رباعیات
مری شاخ امل کا ہے ثمر کیا
مری شاخ امل کا ہے ثمر کیا
تری تقدیر کی مجھ کو خبر کیا
*
کلی گل کی ہے محتاج کشود آج
نسیم صبح فردا پر نظر کیا!
***
فراغت دے اسے کار جہاں سے
فراغت دے اسے کار جہاں سے
کہ چھوٹے ہر نفس کے امتحاں سے
*
ہوا پیری سے شیطاں کہنہ اندیش
گناہ تازہ تر لائے کہاں سے!
***
دگرگوں عالم شام و سحر کر
دگرگوں عالم شام و سحر کر
جہان خشک و تر زیر و زبر کر
*
رہے تیری خدائی داغ سے پاک
مرے بے ذوق سجدوں سے حذر کر
***