امامين حسنين عليهما السلام ثقافتى اور فکر اسلامى - نيٹ ورک

یہ کتاب برقی شکل میں نشرہوئی ہے اور شبکہ الامامین الحسنین (علیہما السلام) کے گروہ علمی کی نگرانی میں اس کی فنی طورپرتصحیح اور تنظیم ہوئی ہے

مہدی آلِ محمد

کُتب اہلِ سُنّت کے آئینہ میں

مؤلِف :

حجةُ الاِسلام و المسلمین جناب ہادی عامری(مدظلہ العالی)

مترجم

مولاناسید بہادُر علی زیدی قُمی

ناشر

انوار القرآن اکیڈمی پاکستان

مشخصات

نام کتابٍ: مہدی آل محمد کتب اہل سنت کے آئینہ میں

مؤلِف :حجةُ الاِسلام و المسلمین جناب ہادی عامری(مدظلہ العالی)

مترجم: مولانا سید بہادُرعلی زیدی قمی

کمپوزنگ:سن شائن کمپوزنگ سنٹر (۰۹۱۹۱۹۶۱۴۵۷)

طبع اول: ۲۰۱۵ ء

تعداد: ۱۰۰۰

ناشر: انوار القران اکیڈمی پاکستان

تقدیم

میں اپنی اس مختصر سی کوشش اور سعی ناچیز کو قطب عالم امکان، محور دائرۂ عالم وجود، مصلح جہان، منجی عالم بشریت، حضرت بقیۃ اللہ الاعظم ارواحنا لتراب مقدمہ الفداء اور اس آفتاب ولایت کے ظہور کے حقیقی منتطرین، اور اس امام عصر (عج) کی غیبت کے زمانے میں ایمان و عمل صالح پر قائم و دائم مؤمنین کی مقدس بارگاہ میں تقدیم کرتا ہوں۔

عرض ناشر

ہر دور میں علماء حقہ، دین و شریعتِ اسلام کا قران و سنت کی روشنی میں دفاع کرتے رہے ہیں اور انشاء اللہ کرتے رہیں گے.

انوار القران اکیڈمی پاکستان بھی عصری تقاضوں کو مدّنظر رکھتے ہوئے اس عزم و ارادہ کا اظہار کرتا ہے کہ قران کریم و سنت نبویﷺ کی روشنی میں دشمنان دین خدا کی جانب سے ہونے والے اعتراضات یا مذہب حقّہ شیعہ اثنا عشری کے مخالفین کے بہترین ، مسکت اورمناسب جواب دے سکے، نیز اپنی قوم و ملت کو قرانی معلومات، تفسیراور معارف قرانی سے متعلق خاطر خواہ معلومات فراہم کرسکے.

ادارہ اس ہدف کے پیشِ نظر حوزہ علمیہ کے فاضل عالم دین حجۃالاسلام و المسلمین جناب ہادی عامری (مدظلہ العالی) کی تالیف کردہ کتاب جسے مولانا سید بہادر علی زیدی قمی نے اردو کے قالب میں ڈھالا ہے،پیش کررہا ہے

ادارہ محترم مؤلف اور ان تمام حضرات کا تہہ دل سے شکریہ ادا کرتا ہے جنہوں نے اس کتاب کو آپ کے ہاتھوں میں پہنچانے کیلئے کسی بھی قسم کا تعاون فرمایا ہے.

آخر میں خداوند متعال سے دعاگو ہیں کہ وہ ہمیں قران کریم کی صحیح معرفت سے بہرہ مند فرمائے تاکہ ہم بہتر سے بہتر انداز میں اس کی تعلیمات پر عمل کرسکیں اور اس کی خدمت میں دن و رات کوشاں رہیں. آمین

مسٔول انوارالقران اکیڈمی پاکستان

گفتار مقدم

بسم الله الرحمن الرحیم الحمد لِلّٰه ربِّ العالَمِین، الحمدُ لِلّٰه ِ الواحِدِ الاَحَد، الفَرد الصمد، الذی لم یَلد وَ لَم یولد و لم یکن له کفواً اَحَد و الصلاة علی محمد عبده المجتبی و رسوله المصطفیٰ، اَرسله اِلیٰ کافَّة الوری، بشیراً و نذِیراً و داعیاً اِلیٰ الله باذنه و سراجاً منیراً و علیٰ اهل بیۡته أئمّة الهدیٰ و مصابیح الدجیٰ، الذین اَذهبَ الله عنه م الرجس و طهرهم تطهیرا و السلام علیٰ من اتبع الهدیٰ

مہدی آلِ محمدؐ کے وجود، غیبت، ظہور اور آخر الزمان میں آپ کی عدل و انصاف پر مبنی عالمی حکومت کے بارے میں صرف شیعہ کتب ہی میں روایات و احادیث بیان نہیں کی گئی ہیں بلکہ جب ہم مسلمانوں کے دیگر مختلف مکاتب فکر کی تفاسیر، کتب احادیث اور تاریخی کتب کا مطالعہ کرتے ہیں تو اہل سنت کی تمام عظیم و معتبر کتابیں مہدی آلِ محمدؐ کے شمائل و خصوصیات، وجود، غیبت، ظہور، آپ کی عالمی حکومت، آپ کا حسب و نسب، آپ کے طرز حکومت اور دیگر مختلف پہلوؤں کے بارے میں، حضور سرور کائنات حضرت محمد مصطفی (ﷺ)، اہل بیت اور صحابہ کرام کی قابل قدر احادیث و روایات سے لبریز و سرشار نظر آتی ہیں۔

لیکن اس روز روشن کی طرح واضح اور آشکار حقیقت کے باوجود بعض نا فہم، لجوج اور معاندین کی جانب سے یہ کوشش کی جاتی رہی ہے کہ وہ مہدی آل محمدؐ کے بارے میں عقیدہ کو شیعوں کی اختراع قرار دے کر مسلمانوں میں باہمی اختلاف و انتشار پیدا کریں اور جس کا نتیجہ دشمنان اسلام کی خدمت و کامیابی کے سوا کچھ نہیں ہوگا۔

اس صورت حال کے پیش نظر اور مسلمانوں کے باہمی اتحاد و اتفاق نظر کو ملحوظ خاطر رکھتے ہوئے ضرورت تھی کہ ایک ایسی مدلل و جامع کتاب قلمبند کی جائے جس میں اتحاد بین المسلمین، حقانیت شیعہ اور مہدی آل محمدؐ کے وجود، غیبت، ظہور اور عالمی حکومت کے بارےمیں بزرگان اہل سنت کی عظیم و معتبر کتب میں بیان شدہ حقائق، احادیث و روایات اور اقوال علماء کو جمع کیا جائے۔

بحمدِ للہ در دست کتاب حجۃ الاسلام و المسلمین جناب ہادی عامری نے شب و روز عرق ریزی انتھک سعی مشکور کی بدولت اس عظیم کام کو سر انجام تک پہنچایا اور اس علمی کاوش کا نام "مہدی آل محمد در کتب اہل سنت" قرار دیا ہے جسے حقیر نے اپنی پیاری قوم کے لئے اُردو کے قالب میں ڈھالنے کی کوشش کی ہے۔ میں امید کرتا ہوں کے حق کی تلاش کرنے والے یقیناً اس علمی کاوش سے بہرہ مند ہوں گے۔ آخر میں خداوند عالم سے بحق محمدؐ و آل محمدؑ طالب دعا ہوں کے اہل حق کی نصرت و مدد فرمائے۔ نیز حقیر کے والدین کو صحت و سلامتی اور طول عمر عنایت فرمائے میری شریک حیات کہ جس نے اس کتاب کو اردو کے قالب میں ڈھالنے کے لئے سکون کے لمحات مہیا کئے نیز میرے ہمدرد رفیق جناب مصطفی علی باںئی اور ثقة الاسلام مولانا شیخ کاظم حسین معصومی نے اس کتاب کو منظر عام پر لانے میں میری خاص معاونت و رہنمائی فرمائی ہے۔ خداوند عالم ان سب کے درجات میں اضافہ فرمائے اور ہم سب کی دنی وی و اخروی مشکلات کو دور فرمائے۔ آمین

و السلام احقر العباد

بہادر علی زیدی

مُقدمۂ مؤلف

محترم قارئین! آپ اس کتاب شریف میں جو کچھ ملاحظہ فرمائیں گے وہ درحقیقت حضرت مہدی موعود کے بارے میں اکثر علمائے اہلِ سنّت کے عقیدے پر ایک تحقیقی جائزہ ہے اور ہم نے استدلالات و براہین کو بہتر سے بہتر پیش کرنے کیلئے بعض مطالب شیعہ کتب سے نقل کئے ہیں ۔

اس کتاب کے لکھنے کا ہدف ، نسل جوان کو اپنے مولاحضرت مہدی (عج اللہ فرجہ الشریف)موعود کے بارے میں وارِدہونے والے ان شُبہات سے بچانا ہے جونادان دوست اور دانادُشمن کی طرف سے پیش کئے جاتے ہیں ۔

لہٰذا میں نے حضرت امام حسن عسکری علیہ السلام کی ولادت باسعادت کے دن کریمۂ اہلِ بیت حضرت فاطمہ معصومہ سلام اللہ علیھا کے حرم میں زیارت کا شرف حاصل کیا اور سوچتارہا کہ نہایت اخلاص کے ساتھ ایک کتاب لکھنی چاہیئے تاکہ اپنے وقت کے امام کے بارے میں اپنی تکلیف و ذمہ داری کو پورا کرتے ہوئے اورعلمی راہ میں جہاد کرتے ہوئے جناب کے سایۂ کرم میں باقی رہ سکوں اورکوئی ایسی بات تحریر نہ کروں جس سے یوسف زہرا، خاتم الاوصیا، حجة ابنِ الحسن العسکری علیہ السلام راضی نہ ہوں۔

میں اپنی اس کتاب کواپنے آقاومولا صاحب الزمان حضرت مہدی موعود (عج) کی مقدس بارگاہ میں ہدیہ کرتاہوں کیوں کہ اگر انکی عنایت اورخاص توجہ نہ ہوتی تومجھے کبھی بھی اسکے شروع کرنے کی توفیق حاصل نہ ہوتی۔ یہ کتاب ایک مقدمہ، بارہ ابواب اورایک خاتمہ پر مشتمل ہے بارہ ابواب معین کرنے کی وجہ یہ ہے کہ آپ روایاتِ مہدی موعود میں "اثناعشریہ " عنوان سے کچھ روایات ملاحظہ فرمائیں گے اورپروردگارِ عالم کی مدد سے کتب اہلِ سنّت میں وارد ہونے والی روایات اور دیگرروایات کے ذریعے یہ ثابت کریں گے کہ شیعوں کے بارہویں امام حضرت حجة ابنِ الحسن العسکریؑ ہی "مہدی موعود "ہیں۔

آخرمیں محترم قارئین سے گذارش ہے کہ اگراپ اس میں کوئی اعتراض و اشکال دیکھیں تو چشم پوشی کرتے ہوئے حقیر کاعذرقبول فرمائیں گے کیونکہ:

"العُذۡرُ عِندَ کِرَامِ النّاسِ مَقۡبُولٌ"

"وَ مِنَ الله ِ التَّوفیقُ وَ هُوَ حَسۡبِی و نِعۡمَ الوَکِیل"

ہادی عامری

قم حرم حضرت معصومہ ( سلام اللہ علیھا )

۲۷ ، ۲ ، ۱۳۸۴ شمسی

۱۶ مئی ۲۰۰۵/ ۸ ربیع الثانی ۱۴۲۶ ھ

مقدمات

شامل :

۱۔ اہلِ سُنّت کے کیا معنی ہیں ، اورحقیقی اہلِ سُنّت کون ہیں ؟

۲۔ حضرت امام جعفرصادق علیہ السلام کی اعلمیت اورواقفیت کے بارے میں ابو حنیفہ اور علمائے عامہ کا اقرار!

۳۔شیعہ کے معنی اور حقیقتِ تشیع ،

۴۔ گُفتار باطل اور اسکا دندان شکن جواب،

۵۔ کُتب اہلِ سُنّت میں حضرت علی کی بلافصل خلافت پر دلالت کرنے والی روایات نبوی،

۶۔ نہایت حیرت و تعجُب کا مقام۔۔۔،

۷۔تِلکَ عَشَرَةَ کامِلَة ،

۸۔ نتیجۂ مطلب ،

۸۔ شیعت کا آغاز اوراس لفظ کا وضع کرنیوالا ،

۱۰۔حقانیت شیعہ پراہلِ سُنّت کی روایات ،

۱۱۔ مہدی مُنتظر پر تمام مسلمانوں کا اعتقاد ،

۱۲۔اہلِ سُنّت کے نزدیک بحث مہدی موعود کی اصالت و اہمیت ،

۱۳۔حصۂ اوّل : اہلِ سُنّت محدثین و ناقلین روایات مہدی موعود علیہ السلام (۱۶۰ محدث)

۱۴۔حصہ ٔ دوئم: روایاتِ مہدی موعود علیہ السلام کے بارے میں مصادروکُتب اہلِ سُنّت (۱۵۵ کُتب)،

۱۵۔حصۂ سوئم : اہلِ سُنّت کے نزدیک اصحاب پیغمبر اور روّات روایات مہدی موعود (۵۴ اصحاب)۔