امامين حسنين عليهما السلام ثقافتى اور فکر اسلامى - نيٹ ورک

نظارۂ حرم

یہ کتاب برقی شکل میں نشرہوئی ہے اور شبکہ الامامین الحسنین (علیہما السلام) کے گروہ علمی کی نگرانی میں تنظیم ہوئی ہے

نظارۂ حرم

صادق اندوری

احادیث مدینہ

رسول(ص) برحق

زمین پہ تاج شہنشاہی ہے

فلک پہ اورنگ سروری ہے

حرا میں وہ قابلِ وحی ہے

جہاں میں سالار امتی ہے

*

زبان و دل کی صدا یہی ہے

رسول(ص) برحق مرا نبی ہے

**

وہ کوہ فاراں کی روشنی ہے

ہر اک طرف اس کی چاندنی ہے

دکھے دلوں کی وہ تازگی ہے

خدا کا محبوب واقعی ہے

*

پیمبر امن و آشتی ہے

رسول(ص) برحق مرا بنی ہے

**

عظیم سے ہے عظیم تر وہ

بھٹکتے انساں کا راہبر وہ

ہر اک جگہ ذات معتبر وہ

وہ فاقہ کش، پھر بھی مفتخر،وہ

*

یتیم و بے کس کی زندگی ہے

رسول(ص) برحق مرا نبی ہے

**

کہیں ورا، ماورا کہیں وہ

قدم قدم آشنا کہیں وہ

اک آئینہ با صفا کہیں وہ

کہیں شروع ، انتہا کہیں وہ

*

اسی کے دم سے ہمہ ہمی ہے

رسول(ص) برحق مرا نبی(ص) ہے

**

جمال یوسف کا وہ انادہ

خلیل کے عزم کا وہ جادہ

کلیم کے قرب کا اعادہ

مسیح کی نفس کا ارادہ

*

ہر اک نبی کی صفت ملی ہے

رسول(ص) برحق مرا نبی(ص) ہے

**

کدورتوں کو مٹانے والا

وہ ظلمتوں کو ہٹانے والا

محبتوں کو لٹانے والا

ہر ایک کا دکھ اٹھانے والا

*

تمام مینار روشنی ہے

رسول(ص) برحق مرا نبی(ص) ہے

**

یتیم و بے کس کا آسرا وہ

غریب و مفلس کا حوصلہ وہ

خدائے اقدس کا لاڈلا وہ

تمام نبیوں کا سلسلہ وہ

*

ہر اک نظر اس کو دیکھتی ہے

رسول(ص) برحق مرا نبی(ص) ہے

**

حقوقِ ہستی دلانے والا

سوئے صداقت بلانے والا

بشر کو حق سے ملانے والا

خدا کا پیغام لانے والا

*

وہ جبرئیل اس کا ایلچی ہے

رسول(ص) برحق مرا نبی(ص) ہے

**

مٹایا جس نے جہالتوں کو

ہٹایا جس نے صعوبتوں کو

لٹایا جس نے نظامتوں کو

بڑھایا جس نے لطافتوں کو

*

وہ ایسا آئینۂ جلی ہے

رسول(ص) برحق مرا نبی(ص) ہے

**

وہ جس نے کونین کو سنوارا

وہ جس نے ہستی کا رُخ نکھارا

وہ جس نے حق کے لئے ابھارا

جسے ہر آزار تھا گوارا

*

وہ خلق و ایثار کا غنی ہے

رسول(ص) برحق مرا نبی(ص) ہے

**

حقوقِ نسواں کا وہ محافظ

شعورِ انساں کا وہ محافظ

بساطِ امکاں کا وہ محافظ

کمالِ ایماں کا وہ محافظ

*

مثال اس کی کوئی نہیں ہے

رسول(ص) برحق مرا نبی(ص) ہے

**

غرور و نخوت کو جس نے توڑا

سوۓ خدا روۓ کفر موڑا

جو سو رہے تھے انہیں جھنجھوڑا

جو تھے شکستہ تو ان کو جوڑا

*

وہ مرہمِ زخمِ دوستی ہے

رسول(ص) برحق مرا نبی(ص) ہے

**

وہ آئینہ حلم اور حیا کا

وہ دائرہ جود اور عطا کا

وہ مقتدا سارے انبیا کا

وہ منتہا زہد و اتّقا کا

*

ہر ایک بات اس کی دیدنی ہے

رسول(ص) برحق مرا نبی(ص) ہے

**

وہ حق نگر، خود شناس ہے وہ

قیاس کیا، بے قیاس ہے وہ

تمام خلق و سپاس ہے وہ

تڑپتی جانوں کی آس ہے وہ

*

وہ نا امیدوں کی دلدہی ہے

رسول(ص) برحق مرا نبی(ص) ہے

**

صداقتیں اس کے گھر سے نکلیں

امانتیں اس کے گھر سے نکلیں

حفاظتیں اس کے گھر سے نکلیں

شجاعتیں اس کے گھر سے نکلیں

*

جری ہے، تلوار کا دھنی ہے

رسول(ص) برحق مرا نبی(ص) ہے

**

تونگر ایسا کہ زر لٹایا

بصد خلوصِ نظر لٹایا

مخیر ایسا کہ گھر لٹایا

نہ پاس کچھ تھا، مگر لٹایا

*

تمام مخلوق کہہ دہی ہے

رسول(ص) برحق مرا نبی(ص) ہے

**

خدائے برتر خدائے داور

میں تیرا صادقؔ ضعیف و کمتر

بصد طفیل شفیع محشر

گناہ جتنے ہیں درگزر کر

*

ترے حضور آج ملتجی ہے

رسول(ص) برحق مرا نبی ہے

*****

وہ ماہ عرب وہ ابر کرم لو جلوہ افگن ہوتا ہے

وہ ماہ عرب وہ ابر کرم لو جلوہ افگن ہوتا ہے

آتش کدۂ دیرینہ ابھی غیرت دہ گلشن ہوتا ہے

*

گیسوئے محمد(ص) کی خوشبو پھیلاتی ہے جب تاثیر اپنی

ہر خار بیابانِ عالم رشک گل سوسن ہوتا ہے

*

انگشتِ مبارک پر صدقے ہوتا ہے اگر ماہِ انور

دندانِ بنی کی ضو سے خجلِ ہر اختر روشن ہوتا ہے

*

آتے ہیں تصور میں پیہم تنویر محمد(ص) کے نقشے

ہر لمحہ دلِ بے نور مرا خورشید بدامن ہوتا ہے

*

اے شوق مجھے یثرب لے چل ہوتا کہ ہمیشہ دید خدا

کہتے ہیں مدینہ میں ہر دم اللہ کا درشن ہوتا ہے

*

ہے شام کا وقت اور دور ہوں میں اب تک بھی مدینے سے یا رب

بہ وقت وہ ہے جب ہر طائر نزدیک نشیمن ہوتا ہے

*

مرقد میں ملک دکھلاتے ہیں جب سرکار دو عالم کی صورت

انوار محمد(ص) سے صادق روشن مرا مدفن ہوتا ہے

*****

(سہ قافیتین)

معراج کی شب بالائے فلک انوارِ ہدایت آیا ہے

معراج کی شب بالائے فلک انوارِ ہدایت آیا ہے

صف بستہ ہیں سب جن اور ملک گلزار حقیقت سجتا ہے

*

مانند تخئیل شکل نظر صرف ایک ہی لمحے میں اڑ کر

افلاک کی رفعت پر یکسر رہوارِ نبوت پہنچا ہے

*

بخشش کی امیدیں کیا معنی اس وقت تک اے انسانِ دنی

جب تک نہ ہو دل میں حبِ نبی پندار شفاعت بیجا ہے

*

اے ننگ ہوس اے ننگِ طلب ہے یہ ہی مناسب اور اغلب

کچھ نیکی کا سودا کر لے اب بازار شفاعت سستا ہے

*

تو سعیِ عمل بیکار نہ کر اے فکر کنندۂ دردِ جگر

جا راہ لگ اپنی چارہ گر، بیمارِ محبت اچھا ہے

*

مقبول خدا وہ بندہ ہے تقدیر کو اس کی کیا کہتے

کیا پوچھتا ہے اس کا جس نے دربارِ رسالت دیکھا ہے

*

بخشش کے لیے سلطان امم ہیں میری طرف مائل بہ کرم

صادق ہو مجھے کیا حشر کا غم اب بارِ ندامت ہلکا ہے

*****

کہاں تو اور کہاں وہ روئے تاباں شاہ اطہر کا

کہاں تو اور کہاں وہ روئے تاباں شاہ اطہر کا

عبث کرنا ہے اے خورشید کیوں دعویٰ برابر کا

*

مرے آقا ملے اور اک چھلکتا جام کوثر کا

میں کب سے منتظر ہوں آپ کے لطف مکرر کا

*

شہ کونین کے جود و کرم نے کر دیا ثابت

سنا کرتے تھے ہم بھی جوش میں آنا سمندر کا

*

گئی وہ شب کی تاریکی وہ آئی صبح نور افزا

وہ ہرسو غلغلہ ہونے لگا اللہ اکبر کا

*

خیالِ آسماں میں نے بہت پرواز کی پھر بھی

نہیں آیا سمجھ میں رتبۂ والا پیغمبر کا

*

مرے عصیاں رلاتے ہیں مجھے اے شافع محشر

قیامت میں بھرم رہ جائے میرے دامنِ تر کا

*

مجھے بھی عاصیوں کے ساتھ دامن میں چھپا لینا

مرے سرکار جب ہوسامنا خورشید محشر کا

*

ہر اک ذرہ سراپا گوش ہو جانا ہے اے صادق

زباں پر ذکر جب آتا ہے اوصاف پیمبر کا

*****

آئینۂ حق ہے رخ تاباں محمد(ص)

آئینۂ حق ہے رخ تاباں محمد(ص)

کیوں کہ نہ مری جان ہو قربانِ محمد(ص)

*

سینچا ہے لہو دے کر ہر اک غنچہ و گل کو

اسلام ہے دراصل گلستانِ محمد(ص)

*

ہے فرش سے تا عرش ضیا باریِ محبوب

کس درجہ ہے روشن رخ تابانِ محمد(ص)

*

گلشن ہو کہ صحرا ہو، لحد ہو کہ قیامت

چھوٹے نہ کہیں ہاتھ سے دامانِ محمد(ص)

*

موسوم کروں نجم و مہ و مہر سے لیکن

عنوان نہیں کوئی بھی شایانِ محمد(ص)

*

ہیں باعث تخلیق دو عالم شہ کونین

ہر چیز ہے منت کشِ احسانِ محمد(ص)

*

کیوں بھیڑ سی ہے بادہ کشوں کی سرِ کوثر

کھلنے کو ہے کیا آج خمستانِ محمد(ص)

*

ہر گام پہ تھی راہ نما رحمتِ کونین

جب عشق چلا جانبِ ایوانِ محمد(ص)

*

قرآن بتاتا ہے ہمیں خیر کی راہیں

کیا چیز ہے یہ شمعِ فروزانِ محمد(ص)

*

حضرت کو سمجھنا ہو تو قرآن کو سمجھو

ہے ایک یہی جادۂ عرفانِ محمد(ص)

*

گونجی تھی بصد شان جو بدر اور احد میں

اب تک ہے فضاؤں میں وہ الحانِ محمد(ص)

*

صدیقؓ پہ ظاہر تھا ہر اک رازِ نبوت

اک وہ بھی تھے منجملۂ خاصانِ محمد(ص)

*

ہرچند زمانہ پہ ہے تکفیر مسلط

اونچا ہے مگر رابت ایمانِ محمد(ص)

*

محشر میں بھی منظور نظر بن کے رہیں گے

ہرگز نہ ہوں مایوس غلامانِ محمد(ص)

*

جاری رہے صادقؔ یوں ہی مے خانۂ توحید

کم ہو نہ کبھی بارش فیضانِ محمد(ص)

*****

میرے دل کے چین ، تسکین نظر یا مصطفیٰ

میرے دل کے چین ، تسکین نظر یا مصطفیٰ

کیوں نہ چاہوں آپ کو آٹھوں پہر یا مصطفیٰ

*

آپ کے قدموں میں نکلے میری جانِ مبتلا

ہے یہ میری آرزوئے مختصر یا مصطفیٰ

*

بے قراری کو کبھی تسکین مل سکتی نہیں

ہوں نہ جب تک آپ دل کے چارہ گر یا مصطفیٰ

*

ہے تفوّق آپ کو حاصل ہر اک انسان پر

درحقیقت آپ ہیں خیر البشر یا مصطفیٰ

*

اک نہ اک دن آتشِ غم پھونک ڈالے گی مجھے

کیجئے للہ رحمت کی نظر یا مصطفیٰ

*

زندگی کا ہر نفس ہے بے قرارو مضطرب

چین سے برگشتہ ہیں شام و سحر یا مصطفیٰ

*

آپ کے در تک ہو صادقؔ کی رسائی کس طرح

ہر دعا جب ہو رہی ہے بے اثر یا مصطفیٰ

*****

حبیب کبریا محبوب داور سرورِ عالم(ص)

حبیب کبریا محبوب داور سرورِ عالمؐ

ادھر بھی اک نگاہِ بندہ پر ورسرورِ عالمؐ

*

معاصی کا اندھیرا چھائے جس دم کنج مرقد میں

دکھا دینا تم اپنا روئے انور سرورِ عالمؐ

*

دکھانے کے لیے رستہ پراک گمراہِ ملت کو

بنایا تم کو سالار پیمبر سرورِ عالمؐ

*

دکھا دو ہم خطا کاروں کو راہِ مستقیم آ کر

تمہیں ہو امت عاصی کے رہبر سرورِ عالمؐ

*

تمہیں تسکین دل ہو، باعث آرامِ جاں تم ہو

نہ کیوں سوجان سے ہم قربان ہوں تم پر سرورِ عالمؐ

*

خدا بھی اس کا ہے اور نعتِ کونین بھی اس کی

تمہاری دید ہو جس کو میسر سرورِ عالمؐ

*

ترا در چھوڑ کر جاتے کسی کے در پہ کیوں صادقؔ

ترا در پھر بھی آخر ہے ترا سرورِ عالمؐ

*****

ادھر بھی اک نظر فردوس منظر سرورِ عالم(ص)

ادھر بھی اک نظر فردوس منظر سرورِ عالمؐ

فزوں ہے آج کل نارِ ستم گر سرورِ عالمؐ

*

شبِ فرقت کہوں کیا حالِ مضطر سرورِ عالمؐ

ستاتا ہے مجھے ہر تارِ بستر سرورِ عالمؐ

*

ترے مداح کی تیرے اصولوں کی حمایت میں

لبوں پر آ گئی ہے جان اکثر سرورعالم

*

فضا میں تیرتے پھرتے ہیں اب تک سرمدی نغمے

بیاں کیا ہوں تری ہستی کے جوہر سرورِ عالمؐ

*

تمہاری ذات لائی گوہرِ مقصود عالم میں

تمہیں ہو بحر وحدت کے شناور سرورِ عالمؐ

*

حجاب عبدیت میں ہے نہاں معبود کی صورت

کوئی دیکھے اگر پردہ اٹھا کر سرورِ عالمؐ

*

ترے اعلانِ حق سے یا تری وحدت پرستی ہے

ہوئی تکمیل ذوقِ ابنِ آذر سرورعالم

*

رہے مے خانۂ توحید سرگرم عمل ہر دم

رہے تا حشر قائم دورِ ساغر سرورِ عالمؐ

*

مساواتِ حقیقی کا سبق دے کر زمانے کو

غریبوں کو کیا تم نے تونگر سرورِ عالمؐ

*

شعورِ آدمی محدود، عقل آدمی ناقص

ترے رتبے کو سمجھے کوئی کیوں کہ سرورِ عالمؐ

*

الوہیت کے جلوے تم سے پھیلے ہیں زمانے میں

تمہیں ہو ذات یزدانی کے مظہر سرورعالم

*

تمہارے روئے روشن کی تجلی دیکھنے والے

نہ دیکھیں چاند سورج کو بھی مڑ کر سرورِ عالمؐ

*

کہاں تک در بدر کی ٹھوکریں کھاتا پھروں آخر

مٹا دیجے مری قسمت کا چکر سرورِ عالمؐ

*

عرب کی وادیوں کو نور ایماں بخشنے والے

جگادو اب ہمارا بھی مقدر سرورِ عالمؐ

*

جدائی کا ہر اک لمحہ دل صادقؔ میں رہ رہ کر

کھٹکتا ہے مثال نوکِ نشتر سرورِ عالمؐ

*****

تمہارا رتبۂ بالا و برتر یرسول(ص) اللہؐ

تمہارا رتبۂ بالا و برتر یرسول(ص) اللہؐ

جھکے جاتے ہیں خود محراب و منبر یرسول(ص) اللہؐ

*

صداقت میں امانت میں ، عنایت میں ، تلطف میں

نہیں دنیا میں کوئی تم سے بڑھ کر یرسول(ص) اللہؐ

*

نہیں ممکن کوئی رہ جائے تشنہ لب سر محشر

تمہیں ہو جب نسیمِ جام کوثر یرسول(ص) اللہؐ

*

ترے روئے منور کی جھلک کے سامنے آخر

نہ کیوں کر جھلملائیں ماہ و اختر یرسول(ص) اللہؐ

*

ہر اک جھونکا ہوا کا عطر بیز و عطر آ گیں ہو

جو برہم ہو تری زلف معطّر یرسول(ص) اللہؐ

*

تمہاری دعوت اسلام کے مابعد دنیا میں

نہیں ممکن کہ ہو اعلان دیگر یرسول(ص) اللہ

*

تری عظمت کے آ گے، تیری عز و شان کے آ گے

نہ ہوں کیوں قیصر وکسریٰ نگوں سر یرسول(ص) اللہؐ

*

عطا کی ہے شب معراج حق نے تم کو وہ رفعت

فضائے لامکاں کیوں ہو نہ ششدر یرسول(ص) اللہؐ

*

کسے معلوم تھا اعلان حق اعجازِ صادقؔ ہے

تری مٹھی میں گویا ہوں گے کنکر یرسول(ص) اللہؐ

*****