شبكة الإمامين الحسنين عليهما السلام الثقافية

والله ان قطعتموا يميني

اني احامي ابدا عن ديني

وعن امام صادق اليقيني

نجل النبي الطاهر الأمين

يانفس لاتخشي من الكفار

وابشري برحمة الجبار

مع النبي السيد المختار

قد قطعوا ببغيهم يسار

يخويه العلم گلي وين اوديه

ينرو العين دربي بيش اجديه

حنا فوگه او شمه او شبچ ايديه

او صاح احسين اخوي الله واكبر

يخويه انكسر ظهري اولا أگدر اگوم

صرت مركز يخويه الكل الهموم

يخويه استوحدوني عگبك الگوم

اولا واحد عليه بعد ينغر

گام احسين يبچي للصواوين

ينشف دمعته عن النساوين

خاف لنهن يفگدن على احسين

او يگلن له عليمن هل الدمع خر

اويلي تلگته تبچي اسكينه

تگله عمي العباس وينه

شرب ماي او نسانا ما نسينه

العطش واگلوبنا تلهب من الحر

خرت دمعة احسين وتنحب

اوگاللها او نار الگلب تلهب

ابشاطي العلگمي عم امترب

گضى فرت اتصيح الله واكبر

يا عباس عني رحت لاوين

اوتدري امن الهواشم ما بگه امعين

يخويه امودع الله تظل بالبر

نهض محني الظهر للخيم سدر

يبوي وحدك وچا عمي وينه

يبويه اشعوگه او مارد علينه

واعدنا يجيب الماي لينه

او على وعده نسچت اطفال الحسين

بچه اونادى يبويه راح عمچ

يبويه الشينغع عتابچ او ونچ

بعد عمچ يبويه موش عمچ

گضه امطبر يسكنه لا تعتبين

صفكت بيدها او صرخت اسكينه

الخلف بالله يزينب يا حزينه

يعمه راح عمي او گطع بينه

صرخت زينب او صاحت وگع وين

طلعت زينب ابصرخات سكنه

تشوف احسين محني الظهر منه

صاحت راح عباس المچنه

ظل احسين لا ناصر ولا امعين

يگلها يزينب راح عباس

او راح الضيغم اتللبي يرفع الراس

اشلون امشي ابيسر وترك ورايه

چفيلي او ما شفت عزمه ورايه

هم ياتي وكت صارم ورايه

ترفرف بيد ابو فاضل عليه

الدهر مايوم فرحني ولي سار

او علي لملم محاشيه ولي سار

وگف عباس لا يمنه ولا إِسار

يصيح آه اعلى سكنه مو لديه

يحادي الكربله سانف مناخاي

نادي بيها ابو فاضل مناخاي

الناس ابذره من اخوتها مناخاي

اچفوفه والعلم گطعن سويه

غداة اتى ارض العراق بفتية

مصابيح أنوار اذ الليل فاحمُ

هم الاسد لكن السيوف مخالب

هم الشهب لكن للكماة رواجمُ

بهم بهم ذلك الغطريف والسيد الذي

نمته الى سبط النبي الفواطمُ

هو ابن الزكي المجتبى القاسم الذي

لهام الاعادي بالمهند قاسمُ

فوالله لا انساه في حملاته

كمثل علي والصفوف تزاحمُ

يلاقي السيوف البارقات بطلعة

كبدر الدياجي ابرزته الغمآئمُ

ترى رمحه يحكي اعتدال قوامه

وصارمه يحكيه في الجفن صارمُ

بوجنته ماء الشبيبة مائج

به جلّنار الخد طاف وعائمُ

لهفي لذلك الغصن بعد اخضراره

ذوى يابسا ناحت عليه الحمائمُ

ولهفي لذلك الخد اشرق قانيا

ببحر نجيع موجه متلاطمُ

ولست بناس سبط طه مذ انحنى

عليه وعيناه دموعا سواجمُ

اتى فيه فسطاط النساء وصدره

على صدره فاستقبلته الكرائم

الكدر من كربله يكفيك اسمها

اهي گبل البشر صادر علمها

عرس جاسم اشلون الصار بيها

اطيور البين تتخافت عليها

عرس والناعيه تنعه ابنعيها

اخوها او هاي ابنها چتيل يمها

تزف من عادة العريس شبان

او زفت حاسم العريس نسوان

احضرن جاسم او عرسه ابفرد صيوان

ابساعه الغيرت رسمه او رسمها

جابن حنته او ما خضبنه

او طير البين للعريس غنه

تهلهل صوت ثاني او صوت لنه

يا جاسم ما تنحر زلمها

هذا اشلون عرس اشلون زفه

بعد اشلون وين اخضاب چفه

آخر كربله ما بيچ عفّه

هله اشبلوتچ والله اشعظمها

العرس من عادته سبعه امن الايام

التزف شبان مثله ورا او جدام

بس جسام وحده عرس جسام

عرسه اصياح والنوحه ابخيمها

جاسم من حده اولن جيت امه

بديها غرفته اوليها تظمّه

عمامك يبني ابشده مهمه

الخيل الخيل كفها او كف حزمها

يا جسام يبني انچاني امّك

يواحد خليني اودعك ورد اشمّك

عمك ذاك عمك ذاك عمك

حياتك دون عمك حل عدمها

تنخه او گال لا ترضين يمّي

لاما سال بالميدان دمي

شلي او شلي ابحياتي عگب عمي

انه مقدر على الذلة او هظمها

على جاسم بنات احسين دارن

عند اموادعه ابياحال صارن

سكنه ادموعها ويلي ايتجارن

تگول اشمولنه بعده ايشيلهما

اجه يتمايل العريس مناك

يعمي ايصيح كل احنه فداياك

اشلون ابن اهدعش فوگ العطش ذاك

اللاّمه ايشيلها او شايل علمها

شال العلم واللامه او ثكلها

شاب امدلل او يبهض ثكلها

زينب عمته طاير عگلها

اعلى اخوها وبن اخوها اشكثر همها

يبني العتب وياك شيفيد

يا نور عيني افراگك ابعيد

يا مهجتي يالفرد ووحيد

يبني امن ابنها الوالده اتريد

مروفعه لمن تسكن التلحيد

جسمي نحيل او شوفي ازهيد

هذا البهضني او جرح المچيد

تجي دفعة الشبان بالعيد

لجيم النوح على العريس ونصاب

عزه او مأتم او دمعي سال وانصاب

لكد ويلي على العدوان وانصاب

ابراسه او طاح على الغبره الشفيه

يوم الطف سهم ماضي تحنه

او على جمر الغضه ضلعي تحنه

اون علمُن دمه راسه تحنه

او صار املبسه اسهام المنيه

زفوا العريس يا خوانه

ونصبوله حوفته ابصيوانه

گوموا زفوا بن الحسن يعمامه

او جردوها البيضكم جدامه

مابگت غير الحرم ويتامه

بالاحزان اگلوبها مليانه

گوموا الزفة الجاسم يا شباب

ييزيكم هالنوم كله اعلى التراب

احسين هالفصّل على طوله الثياب

للعرس لاچن ابوضع اچفافه

گوموا الزفته او حنوا چفوفه

يعمامه وانصبوا له الحوفه

هذه سيره او بالعرب معروفه

الولد تتكور ابعرسه اخوانه

گموا زفوا ابن الحسن لا ينهضم

بالعرس گلبه عگب كسر اليتم

هم جرت عريس ما اتزفه الزلم

بس يزفنه حرم ولهانه

گوم يا عباس زف ابن الحسن

يا عجب تغمض اعيونك عالوسن

حاشه اگول اگلوبكم لنهن جسم

اوصاغها من رحمته سبحانه

گوم يالاكبر يشبه المصطفى

طال نومك على الرمضا ماكفه

گفت الجاسم رضيت ابهل صفه

ماگلت بيه تشمّت عدوانه

يبني امهنه ابطيب نومك

عريان وامسلبه اهدومك

حر الشمس غيّر ارسومك

لون تنشره ابروحي السومك

وين الذي ياخذ اعلومك

لبوك الحسن واهلك او گومك

اويلاه يالغسلك ادمومك

اويلاه يبني يوم يومك

يا دوحة المجد من فهر ومن مضر

قجف ماء الصبا منغصنك النضر

يا نجمة الحي من عمرو العلى وحمى

زمار سؤددها في البدء والحضر

يا درة غادرت اصدافها فعلت

حتى غلت ثمنا عن ساير الدرر

قد غال خسف الردى بدر الهدى فهوى

فيا نجوم السما من بعده انتشري

القد يشبه مهما ماس صعدته

والخد يحكي بروق الصارم الذكر

حلو الشبيبة يالهفي عليه ذوى

من بعد ايناعه بالعز والظفر

تحكي خلائقه زهر الربيع كما

في رقة الطبع يحكي نسمة السحر

استصغرت سنّه الاعداء حين دعا

الى البراز فلاقت اعظم الخطر

كأن صاعقة حلّت بها فأتت

على الكتائب لم تبقى ولم تذر

السمر قد صفقت والبيض قد رقصت

بالبيض والخيل غنته عن الوتر

خضابه الدم والنبل النثار وقد

زفته اعدائه بالبيض والسمر

النجم فوق السما ليست بذي صفر

وان رأته عيون الناس في صدر

مهذب الخلق والأخلاق ان تره

كانه ملك في صورة البشر

ما اخضر عارضه ما دب شاربه

لكن جرى القدر الجاري على القدر

آيبني شگول اعليك آيبني

دولبني زماني بيك دولبني

دولبني زماني بيك يا سلوه

اشلون انساك وانسه ايامنه الحلوه

اشهل بلوه المثلها ما جرت بلوه

آيبني العنه الموزمه اتذبني

تذب البيك تسعه امن الشهر شالت

ونالت من ثجيل الحمل ما نالت

امك جابتك يمدلل او حالت

او يوم البيه صرت يا شبل شيبني

شيّبني اصيارك والهدم حيلي

شيّبني اصيارك والهدم حيلي

منك حرمت امك ليش يا ويلي

منك حرمت امك ليش يا ويلي

اطلبك سهر ليلي والمنازع ذاك

اطلبك بللبن من درتي الغذاك

نسيت ارباك يا جاسم نسيت ارباك

يمدلل سگمني ارباك واتعبني

اتعبني او سكمني اوغير اللوني

على صدري ربيت ومر على امتني

حسبت احساب واحسابي طلع دوني

على راسي ابيوت امشيده تبني

تبني البيت لامك والجعيده امك

تصابحني او تجيب الواجب ابصمك

ريت الگبر ضمني گبل ما ضمك

الموت الموت يبني اوياك يرغبني

يرغبني الكبر سني او شوفي ازهيد

حيلي راح مني والجريب ابعيد

يبني من تجي الشبان يوم العيد

صار النوح يوم العيد يطربني

نسيت امك يجاسم من بعد عدها

عين الله على العريس واحدها

تريد اتناشدك دگعد او ناشدها

تگلك باليسر منهو اليرچبني

يبني الفاجدات اكثرهن امخلفات

ما تدري تموت ام الولد لو مات

يبني ارباي وينه او سهر ليلي الفات

يبني ليش ما تگعد تحاسبني

انا الوالده ونته ظناها

والوالده تطلب رباها

ليش انگطع منك رجاها

يبني انطفه عيني ضواها

يومك يالوحيد عماها

وضلوعي القصر حناها

شلفا يده وياك يبني

انا الوالده هيّن تذبني

مهو ارباك يمدلل اتعبني

ردتك عليه البيت تبني

سل اوسگم يومك انشبني

ان تنكروني فانا ابن الحسن

سبط النبي المصطفى والمؤتمن

هذا حسينٌ كالأسير المرتهن

بين أناس لا سقوا صوب المزن

اني انا القاسم من نسل علي

نحن وبيت الله اولى بالنبي

على ابن الحسن ياگلبي تفطر

خر او صاح يا عمي المشكر

بس ما سمع حسه شرعبت بيه

چتل چتال جسام او سدر ليه

لگاه ايعالج او يفحص ابرجليه

يلوج ابروحه او دمه ايفور

بچا او ناده يا جاسم اشبيدي

يريت السيف گبلك حز وريدي

هان الكم تخلوني وحيدي

على اخيمي يعمي الخيل تفتر

يعمي اشگالت من الطبر روحك

يجاسم ما تراويني اجروحك

لو ابگى يعمي چنت انوحك

ابگلبب مثل الفضا وابدمع محمر

حط احسين صدره ابصدر جاسم

شبگ فوگه او شاله يم الخايم

صدره ابصدر عمه او خط بالجدام

بالتربان واحسين ايتعثر

جابه او مدده مابين اخوته

بچا عدهم يويلي وهم موته

بس ما سمعت النسوان صوته

اجت زينب تصيح الله واكبر

ضلع احسين على جسام محنه

يعمي ابموتتك زادت محنه

شاله احسين وبدمه محنه

آه اشلون حال امه الزچيه

ردتك ما ردت دنيا ولامال

اتحضرني لو وگع حملي ولامال

يجاسم خابت انظوني ولآمال

عند الضيج يبني اگطعت بيّه

علامت اوليدي امحنه ليدين

اومطعون بفاده طعنتين

او سالت ادموعه على الخدين

او بعده شباب او ما تهنه

إن يبكِة عمّه حزناً لمصرعهِ

فما بكى قمر إلا على قمرِ

يا ساعد الله قلب السبط ينظره

فرداً ولم يبلغ العشرين في العمرِ

لابن الزكي الا يا مقلتي انفجري

من الدموع دما يا مهجتي انفطري

قد كنت احذر انّي لا اراك على

وجه الصعيد ولكن جائني حذري

ما كنت آمل في الرمضاء ابصرهُ

ياليت فارقني من قبل ذا بصرِ

ما كنت آمل ان ابقى وانت على

حرّ الصعيد ضجيع الصخر والحجرِ

مرمّلاً مذ رأته رملة صرخت

يا مهجتي وسروري يا ضيا بصري

خلّفت والدة ولهى محيّرةً

مدهوشة ليس من حام ومنتصري

بُني تقضى على شاطي الفرات ظماً

والماء اشربه صفواً بلا كدرِ

بني في لوعة خلّفت والدة

ترعى نجوم الدجى في الليل بالسهرِ

وددتُ قبل تمام الحمل اسقطه

او أنني لم اجد حملاً مدى العمرِ

حملته تسعة حتى سهرت به

طول الليالي فلم اربح سوى الضررِ

رمله الوالدها شبگت اعليه

تشجعه او تهلهل له او تنخيه

للعمر دون احسين تفديه

يگلها او دمع العين يجريه

الماي عگبي من تشربيه

اذكري افادي العطش ماذيه

والعرس لابد من تحضريه

تذكرين عرسي او زفتي بيه

اوشباب الذي عينچ تصد ليه

والده اشبابي دذكريه

آيبني ابشبابه ما تهنه

عرّيس وابدمّه امحنّه

او للبيض فوگه غدت حنّه

واملبّسه نشاب ايتثنّه

مدري اهلهلك يجسّام

ابعرسك البيه الفرح ما دام

مدري ادگ والطم على الهام

اشوفك اموزّع بيض وسهام

اوحِيّد وعدلك شهر ويّام

واليوم عندي اسنين واعوام

مدري صدگ لو طيف واحلام

اوليدي على امنصّة رمل نام

تزفه العده چاوين الاعمام

اشموعه مواضي او نبل وسهام

واعمامته طبره على الهام

يا حسين دِحضر عرس جسّام

غريبون عن اوطانهم وديارهم

تنوح عليهم في البراري وحوشها

وكيف لا تبكي العيون لمعشرٍ

سيوف الأعادي في البراري تنوشها

بدور توارى نورها فتغيّرت

محاسنها ترب الفلاة نعوشها

وضجيع طفلهم وان ثوى

منهم فتى فمع المهند يقبر

فأنهم يرجون لقيا ربّهم

بالبيض تشفع عنده وتكفر

فوليدهم في المهد يألف سيفه

فكأنه والسيف قد ولدا معاً

كأن الحرب ربتهم صغاراً

وهم شكروا مساعيها كباراً

تلك الوجوه المشرقات كأنها

الأقمار تسبحُ في غدير دماءِ