مُنہ سے جب نامِ شہنشاہِ رسولاں نکلا
مُنہ سے جب نامِ شہنشاہِ رسولاں نکلا
خیر مقدم کو دُرودوں کا گلستاں نکلا
٭
بچھ گئی دولتِ کونین مرے رستے میں
میں جو طیبہ کی طرف بے سرو ساماں نکلا
٭
میں تو سمجھا تھا کہ دشوار ہے ہستی کا سفر
اُن کی تعلیم سے یہ کام بھی آساں نکلا
٭
فکرِ مدحت میں جو پہنچا سرِ گلزارِ سخن
ہر گُلِ حرف محمد کا ثنا خواں نکلا
٭
خاک ہو کر ہَدفِ موجِ ہَوا بن جاؤں
درِ آقا کی رسائی کا یہ عنواں نکلا
٭
میرے آئینے میں ہے عشقِ محمد کی جِلا
مجھ سے کترا کے غبارِ غمِ دوراں نکلا
٭
منصبِ ذہن پہ فائز ہوئی جب چشمِ خیال
عشقِ محبوبِ خدا حاصلِ ایماں نکلا
٭