یوں تو ہر اک پھول میں تھا رنگِ رخسارِ چمن
یوں تو ہر اک پھول میں تھا رنگِ رخسارِ چمن
اک گلابِ ہاشمی ہے صرف شہکارِ چمن
٭
آپ کی مرضی جسے چاہیں مدینے میں بلائیں
یعنی ہر غنچہ نہیں ہوتا سزاوارِ چمن
٭
حلقۂ خوابِ نظر ہے سبز گنبد کا خیال
"سرو ہے با وصفِ آزادی گرفتارِ چمن "
٭
ہے تصور میں مدینے کی گلاب افشاں بہار
میرے دروازے تک آ پہنچی ہے دیوارِ چمن
٭
یارِ غارِ مصطفےٰ ، فاروق و عثمان و علی
سروِ رنگ و نور ہے ایک ایک کردارِ چمن
٭
اے بہارِ دینِ فطرت اک نگاہِ گل طراز
بے زرِ گل سرد ہے مدت سے بازارِ چمن
٭
گلشنِ دیں کے خس و خاشاک چنتا ہوں ایاز
برگ و گل کہتے ہیں مجھ کو بار بردارِ چمن
٭٭٭