وہ شاہ، سب ہیں گدا، لا الہ الا اللہ
ڈاکٹر نسیم (وارانسی)
وہ شاہ، سب ہیں گدا، لا الہ الا اللہ
ہے کون اس سے بڑا، لا الہ الا اللہ
*
پیامِ غارِ حرا، لا الہ الا اللہ
نبیؐ کی پہلی صدا، لا الہ الا اللہ
*
اذاں کی آئی صدا، لا الہ الا اللہ
تو گونجے ارض و سما، لا الہ الا اللہ
*
کبھی یہ مشعل توحید بجھ نہیں سکتی
چلے کوئی بھی ہوا، لا الہ الا اللہ
*
یہ بحر و بر، یہ زمیں، آسماں یہ شمس و قمر
وہی ہے سب کا خدا، لا الہ الا اللہ
*
یہی وظیفہ ازل سے ہے ساری خلقت کا
ندائے ارض و سما، لا الہ الا اللہ
*
شعاع مہر جو پھوٹی افق سے وقتِ سحر
تو بادلوں پہ لکھا، لا الہ الا اللہ
*