خوشا ہر گوشۂ سیرت منّور ہے محمدؐ کا
خوشا ہر گوشۂ سیرت منّور ہے محمدؐ کا
مثالِ آئینہ شفاف پیکر ہے محمدؐ کا
*
صبا مس ہوکے جب گزرے اسے مستی میں آ جائے
بسا خوشبو میں ایسا جسمِ اطہر ہے محمدؐ کا
*
اسی سے ماہ و انجم روشنی کی بھیک لیتے ہیں
کچھ اِس انداز سے چہرہ منور ہے محمدؐ کا
*
لکھیں اس کے سوا تعریف کیا ہم اس کی عظمت کی
ریاضِ خلد دنیا میں فقط گھر ہے محمدؐ کا
*
تصدق دولتِ کونین ہے جس کے تقدس پر
جہانِ فقر و فاقہ میں وہ بستر ہے محمدؐ کا
***