شبكة الإمامين الحسنين عليهما السلام الثقافية

والله عجب كيف استقامت في هلبدور

من بعدما هي في امعزه اُوخدر واقصور

من بعد عبّاس اُوعلي الأكبر البدور

نمشي مع زجر ابن قيس ابذله اُوهون

ليهود تتعجب اُو يحكمون النصارى

من فعل هالامه الكل ضاع افتكاره

ايصلون باسمه اُو ياخذوا له اسارى

شلكم بسم جده إلى قمتوا اتصلون

شلت يمين اسنان شايل راس لحسين

ايلين الصخر واقلب ذاك الرجس ما يلين

اُو زينب تقلّه لا تجي يم النساوين

بالراس حتّى الناس عنها اتغض لعيون

اتوخر يظالم عن حرمنا ابروس اهلنا

واحنا بعد ويّاك جرمه ما جرمنا

امن السير والحر والعطش والله انتلفنا

يا ليت ينظرنا الوصي هزاز لحصون

ما وقفت بيها المطايا غير في الشام

وا ويل قلبي ما اذل وقفة الايتام

اوسار البريد اُوخبّر الطاغي بلعلام

أمّر يدشّوهم على ذلّة اُوعلى هون

زينب تقول للحادي لاوين ساير بينا

ريّض الظعينة ساعة انودع جسد والينا

باروح يم الوالي اُو باظلله باهدومي

باعتب على حامي النجف اُوبانخى فوارس قومي

لمن سمعها الحادي قلها يزينب قومي

قومي اركبي المهزوله واِحسين ما تشوفينه

جاب المطيّة الحادي اُوقصده يريد الكوفه

كيف اركب المهزوله واخليصي ما شوفه

باروح انخي بوالفضل لو كان قصوا اكفوفه

لَحد يشيال العلم للشام شالوا بينا

وإلّا بروح للجاسم ياحي كُل افعاله

يرضى علي بالذله واركوبي المياله

اُو زين لعباد امقيد وامصفد باغلاله

واحنا سبايا حوله حر الشمس صالينا

ساق المطيّة الحادي اُوعن جثتك بعدوني

قصدي بودع جسمك يحسين ما راعوني

اُوساق الظعينة اُوشاطها ويّاك ما خلّوني

صبري على ضيم اُوضم واِحسين ما اتشوفينه

يحسين ما رحموني من يوم شالوا بيّه

اُوشلنا اُو تركنا اجسادكم فوق الترب مرميّه

بالأمس حولي دولة اُوجار الزمان اعليّه

ذبحت هلي في كربلا وابلا ولي ظلّينا

يحسين عقب اعيونك بالطفِّ بتنا ليله

وامن الصبح جالحادي اُوحن اُوحدا بالشيله

ما تعودت يابن اُمّي باركوبي المهزوله

لمت علينا العسكر يتفرجون اعلينا

مروا بزين العابدين امقيدينه

ولا طلع فزاع من ارض المدينه

مروا ابعليل ينتحب فوق المطيّه

يبكي اُوتهمل دمعته لهله سويّه

ينظر عمامه واخوته فوق الوطيّه

والشاب هاللي بالطفوف امعرسينه

اُومروا ابحريم تنتحب كلها على النوق

اتنخى يحادي بالظعينة بالك اتسوق

ابننظر اهلنا اعلى الثرى اُو نبكي لهم شوق

يا غيرة الله حيدر الكرّار وينه

مروا بنو اُميّة اُوفوق ارماحهم روس

روس اغلى روس القنا تاضي كلشموس

الله يدنيا ابتدلين السعد بانحوس

جرتي على المختار واتبعتي نبيه!!

يطيور طيري بالخبر بالعجل سرعي

اُولا جيتي الزهرا البتولة عندها انعي

اُو قولي يزهرا لا تصيحي آه ضلعي

كسر الضلع يا فاطمة لا تذكرينه

طفل يقلك أحمد المختار سكتيه

ابكاه يذوبني يا زهرا اُو يوذيه

مرمي على الغبرة يزهرا ما حظرتيه

ليتك حضرتي قبل ما تشيل الظعينه

مطروح فوق الترب يم اِحسين ينخاك

قومي يزهرا اُو ظللي له اليوم برداك

لو ان سمعتي في السبا حنت يتاماك

بنتك جسمها بالنياحه امذوبينه

واللي عليها الشمس غابت وقت لطلوع

امست امن البلوى اُوهي محنية لضلوع

اتعاين على العسّال راس اِحسين مرفوع

لامن سمعها اتنوح صد الها ابعينه

ما تبرح إلّا ذابها اتوصي الأيتام

ليكون وحده ييتامى منكم اتنام

تدرون هذي القوم ماحد يرحم ايتام

إلّا عدو مبتلي قلبه ابضغينه

والله عجايب ما تزلزلتي يكوفان

راس السبط منصوب في سوقك على اسنان

ولا اندهيتي وابتليتي ابزلزلة عاد

في ساعة اللي واجهت زينب ابن ازياد

ينظر ابعينه واقف ابحبله السجّاد

يا ارض سيخي بالملا الوقفة النسوان

لله أسرار خفيّة في بقى الكون

آل الرسالة والجلالة في أذى اُوهون

اعليهم يهل كوفان بيديكم تصفقون

لاشك انكم للنبي المبعوث عدوان

يا عجب الله ابن النّبي خارج يسموه

والدين محمّد شيده غير الوصي بوه

يرضى النّبي المصطفى ابنه يسبوه

اُو يرضى يشهروا مخدراته آل سفيان

في ثار لبوه يا علي ثارت الأولاد

واتذكرت فعلك بني اُميّة بلطراد

فرصة اُوحصلها بأولادك ابن ازياد

خلاك نايم بالقبر واشفى الأضغان

يا ليت عنّك ينكشف تربان للحاد

اُو تلفي مع فرسان غالب كُل هداد

اُو تذبح لحتّى ما يقول الذبح بس عاد

كله ولا يقضي غرض من آل سفيان

اُو نذبح لحتّى ما يقول الذبح مابي

اُو تطعن لحتّى تنتحل روس الحرابي

والخيل تصرخ من تعبها واعذابي

كله ولا يقضي خبر من اَهل كوفان

واتذكروا فعلك بني اُميّة بلحروب

اُو منّك يحيدر ادرك الطالب المطلوب

يمتى رضي الغالب يبويه ايصير مغلوب

ما قدّر الله يا علي المرتضى كان

تبكون يهل الكوفة وانتون ذبّحتونا

سبعة عشر من بيتي اُوثامن عشرهم خونا

ما قصرت دولتكم سدت علينا الوادي

وانتوا ذبحتوا مسلم اُول ذبيح اُوبادي

وانتوا ذبحتوا ارجالي وانتوا حرقتوا افادي

تبكون يهل الكوفة وانتون ذبّحتونا

اُودرتوا علينا ابدوله وانتوا جمعتوا الدوله

إخيولكم مسروجة واِسيوفكم مسلوله

عين عسى تنظرنا ابميل العمى مكحوله

تبكون يهل الكوفة وانتون ذبّحتونا

إرجالكم تذبحنا اُونسوانكم تبكينا

وانتوا انميتوا لينا تتفرجون اعلينا

متفرجة اُو متشمّتة اُو تتصدقون اعلينا

تبكون يهل الكوفة وانتون ذبّحتونا

يا ليتنا لا عشنا ولا لفينا الكوفه

بالأمس يوم ادخولي بارجالي انا محفوفه

واليوم انا وايتامي في سوقة مكتوفه

تبكون يهل الكوفة وانتون ذبّحتونا

جابوا بنات المصطفى حسرى على اجمال

ما بينهم زينب تصب الدمع همّال

ياللي على ظهر الجمل ذابك تحنين

خلي حنينك يا حزينة لا تنوحين

تلفت مرايرنا من انياحك على اِحسين

مثلك ما شفنا نايحه في اُول اُوتال

نوحك عليه ايفتت اصخور القويّه

كُل ساع ما وقعت من انياحك مطيّه

مثلك حزينة مارأينا في البريّه

كلما نحبتي جاوبت نسوان واطفال

النوق ذابت يا حزينة من حنينك

واكبودنا تنفت اذا سمعنا ونينك

زايد على نوح الحمايم في حنينك

بعد الخدر والصون حسرا فوق لجمال

هي حالتك تدهش فكر كُل من رآها

يا غيرة الله كيف حيدر ما اتاها

لوما درى حراتهم ذابت حشاها

اُولجساد منها اتنحلت من نوح لطفال

خفي البكى والنوح رحمي ابحال ليتام

اُوصبري على ذل اُوهضم يا بنت لكرام

معلوم عنكم ما درى زراق لرخام

لوهو درى جاكم اباجناده الأبطال

يا حجّة الله قوم خذ هاليوم ثارك

زينب الحورا ايزيد وردها مهالك

يا حجّة الله قوم يابن العسكري الساع

زينب بعد عزها بقت حسرا بلا اقناع

تبكي على فقد السبط والقلب مرتاع

يا حجّة الله بالعجل جرّد إفقارك

ما قصرت افعالها فيكم اُميّه

خلّت أبو السجّاد بارض الغاضريّه

مرضوض جسمه من حوافر لعوجيّه

باحماك يابن العسكري ليفوت ثارك

صبرك تعدى قوم يانسل الميامين

زينب ذليله ابكربلا اُوذبحوا العدى اِحسين

اُودخلوا ابها يابن الحسن وسط الدياوين

العار صعب اعليك دنهض زيح عارك

الخيل ملتها مرابضها يصنديد

بالعجل ثور اخلص الحورا من القيد

من قبل ما ندخل بلا والي على ايزيد

كيف الصبر لوما بعد كملت انصارك

وانته الذي موعود عنا اتزيح كُل عار

اخبرك جدك ذبحوا اطفاله اصغار

دنهض اُو فزع كُل بني هاشم لك انصار

والمهر شده وامتطه عندك انصارك

شيل العلم قدّام يانسل البهاليل

واصرخ ابعالي الصوت قوموا واركبوا الخيل

اُوشيل الذي فوق الثرى من غير تغسيل

يمتى تجي يابن الحسن لينا اخبارك

يمتى نشوف السيف بيدك واللوى ايلوح

جدك يبو صالح على التربان مطروح

واعليه أملاك السماء ما زالت اتنوح

لو هالخبر يابن الحسن ما عاد جالك

عاشور يابن العسكري يانسل لكرام

هد للهدى ركنه اُوهدم دين لسلام

ياهي امصيبه اشلون تنسى ابطول ليام

في يوم واحد ذبحوا جملة انوارك

طالت الغيبة قوم يابن العسكريين

شيعتكم ابشدّه يبن طاها اُو ياسين

طالت الغيبه والفرج طال انتظاره

يمتى ايثور ابن الحسن طالب ابثاره

شيعتكم ابشدّه يبو صالح حياره

بك يستغيثوا يا غياث المستغيثين

دنهض لثاراتك يبو صالح يمبرور

وانته إلى الشدّات ولملمات مدخور

وامّا يد امن الله يبو صالح اُو منصور

جبريل والأملاك جندك والنبيِّين

أصواتنا امن النوح باحت من نخاويك

كلما رأينا الضيق قمنا ننتخي بيك

يمتى نشوف البيرق ايرفرف حواليك

إنكان تصبح شيعتك كُلهم اِمعيدين

وانكان تنسى ما كنت تنسى الفجيعه

اِحسين واَنصاره اُو عبد الله رضيعه

إتذبّحوا يبن الحسن يمّ الشريعه

ظلوا عرايا اِعلى الثرى من غير تكفين

واعظم مصاب اللي دهش يا ناس بالي

تركيب زينب والحرم من غير والي

ظلّت نساهم تنتحب والصوت عالي

اتنادي ابعالي صوتها ضيّعني اِحسين

شفنا جنايز في اطفوف الغاضريّه

كلهم بليا روس واَجساد رميّه

أجساد مطروحة على الغبرة بلا روس

اُو فيهم جسد كنّه بدر لوشمس لشموس

واضلوع جسمه امكسّرة بالخيل مديوس

ما ظننا إلّا مكسّرة بالأعوجيّه

كلهم بليا روس وا حزني عليهم

أبداً ولا واحد كسب معروف فيهم

إلّا اطيور امن السما اتظلل عليهم

باتوا ثلاثتيّام بالغبرة رميّه

اهناك من حول الشريعة بطل ممدود

طايح على المسنات لكنه بلا ازنود

فوق الثرى مرمي اُوحوله اِمشقق الجود

اُوحوله جماعة امطرّحه كلهم سويّه

ظلوا ثلاثتيام صرعى فوق تربان

ما بينهم صنديد يدعي القلب حيران

وايصيح من نحره انا المذبوح عطشان

وا حسرتي رضت اضلوعه الأعوجيّه

لا تسألونا اللي لقينا احوال شنعا

شفنا اَجساد امطرّحة بالترب صرعى

كلهم بليا روس بالتربان ضجعا

كُل ينادي آه كبدي ملتظيّه

بانت اِقبور اَهلي اُورد حزني عليّه

يا عمتا بانت اطفوف الغاضريّه

بانت فيافي كربلا اُوهلّت اعيوني

واتذكّرت فرسان قومي فارقوني

يا ليت ما شافت مصارعهم اعيوني

راحوا ابجمعهم ما بقى منهم بقيّه

جتكم يتاماكم اُو نسوتكم عرايا

في الشام قاسينا المصايب والرزيا

واعظم علينا ادخولنا لبن الدعايا

ما ظن ترضى يا شهيد الغاضريّه

لحد يصنديد الحرايب يا ولينا

اجلس تلقانا ترا من الشام جينا

جيتك بخبرك بالذي سوّوه بينا

قاسيت يا خويه البلا واعظم رزيّه

ما قصروا يحسين فينا هالاعادي

نصبح ابوادي يا لولي اُونمسي ابوادي

وابنك علي يحسين مغلول الايادي

دشّيت سوق الشام واردى ما عليّه

يحسين يابن اُمّي الضرب ألّم اِمتوني

لومن صحت باسمك يخويه يضربوني

واِحريمكُم ويّا اليتامى ذوّبوني

كُل من تون من صوب والونّه خفيّه

يحسين بعدك يابن ابويه ما هجعت عين

ابليا ستر يحسين دشّينا الدياوين

واليوم جينا الكربلا ياخوي يحسين

جينا بننصب لك عزا في الغاضريّه

معتاد اخويه اهل السفر لاجوا يردون

اشيلوا هدايا مع تحف حق هلهم يودون

واحنا بليا تحف لا يقضى ولا يكون

نرجع إلى الأحباب باكفوف خليّه

بالله يسوري اعن العدى اُويافيض لعلوم

نبغي هديّة حق بني هاشم اُو مخزوم

قلها هديتكم يعمّة فيض لدموم

من منحر المذبوح باَرض الغاضريّه

قبر الشهيد ابن اُمّي بانت لنا أنواره

قبرٌ عسى يالوالي ما تنقطع زوّاره

يا كربلا باترابك صار القبر والحاير

يا كربلا ردّيهم رحمي لقلب طاير

يا كربلا من فضلك صرتي ملاذ الزاير

كلمن يزورك يستر يوم الحشر بابشاره

يا كربلا ردّيهم واعلى العزيزة احشاها

ردّي حشا من شبت نار الحزن باحشاها

ترجع بلا وليانها ما ينتظم ممشاها

في شيلتي يا كربلا اُوفي رجعتي محتاره

ياهي امصيبة امنها اضلوع الصدر تتحنى

يوم دخلنا المجلس فيه الزمر والغنا

مجلس يزيد الفاجر يضحك علينا ابسنه

شامت علينا بالفرح يترنم اباشعاره

ياهي امصيبة عظمى اُوياهي امصيبة شنعا

يوم دخلنا المجلس واحنا بليا قنعه

واتذكرت اسكينة قامت تصيح اُوتنعى

ترضى يبويه ندخل في مجلس الخمّاره

عتبي على اللي غابوا من عزوتي وارجالي

في كربلا خلّوني حرمة بليا والي

واحسرتي واذلي يبكي عدوي الحالي

في وين اصك ابراسي من كثرة النظاره

اُوعتبي على فرسان راحت ابأيد اعدايه

يوم الحرب والرنّة باسيوفهم فرايه

مثل الضواري الجايله تحت العلم والرايه

اُوعتبي على فرساني ما صبحوا بالغاره

بانت اطفوف الغاضريّة يا نساوين

هذي اقبور اَهل الحميّة والولي وين

يحسين جينا نشتكي عندك اشكايه

دشّوا بنا الشامات يابن اُمّي سبايا

وايتامكم تنعى على اظهور المطايا

من عقب ما طافوا بنا ذيك البلادين

ياهي مصيبة يوم دخلونا على ايزيد

وابنك علي بين الأعادي امقيد ابقيد

وامر يزيد الرجس في الشامات بالعيد

ليتك ترانا بين اعدانا ذليلين

في دار مكشوفه حبسنا نسل لنذال

يحسين تصهرنا الشمس واحنا بلا اظلال

واعظم عليّه يا كفيلي نوح لطفال

كُل من تسايلني يعمّه اِحسين في وين

طر اللحد يحسين جينالك من الشام

ابننصب عزا يحسين عندك سبعة ايام

اُوذوب افادي من عقبكم نوح ليتام

اُوسكنة تنادي وين فرسان الحرب وين

جينا حرم يا لحود فرجي عن ولينا

ينهض مع العبّاس ويردنا المدينه

ما قصر ابن ازياد فيما فعل بينا

في السوق وقفنا اُوهل الكوفة امعيدين

شتشور يابن اُمّي علينا يا شفيّه

ننصب عزاكم ياهلي في الغاضريّه

لو نمضي الطيبة إلى ابن الحنفيّه

اُو ننصب عزاكم في المدينة ياضيا العين

ماحد غدر بيه الدهر مثلي من الناس

فارقت اخويه اِحسين والجاسم اُو عبّاس

اُو قومي اُو فرساني اُوهلي صعبين لمراس

بانصب عزا ما حد يعزيني على اِحسين

امن اقبوركم ثوروا ابهمه يا رجالي

ردّت حرمكم للمدينة ابغير والي

نخيت ما واحد سمعني وانتخى لي

وين الذي بالأمس يحمون الصياوين

يحسين يا والينا يحسين يا والينا

جاب الدهر خدامنا يتفرجون اعلينا

يحسين انا ما عفتك بعدك عزيز اُوغالي

وانته عفتني وانته ضيعتني يالوالي

يحسين بعد ارجالي ضاعت يخويه احوالي

خدامنا جو لينا يتفرجون اعلينا

عن هالحكي كرمينا وامن الدنس حاشانه

ربّ السما طهرنا اُو يشهد لنا قرآنه

والعيب في ميسونة والعيب في مرجانه

والعيب في ولد الزنا هاللي خرج عن دينا

يا هند ما تعرفيني اهلي كرام اُوساده

اُوبيتي رفيع اُوعالي ما تنقطع وفّاده

اُوهذا الدهر من شانه ما تنحمدله عاده

جابك الينا امن القصر تتفرجين اعلينا

يا هند انا المعروفه يا هند انا الموصوفه

وابيوتنا في يثرب وابيوتنا في الكوفه

واليوم دهري جابني في دارك المكشوفه

اُوجيتين لينا امن القصر تتفرجين اعلينا

يا ليت عاجلني الاجل والشام ماجيناها

حال الشناعة حالنا في حين وصلناها

بازمورهم حولينا واهوال قاسيناها

يا ليت فارقنا النفس ولا اليها جينا

ما حب اَنا اتعرفيني ما دام هذا حالي

إبدار أنا مكشوفة وانتين قصر عالي

انتين قومك حولك ونا فقدت ارجالي

اُوراسك علينا شامخ تتفرجين اعلينا

هل كيف انا اتواضع لك وانتي لنا مسبيّه

إمن الخوارج تدعي اُوهم عندنا موليّه

مانتي البتولة فاطم اُولا زينب المسبيّه

نبغي نعرفك وانتي ما جايه اِتخبرينا

اِقعد تلقّى للحرم جاتك من الشام

وانظر السكنة اشحالها اُويش حال ليتام

اُو زينب تنادي قبر اخويه وينه صار

يامن يدلني ابحفرته اُوحفرة الانصار

باقعد على قبره اُو بصب الدمع مدرار

بانصب عزا لسبوع حربي سبعة ايام

بقعد وخلي فوق قبره مدمعي ايسيل

ايحق لي لخلي ادموع عيني تشبه السيل

مدري تغسل لو دفن من غير تغسيل

في وين حطيتون لحده يابن لكرام

يا بوالأئمة قبر اخويه ودني ليه

بانعى على قبره اُو بابكي للحموله

واتخاطب ام كلثوم بادموع هموله

قومي يخيّه واصحبي ويّاك ليتام

معتاد لن اهل السفر لاجوا يردون

يبغون حق هلهم تحف ليهم يودون

واحنا بليّا تحف ويش انكم تقولون

خوفي يعتبون الاهل وولاد لعمام

يابو محمّد يا علي يا بحر لعلوم

نبغي تحف حق الاهل هاليوم ملزوم

قلها هديتكم لهلكم عمه ادموم

خضبي اثيابك بالدما واثياب ليتام

يحسين قوم امن القبر جتّك يتاماك

يحسين حسّ اَطفال حول القبر تنعاك

في دار مكشوفة حبسني الفاجر ايزيد

فيها ثلاثتيام ما فكني من القيد

اُوصار التهاني ابمجلسه أعظم من العيد

وايقول يا حيدر استوفينا من ابناك

اُوسايل عن الوقعة اُوعن حرب الذي كان

قالوا لفانا اِحسين في دولة اُوشبّان

مثل الاسود النازلة ابحومة الميدان

اينادون يوم الزلزله يالموت حياك

اُوباقي البقيّة اِحسين في حربه تلفنا

حوّل علينا اُوقام ينشرنا اُويلفنا

حتّى لوان اتريد لك نحلف حلفنا

لولا يومه ما رجعنا لك اُوجينا

حول علينا اُوقام يطوي اجموعنا طي

ويقول لينا ياهل الجور اُوهل الغي

يا حيف لو ان القضا يمهلني اشوي

قلنا إله يحسين والله ما نسيناك

ساعة ولنه جاى له شمر الضبابي

وايقول من فضة اُوذهب املي ركابي

قتلت خير الناس وامكثي ابعذابي

قلّه تولى واندثر الله يخزاك

قوموا يناديكم بشر يهل المدينه

ما ظنّتي إلّا امن اليتامى نادبينه

في زمن لول مالفى جايب ابشاره

راكب على الناقة اُو عبراته اتجاره

أسلم على العالم اُو يومي بالإشاره

اُو ينشد ابشعره اُو يصفق اشماله ابيمينه

مدري درى لوما درى ابن الحنفيّه

ابجية رسول من يتامى الغاضريّه

من صوب داره يا بشر عرج المطيّه

ما تعرفونه من طلع ما تنام عينه

تسفي عليه الدار بحجار اُو سوافي

اش هالبيت هالمظلم علي الله الكافي

يمتى يخويه اِحسين إلى وجهك اُوافي

واحب ايادي اِحسين واقبل جبينه

فاز الذي يحسين شربوا دونك الكاس

مثل النذب لكبر اُو مثل البطل عبّاس

والجاسم اللي انكسر عرسه دون لعراس

دشّت احدوده زوجته الحرة اسكينه

ولا حضرنا ازفاف ذاك المعرس الشاب

ولا اختضبنا من بقايا ذاك لخضاب

ولا عروس يوم عرسه اتبدل اثياب

ولا ركبنا الخيل مسروجة ابزينه

ولا حضرنا اطراد ذيك اليوم يا حيف

ولا كسرنا اسنان في حربك ولا سيف

لو طرّشت جيناك بقلوب ملاهيف

واحنا العدو لا شافنا اِتزور عينه

يا آل هاشم في المدينة صاح بشّار

مرسول أبو محمّد لفى ليكم بلخبار

ينشد اِبغارة يا هلي اُو يجدب الونّه

قوموا انشدوا وابشار واخذوا الخبر منّه

ظنّي يتيم اِحسين ليكم راسلنّه

ناح اُونعى اُوسط المدينة ينشد أشعار

اقبل إلى قبر النّبي اُو نوح اُونادى

اُو عزا رسول الله في جملة اُولاده

في كربلا ابناك ماتوا بالشهاده

ماتوا ابظماهم يا امين اصغار واكبار

اُو وقفت ما بين النساء وحده حزينه

قالت يمرسول اليتامى في المدينه

عرج على اللي ابحجرته زايد ونينه

يجدب الونّة بالاسف والدمع نثار

محزون انا ويزيد حزني سافي الدور

كنها سما لكنها ظلّت بلا ابدور

بنذر على رجعة ارجالي اُو عزوتي انذور

تذري على جية ابدورك ليك يا دار

حزني على بدر طلع عنّي ولا عاد

يمتى يخويه جيتك توعد ابميعاد

ويا ارجالك يا سنادي اُوذيك لولاد

اُو ترجع يخويه اِحسين باهلي اصغار واكبار

لفرح لجيتكم يخويه وانصب العيد

وافرح ابجية اخوتي ذيك الصناديد

يمتى تجيني اخباركم يابن الاماجيد

واِنظر ضيا وجهك اُومنّه تسطع أنوار

انكان ردّت بالحرايب ياسنادي

منكم فلا هي نايلة اسيوف الأعادي

لكن خوفي من خبر جدّك الهادي

خوفي عليكم يخوتي حانت الأقدار

يهل المدينة ابشارة يهل المدينة ابشاره

واخيولكم سرجوها يهل المدينة اِبشاره

بس ما وعوا بالصيحة واتراكضوا له ابهمه

وولاد هاشم جولة والكل زايد همّه

والناس كلها طلعت اُو صارت عليه اللمّه

اُو بشر بن حذلم ينعى اُو يترجّز ابأشعاره

يهل المدينة قوموا بالعجل جاء واليكم

خلف البلد فسطاطه وآنا رسوله ليكم

وين الشجاع محمّد ما شوف حاضر فيكم

قالوا له يا هذا محمّد مريض اِبداره

من حين شال اعضيده اُوبن والده للكوفه

من حسرته واَحزانه يصفق مديم اكفوفه

انكان السبط وصلنا بانروح كلنا انشوفه

ياحي من يحضي به اُويحتضي باجواره

حن اُوبكى واتزفّر وامدامعه همّاله

اِحسين مارد ليكم جاكم علي واطفاله

جاكم علي من والده اُو فاقد جميع اِرجاله

ما قصّرت هالوقعة راح العمد وانصاره

روس اخوته وارجاله فوق السمر شالوها

ما قصّرت عدوانه حتّى الخيم حرقوّها

اُو نهبوا جميع أمواله حتّى النسا سلبوها

اُو جسمه بقى في الغبرة وحش الفلا زوّاره

اُمّ البنين اتسايل من وين هذي الصيحه

اُو بشر بن حذلم جاها وامدامعه مسفوحه

ياُمّ البنين اُولادك في كربلا مذبوحه

ماتوا عطاشى اُو بالثرى اُوظلوا بليا امواره

صاحت عليه اتنادي وادموعها مهموله

عن كربلا خبروني اُوعن بوالفضل وافعوله

فرسان هاللي فزعت عبّاس فيهم لولا

قلها نعم بوفاضل يشعل عليهم ناره

قالت عجل ما تعدى عن والده اُوعن أهله

بوه الأسد ما ينتج إلّا شجاع مثله

حزت الشجاعة والظفر والفوز حزته كلّه

يابو الفضل بافعالك سرني بشر باَخباره

جينا يخويه جيّة ترضى لنا ابها لجيّه

ليتك حضرت الوقعه بالحربة المحميّه

وينك غبت يا محمّد يا متعب الحرّابه

محمّد يكاس العلقم ماهم كفوا شرابه

يوم الجمل بالبصرة سبعين ألف مناصبه

اُوصفّين ماحد غيرك خلا الجثث مرميّه

اتمّنيت لنك حاضر يوم الحرب والصوله

جانا ابن سعد ابعسكر وابن الضبابي ابدوله

وارماحهم مشروعه واسيوفهم مسلوله

لكن غبت ويش بيدك يا لجمرة المحميّه

وسفه غبت يا محمّد ما جيت يوم الوقعه

اُوشفت الكتايب جايه الحرب الولي مجمعه

تلقى المواضي تلمع اُوفرسانها مدرعه

مثل الشياطين حاله واقلوبهم معميّه

لو كاتب الله اُورايد ما فاتتك هالنصره

واتشوف عينك يوم ما هو الجمل والبصره

وصلت الصيحه الكوفة وابن الخنا في قصره

صاح الدهم وصلتنا وانكسرت الحربيّه

جتنا يخويه دولة لا بارك الله فيها

ما ينعرف شاميها ياخوي من كوفها

شبت علينا نارها ماحد قدر يطفيها

اكلت جميع اخواني وامست اُوهي مطفيّه

بتنا يخويه ليله في خيمة مشبوبه

والروس كلها اقبالي فوق السمر منصوبه

والجثث ظلّت صرعى فوق الترب مذبوبه

وامن الصبح سافرنا اُوظلّت جثث مرميّه

قالت يخويه يوم شدّوا وصار لمجال

والجو اظلم والتقت أبطال ببطال

ظلّيت انا انخي واخويه بوالفضل قال

لَحد يزينب أثر ما تدرين بيّه

أخبرك ياخويه علينا دارت اصفوف

وانا يخويه أرتعد وارعش من الخوف

صارت مناياهم ارجالي برض لطفوف

ما شفتني متحيّرة في الغاضريّه

وأمّا أبو فرجة بطلنا صعب لمراس

أعني أبا فاضل اُخويه البطل عبّاس

باعمود صابوا له يخويه اُو فضخوا الراس

اُونادى ابعالي الصوت اُخويه اِلحق عليّه

وأمّا علي لكبر وقع ما بين صفّين

اُو نادى تسلم لي يبويه اعلى النساوين

اُومن خر علي لكبر يخويه اتنكر اِحسين

اُومن شافته اُمّه بكت اُوخرّت رميّه

اُوأمّا الولد جاسم يخويه اِهناك زفّوه

عمّه اِبوحده لبّسه النسوان حنّوه

اُودشّوه على سكنة فرد ساعة اُوخلّوه

اُوصار العرس في ساعة ازفافه عزيّه

بس ما سمع منها الحكي محمّد مشى اُوطاح

واقبل يحاكيها اُو يبكي اُو يصفق الراح

ايقلها يزينب وين عنّك بو الفضل راح

اُو منهو تكفلكم عقب عين الشفيّه

قالت يخويه يوم شدوا وصار لطراد

اُوشمّرت عن ذرعانها هذيك لولاد

واِحسين ياخويه يوصي زين لعباد

والله حسافة ما بقت منهم بقيّه

واِحسين اخويه متكي اعلى قائم السيف

كُل ساع يجدب زفرته ويقول يا حيف

والله حسافة اتذبّحوا في جمرة الصيف

اُوفاتت يخويه ابها عليكم بنو اُميّه

شالوا العلم والراية شالوا العلم والرايه

عنّك يخويه محمّد شالوا العلم والرايه

لاحد يقول محمّد صابه مرض لوعلّه

سر خفي أدري بيه السبب والعلّه!!

والله لولا الواسطة فيها المرض والعلّه

ماحد تقدم دوني اُوشال العلم والرايه

حظّي نهض بي نهضة اُوحظّي قعد بي قعده

مثل السبع في النهضة اُومثل السبع في القعده

لو الدهر ساعدني ما بي قعد هالقعده

اُوخلا الاجانب عنّي اتشيل العلم والرايه

يحسين انا فارقتك ما في العواوض شيبه

واحنا مهو من شانا تلحق علينا الشيبه

لكن افراق اخواني سرع عليّه الشيبه

لو كنت انا وياهم شلت العلم والرايه

يوم التغابن فاتني اُويوم المدح والشهره

وانا الذي من سابق حزت المدح والشهره

واليوم صاير غيري ليه المدح والشهره

يوم الجمل والبصرة بيدي العلم والرايه

كل من يقول محمّد صاير طريح اُوساده

جاني المرض وآذاني امن افراق ذيك الساده

واحنا الحرب ياخوي فنّا اُولينا عاده

يا ليتني ويّاكم شلت العلم والرايه

أهل الحرب ما قاسوا مثل الذي قاسيته

قاسوا حرايب لكن غير الذي لاقيته

بس يوم واحد فاتني يا ليتني لاقيته

لو كنت اَنا ويّاهم شلت العلم والرايه

نادى المنادي يوم حرب الغاضريّه

لَحد عداك السهم يابن الحنفيّه

واتقدموا للحرب فرسان شفايا

عند الملاقى ما يهابون المنايا

وانكان تسأل من حمل منهم الرايا

الراية حملها خوك عبّاس الشفيّه

يذّكرونك يوم بكرة شدّوا الخيل

اُوصالوا على العدوان باسيوف مصاقيل

صالوا عليهم واستوى وقت الضحى ليل

ليل طويل اُوفيه أهوال المنيّه

بني اُميّة عندهم في غيبتك عيد

ايقولوا حصرنا اِحسين لا ناصر ولا اعضيد

بالحيف لنهم يعرفونك بطل صنديد

قرم جسور ما تهاب امن المنيّه

حاطوا العدى باِحسين ليتك عن يمينه

اُوعن اشماله انكان يا حامي الظعينه

ليت المرض ما كان عاقك في المدينه

انته المقدم في الحرايب ياشفيّه

والله اخوك اِحسين يمحمد تمنّه

يوم عليه الخيل دارت والأسنّه

إتمناك حاضر يالبطل ما غبت عنّه

عند الشدايد ما تهاب امن المنيّه

في كربلا يا عمّي في كربلا يا عمّي

ليتك حضرت اطرادهم في كربلا يا عمّي

ليتك حضرت اِطرادهم يالحربة المحميّه

اُوشلْت العلم والراية في حومة الحربيّه

خلّوا على عدوانهم نار الوغى موريّه

متباشرين ابموتهم في كربلا يا عمّي

يوم استوى مفزاعهم انا طريح اُوسادي

مثلك انا يا عمّي طايح حريم اجهادي

اُوانا أون في الخيمة واسمع اُخوك اينادي

مستوحدينه الاعداء في كربلا يا عمّي

شدوا على اكحبلاتهم في ضحوة ميشومه

والكل في مطراده مثل الصقر له حومه

حاشا على اعراضهم من كلمة المذمومة

متباشرين ابموتهم في كربلا يا عمّي

واتسنموا ضمرهم كلهم فرد ضحويّه

اُوشالوا العلم والراية يا صدق ذيك النيّه

اُوصالوا يعمّي اعلى العدى اُوخلّوا الجثث مرميّه

اُوخلّوا دماهم تجري مثل البحر يا عمّي

ليتك نظرت اخوانك يوم اصبحت فرحانه

يوم اصبحوا يا عمّي والكل يشد احصانه

اُو زينب عليهم تلطم فوق الوجن ولهانه

واقلوبهم مسرورة في كربلا يا عمّي

ماحمل منهم واحد إلّا اُوتبسم سنّه

اُولو طاح منهم طايح شالوا الراية عنّه

اُوما طاح منهم طايح إلّا ابوسط الجنّه

متباشرين ابموتهم في كربلا يا عمّي