بسمه سبحانه تعالى
گفتار مولف
میری پہلی کتاب "ثمّ اھتدیت" (جس کا اردو ترجمہ تجلی ہے)کو قارئین کرام نے حسن قبول سے نوازا اور اس پر کئی اہم تبصرے بھی کیے ۔بعض نے ان مسائل کے بارے میں جو اہل سنت اور اہل تشیع میں اختلافی ہیں مزید وضاحت چاہی تاکہ دودھ کا دودھ اور پانی کا پانی ہوجائے ۔ اور جو شخص تحقیق کرنا اور حقیقت سے واقف ہونا چاہے ، اس کے لئے کوئی شک اور ابہام باقی نہ رہے ۔
اس لئے میں نے ایک اور کتاب اسی طرز پر لکھی ہے تاکہ انصاف پسند تحقیق کا طالب بہ آسانی حقیقت تک اسی طرح رسائی حاصل کرسکے جیسے میں نے تفصیلی بحث ومطالعہ کے بعد حاصل کی ہے ۔ برکت کے لئے میں نے اس کتاب کا نام " لاکون مع الصادقین" رکھا ہے ، جو اس آیت کریمہ سے ماخوذ ہے :
"يآيّها الّذين آمنوا اتّقواالله وكونوا مع الصّادقين"(1)
ظاہر ہے کہ حضرت رسول ص اور ان کی آل پاک ع سے بڑھ کر اور کون سچا ہوسکتا ہے ۔ مسلمانوں میں سے جو بھی ان سچوں کا ساتھ دینے سے انکار کرےگا وہ خود کو راہ راست سے دور ہٹا ہوا پائے گا اور اس طرح یا تو مغضوب علیہم کے زمرے میں شام ہوگا یا ضالّین کے زمرے میں ۔
مجھے ذاتی طور پر تو اس بات کا یقین اور اطمینان ہوگیا ہے ۔ اب میری کوشش یہ ہے کہ جہاں تک بن پڑے دوسروں کے لیے بھی یہ بات واضح کردوں مگر میں کسی پر اپنی رائے ٹھونسنا نہیں چاہتا بلکہ دوسروں کی رائے کا بھی احترام کرتا ہوں ۔
--------------------
(1):- اے ایمان والو! تقوی اپناؤ اور سچوں کے ساتھ ہوجاؤ ۔(سورہ توبہ ۔آیت 119)