شبكة الإمامين الحسنين عليهما السلام الثقافية

عهد الوصية

لا تنسه يا جسام عهد الوصيه

موعد صمودك حان بالغاضريه

* * *

صوت الحسن وصاك احفظ وصيته

ولا تهدم ابيمناك سور البنيته

تعب التعبته آوياك بألطف جنيته

لحسين اريد أنطيه دمك هديه

* * *

هاك اخذ سيفك هاك يا فرحة أمك

عمك غريب حسين لا تنسه عمك

عوف الزفاف وروح ضحيله دمك

عرسك يجاسم صار عرس المنيه

* * *

من ايدي سيف الموت سلمته بيدك

يبني المثل هاليوم چنت آنه أريدك

والحنه خلها اتصير من دم وريدك

افرح واحني چفوف ايدك بديه

* * *

ابدال الشمع تنشال بيض الصوارم

والحنه يا عريس دم المچارم

توفيلي حگ أرباك يبني يجاسم

لو شفتك أعله الگاع جسمك رميه

* * *

لمن تضحي الروح يبني يجسام

اتفاخر أعله الناس مرفوعة الهام

أهتف أنه الضحيت ابن اثنعش عام

قدمته للإسلام للحگ ضحيه

* * *

بين ايد أبو السجاد قدم حياتك

خل تدرس الأجيال من تضحياتك

آنه أمك ولو صار موعد وفاتك

اتحزم أعله الضيم وأعل الاذيه

* * *

من تطفه بالميدان شمعة شبابك

اطفي بدمع عيناي جمرة مصابك

بالسيف اريد اليوم اسمع خطابك

شد عزمك ولتهاب جيش آل اميه

* * *

خل نآخذ آنه آوياك هاي السعاده

ونشارك المظلوم ساحة جهاده

يا جاسم أنت اتخوض درب الشهاده

وآنه أعله درب الشام اطلع سبيه

* * *

ثابت عزيمه وجاش والهمه طبعه

هاج ولبس للموت گلبه اعله درعه

ضحه النفس للدين للأبه وشرعه

اتوالفت بيه اثنين زود وحميه

* * *

(لندن ١٩٩٣ م)

نار العطش

ننخاك يا گمر هاشم بحماك يا گمر هاشم

نار العطش بالروح با صرنه وين نروح

ننخاك يا گمر هاشم

* * *

عباس آنه اختك واجيت اشكي الحال يا با الفضل بحماك للطف جينه

بهاي الخيم عندك فواطم وأطفال كلها تصيح العطش أثر بينه

وهذا الفرات اليجري مثل السلسال ليش انمنع ها لماي بس اعلينه

عبد الله شاطت مهجته والدلال وشچم طفل عالجود شابح عينه

اطفال يا گمر هاشم وعيال يا گمر هاشم

تنادي ابگلب مجروح با صرنه وين نروح

ننخاك يا گمر هاشم

* * *

يا با الفضل بالگلب تسعر نيران والعطش تدري اشخلفت آثاره

هاي الرباب اتحوم وسط الصيوان جف الحليب وبا لطفل محتاره

دمعتها تجري أعله الرضيع العطشان والگلب ذبلت بالحزن أثماره

متگلي شيصبر گلوب الرضعان وهذا العطش شيطفي جمرة ناره

هالجود يا گمر هاشم موجود يا گمر هاشم

ليك النظر مشبوح باصرنه وين نروح

ننخاك يا گمر هاشم

* * *

عباس اشرحلك مصابي وهمي يا خويه ساعدني اعله همي وبلواي

بالخيم كلسا طفله توگف يمي التفت لنها تصرخ الماي الماي

تنشدني عنك ليش ساكت عمي ما يدري تسعر بالگلب نار اظماي

يا ريت دمعي ينفرز عن دمي چان اسگي هالطفله بمدامع عيناي

جرحين يا گمر هاشم بالعين يا گمر هاشم

دم ودمع مسفوح باصرنه وين نروح

ننخاك يا گمر هاشم

* * *

هذا انته يا عباس شخصك موجود وهاي آنه جيتك يا گمر شچايه

هاك اخذ جودك هاك يا راعي الجود يابا الفضل اگصد للمسنايه

عندك عهد والعهد أصبح مريود يا لگلت هاي العايله بحمايه

لتگول ملزوم الفرات ومرصود شنهو الفرات اخذ الفرات ومايه

معروف يا گمر هاشم موصوف يا گمر هاشم

سهم المصيبه يلوح با صرنه وين نروح

ننخاك يا گمر هاشم

* * *

من گبل ما للنهر تمضي وتطلع عندي وصيه آوياك أرد احچيها

هالگوم لو هجمت يعباس ارجع ما ردنه روحك للأجل تنطيها

لو چان گصدك تعتني للمصرع متريد ماي الحرم يا واليها

خليني اسگيها بمسيل المدمع بس ترد سالم دمعتي تكفيها

ردناك يا گمر هاشم وياك يا گمر هاشم

لو گالولي مذبوح با صرنه وين نروح

ننخاك يا گمر هاشم

* * *

يا خويه تتراوالي اشباح البين وصوت المصايب بالحزن أوحالي

چني أشوف بعيني گطع الچفين والعمد يفضخ هامتك يالوالي

خليك يمنه ولا تروح بهالحين والماي شنهو ولجله تنطي الغالي

كل سهم لو صوبك يصبح سهمين لو سهم لاحك لا حني ابدلالي

آهات يا گمر هاشم عبرات يا گمر هاشم

بس الصبر مسموح با صرنه وين نروح

ننخاك يا گمر هاشم

* * *

(لندن ١٩٩١ م)

شجاعة العباس (عليه السلام) (تجليبه)

حي عباس رمحه الجثث زرگها بيض وسمر سم الرمح زرگها

* * *

يلذع بالرمح مرهب يذب اسموم وبسيفه يصب الگدر والمحتوم

هز الرمح من أرمگ جبيله الگوم من هزته اعجود املوحه طگها

* * *

طگ اعجود رمحه وهاج بيه الباس عباس ونعم من گال حي عباس

ماس وچسب چاس من الوغه ونوماس غانم والمغانم عزمه طوگها

* * *

فاعي ولو نفر منه امحرب ميفوت واللي فات لتظن ما يلوحه الموت

ملچ الموت رافگ مرهف المنعوت وأرواح الزلم برهيفه علگها

* * *

عكوبس وبرهيفه اتعلگت أرواح گدر روح كل مجبل وروح الراح

صياح ويخرس حومته لو صاح حگها لو تظل املجلجه حگها

* * *

من صاح أبو جهه لسانها اتلجلج صول على الجيمه وغدت تتموج

صاح الله أكبر والحرب يرتج صيحه ابصيحة الكرار واشگها

* * *

أعله بن ود كبًّر الكرار بالخندگ لا چن شوف حامي امخدرات الحگ

بسبعين ألف عمر بكربله امطوگ وايذچِّر أعداء ابيوم خندگها

* * *

حي عباس لاح بصهوة الأدهم غضب وأعله الملاحم أرعد ودمدم

خله الغاضريه تموج من الدم خنياب وطفح والموج غرّگها

* * *

هذا اليوم جيثوم الحرب يومه طوّجها وفنه وشلع الملزومه

خلاها شتت واختلّت الحومه شراذيب انفرت والموت لا حگها

* * *

عالصوّال صال وعاف كل شارد حيث الموت لنّه حصة المارد

زم بيده المزاده وللنهر رايد وحافر مهره للجيمان يسحگها

* * *

عگب ما ملك ماي المشرعه الصنديد مله الراوية وسدّر للخيام يريد

لن تتنطره الگوم ابهنادي وميد وأبحد الشريعة اتحوم سبّگها

* * *

كل همه يرد بالماي لخيامه واشباح المنايه اتلوح جدّامه

چالهزبر رعد وابچفه صمصامه وصيحاته رعيد الموت رافگها

بالذابل غزاها وذبل عود الحيل فناها وذل عجيدتها ونشبها الويل

ليل أصبح ضحاها من عجاج الخيل وبليل الچتام انحجب درنگها

* * *

انحدر شبه العگاب اللي يشگ الريح طوح بالنفوس أعله الحتف تطويح

غضب وايرجّف المسكون من ايصيح ورگاب الاعادي دموم دفّكها

* * *

(الكاظمية المقدسة ١٩٧٧ م)

ما أصعب الوداع

لو ودعتنه لو فارگتنه

منهو اليحرس اخيامك منهو اليجمع ايتامك

لو فارگتنه

* * *

لا هيه چلمة عتب لا صرخة لوم شكوه ويترجمها الدمع يا مظلوم

نسكت غصب شيفيد حچي المهموم والدهر فاجئنه بوداعك هاليوم

للطف جبتنه وما خبّرتنه

بغيابك يوالينه شنهو اليحصل اعلينه

لو فارگتنه

* * *

باصرنه يا مظلوم شنهي الأخبار ابحد المخيم وگف عسكر جرار

حاطتنه بسهام ورماح وأشفار ولمع السيوف اعلينه يغشي الأبصار

هالگوم اجتنه واستهدفتنه

فجر الحرب لو أسفر بينه اشتعمل العسكر

لو فارگتنه

* * *

من كل كتر حاطتنه أشباح البين باصرنه يا مظلوم شتشوف العين

لو ودعتنه ورحت باچر يحسين لا وين ننطي الوجه عگبك لا وين

لو داهمتنه الخيل ولفتنه

باصرنه اعله هالحاله شيرجع الخياله

لو فارگتنه

* * *

ما نعتب اعليك العتب ما مقبول لا چن ننشدك بالمدامع ونگول

لو رحت منهو ايصير عگبك مسؤول ومنهو اليرد ناس الذي اعلينه تصول

لو سلِّبتنه الناس وولتنه

واحنه عايله ابغربه اشلون انقاوم النكبه

لو فارگتنه

* * *

فوگ الظمه وفوگ الغرب والآلام باچر على التربان نلگه الأجسام

ونشوف سلب اخدورنه وحرگ اخيام واطفالكم يحسين تصبح أيتام

لو غربتنه ورحت وعفتنه

اشنحمل جمرة مصابك نحمل لوعة اغيابك

لو فارگتنه

* * *

جمرة وداعك بالمهج مستعره فيض الدمع ما يطفي هاي الجمره

هالليله للتوديع نجري العبره بالفجر تجري ادموم فوگ الغبره

مصايب دهتنه و بألطف رمتنه

من تتوسد المصرع وين اتجِّه وين أطلع

لو فارگتنه

* * *

لو رحت من بعدك نصير بيا حال خدًّر غرايب ما تظل يمنه ارجال

ولا تظل خيمه البيها نجمع أطفال بس النوايب والمحن والأهوال

يالحيرًّتنه ابعينك شفتنه

لجلك نسفح المدمع من بعد اشتتوقع

لو فارگتنه

* * *

(لندن ١٩٩٣ م)

وا علياه

ناديتك تدري بحالتنه ما غيرك يحضر شدتنه

بالشدد تحضر بويه يا حيدر

والخيم تسعر بويه يا حيدر

* * *

آنه العقيلة يا علي أصرخ بدمعة عيني

حايره بايتام وحرم ما واحد ايواسيني

يا بويه ادرك حالتي بهالحاله، لتخليني

وبحالي تدري اشصار

محتاره يا كرار

بين السلب والنار

والليل هذا الليل يا داحي الباب خيم علينه واحنه بين الاجناب

لا أهل عدنه لا خيم لا أصحاب منين ابدي واشرحلك هظم چم مصاب

اشرحلك غيبة ولياني واعرضلك همي واحزاني

ابهجمة العسكر بويه يا حيدر

والخيم تسعر بويه يا حيدر

* * *

يا بويه أول فاجعه گطعت هرش دلالي

لمن علي الأكبر وگع فوگ الرمال اگبالي

مصرع شبيه المصطفه يا بويه غير حالي

دارت عليه اصفوف

رماح ونبل وسيوف

يا با الحسن شتشوف

هذا الجره أعله الأكبر وهذا الصار يا ريت حاضر چنت يا حامي الجار

وتشوف عالغبره شبيه المختار أول صريع انصرع بعد الأنصار

ما تخمد لهبة أحزانه واتوسد جسمه بميدانه

ذبحوا الأكبر بويه يا حيدر

والخيم تسعر بويه يا حيدر

* * *

ثاني مصاب اللي جره لو ردت تنشد عنه

جاسم بليلة زفته سيوف الحرب زفنه

من دمه عجنوا حنته ابدم الوريد اتحنه

ليلة عرسه ذبحوه

وأعله الأجل زفوه

ابدم النحر حنوه

يابويه ريتك چنت حاضر وتشوف ابدال الشمع للعرس رفعوله سيوف

ابدال الهلاهل علت صرخات الخوف حنته ابدمه ودمع عيني المذروف

بالحومه يا ريت تشوفه بدمومه حنّوله چفوفه

بالثره اتعفر بويه يا حيدر

والخيم تسعر بويه يا حيدر

* * *

يا بويه واصعب فاجعه مرت اليوم أعلينه

مصرع كفيل العايله من گطعوا چفينه

بالعمد صابوا هامته والسهم صوب عينه

صابه العمد بالرأس

وابمصرع العباس

جارت علينه الناس

وآنه اطلعت صوب النهر شچايه شاهدت بس جثه وچفوف ورايه

أصرخ ودمعاتي تصيح اويايه يا ريت لا فاض الفرات ومايه

والينه العباس اتگطع چفينه ظلت بالمصرع

شبلك اتوذر بويه يا حيدر

والخيم تسعر بويه يا حيدر

* * *

يا بويه والنوب الطفل حيرني بألطف أمره

عطشان ذبحوه العده وشاطي الفرات ابكتره

يا سايه عنده ويا ذنب بالسهم گطعوا انحره

شفت الطفل مذبوح

دم النحر مسفوح

وأمه الرباب اتنوح

هاي الرباب تصيح يبني الغالي بياعين اشوف المهد منك خالي

يا ريت نبلة حرمله ابدلالي ولا شوفك بدمك خضيب اگبالي

عبدالله ما ننسه مصابه بالنبله هالظالم صابه

گطعوا المنحر بويه يا حيدر

والخيم تسعر بويه يا حيدر

* * *

اخر مصيبه اللي سدت هدّمت حيلي وعزمي

لمن رجع خالي المهر ينحب ويصهل يمي

ناديته بالله يالمهر دليني وين ابن امي

ليش السرج مگلوب

ليش الوجه مخضوب

عفت الولي ابيا صوب

دليني بالله يالمهر دليني يم أبو اليمه ومصرعه وديني

خل يگعد ايباصرني ويحاچيني واشلون ما بين العده ايخليني

مرعوبه ولا واحد يمي مصيوبه بأحزاني وهمي

هالوضع أثر بويه يا حيدر

والخيم تسعر بويه يا حيدر

* * *

حالة الفجعت مهجتي يابا الحسن هالحاله

لرض المداين يا علي لسلمان تتعناله

وحسين ظل ابلا دفن والجسم محّد شاله

ياللي احضرت سلمان

شبلك على التربان

طايح بلا أچفان

من كل كتر يا با الحسن دمه يسيل عالأرض جسمه لا چفن لا تغسيل

واحنه يبويه بين نيران وخيل هذا النهار وشيگضي الليل

يالتحضر ساعات الشده ما نگدر نصبر هالمده

تصرخ الخدّر بويه يا حيدر

والخيم تسعر بويه يا حيدر

* * *

(لندن ١٩٩٣ م)

يبن أمي يا مظلوم

يبن أمي يا مظلوم يمك رجعنه اليوم

عالغبره خليناك ردينه ملگيناك

* * *

آنه العقيلة وبالحزن گلبي اسعرت نيرانه

جيت وجبت هالعايله وما واحد اتلگانه

يمك رجعنه من السبي وراسك رجع ويانه

أبنظرات عينه يلتفت وأعله الگبر دلانه

رأسك رجعنه آوياه يم الجسد جبناه

صوت الدمع ناداك ردينه ملگيناك

* * *

بالنوح والهم والدمع رحنه مثل ما جينه

واليوم من ذاك اليسر يم الأهل ردينه

عالغبره عفناكم جثث واطلعنه يا والينه

ولمن رجعنه لكربله بس الگبور الگينه

عالغبره عفنه أبدور جينه ولگينه اگبور

چان الأمل نلگاك ردينه ملگيناك

* * *

بس ما وصلت لكربله وشفت الطفوف اگبالي

اتذكرت يوم اللي رجع مهرك بسرجه الخالي

واذكرت غارات العده واذكرت سلب اعيالي

واذكرت عالتل من رحت اصرخ فگدنه الوالي

عالغبره جسمك طاح والحادي بينه راح

بهالحاله فارگناك ردينه ملگيناك

* * *

ابفجرية الحادي عشر لليسر من ردت اطلع

ودعتك وعفت الگلب يمك بذاك المصرع

ظنيت اعود لكربله واستلمه لمن أرجع

ما شفت گلبي ولا شفت جسمك الچان امگطع

عفت الگلب ومشيت ما شفته من رديت

گلبي اندفن وياك ردينه ملگيناك

* * *

عفناك وبصدرك سهم صابك طلع من ظهرك

وعفناك مرمي بمصرعك دمك يصب من نحرك

ظنيت ارجع بالظعن وردود عيني اتنظرك

ما چنت ادري ابرجعتي الگاك خويه ابگبرك

شفت الجسد مفگود بس الگبر موجود

بالدمعه ودعناك ردينه ملگيناك

* * *

يحسين يا هم ينحمل هم الحرم لو همك

عيلتك من بعد اليسر يبن أمي رجعت يمك

عافتك من يوم الذي بالخيل سحگوا جسمك

ما عدها عنك كل خبر من يوم سفكوا دمك

هاي الحرم يحسين صاحت ينور العين

بذاك الوضع عفناك ردينه ملگيناك

* * *

يحسين هاي العايله تعلم وتدري شبيها

مسبيه للشام اطلعت جور الدهر سابيها

هاليوم اجت واتوزعت كل وحده يم واليها

وكل وحده گعدت يم گبر دمعة حزن تجريها

وآنه أعله گبرك جيت بصوت الدمع ناديت

ابهظم اليسر جيناك ردينه ملگيناك

* * *

(لندن ١٩٩١ م)

قم يا حسين (عگيلي)

يحسين اگعد شاهد حالي

* * *

بغربه ولا واحد ظل يمي لا وين اتوجه يبن أمي

أحتار ابهمك لو همي وجسمك عالتربان اگبالي

* * *

ابهمي وهمك فكري اتحير أرد أوصل يمك ما أگدر

خيل وليل ونار وعسكر عگبك ما أدري اشيجرالي

* * *

نوب اتعنالك للمصرع نوب اذكر أطفالك وأرجع

محتاره وبس اجري المدمع كلسا حسبه اتمر ابالي

* * *

ناديتك والمدمع يجري لا وين اتوجه ما أدري

عگبك بألطف سلبوا خدري وآنه الما ينشاف اخيالي

* * *

سلبوا خدري وخدر اعيالك وانسحگت بالخيل أطفالك

ظل ينشد عنك چتالك يا زينب چاوين الوالي

* * *

ناديتك والدمعه ابعيني اشلون ابهالحاله اتخليني

يرضيك العسكر توليني يرضيك اتحير بعيالي

* * *

يبن أمي اخلافك ظلينه ابغربه ولا واحد يحمينه

كلسا هجمه اتغير أعلينه وكلسا ظالم يتعنالي

* * *

أنظر أيتامك مسلوبه أنظر للخدًّر مرعوبه

أنظر لخيامك منشوبه وچم لوعه أتحمل دلالي

* * *

لميت العيله من الوادي وظلت روحي اعليك تنادي

لو طوح بظعوني الحادي عگبك منهو ايشد ارحالي

* * *

ظعن اختك يا ريت تشوفه اخذوه اميسر للكوفة

أيتام وخدّر مچتوفه ورأسك مرفوع ويبرالي

* * *

لو طاحت طفله بمسراها رأسك يثگل لو عفناها

ما ينشال ايظل يتناها ناديتك ضيعت الغالي

* * *

(بغداد ١٩٧٥ م)

يا حماتنا

كفلتوني ونسيتوني يولياني

* * *

اختلف أمري يمن خدري ابحمايتكم

الدمع غالي ورخص تالي لمصيبتكم

ابجمر عتبي استعر گلبي أعله فرگتكم

ولا حامي يجي ايحامي عقيلتكم

تركتوني وفجعتوني يولياني

* * *

اسعرت ناري ويظل جاري دمع عيني

اختلف وضعي صبح دمعي يسليني

اندهش حالي ولا والي يحاميني

مچنت أدري هظم دهري يعاديني

انخطف لوني وضوه عيوني يولياني

* * *

كثر وني انگطع ظني وهمت بالبر

جره المدمع شفت مصرع علي الأكبر

يسح دمه انخضب جسمه بدمه المنحر

صحت وينك عگب عينك لفه العسكر

يسلبوني ويهظموني يولياني

* * *

اعلگت شمعه صفت دمعه ابجفن حالم

اختفت شمسه اشلون أنسه عرس جاسم

انگطع نحره وعلى الغبره بدر نايم

بگيت انخه اصرخت صرخه ابگلب هايم

حرمتوني وهظمتوني يولياني

* * *

وگمر هاشم عهد راسم وفه اويايه

تكفّلني وكفل ظعني ونصب ثايه

ألف وسفه انگطع چفه على الرايه

تعنيته النهر ريته نشف مايه

تفجعوني وتخلوني يولياني

* * *

بدمع يسفح شفت مذبح أبو اليمه

اختفت روحه بدمه جروحه انخضب جسمه

الشهم شفته وشفت جثته وصحت يمه

الگلب لجلك يخي مثلك نزف دمه

اخبروني اشتوصوني يولياني

* * *

أحشمكم على اخيمكم هجوم الخيل

حرم احنه ابهظم طحنه ولفانه الليل

اسهرت ليلي انهدم حيلي ولا ظل حيل

خيم تلهب أون وانحب واصيح الويل

تسمعوني وتعيفوني يولياني؟

(لندن ١٩٩١ م)

الديار الخالية

خاليه الدار الدار وين أهليها

گبل چانت زاهيه ليش ظلت خاليه

وين أهاليها

* * *

انشد أعله الدار من دموع العين

موحشه صارت ابغيبة الطيبين

بس عليل نشوف وين أهلها وين

تنشد الروح الروح من يدليها

ها ذي دار الغانمه ليش أمست مظلمه

وين أهاليها

* * *

وسفه هاي الدار تصبح بهالحال

بس عليل اينوح ما نشوف ارجال

عايله ظلت بس حرم وأطفال

موحشه اليوم اليوم ولا زلم بيها

انظر لهذا الوضع واصرخ بصوت الدمع

وين أهاليها

* * *

بالدمع ناديت وين أبو اليمه

بعده هاي الدار موحشه وظلمه

بس علي السجاد ولا أهل يمه

دمعته تسيل تسيل وجفنه يجريها

بنظر لدار الحزن ويصرخ بدمع الجفن

وين أهاليها

* * *

انشد واصرخ والدمع ساجم

اسألچ يا دار عن گمر هاشم

جاوبتني الدار غدرته الوادم

غدرته الناس الناس واشنحاچيها

مظلمه ديار الفخر وين عباس الگمر

وين أهاليها

* * *

هايم وناديت بدمعة عيوني

وين الأكبر صار ما تخبروني

ابلوعة الأحزان خابت اظنوني

مهجتي الحال الحال يصعب اعليها

تلتهب نار الحشه وعگب الأكبر موحشه

وين أهاليها

* * *

هايم وفكري بالنوايب هام

انشد ورايد خبر عن جسام

شمعة العريس مصدر الآلام

شمعته اشلون اشلون دهره يطفيها

عگب نور ابن الحسن خاليه ديار المحن

وين أهاليها

* * *

من اهالي الدار خابت أمالي

عالطفل انشد واندهش حالي

وين عبد ال له بس مهد خالي

گالوا انصاب انصاب هذي تاليها

حتى طفل البالمهد غاب شا تأمل بعد

وين أهاليها

* * *

(الكاظمية المقدسة ١٩٧٤ م)

بين الكعبة وبين اللوح

يهلال الغابت أنوارك بين الكعبه وبين اللوح

جارت هاي الدنيه أعلينه تدري وتعلم يا مهدينه

مجروح ايعاتب مجروح

* * *

يا گلب المختار وروحه يا شمعة عين الكرار

يا تيار افلاك العالم والكون ابچفك يندار

يا ميعاد الطال أعلينه واحنه نصيح الثار الثار

يا من بظهورك عسّلك يشعل نار ويخمد نار

رمحك يشعل نار الموعد ثارك يخمد نار النوح

چم نار اللي تسعر بينه تدري وتعلم يا مهدينه

مجروح ايعاتب مجروح

* * *

يالمهدي امصايبكم كثرت لا چن نذكر منها مصاب

نعوف الهادي وحالة دفنه ونترك محسن يم الباب

ونترك حيدر جدك لمن رأسه اتصوب بالمحراب

لاچن نذكر حالة عمك دلاله بنار السم ذاب

عالمسموم اتهل عبرتنه ونحسبلك يالمهدي جروح

عن هذا الحال وتبيينه تدري وتعلم يا مهدينه

مجروح ايعاتب مجروح

* * *

يالعايش ما بين الوادم لاچن غايب عن كل عين

سهم غيابك بينه اتفرس واحنه انعد سنين سنين

نعرضلك هالحال ونشرح والمدمع يعرض تبيين

عمك بالسم چبده اتگطع ونعشه نصاب بسهم البين

ما يخفاك الحال وتعلم والمجمل عندك مشروح

حال وبالمدمع تدوينه تدري وتعلم يا مهدينه

مجروح ايعاتب مجروح

* * *

سجلت بصفحة آلامك موقف بالمدمع مكتوب

سهام الجور الصابت نعشه اتحولت للطف يالمحجوب

طفوا شمعة جاسم بيها وچفه من المنحر مخضوب

يا محنه التگدر تنساها عمك لو شبله المصيوب

الوالد نعشه سهام اتصوب وجاسم بالمصرع مذبوح

اسهام الترميكم ترمينه تدري وتعلم يا مهدينه

مجروح ايعاتب مجروح

* * *

للطف لو رايد تتعنه شتشاهد بألطف يا حال

يالمهدي عيونك ما تنظر غير الخدّر والأطفال

وتشوف خيامك تتلاهب وتشوف اجساد أعله رمال

وتشوف السجاد امكبل لاچن بصفاد واغلال

وتسمع عمتك زينب تصرخ نطلع وين ووين نروح

ما ظل مغوار ايحامينه تدري وتعلم يا مهدينه

مجروح ايعاتب مجروح

* * *

يالمهدي ونعرضلك صوره اتهدم حيلك يا موعود

لاچن نعلم يا غايبنه حلمك من حلم المعبود

نرويلك موقف عن زينب والموقف عندك مشهود

اتعنت للعباس وشافت بالمصرع چفين وجود

وگفت يم جسمه ودمعتها مزجتها ابدمه المسفوح

اشعملت من شافت چفينه تدري وتعلم يا مهدينه

مجروح ايعاتب مجروح

* * *

(دمشق ١٩٩٠ م)

قلب العقيلة زينب (عليها السلام)

ما جزعت من الغرب أنت صخره لو گلب

اشما تزيد الآلام تبتسم للأيام

أنت صخره لو گلب

* * *

يا گلب حيرت البشر باوصافك

اشما ينفتح جرحك اظنّه شفافاك

ياللي مزجت اهمومك بأطيافك

أرد أنشدك چم والي بألطف عافك

ما تهاب من الخطر گلب أنت لو حجر

اشما تجي عليك اسهام تبتسم للأيام

أنت صخره لو گلب

* * *

يا گلب وبصفحة صمودك مكتوب

من شفت جمر الخيم اصبح منشوب

شفتك خيم للحرم بألطف منصوب

چم نار بيك وانت صامد متذوب

نار من جمر الظمه والخيام المظرمه

حرگوا عليك اخيام تبتسم للأيام

أنت صخره لو گلب

* * *

يا گلب خليت البشر متحيرة

مخلوق من دم ولحم مو صخره

چم نار بيك من الدهر مستعره

وانت بصمودك للدهر تحتقره

دهر هذا مو بشر اخذ من عنده الحذر

وانت بين الظلام تبتسم للأيام

أنت صخره لو گلب

* * *

يا گلب كل هالفاجعه وما تنهار

مو گلب أنت، أنت لعيالك دار

والخيم من شبت بنار الأشرار

ضلعي اعصرك وبدمك اطفيت النار

ابدمك اطفيت الخيم واجمعت بيك الحرم

صابر وما تنضام تبتسم للأيام

أنت صخره لو گلب

* * *

يا گلب بالعز والعزم ما تنقاس

أصبحت مضرب مثل ما بين الناس

صبرك أظن من صبر گلب العباس

يوم الوصل للنهر مرفوع الراس

ظامي واحتل العذب وانحرم من الشرب

رفع راية أحكام تبتسم للأيام

أنت صخره لو گلب

* * *

يا گلب تدري اشگال راعي الرايه؟

هاي الحرم تنضام هاي احچايه

للعيله لو آخذ الماي اويايه

لو أخبط ابدمي الفرات ومايه

مثل ما گال الگمر ضحّه يم شاطي النهر

وجروحه ما تلتام تبتسم للأيام

أنت صخره لو گلب

* * *

(طهران ١٩٨٥ م)

موال ندبة للرسول (ص) عن لسان زينب (ع)

يا لهادي جمر الهظم بحشاشتي يا جد

وحزن البگلبي حزن مثله فلا ياجد

لمصاب شبلك تظن دمع الجفن ياجد

ما يجدي دمعي ولا تبره العلل وتصيح

اغبرت سمانه ولا تصفه بعد وتصيح

هاذي بناتك اجت من كربله وتصيح

يا جدي گطعوا نحر ريحانتك ياجد

* * *

انتهي الجزء السادس

ويليه الجزء السابع

بعون الله تعالى

الفهرس

مقدمة ٢

واجداه وامحمداه ٤

وا أبتاه ٧

نفذ صبري ٩

الحسن المسموم ١١

قائد الدنيا والدين ١٣

حفظ الوعود ١٥

تاج الفخر ١٩

شمعة حياتك ٢١

افدي العمر ٢٣

اذكر اتعاب سنيني ٢٥

يا عباس أنت المسؤول ٢٧

أين طفلك ٣٠

آخر ليله ٣٢

جمرة مصيبتي ٣٤

يا أيها الحماة ٣٦

جئت إلى قبرك (عگيلي) ٣٨

حان رجوعي ٤٠

صرخة بضمير الوجدان ٤٢

يا روح الإنسانية ٤٤

العواقب بالتجارب ٤٦

آيات دستور الوحي ٤٨

أم المصائب ٥١

لوعة البتول ٥٣