جو پُر یقیں ہیں انھی کو اٹھان دیتا ہے
(۳)
جو پُر یقیں ہیں انھی کو اٹھان دیتا ہے
خدا پرند کو اونچی اڑان دیتا ہے
*
اسی کا کلمۂ توحید افضل و اعلا
یہ دیکھ روز مؤذّن اذان دیتا ہے
*
دعائیں مانگ اسی سے تو بے مکانی پر
وہی زمین پہ سب کو مکان دیتا ہے
*
اگر وہ چاہے ہری کھیتوں کو کر دے تباہ
اُسی کے اِذن پہ فصلیں کسان دیتا ہے
*
غرور کس لیے تجھ کو ہے خوش کلامی پر
وہ چاہتا ہے تو شیریں زبان دیتا ہے
*
عطا وہ کرتا ہے جنت کی اُس کو ہر نعمت
جو اُس کے دیں کے لیے اپنی جان دیتا ہے
*
اُسی کی ذات پہ ساحل یقین رکھ، ورنہ
وہ انحراف پہ وہم و گمان دیتا ہے
***