شبكة الإمامين الحسنين عليهما السلام الثقافية

أمّ البنين زوجُ مولانا علي

ناهيكمو عن ذلك الفضل الجلي

والدةُ العبّاسِ ذيّاكَ الأغرْ

شمسُ الكراماتِ ونجلُها قمرْ

بها إلى اللهِ توسّل كي تنلْ

كلَّ الذي ترجو وتحظى بالأملْ

تلك التي مثّلَتِ المودّة

في آل طه في الرَّخاء والشدّة

لله صبرُها بيوم أقبَلْ

ناعي الحسينِ والدّموعَ أسبلْ

تسأُلُه كأنّها لم تَسمعِ

نعيَ شهيدِ كربلا ولم تعِ

تقولُ أخبرنيَ عن إِمامي

والطّرفُ منها بالدّموعِ هامي

أخبرها آهٍ بفقدِ الأربعة

أبنائها وهو يُهلُّ أُدمُعه

قالت هُمُ الفداءُ للحسينِ

روحِ نبيّنا ونور عيني

لا تُخفِ باللهِ عليكَ عنّي

حقيقةَ الأمرِ أهجتَ حُزني

هل الحسينُ عائدٌ فأنتظر

فعندها قالَ بدَمعٍ منهمر

آجرَكِ اللهُ قضى بكربلا

ظمآنَ مذبوحاً بهاتيك الفلا

ولا تسل عن حالِها مُذ سمعت

ذلك بالحرقةِ نادت وبكت

يا أسفا عليك يا بن المصطفى

بعدكَ مولاي على الدّنيا العفا

هيهاتَ أن أهنى بعيشٍ حتى

أكونَ عاجلاً عدادَ الموتى

فعلاً قضت أيّامها حتى قضت

حُزناً ومن كثرةِ ما فيها بكت

والتحقت لهفي لها بالزّهرا

بمهجةٍ من المُصابِ حَرّا

وفاتُها يقالُ في ثالثِ عشر

جماديَ الآخرة وذلك الشتهَر

أسمى التعازي للإمامِ المنتظر

وكلِّ من والاهُ غاب أو حضر

أُم البّنين تصيح يا بن الحنفيّة

بحسين خبّر وين نازل هالمسيّة

مستوحشة طيبه علينا بعد لحسين

من طلع من مكّة مَندري احنا نزل وين

في وين خبّرني نزل يَبن الميامين

ما جاك عنّه خبر يَبن الحنفيّة

معلوم ما عندك ضمدنا وين هيّد

يقولون طب مكّه وقضى للحج مفرد

وسافر ولا ندري بعد في وين عيّد

كلما أجي لك واسألك تخفي عليّه

قلها وقلبه من المصايب يوقد وقيد

بتسايليني وين خيّي عيّد العيد

مَدري بعزم سبط النّبي أي بلده يريد

يرجع الطيبه لو يروح الغاضريّه

لكن اخبرچ والقلب صادي وملهوف

حزنه حنى ضلوعي وخلّي الدّمع مذروف

خيّي نزل وادي يسمّى أرض لطفوف

ومن كل كتر دارت عليه علوج أُميّه

ولن الدّمع منها على الخدّين مسفوح

وتصيح يبني قوم شد رحالك نروح

نتدارك المظلوم قبل يروح مذبوح

وانصر اخوك حسين يا حر يا شفيّه

قلها وتزفّر وهمَلت بالدّمع عينه

اطراد يوم الطّف انا ويني ووينه

فاز الذي دون السّبط تقطع يمينه

مثل البطل عبّاس جيدوم السّريّه

قالت وهي قلبي وهلّت دمعة العين

فال السّلامه فالهم يَبن الميامين

الله يردهم بالسّلامة ويرجع حسين

يظلّل علينا ونلتجي يبني بفيّه

وصلوا المدينة والخلق ضجّت بلحنين

واتلاقت ابهالحال زينب وام لبنين

صار الناشد والوديعه صفقت الچف

بس الزّفير الصوت بايح والدّمع جف

بيها غدت ذيچ الأيتام اتلوذ وتحف

يم البنين تصيح شوفي فجعة البين

مقدر أسولف بالجرى لا تنشديني

قلبي موزّع والسّهر عامي عيوني

لا مال ضاعت والدّهر خيّب اظنوني

راحوا طبق كلهم چتل والتّالي حسين

قالت وحق اللّي تربّيتي ابحجرها

أدري ابعملة كربلا چايد أمرها

لكن ثَلَث نَشدات وضحي لي خبرها

أدري على شرح المصايب ما تقدرين

أريد أنشدچ فاز بالنّاموس عبّاس

وخبريني جسم حسين بخيول العدا انداس

وانتي وقفتي امچتّفه ابديوان لرجاس

بالحبل مربقوات ويّاچ النساوين

سمعي نقلها والدّمع كفّي انهماله

طيب الأصل ما ينحصى طيّب افعاله

ملهوف خاض النّهر مهتم بزلاله

جوده ملاه أوكت بداله مدمع العين

فيّض من الشّاطي وبحر دم صيّر الطّف

ابنچ تلقّاها وطوى صفٍ على صف

طارن زنوده وزاد عزمه والعلم رف

لو لا السّهم وصّل الخيمه بغير چفّين

وانچان قلتي لي الشّهيد شلون رضّوه

دفنوا خوارجهم واخويه حسين خلّوه

نخّيتهم وعناد إلي بالخيل داسوه

واللي جرى ما ينوصف غير التسمعين

يم البنين أو وقفتي ابديوان سفيان

بيه انعرفنا وانقلب ماتم الدّيوان

والفاجر يزيد افتضح ما بين لَعيان

لكن ثناين حسين كسّرهن الصوّبين

بالله استعدي للبواچي يم لبنين

ردّوا يتامى وانذبح عبّاس وحسين

يم البنني اتذبّحوا كلهم على القاع

وحسين ظل امجرّد ومكسور لضلاع

ومخدّرة حيدر علي فرّت بلا قناع

ويّا الحرم والنّار تسعر بالصّواوين

يم البنين الأربعة انذبحوا ظمايا

وظلّوا ثلثتيام بالغبرا عرايا

وليتچ نظرتي عَلى النّهر صاحب الرّايه

مفضوخ راسه مقطّعه شماله وليمين

يم البنين الأربعه محّد دفنهم

دمهم غسلهم والتّرب صاير چفنهم

ومن الصّبح زينب مشت للشّام عنهم

فوق الهزل مرّت وشافتهم مطاعين

يم البنين الأربعة تشهد لچ النّاس

ما صار بليوث الحرايب مثل عبّاس

خلّا الأرض روس وجثث ومطهّمه داست

روس الأعادي وغلّق الميدان صوبين

صاحت اولادي وكل من بالعالم يروح

ويا ليلت بعد حسين ما تبقى لنا روح

يا بشر بالله لا تقول حسين مذبوح

ما شوف بالدّنيا عوض عندي عن حسين

عبّاس واخوانه عليهم ذاب لفّاد

اعزاز عندي وحزنهم بالقلب وقّاد

وحسين فَت قلبي ونسيت ارفاق لولاد

فدوه لبو سكنه أولادي يا مسلمين

يا ليت عندي من الولد سبعين مولود

بالمرجله كلها مثل عبّاس وتزود

تنذبح وابن المصطفى لدياره يعود

سالم ولا تنضام زينب والخواتين

بقصى المدينة أُم البنين اتصيح بالويل

تندب يبو فاضل يصنديد الرّجاجيل

يقولون يبني باللوا شقّيت لصفوف

ودارت عليك القوم يبني بزان وسيوف

واوقعت يم المشرعه مقطوع لچفوف

مفضوخ راسك والدّما من جروحك تسيل

يقولون طبّيت النّهر وطلعت عطشان

وارجعت قلبك بالظّما ملتهب نيران

ما صار مثلك يا ضيا عيني بلخوان

لجلك أواصل بالبچا انهاري مع الليل

يقولون راسك يوم حطّه بحجره حسين

للقاع ردّيته يعقلي ويا ضيا العين

يا ريت مثلك يالولد تنذبح سبعين

ولا چار صدر ابن البتوله اترضّه الخيل

معلوم يبني ضيّعت زينب وليتام

حرمه وغريبه وضايعه والقوم ظلّام

والله حسافه انچان زينب دخلت الشّام

من غير والي والولي مقيّد بزنجيل

لا تهيجون احزان قلبي يا مسلمين

راحوا اولادي لا تسمّوني ام لبنين

لو راحوا اثنين وعليّ ردّوا اثنين

بَلكَت عليّ اتهون جمرة هالمچاتيل

اشبال أربعة والنّاس كلهم يحسدوني

وكل الخلق يم البنين يخاطبوني

شبّان كلهم فرد ساعه فارقوني

وظلّوا ابعرصة كربلا من غير تغسيل

لا تذكروا لي هالإسم ذايب افّادي

منين البنين وكربلا ضمّت أولادي

وراعي العلم مطروح مقطوع الأيادي

وزينب بليّا رجال حسره على المهازيل

اشهالخبر لقشر علينا اشهالمصاب اللّي جرى

ايذوّب افّادي امن اسمه ومهجتي امن اتصوّره

دم دمع عينيت جرى وبالحزن دلّالي انجرح

حس لمنادي ينادي ابكربلا حسين انذبح

وبو الفضل فوق الشّريعة مقطّعه اچفوف انطرح

وانكسر ظهر السّبط من عاينه فوق الثّرى

راعني صوت لمنادي ايصيح مذبوحه هَلي

ذوّب قليبي ينادي راح جسّام وعلي

راح عون وراح جعفر للحرم ما ظل ولي

لَشِق جيبي امن الأسف چان العزيزه اميسّره

آه يزينب يالمصونه اشلون ضيعه ضيعتچ

تركبين الجمل عاري وزجر قايد ناقتچ

بالدّهر للخق تبقى اشلون فجعه امصيبتچ

ويظل اسمچ للأبد بالفخر كلمن يذكره

قالت اسكت لا تفاول على اولادي القلب ذاب

بالسّلامه يردهم المعبود حلوين الشّباب

وتزهر الدّور ابأهلها وبعد ما ينغلق باب

وترجع ايام الهنيّة والسّعاده المزهره

ايواجه الله بينك وبين اخوتك يبن الأمين

ايرد ابو فاضل وخوته أربعتهم سالمين

انشا الله انشوف المنازل زاهية ابغرّة حسين

وترجع الوفّاد وتعود الليالي مسفره

صاح راح حسين لا تترقّبينه لچ يعود

والحرم للشّام مسبيّه وترفل بالقيود

وداروا ابذيچ الحراير حاسره ابوسط العقود

ووقّفوا زينب ابديوان آل اميّه محيّره

بدروب السفر راحو بنيني

وظلّت عالدرب مشبوحه عيني

طال أعليّه الغياب

وحشه اديار الأحباب

راحو بنيني الاربعه بهالسفره

من ودّعتهم بالدمع والحسره

گلبي يلوب اعليهم او شيصبره

وبحشاشتي نار البعد مستعره

نار احشاي وجّرها ونيني

وكلما تستعر يكثر حنيني

انه الذي اشگيت او تعبت اوياهم

أربع بنين واِضهدت حيلي اوياهم

لوّعني يا ناس اشكثر فرگاهم

شلون الگلب يگدر بعد ينساهم

آنه الوالده الما بطّل ابچاي

وحگّي من اداعي ابتعبي ورباى

شينفع بعد العتاب

وحشه اديار الأحباب

ثوب الحزن ما بدَّله او لا نزعه

وعيوني متفارگ جفنها الدمعه

ضعن المشه يا ساعه ينوي الرجعه

ومن بعد غيبه اتعود ذيچ الجَمعه

وابسد فيهم اگعد من يعودون

وبدمع الفرح خل تجري العيون

گلبي امن القهر ذاب

وحشه اديار الأحباب

طالت السفره وطوّلت غيبتهم

ولا طارش او مكتوب أجه من عدهم

ما أدري يمته تنگضي سفرتهم

ويگلّي گلبي أيسي من جيّتهم

والدهم علي عندي ذخرهم

لأبو اليمّه يضحّون أبعمرهم

ولهم أحسب أحساب

وحشه اديار الأحباب

مو لحِت من كثر البواچي اعيوني

ومنهم بعد خاب الگلب وضنوني

هم صدگ من بعد السفر يلفوني

لو بالغرب والنايبه ايعوفوني

بس حسين سالم يرد ليه

خلها تروح ويلادي ضحيّه

گلبي ابفرگته أنصاب

وحشه اديار الأحباب