امامين حسنين عليهما السلام ثقافتى اور فکر اسلامى - نيٹ ورک

تفسير راہنما جلد ۲

یہ کتاب برقی شکل میں نشرہوئی ہے اور شبکہ الامامین الحسنین (علیہما السلام) کے گروہ علمی کی نگرانی میں تنظیم ہوئی ہے

تفسير راہنما

قرآنى موضوعات اور مفاہيم كے بارے ميں ايك جديد روش

دوسرى جلد

مؤلف: آيت الله ہاشمى رفسنجاني

اور

مركز فرہنگ و معارف قرآن كے محققين كى ايك جماعت

مترجم: معارف اسلام پبلشرز

ناشر:نور مطاف

جلد: دوسرى

اشاعت:اول

تاريخ اشاعت:شوال المكرم ١٤٢٤ھ _ق

Web : www.maaref-foundation.com

Email: info@maaref-foundation.com

جملہ حقوق طبع بحق معارف اسلام پبلشرز محفوظ ہيں _

چند اہم نكات:

بسم الله الرحمن الرحيم

و صلى الله على سيدنا و مولينا ابى القاسم محمد و على اهل بيته الطاهرين و لعنة الله على اعدائهم اجمعين

يا ايها الناس قد جائتكم موعظة من ربكم و شفاء لما فى الصدور و هدى و رحمة للمؤمنين

(يونس/٥٨)

١) آيات كا ترجمہ مرحوم حجة الاسلام والمسلمين جناب سيد ذيشان حيدر جوادى صاحب كے قرآنى ترجمہ سے ليا گيا ہے _ اس اعتبار سے اگر ترجمہ اور تفسير ميں كہيں كہيں اختلاف رائے نظر آئے تو يہ طبيعى ہوگا_

٢) كتاب كے حواشي( Foot Notes ) اس بات كے شاہد ہيں كہ اس تفسير كے مايہ ناز مفسر اور ان كے معاون علماء كى ٹيم كى يہ كوشش رہى ہے كہ جامع و متنوع موضوعات اور اشاريوں كے ذريعے اس تفسير كى انفراديت كو باقى ركھنے كے ساتھ ساتھ ديگر معروف و اہم تفاسير سے بھى استفادہ كيا جائے_

٣) توجہ رہے كہ متن ميں جن مطالب كے سامنے ستارے كى علامت * كا استعمال ہوا ہے ،ان مطالب كو ايك احتمال كے طور پر بيان كيا گيا ہے لہذا محققين ان نكات ميں خود غور فرمائيں _

٤) تفسير كے ترجمہ ميں اشاريوں كو اردو حروف تہجى كے مطابق مرتب كرديا گيا ہے _

٥) اس نفيس تفسير كى اساس و بنياد، جليل القدر عالم اور عظيم الشان محقق حضرت آيت الله ہاشمى رفسنجانى كى

جديد اور كم نظير عالمانہ تحقيقات كا نتيجہ ہے اور آپ كے زير نظر'' مركز فرہنگ و معارف قرآن'' كے محققين نے اپنى كاوشوں كے ذريعہ اس كام كو پايہ تكميل تك پہنچايا_

٦) يہ تفسير ترتيبى و موضوعاتى ہونے كے ساتھ ساتھ ايسے بعيد موضوعات كے لئے ايك راہنما كليد ہے جنہيں سخت كاروكاوش كے بعد تلاش كيا جاسكتاہے _ ان موضوعات كو جامع مفيد اور متنوع اشاريوں كى صورت ميں دست رسى اور استفادے كے قابل بناديا گيا ہے _

٧)فارسى تفسير كے متن ميں موجود روايات بغير ترجمہ كے ذكر كى گئي ہيں جبكہ تفسير كے اردو ترجمہ ميں بہتر استفادہ كيلئے روايات كا اردو ترجمہ بھى كرديا گيا ہے _

٨)ترجمہ كرنے والے گروہ نے سعى و كوشش كى ہے كہ يہ ترجمہ نقائص اور خاميوں سے محفوظ ہو ليكن پھر بھى مؤسسہ معارف اسلام پبلشرز تفسير كے شائقين اور اپنے قارئين كو پيش كش كرتاہے كہ اگر كسى قسم كى خامى اور نقص كى جانب متوجہ ہوں يا كوئي مفيد مشورہ ہو تو مؤسسہ كو آگاہ فرمائيں ، آپ كى آراء كو مؤسسہ خوشى سے قبول كرے گا _

آخر ميں تمام محققين محترم كے شكر گزار ہيں جنہوں نے تفسير راہنما كى اس جلد كے ترجمہ، تصحيح اور نظر ثانى كے امور كو انتہائي دقت اور محنت سے انجام ديا _

بارگاہ رب العزت ميں دعا ہے كہ امام عصر حضرت بقية الله الاعظم (ارواحنا فداہ) كے زير سايہ اسلامى علوم و

معارف كى ترويج اور نشر و اشاعت كى راہ ميں ہميں دن دگنى اور رات چگنى ترقى عنايت فرمائے_بحق محمد: و آل محمد(عليھم السلام)

معارف اسلام پبلشرز

وَأَتِمُّواْ الْحَجَّ وَالْعُمْرَةَ لِلّهِ فَإِنْ أُحْصِرْتُمْ فَمَا اسْتَيْسَرَ مِنَ الْهَدْيِ وَلاَ تَحْلِقُواْ رُؤُوسَكُمْ حَتَّى يَبْلُغَ الْهَدْيُ مَحِلَّهُ فَمَن كَانَ مِنكُم مَّرِيضاً أَوْ بِهِ أَذًى مِّن رَّأْسِهِ فَفِدْيَةٌ مِّن صِيَامٍ أَوْ صَدَقَةٍ أَوْ نُسُكٍ فَإِذَا أَمِنتُمْ فَمَن تَمَتَّعَ بِالْعُمْرَةِ إِلَى الْحَجِّ فَمَا اسْتَيْسَرَ مِنَ الْهَدْيِ فَمَن لَّمْ يَجِدْ فَصِيَامُ ثَلاثَةِ أَيَّامٍ فِي الْحَجِّ وَسَبْعَةٍ إِذَا رَجَعْتُمْ تِلْكَ عَشَرَةٌ كَامِلَةٌ ذَلِكَ لِمَن لَّمْ يَكُنْ أَهْلُهُ حَاضِرِي الْمَسْجِدِ الْحَرَامِ وَاتَّقُواْ اللّهَ وَاعْلَمُواْ أَنَّ اللّهَ شَدِيدُ الْعِقَابِ (١٩٦)

حج اور عمرہ كوالله كے لئے تمام كرو اب اگر گرفتار ہو جاؤ تو جو قربانى ممكن ہو وہ دے دو اور اس وقت تك سر نہ منڈا ؤ جب تك قربانى اپنى منزل تك نہ پہنچ جائے _اب جو تم ميں سے مريض ہے يا اس كے سر ميں كوئي تكليف ہے تو وہ روزہ يا صدقہ يا قربانى ديدے پھر جب اطمينان ہو جائے تو جس نے عمرہ سے حج تمتع كا ارادہ كيا ہے وہ ممكنہ قربانى ديدے اور قربانى نہ مل سكے تو تين روزے حج كے دوران اور سات واپس آنے كے بعد ركھے كہ اس طرح دس پورے ہو جائيں _ يہ حج تمتع اور قربانى ان لوگوں كے لئے ہے جن كے اہل مسجد الحرام كے حاضر شما رنہيں ہوتے او رالله سے ڈرتے رہو اور يہ ياد ركھو كہ خدا كا عذاب بہت سخت ہے_

١_ اعمال حج و عمرہ كا مكمل طور پر انجام دينا واجب ہے_و اتموا الحج و العمرة لله

٢_ حج و عمرہ كى ادائيگى صرف خدا كى خوشنودى كے

ليئے ہونى چاہيئے_و اتموا الحج و العمرة لله

٣_ جسے حج و عمرہ سے روك ديا گيا ہو احرام سے خارج ہونے كے ليے ضرورى ہے كہ جوچوپايا ( گائے ، اونٹ، گوسفند ) اسے آسانى سے ميسر ہو، اس كى قربانى كرے_فان احصرتم فما استيسر من الهدي

محصور اس مُحرم كو كہتے ہيں جو مرض يا دشمن كے روكنے كى وجہ سے حج و عمرہ كے اعمال كو مكمل نہ كرسكے_

٤_ جو شخص احرام باندھنے كے بعد محصور ہوجائے اس پر حج و عمرہ كے اعمال كى تكميل واجب نہيں ہے_و اتموا الحج فان احصرتم فما استيسر من الهدي

٥_ قربانى كے قربان گاہ تك پہنچنے سے پہلے محصور كيلئے سر منڈانا حرام ہے_ولاتحلقوا رؤسكم حتى يبلغ الهدى محله

٦_ قربانى جب قربان گاہ پر پہنچ جائے تو سرمنڈوا كر احرام كھول سكتا ہے_فان احصرتم فما استيسر من الهدى و لاتحلقوا رؤسكم حتى يبلغ الهدى محله اس آيت سے ظاہر ہوتا ہے كہ قربانى كو قربان گاہ تك پہنچاكر سرمنڈانا احرام كھولنے كيلئے ضرورى ہے نہ كہ محصور كے ليے خاص شرعى حكم_

٧_ قربانى كو صرف قربانگاہ ميں نحر يا ذبح كيا جاسكتاہے_حتى يبلغ الهدى محله

٨_ جو محرم بيمار ہو يا اس كے سر ميں تكليف ہو تو وہ قربانى كرنے سے پہلے سر منڈوا سكتا ہے_ولا تحلقوا رؤسكم فمن كان منكم مريضاً يہاں پر ''مريض''سے مراد اسكى قسيم (اوبہ اذى من راسہ) كو ديكھتے ہوئے ، وہ مرض ہے جس كا علاج صرف سر منڈوانے سے ہوسكتا ہو نيز ''بہ اذي'' سے مراد وہ تكليف ہے جو مرض كے علاوہ كسى دوسرى چيز سے ہو جيسے مُحرم كے سر ميں جوؤں كا ہونا_

٩_ بيمارى ، شرعى فريضے ميں تخفيف كا موجب ہے_فمن كان منكم مريضاً او به اذًى من راسه ففدية

١٠_ محرم كے معذور ہونے كى صورت ميں قربانى سے پہلے سر منڈانے كا فديہ (كفارہ) روزہ ، صدقہ يا قربانى ہے _

فمن كان منكم ففدية من صيام او صدقة او نسك

١١_ عمرہ كى تكميل كے بعدسے مناسك حج شروع ہونے تك احرام كے تمام محرمات حلال ہوجاتے ہيں _

فاذا امنتم فمن تمتع بالعمرة الى الحج

١٢_ حج تمتع ميں عمرہ كے اعمال حج سے پہلے انجام ديئے جاتے ہيں _فمن تمتع بالعمرة الى الحج

١٣_ حج تمتع ميں قربانى واجب ہے_فمن تمتع فما استيسر من الهدي

١٤_ جو شخص كسى وجہ سے قربانى نہ كرسكے تو اس پر تين روزے حج كے دنوں ميں اور سات روزے واپس لوٹنے پرواجب ہيں _( پورے دس دن كے روزے)_فمن لم يجد فصيام ثلثة ايام فى الحج و سبعة تلك عشرة كاملة

١٥_ حج تمتع مكہ سے باہر رہنے والوں كا فريضہ ہے_ذلك لمن لم يكن اهله حاضرى المسجد الحرام

١٦_ مكى وہ شخص ہے جو اہل و عيال كے ساتھ مكہ ميں رہائش پذير ہو_ذلك لمن لم يكن اهله حاضرى المسجد الحرام

١٧_ حج كے اعمال كى انجام دہى ميں كسى قسم كى كوتاہى نہ كى جائے_واتقوا الله

احكام حج بيان كرنے كے بعدتقوائے الہى كا حكم دينا اعمال حج كو اسى طرح انجام دينے كى تاكيد ہے جس طرح خدا وند عالم نے حكم ديا ہے_

١٨_تقوي كى رعايت ضرورى ہے_واتقوا الله

١٩_تقوي شرعى ذمہ داريوں كى انجام دہى ميں ممد و معاون ہے_و اتموا الحج و العمرة و اتقوا الله

٢٠_ خداوندعالم سخت عذاب دينے والا ہے_ان الله شديد العقاب

٢١_ اعمال حج كو مكمل طور پر انجام نہ دينا سخت سے سخت عذاب الہى ميں مبتلا ہونے كا سبب بنتاہے_واتموا الحج ...واعلموا ان الله شديد العقاب

٢٢_ شدت عذاب كى طرف توجہ، احكام خدا كے مكمل طور پرانجام دينے كاباعث ہے_و اتموا الحج والعمرة واعلمو ا ان الله شديد العقاب

٢٣_ خدا تعالى كے سخت عذاب كى طرف توجہ تقوي كا سبب بنتى ہے_واتقوا الله واعلموا ان الله شديد العقاب

يہ مطلب اس صورت ميں ہوسكتاہے كہ''و اعلموا ...''،''واتقوا الله '' كيلئے علت ہو_

٢٤_تقوي سے بے اعتنائي اور خداوندعالم كے احكام كى نافرمانى سخت عذاب كا موجب ہے_و اتموا الحج واتقوا الله و اعلموا ان الله شديد العقاب

٢٥_ صدر اسلام كے مسلمانوں ميں اعمال حج كى مخالفت كے اسباب پائے جاتے تھے_و اتموا الحج و اتقوا الله و اعلموا ان الله شديد العقاب احكام حج بيان كرنے كے بعد آيت كا يہ دھمكى آميز انداز بتلاتا ہے كہ بعض مسلمان احكام حج كى مخالفت يا ان پر بالكل عمل نہ كرنے كے خيالات ركھتے تھے_

٢٦_ حقيقت ميں حج كى تكميل اور اس كا كمال، امام (ع) سے ملاقات ميں ہے_و اتموا الحج امام محمد باقر (ع) كى حديث ہے_''تمام الحج لقاء الامام'' (١) ترجمہ: حج كى تكميل ملاقات امام (ع) ہے_

٢٧_ حج ميں محصور كاايك مصداق مريض بھى ہے_فان احصرتم امام جعفر صادق (ع) نے فرمايا:''المحصور المريض '' (٢)

٢٨_ كم از كم قرباني، ايك گوسفندہے_فما استيسر من الهدي امام رضا(ع) نے فرمايا:فما استيسر من الهدي، يعنى شاة (٣)

٢٩_ قربانى سے پہلے سرمنڈوانے كا كفارہ، تين روزے يا چھ مسكينوں كو صدقہ دينا يا ايك گوسفند كى قربانى كرنا ہے_

فمن كان منكم مريضاً او صدقة او نسك امام صادق (ع) نے فرمايا:وجعل الصيام ثلاثة ايام والصدقة على ستة مساكين لكل مسكين مدين و النسك شاة .. (٤) روزے تين ہيں اور صدقہ چھ مسكينوں كو دينا ہوگا، ہر مسكين كو دو مد اور ''نسك'' سے مراد گوسفند ہے

٣٠_ ہر وہ شخص مكى كہلائے گا جو مسجد الحرام كے چاروں طرف اٹھارہ ميل كے اندر رہتا ہو_لمن لم يكن حاضرى المسجد الحرام مندرجہ بالا آيت كے بارے ميں امام صادق (ع) نے فرمايا_من كان منزله على ثمانية عشر ميلاً من بين يديها و ثمانية عشر ميلاً من خلفهاوثمانية عشر ميلاً عن يمينها و ثمانية عشرميلاًعن يسارها فلامتعة له (٥) جس كا گھر مسجد الحرام كے آگے ، پيچھے دائيں اور بائيں چاروں اطراف ميں اٹھارہ ميل كے اندر ہو تو اس كيلئے حج تمتع نہيں ہے _

____________________

١) كافي، ج ٤، ص ٥٤٩، ح ٢، نور الثقلين، ج ١، ص ١٨٣، ح٦٥٠_ ٢) كافي، ج ٤، ص ٣٦٩، ح ٣ ، نور الثقلين، ج ١، ص ١٨٣، ح ٦٥٤_

٣) عيون اخبار الرضا(ع) ، ج٢، ص١٢٠، ح١، نور الثقلين ، ج ١، ص ١٨٥، ح ٦٦٠_ ٤) كافي، ج ٤، ص ٣٥٨، ح ٢، نور الثقلين، ج١، ص ١٨٧، ح ٦٦٤ و ٦٦٦_

٥) كافي، ج ٤، ص ٣٠٠، ح ٣، نور الثقلين، ج ١، ص ١٩٢، ح ٦٩٢_

٣١_ حج ميں قربانى كے وجوب كى حد اس كا آسانى سے ميسّر ہونا ہے_فمن تمتع فما استيسر من الهدي

٣٢_ ميقات كے علاوہ كسى اور جگہ سے مُحرم ہونا اور خصى حيوان كى قربانى كرنا جائز نہيں ہے_واتموا الحج و العمرة

امام رضا (ع) سے روايت ہے كہلايجوز الاحرام دون الميقات قال الله عزوجل ''واتموا الحج والعمرة لله '' ولايجوز ان يضحى بالخصى لانه ناقص ... (٦) ميقات كے علاوہ كسى اور جگہ سے احرام باندھنا جائز نہيں ہے كيونكہ اللہ تعالى كا فرمان ہے '' و اتموا الحج و العمرة للہ '' اور خصى جانور كى قربانى جائز نہيں ہے كيونكہ وہ ناقص ہے_

٣٣_ اہل مكہ اور اس كے قرب و جوار ميں رہنے والوں كے علاوہ كسى اور كے ليے حج قران اور افراد جائز نہيں ہے_

واتموا الحج والعمرة لله امام رضا(ع) سے مروى ہے:لا يجوز القران والافراد الذى يستعمله العامة الا لاهل مكه وحاضريها قال الله تعالى ''و اتموا الحج و العمرة لله .'' (٧) اہل سنت جو حج افراد يا قرآن انجام ديتے ہيں وہ صرف اہل مكہ اور مكہ ميں رہنے والوں كيلئے جائز ہے كيونكہ اللہ تعالى كا فرمان ہے ''و اتموا الحج والعمرة لله ...''_

٣٤_ حج و عمرہ كى تكميل اس وقت ہوگى جب نازيبا كلام، خدا تعالى كى نافرمانى اور جھگڑے سے پرہيز كيا جائے _

واتموا الحج والعمرة لله_امام محمد باقر (ع) اور امام جعفر صادق(ع) سے روايت ہے_ فان تمام الحج و العمرة ان لايرفث و لايفسق و لايجادل (٨) حج و عمرہ كى تكميل نازيبا كلام، خدا كى نافرمانى اور جھگڑے كو ترك كرنے كے ساتھ ہے_

٣٥_ حج و عمرہ كى تكميل كيلئے اس كے اعمال كى انجام دہى كے ساتھ ساتھ احرام كے محرمات سے پرہيز بھى ضرورى ہے_واتموا الحج و العمرة لله امام صادق (ع) سے مروى ہے_ ''يعنى بتمامهما اداؤهما و اتقاء ما يتقى المحرم فيهما '' (٩)'' حج و عمرہ كو تمام كرنے سے مراد يہ ہے كہ حج و عمرہ كى ادائيگى كے ساتھ ساتھ ان تمام چيزوں سے بچے جو احرام كے محرمات ہيں ''_

٣٦_ حج كى طرح عمرہ بھى واجب ہے_واتموا الحج و العمرة لله

امام صادق (ع) نے فرمايا:''العمرة واجبة على الخلق بمنزلة الحج لان الله

____________________

٦و٧) عيون اخبار الرضا(ع) ، ج ٢، ص ١٢٤، ح ١، ب ٣٥ _ نور الثقلين، ج ١، ص ١٨١، ح ٦٤١_

٨) تفسير عياشي، ج ١، ص ٨٨، ح ٢٢٥، نورالثقلين ، ج ١، ص ١٨١، ح ٦٤٢_

٩) كافي، ج ٤، ص ٢٦٤، ح ١، تفسير برھان، ج ١، ص ١٩٣، ح ٢_

عزوجل يقول واتموا الحج والعمرة لله '' (١) عمرہ بھى اسى طرح واجب ہے جس طرح حج كيونكہ اللہ تعالى كا فرمان ہے'' و اتموا الحج والعمرة لله''

٣٧_ اونٹ، گائے بھيڑ اور بكرى حج تمتع ميں قربانى كى اقسام ميں سے ہيں _ فمن تمتع بالعمرة الى الحج فما استيسر من الھدي

امام صادق (ع) نے فرمايا:''فما اسيتسر من الهدى امّا جزور و امّا بقرة و امّا شاة'' (٢)'' قربانى سے مراد اونٹنى گائے يا گوسفند ہے ''_

٣٨_ جو شخص قربانى ساتھ لايا ہو اس كيلئے جائز نہيں كہ قربانى كرنے سے پہلے سرمنڈا كرمُحلّ (احرام سے خارج) ہوجائے_و لاتحلقوا رؤسكم حتى يبلغ الهدى محله

امام صادق (ع) نے فرمايا: قال رسول الله (ص) و لم يكن يستطيع ان يحل من اجل الهدى الذى كان معه ان الله عزوجل يقول و لا تحلقوا رؤسكم ... (٣) رسول الله (ص) كا فرمان ہے كہ حاجى اپنى قربانى ساتھ لانے كى وجہ سے محل ہونے كى صلاحيت نہيں ركھتا_

٣٩_ مجبورى كى بنا پر سرمنڈانے كيلئے اگر روزہ ركھنا مشكل ہو تو اس كا كفارہ صدقہ ہے _ففدية من صيام او صدقة او نسك امام رضا(ع) اس آيت كے بارے ميں فرماتے ہيں : ''فاقام الصدقة مقام الصيام اذا عسر عليہ'' (٤)اگر روزے مشكل ہوں تو اس كى جگہ پر صدقہ دے دے_

٤٠_ حج كے اعمال انجام دينے سے پہلے عمرہ تمتع بجالانا واجب ہے_فمن تمتع بالعمرة الى الحج

امام صادق (ع) سے مروى ہے:''ان الحج متصل بالعمرة لان الله عزوجل يقول ''فاذا امنتم فمن تمتع '' فليس ينبغى لاحد الا ان يتمتع'' (٥)حج عمرہ سے متصل ہے كيونكہ اللہ تعالى كا فرمان ہے''فاذا امنتم فمن تمتع ...'' پس يہ سزاوار نہيں كہ حج سے پہلے عمرہ تمتع انجام نہ دے_

____________________

١) علل الشرائع، ج ٢، ص٤٠٨، ح ١، كافي، ج٤، ص ٢٦٥، ح ٤_ ٢) تفسير عياشي، ج ١، ص ٩٠، ح ٢٣٣، تفسير برھان، ج ١، ص ١٩٧، ح ١٧_

٣) كافي، ج ٤، ص ٢٤٨، ح ٦، علل الشرائع، ص ٤١٢، ح ١، ب ١٥٣_ ٤) عيون اخبار الرضا(ع) ، ج ٢، ص ١١٨، ح ١، علل الشرائع، ص ٢٧١، ح ٩ باب ١٨٢_

٥) علل الشرائع،ص٤١١، ح ١، ب ١٤٩، نور الثقلين، ج ١، ص ١٨٨، ح ٦٦٩_

٤١_ حج ميں قربانى كا مكمل بدل دس روزے ہيں :فمن لم يجد تلك عشرة كاملة

امام صادق (ع) سے مروى ہے: ''الكامل كمالها كمال الاضحية سواء اتيت بها او اتيت بالاضحية تمامها كمال الاضحية'' (١)كامل سے مراد قربانى كا كامل ہوناہے چاہے قربانى كى جگہ پر روزے ركھے يا خو د قربانى كرے ، ان دونوں چيزوں كا كامل ہونا قربانى كا كامل ہونا ہى ہے_

٤٢_ جو شخص قربانى پر قادر نہ ہو وہ سات ذى الحجہ، آٹھ ذى الحجہ (يوم الترويہ) اور نو ذى الحجہ كو تين دن تك ايّام حج ميں روزے ركھے گا_فمن لم يجد فصيام ثلاثة ايام فى الحج امام صادق (ع) سے اس حاجى كے بارے ميں سوال كيا گيا جو قربانى پر قدرت نہيں ركھتا تو آپ (ع) نے فرمايا: ''يصوم ثلاثة ايام فى الحج يوماً قبل التروية ويوم التروية ويوم عرفة'' (٢)وہ تين دن روزے ركھے سات ، آٹھ اور نو ذى الحجہ_

٤٣_ جو شخص قربانى نہ دے سكے اس پر تين روزے ايام حج ميں اور سات روزے گھر واپس آكر ركھنا واجب ہيں _

فمن لم يجد فصيام ثلاثة ايام فى الحج و سبعة اذا رجعتم امام صادق(ع) سے حج تمتع كرنے والے اس حاجى كے بارے ميں پوچھا گيا جو قربانى نہيں كرسكتا تو آپ (ع) نے فرمايا: '' يصوم ثلاثة ايام بمكة و سبعة اذا رجع الى اھلہ'' (٣) تو تين روزے مكہ ميں اور سات روزے گھر پلٹنے كے بعد ركھے_

٤٤_ حج تمتع كا حكم اس شخص كے ليے ہے جس كے گھر والے مكہ يا اس كے اردگرد اڑتاليس ميل كى حدودسے باہر رہتے ہوں _ذلك لمن لم يكن اهله حاضرى المسجد الحرام امام با قر (ع) اس آيت كے بارے ميں فرماتے ہيں :يعنى اہل مكة ليس عليھم متعة كل من كان اھلہ دون ثمانية و اربعين ميلا ذات عرق و عسفان كما يدور حول مكة فھو ممن دخل فى ھذہ الآية (٤)

٤٥_ حج تمتع اس شخص كے ليئے خاص ہے جس كے گھر والے مواقيت اور مسجد الحرام كے درميانى علاقے ميں نہ رہتے ہوں _

____________________

١) تھذيب شيخ طوسي، ج ٥، ص ٤٠، ح ٤٩، ب٤، نورالثقلين ج١ ص ١٨٩ ح ٦٧٣_

٢) كافي، ج ٤، ص ٥٠٨، ح ٣، نور الثقلين، ج١، ص ١٩٠، ح ٦٧٧ و ٦٧٩_ ٣) تھذيب شيخ طوسي، ج ٥، ص ٢٣٤، ح١٢٨ب ١٦ ، استبصار ج٢ ص ٢٨٢ ح ٢ ب ١٩٤_

٤) تھذيب شيخ طوسي، ج ٥ ، ص ٣٣ ، ح ٢٧ ، استبصار ، ج ٢، ص ١٥٧، ح ٣_

ذلك لمن لم يكن اهله حاضرى المسجد الحرام مذكورہ بالا آيت كے بارے ميں امام صادق (ع) فرماتے ہيں :ما دون المواقيت الى مكه فهو حاضرى المسجد الحرام (١)مكہ اور مواقيت كے درميان رہنے والے لوگ حاضرين مسجد الحرام ميں شمار ہو تے ہيں _

٤٦_ عمرہ تمتع كى ادائيگى كا وقت صرف حج كے مہينوں ميں ہے _فمن تمتع بالعمرة الى الحج

امام باقر (ع) نے فرمايا:ان العمرة واجبة بمنزلة الحج والعمرة فى اشھر الحج متعة (٢) حج كى طرح عمرہ بھى واجب ہے اور عمرہ تمتع حج كے مہينوں ميں ہے _

احرام: احرام كے احكام ٣٢; احرام كے محرمات ٣٥; احرام كے ميقات ٣٨

احكام: ١، ٢، ٣، ٤، ٥، ٦، ٧، ٨، ٩، ١٠، ١١، ١٢، ١٣، ١٤، ١٥، ٢٧، ٢٨، ٢٩، ٣٠، ٣١، ٣٢، ٣٣، ٣٦، ٣٧، ٣٨، ٣٩، ٤٠، ٤١، ٤٢، ٤٣، ٤٤، ٤٥، ٤٦،

احكام ثانوي: ٣، ٣٩

اسلام: صدر اسلام كى تاريخ ٢٥

اسماء و صفات: شديد ا لعقاب ٢٠

اضطرار: اضطرار اور شرعى فريضہ كا اٹھ جانا ٩

اللہ تعالى: اللہ تعالى كا عذاب ٢٠، ٢١، ٢٢، ٢٤

امامت و ولايت: ٢٦

انفاق: مساكين پر انفاق ٢٩

بيمار: بيمار كے احكام ٨، ٢٧

تربيت: تربيت كا طريقہ ٢٢

____________________

١) استبصار، ج ٢، ص ١٥٨، ح ٤، تھذيب شيخ طوسي، ج ٥، ص ٣٣، ح ٢٨، تفسير عياشي، ج ١، ص ٩٤، ح ٢٤٨_

٢) تفسير عياشي، ج ١، ص ٨٧، ح ٢١٩، تفسير برھان، ج ١، ص ١٩٤، ح ١٤_

تقوي: تقوي سے منہ پھيرنا ٢٤; تقوي كا پيش خيمہ ٢٣; تقوي كى اہميت١٨; تقوي كے اثرات١٩

حج: احكام حج١، ٢، ٣، ٤، ٥، ٦، ٧، ٨، ٩، ١٠، ١١، ١٢، ١٣، ١٤، ١٥، ٢٧، ٢٨، ٢٩، ٣٠، ٣١، ٣٢، ٣٣، ٣٤، ٣٥،٣٦، ٣٧، ٣٨، ٣٩، ٤٠، ٤١، ٤٢، ٤٣، ٤٤، ٤٥، ٤٦، حج افراد ٣٣; حج تمتع ١٢، ٣٧،٤٤،٤٥; حج قران ١٥، ٣٠، ٣٣; حج محصور ٤، ٥;حج ميں احرام ٦، ; حج ميں جدال ٣٤; حج ميں سر منڈانا٦، ٨، ١٠، ٢٩، ٣٨;حج ميں قربانى ٣، ٥، ٧، ٨، ٩، ١٣، ١٤، ٢٨، ٢٩، ٣١ خوف: خوف كے اثرات ٢٢، ٢٣

روايت: ٢٦، ٢٧، ٢٨، ٢٩، ٣٠، ٣٢، ٣٣، ٣٤، ٣٥، ٣٦، ٣٧ ، ٣٨، ٣٩، ٤٠، ٤١، ٤٢، ٤٣، ٤٤، ٤٥، ٤٦

روزہ : روزے كا كفّارہ ١٠،١٤،٢٩،٣٨،٣٩،٤١،٤٢

شرعى فريضہ: شرعى فريضہ پر عمل كرنے كا پيش خيمہ ١٩، ٢٢; شرعى فريضہ كى استطاعت ٣١

صدقہ : صدقہ كا كفارہ ١٠،٢٩،٣٩

عبادت: عبادت ميں اخلاص ٢

عذاب: عذاب كے موجبات ،٢١، ٢٤

عرفات :٤٣

علم: علم و عمل ٢٢، ٢٣

عمرہ: عمرہ تمتع ٤١، ٤٧; عمرہ كے احكام ١، ٢، ٣، ٤، ١١، ١٢، ٣٤، ٣٥، ٣٦، ٤٠

فديہ: ١٠

فقہى قواعد: ٩

قرباني: قربانى كا كفّارہ ١٠

كفّارے: ١٠، ١٤، ٢٩، ٤٠

محرمات: ٥ مضطر: مضطر كے احكام ٣٠

مقدس مقامات: ١٦، ٣٠، ٤٤،٤٥

نافرماني: نافرمانى كى سزا ; ٢١، ٢٤ واجبات: ١٣، ١٤، ٣٦، ٤٠، ٤٢

الْحَجُّ أَشْهُرٌ مَّعْلُومَاتٌ فَمَن فَرَضَ فِيهِنَّ الْحَجَّ فَلاَ رَفَثَ وَلاَ فُسُوقَ وَلاَ جِدَالَ فِي الْحَجِّ وَمَا تَفْعَلُواْ مِنْ خَيْرٍ يَعْلَمْهُ اللّهُ وَتَزَوَّدُواْ فَإِنَّ خَيْرَ الزَّادِ التَّقْوَى وَاتَّقُونِ يَا أُوْلِي الأَلْبَابِ (١٩٧)

حج چند مقررہ مہينوں ميں ہو تا ہے اورجو شخص بھى اس زمانے ميں اپنے اوپرحج لازم كرلے اسے عورتوں سے مباشرت ،گناہ اور جھگڑے كى اجازت نہيں ہے اور تم جو بھى خير كروگے خدا اسے جانتا ہے _ اپنے لئے زاد راہ فراہم كرو كہ بہترين زاد راہ تقوى ہے او راے صاحبان عقل ہم سے ڈرو _

١_ ضرورى ہے كہ حج كے اعمال اپنے خاص مہينوں ميں انجام پائيں _الحج اشهر معلومات

٢_ حج ميں ہر قسم كى نازيبا گفتگو (رفث) حرام ہے_فمن فرض فيهن الحج فلارفث ...فى الحج

٣_ حج ميں ہر قسم كى نافرمانى (فسوق) حرام ہے_فمن فرض فيهن الحج فلا رفث و لافسوق فى الحج

٤_ حج ميں ہر قسم كا جھگڑا (جدال) حرام ہے_فمن فرض فيهن الحج و لاجدال فى الحج

٥_ خداوند عالم كے نزديك حج كى قدر و منزلت اور اہميت_الحج اشهر معلومات ...و لاجدال فى الحج

اس آيت اور ديگر آيات ميں لفظ ''الحج ...''كے تكرار ،اور جدال سے روكنے سے معلوم ہوتا ہے كہ خدا وند متعال كى نظر ميں حج بہت ہى قابل قدر اور اہم عمل ہے_

٦_ خداوند عالم كا علم انسان كے تمام نيك اعمال پر محيط ہے_و ما تفعلوا من خير يعلمه الله

٧_ نيك اعمال كرنے والوں كو خدا وند متعال كى طرف سے جزا كى ضمانت _و ما تفعلوا من خير يعلمه الله

يہاں پر''يعلمہ الله '' كا جملہ انسان ك-ے نيك اعمال پر خدا كے احاطہ علم كو بيان كرنے كے ساتھ ساتھ ان كى نيكى پر جزا كى ضمانت سے بھى كنايہ ہے_

٨_ حج، نيك اعمال كے انجام دينے اورتوشہ آخرت كے حصول كا مقام ہے_و ما تفعلوا من خير يعلمه الله و تزودوا

٩_ انسان كا اپنے اعمال كے سلسلے ميں خدا كو حاضر و ناظر سمجھنا اسكے نيك اعمال بجالانے كا باعث بنتا ہے_

فمن فرض فيهن الحج و ما تفعلوا من خير يعلمه الله

١٠_ حج ميں نيك اعمال انجام دينے كى رغبت دلانا _فمن فرض فيهن الحج و ما تفعلوا من خير يعلمه الله

١١_ آخرت كيلئے زاد راہ (تقوى اور اعمال خير) فراہم كرنا ضرورى ہے_و تزودوا فان خير الزاد التقوي

١٢_ انسان دنيا ميں ايك مسافر كى مانند ہے_و تزودوا فان خير الزاد التقوي

''تزوّدوا '' كے استعمال سے يہ معلوم ہوتاہے كہ انسان كو ايك مسافر سے تشبيہ دى گئي ہے كہ جسے زاد راہ كى ضرورت ہوتى ہے_

١٣_ حج كيلئے ضروريات سفر كا آمادہ كرنا واجب ہے (جيسے لباس، كھانا اور دوسرى ضروريات )_و تزوّدوا

يہ تفسير مجمع البيان ميں منقول شان نزول سے استفادہ ہوتاہے_

١٤_ زہد ميں افراط كى مذمت _و تزودوا يہ مطلب بھى مجمع البيان ميں اس آيت كے ذيل ميں نقل كئے جانے والے شان نزول كى بنياد پر ہے كہ كچھ لوگ زاد راہ كو پھينك ديتے تھے تو اس آيت ميں ان لوگوں كے مقابل ميں كہا گيا ''تزودوا ...''_

١٥_تقوي بہترين توشہ ہے _فان خير الزاد التقوي

١٦_تقوائے الہى كى رعايت ضرورى ہے _و اتقون

١٧_ خداوند عالم نے صاحبان عقل (اولى الالباب) كوتقوي اختيار كرنے كى دعوت دى ہے_واتقون يا اولى الالباب

١٨_ عقلمندى كا تقاضا ہے كہ تقوي اختيار كياجائے_واتقون يا اولى الالباب

١٩_ عقل كى اہميت و منزلت_و اتقون يا اولى الالباب

٢٠_ حج ادا كرنے والے افراد عقلمند ہيں _الحج اشهر معلومات فمن فرض يا اولى الالباب

٢١_ حج كے مہينے شوال، ذى قعد اور ذى الحج ہيں ان كے علاوہ كسى اور مہينے ميں حج صحيح نہيں ہے_الحج اشهر معلومات امام صادق(ع) نے فرمايا:''الحج اشهر معلومات'' شوال و ذيقعده و ذوالحجة ليس لاحد ان يحج فى ما سواهن (١)حج كے مہنے شوال، ذيقعد اور ذى الحج ہيں ان كے علاوہ كسى اور مہينے ميں حج كرنا صحيح نہيں ہے_

٢٢_ حج ميں جماع، جھوٹ، گالى دينا اور ''لاوالله و بلى والله '' كے الفاظ سے قسم كھانا حرام ہے_فلا رفث و لا فسوق و لا جدال فى الحج امام صادق (ع) نے فرمايا:و''الرفث''، الجماع و''الفسوق'' الكذب و السباب و ''الجدال'' قول الرجل لا و الله و بلى والله '' (٢)''رفث'' سے مراد جماع، ''فسوق'' سے مراد جھوٹ بولنا اور گالياں دينا اور '' جدال'' سے مراد '' لا واللہ'' اور ''بلى واللہ '' كے الفاظ سے قسم كھانا ہے _

٢٣_ حج كا آغاز تلبيہ، اشعار اور تقليدسے ہوتا ہے_فمن فرض فيهن الحج امام صادق(ع) نے اس آيت''الحج اشهر معلومات ...'' كے بارے ميں فرمايا:والفرض التلبية و الاشعار و التقليد فاى ذلك فعل فقد فرض الحج (٣) حضرت(ع) نے فرمايا: تلبيہ، اشعار اور تقليد فرض ہے ان ميں سے جس نے كسى ايك كو بھى انجام دے ديا اس نے اپنے اوپر حج فرض كرليا_

٢٤_ حج ميں پے درپے تين سچى قسميں اور ايك جھوٹى قسم كھانا جدال كے مصاديق ميں سے ہے_و لا جدال فى الحج

امام صادق(ع) يا امام باقر (ع) فرماتے ہيں :''اذا حلف ثلاث ايمان متتابعات صادقا فقد جادل و اذا حلف بيمين واحدة كاذبا فقد جادل'' (٤)''جب كوئي تين پے درپے سچى قسميں كھائے تو اس نے جدال كيا ہے اور اگر كوئي ايك جھوٹى قسم كھائے تو اس نے بھى جدال كيا ہے''_

٢٥_ عورت كو كنائے سے جماع كے ليئے راغب كرنا اور ہر قسم كى معصيت كى دعوت ديناحج ميں حرام ہے_

فلا رفث و لا فسوق و لا جدال فى الحج

''فلارفث''كے بارے ميں آنحضرت (ص) نے فرمايا:الرفث الاعرابة والتعريض للنساء بالجماع و 'الفسوق'' المعاصى كلھا (٥) ''رفث'' يعنى عورت كو اشارے كنائے

____________________

١) كافى ج ٤ ص ٢٨٩ ح ١، تفسير نورالثقلين ج١ ص ١٩٣ ح ٦٩٧_ ٢) كافى ج٤ ص ٣٣٧ ح ٣، نورالثقلين ج١ ص١٩٤ ح٧٠٤_

٣) كافى ج٤ص ٢٨٩ح٢، تفسير برھان ج١ص١٩٩ح ٢_ ٤) كافى ج٤ ص ٣٣٨ ح٤، تفسير عياشى ج١ ص٩٥ ح ٢٥٨_ ٥) الدرالمنثور ج١ ص ٥٢٨_

سے جماع كے ليے آمادہ كرنا اور فسوق ہر قسم كى نافرمانى ہے_

آخرت: توشہ آخرت ٨، ١١

احكام: ١، ٢، ٣، ٤، ١٣، ٢١، ٢٢، ٢٣، ٢٥ افراط و تفريط: ١٤

اللہ تعالى: اللہ تعالى كا احاطہ ٦، اللہ تعالى كا علم ٦، ٩

تحريك: تحريك كے اسباب ٩

تربيت: تربيت كا طريقہ كار ٩

تقوي: تقوي كى اہميت ١١، ١٦، ١٧، ١٨; تقوي كى قدر و منزلت ١٥

جھوٹ: ٢٢، ٢٤

حج: احكام حج١، ٢، ٣، ٤، ١٣، ٢١، ٢٢، ٢٣ ، ٢٥ ; اوقات حج ١، ٢١;حج كا توشہ ١٣;حج كى اہميت٨; حج كى قدر و منزلت٥; حج ميں تلبيہ٢٣; حج ميں جماع ٢٢، ٢٥; حج ميں جھگڑا و نزاع ٤، ٢٢، ٢٤; حج ميں جھوٹ٢٢، ٢٤; حج ميں فسق٢، ٣ ;حج ميں قسم٢٢، ٢٤

خير: خير كى طرف رغبت دلانا ١٠

دنيا: دنيا و آخرت ٨، ١٢

ذى القعد كا مہينہ: ٢١

روايت: ٢١، ٢٢، ٢٣، ٢٤، ٢٥

رہبانيت: رہبانيت كى سرزنش ١٤

شرعى فريضہ: شرعى فريضہ پر عمل كرنے كا پيش خيمہ٩ شوال كا مہينہ ٢١

عقل: عقل كى قدر و قيمت ١٩

عقلاء: ١٧، ٢٠

علم: علم و عمل ٩

عمل: عمل صالح ٦; عمل صالح كى اہميت١١ ;عمل كى جزا ٧

غوروفكر: غوروفكر كى اہميت ١٨، ١٩

قرآن كريم: قرآن كريم كى تشبيہات ١٢ قسم: ٢٢، ٢٤

نيك لوگ: نيك لوگوں كى جزا ٧

واجبات:١٣

وقت شناسي: ١، ٢١

ہمبستري: ٢٢

لَيْسَ عَلَيْكُمْ جُنَاحٌ أَن تَبْتَغُواْ فَضْلاً مِّن رَّبِّكُمْ فَإِذَا أَفَضْتُم مِّنْ عَرَفَاتٍ فَاذْكُرُواْ اللّهَ عِندَ الْمَشْعَرِ الْحَرَامِ وَاذْكُرُوهُ كَمَا هَدَاكُمْ وَإِن كُنتُم مِّن قَبْلِهِ لَمِنَ الضَّآلِّينَ (١٩٨)

تمھارے لئے كوئي حرج نہيں ہے كہ اپنے پروردگار كے فضل و كرم كو تلاش كرو پھر جب عرفات سے كوچ كرو تو مشعرالحرام كے پاس ذكر خدا كرو او راس طرح ذكر كرو جس طرح اس نے ہدايت دى ہے اگرچہ تم لوگ اس سے پہلے گمراہوں ميں سے تھے _

١_ مناسك حج كى ادائيگى كے دوران تجارت اور كسب و كار كرنا جائز ہے_الحج اشهر معلومات ليس عليكم جناح ان تبتغوا فضلا اس آيت ميں جملہ ''ليس عليكم ...'' حج كے دوران تجارت اور كمائي كرنے كى طرف اشارہ ہے كيونكہ اسے حج كے احكام كے درميان ذكر كيا گيا ہے_ جبكہ حج كے علاوہ ديگر اوقات ميں تجارت اور كمائي كرنے كے بارے ميں شك و شبہ ہى نہيں ہے كہ اس كے صحيح يا غلط ہونے كو ثابت كيا جائے_

٢_ صدراسلام كے بعض مسلمان يہ غلط سوچ ركھتے تھے كہ حج كے دوران ميں اقتصادى سرگرمياں ناجائز ہيں _

ليس عليكم جناح ان تبتغوا فضلا

بعض مسلمان حج كے دوران خريد و فروخت كو گناہ سمجھتے تھے اس آيت ميں ان كے اس خيال كو رد كيا گيا ہے_ مجمع البيان (١)

____________________

١) مجمع البيان ج ٢ ص ٥٢٧ ، تفسير برہان ج ١ ص ٢٠١ حديث ٢_

٣_ تجارت اور كسب و كار كى اہميت اور قدر و قيمت_ان تبتغوا فضلا من ربكم اس آيت ميں تجارت اور كام كے نفع كيلئے ''فضلا من ربكم''كے الفاظ كا استعمال اس كى اہميت اور قدر و قيمت پر دلالت كرتا ہے_

٤_ انسان كو رزق اور روزى دينا خداوند متعال كا فضل و كرم ہے_فضلا من ربكم

٥_ خدا وند متعال كا بندوں پر فضل و كرم اس كى ربوبيت كا پرتو ہے_فضلا من ربكم

٦_ عرفات ميں وقوف مناسك حج ميں سے ہے_فاذا افضتم من عرفات عرفات سے كوچ (افاضہ) عرفات ميں وقوف كى صورت ہى ميں ہوگا _ اسى وجہ سے عرفات ميں وقوف كو مسلم ليا گيا ہے_

٧_ عرفات ميں وقوف كے بعد مشعر الحرام كى طرف جانا اور وہاں پر وقوف كرنا واجب ہے_فاذ ا افضتم من عرفات فاذكروا الله عند المشعر الحرام عرفات ميں وقوف كے بعد،مشعر الحرام ميں ذكر خدا كے واجب ہونے كا لازمہ مشعر الحرام كى طرف جانا اور وہاں وقوف كا واجب ہونا ہے_

٨_ مشعر الحرام ميں خدا كا ذكر واجب ہے_فاذكروا الله عند المشعر الحرام

٩_مشعر الحرام مقدس سرزمين ہے_فاذكروا الله عند المشعر الحرام

''مشعر''كے ساتھ ''الحرام '' كى صفت لانا اس سرزمين كے تقدس اور خاص احترام پر دلالت كرتا ہے_

١٠_ مشعر الحرام ميں ذكر خدا كا طريقہ ،خدا كے حكم كے مطابق ہونا چاہيئے_فاذكروا الله و اذكروه كما هداكم

''كماھداكم''كے معنى ''كما علّمكم'' كے ہيں يعنى ويسے ہى ذكر كرو جيسے اس نے تمہيں تعليم ديا ہے_

١١_ ذكر خدا كى كيفيت الہى تعليمات كے مطابق ہونى چاہيئے_و اذكروه كما هداكم سابقہ نكتے كى وضاحت كى بنياد پر_

١٢_ ہدايت جيسى نعمت كے مقابلے ميں خدا كا ذكر ضرورى ہے_و اذكروه كما هداكم اس بناپر كہ ''كما'' ميں ''كاف'' تعليل كيلئے ہو_

١٣_ ذكر خدا كے لئے ضرورى ہے كہ ہدايت الہى والى

نعمت سے مناسبت ركھتا ہو_و اذكروه كما هداكم

١٤_ خداوند متعال انسانوں كا ہادى اور معلم ہے_كما هداكم

١٥_ انسان ہدايت الہى كے بغير گمراہى ميں ہے_وان كنتم من قبله لمن الضالين

١٦_ اسلام سے پہلے لوگ گمراہ تھے_وان كنتم من قبله لمن الضالين

١٧_ ايام حج ميں خريد و فروخت كے جواز كا وقت ، مناسك حج كى تكميل اور احرام كھولنے كے بعد ہے_ليس عليكم جناح ان تبتغوا فضلا من ربكم آيت ''ليس عليكم ...''كے بارے ميں امام صادق (ع) فرماتے ہيں :''الرزق اذا احل الرجل من احرامه وقضى نسكه فليشتر و ليبع فى الموسم'' (١)يعنى طلب رزق اس وقت جائزہے جب آدمى احرام سے نكل آئے اور مناسك ادا كرلے تو اس كے بعد وہ خريد و فروخت كرسكتا ہے_

١٨_ حضرت جبرائيل (ع) كا حضرت ابراہيم (ع) كوعرفات ميں يوں خطاب كرنا ''اعرف بہا مناسكك و اعترف بذنبك'' اس مقام كا عرفات نام پڑنے كا موجب_فاذا افضتم من عرفات امام محمد باقر (ع) اور امام جعفرصادق (ع) نے ارشاد فرمايا:فقال جبرئيل(ع) هذه عرفات فاعرف بها مناسكك و اعترف بذنبك فسمّى عرفات (٢) جبرئيل (ع) نے حضرت ابراہيم (ع) سے كہا يہ عرفات ہے اپنے مناسك كو پہچان ليں اور اپنے گناہوں كا اعتراف كريں پس اسے عرفات كہا جانے لگا_ احكام: ١، ٦، ٧، ٨، ١٠، ١٧

اسلام: صدراسلام كى تاريخ ٢

اللہ تعالى: اللہ تعالى كى ربوبيت ٥; فضل الہي٥;نعمات الہي١٢، ١٣; ہدايت الہى ١٤، ١٥

انسان: انسان كى روزى ٤

جاہليت: تاريخ جاہليت ١٦، عقيدہ جاہليت ٢

جبرائيل (ع) : ١٨

حج: احكام حج ١،٦،٧، ٨، ١٠، ١٧; حج ميں خريد و فروخت١، ٢، ١٧;حج ميں كام١

____________________

١) تفسير عياشى ج ١ ص٩٦ ح ٢٦٢، تفسير برہان ج١ ص٢٠١ ح ١ _

٢) كافى ج ٤ ص٢٠٧ ح ٩، علل الشرايع ج ٢ ص ٤٣٦ ح ١ باب ١٧٣_

حضرت ابراہيم (ع) : حضرت ابراہيم (ع) اور جبرئيل (ع) ١٨

ذكر: ذكرخدا ٨، ١٠، ١١، ١٢، ١٣ زما نہ بعثت كے قريب كى تاريخ: ١٦

عرفات: عرفات كانام ركھنا ١٨; عرفات ميں وقوف ٦، ٧

كام: كام كى اہميت ٣

گمراہي: گمراہى كے اسباب ١٥

مشعر الحرام: مشعر الحرام ميں ذكر ٨، ١٠; مشعر الحرام كا تقدس ٩; مشعر الحرام ميں وقوف ٧

معاملہ: ١٧

مقدس مقامات: ٩

نام: نام كا كردار١٨

واجبات: ٧، ٨

ہدايت: ہدايت كى نعمت ١٣

ثُمَّ أَفِيضُواْ مِنْ حَيْثُ أَفَاضَ النَّاسُ وَاسْتَغْفِرُواْ اللّهَ إِنَّ اللّهَ غَفُورٌ رَّحِيمٌ (١٩٩)

پھر تمام لو گوں كى طرح تم بھى كوچ كرو اور الله سے استغفار كرو كہ الله بڑا بخشنے والا اور مہربان ہے _

١_ مشعر جانے كيلئے ضرورى ہے كہ دوسرے لوگوں كى طرح عرفات سے كوچ كريں _ثم افيضوا من حيث افاض الناس بعض كے نزديك جملہ''ثم افيضوا'' عرفات سے كوچ (افاضہ) كى تاكيد ہے، ''من حيث''كے قرينے سے كيونكہ قريش اوران

كے حليف عام لوگوں كے برعكس ، عرفات سے كوچ نہيں كرتے تھے_

٢_ عرفات ميں وقوف، مناسك حج ميں سے ہے_ثم افيضوا من حيث افاض الناس اس لحاظ سے كہ اگر افاضہ سے مراد عرفات سے كوچ كرنا ہو تو اس كا لازمہ يہ ہوگا كہ عرفات ميں وقوف كيا جائے_

٣_ عام لوگوں كے ہمراہ مشعرالحرام سے كوچ كرنا ضرورى ہے_ثم افيضوا من حيث افاض الناس اس آيت ميں ''ثم''كا لفظ دلالت كرتا ہے كہ افاضہ سے مراد مشعر سے كوچ كرنا ہے_

٤_ حج ميں كسى قبيلہ يا گروہ كو ايك دوسرے پر كسى قسم كى برترى اور فوقيت حاصل نہيں ہے_ثم افيضوا من حيث افاض الناس آيہ كريمہ كے ذيل ميں منقول اس بات كے پيش نظر كہ قريش كے كچھ لوگ اپنے آپ كو دوسرے لوگوں سے جدا سمجھتے تھے اور عرفات ميں وقوف نہيں كرتے تھے_

٥_مشعرالحرام كا وقوف حج كے مناسك ميں سے ہے_ثم افيضوا من حيث افاض الناس اس صورت ميں كہ جب''ثم افيضوا'' مشعر الحرام سے متعلق ہو_

٦_ بارگاہ خداوندى ميں توبہ اوراستغفار ضرورى ہے_و استغفروا الله ان الله غفور رحيم

٧_ حج ميں اپنى امتيازى حيثيت كا خيال ركھنے والے قريش كيلئے خدا تعالى كا حكم ہے كہ اس امتيازى حيثيت اپنانے كے گناہ سے استغفار كريں *_ثم افيضوا من حيث افاض الناس و استغفروا الله امتيازى حيثيت (من حيث افاض الناس) كو رد كر كے، استغفار كا حكم دينا اس بات كى طرف اشارہ ہو سكتا ہے كہ يہ عمل گناہ ہے اور اس پر استغفار كرنا ضرورى ہے_

٨_ عرفات اورمشعر سے كوچ كرتے وقت استغفار كرنا ضرورى ہے_ثم افيضوا و استغفروا الله

اس مطلب ميں جملہ''ثم افيضوا''كے بارے ميں مذكور ہر دو نظريات (افاضہ عرفات يا افاضہ مشعر) كا خيال ركھا گيا ہے_

٩_ خداوند عالم غفور و رحيم ہے_ان الله غفور رحيم

١٠_ استغفار كرنے والوں كے لئے رحمت اور بخشش كا خداوند متعال نے وعدہ كيا ہے_و استغفروا الله ان الله غفور رحيم اگرچه مذكورہ بالا آيت عرفات اورمشعر سے كوچ كرنے والوں كے بارے ميں ہے ليكن''ان

الله غفور رحيم''كى علت عام ہے لہذا بخشش اور رحمت كا وعدہ بھى تمام استغفار كرنے والوں كو شامل ہو گا _

١١_ حضرت ابراہيم (ع) ، حضرت اسماعيل (ع) ، حضرت اسحاق (ع) ، اور ديگرحاجيوں كى طرح عرفات سے كوچ كرنا ضرورى ہے_ثم افيضوا من حيث افاض الناس امام صادق (ع) آيت''ثم افيضوا ... ''كے بارے ميں فرماتے ہيں :يعنى ابراهيم و اسماعيل و اسحاق فى افاضتهم منها و من كان بعدهم _ (١)

١٢_ قريش سمجھتے تھے كہ ان پر عرفات سے كوچ كرنا ضرورى نہيں ہے_ثم افيضوا من حيث افاض الناس

امام صادق (ع) نے فرمايا:اولئك قريش كانوا يقولون:نحن اولى الناس بالبيت و لايفيضون الا من المزدلفة، فامرهم الله ان يفيضوا من عرفة (٢)''يہ قريش تھے جو كہتے تھے ہم بيت الله پر ديگر لوگوں كى نسبت زيادہ حق ركھتے ہيں وہ صرف مزدلفہ سے كوچ كرتے تھے خدا وند عالم نے انہيں حكم ديا كہ عرفات سے كوچ كريں ''_

١٣_ عرفات اورمشعر سے كوچ كرتے وقت خدا سے مغفرت طلب كرنے والے خدا كى رحمت و مغفرت سے بہرہ مند ہوتے ہيں _ثم افيضوا ...واستغفروا الله ان الله غفور رحيم

١٤_ عرفات سے اہل بيت (ع) كى طرح كوچ كرنا لازمى ہے_ثم افيضوا من حيث افاض الناس

امام حسين (ع) نے فرمايا:فنحن الناس و لذلك قال الله تعالى ذكره فى كتابه:''ثم افيضوا من حيث افاض الناس'' (٣) الناس سے مراد ہم اہل بيت (ع) ہيں اور اسى وجہ سے اللہ تعالى نے اپنى كتاب ميں ارشاد فرماياہے پھر كوچ كرو وہاں سے جہاں سے لوگ كوچ كريں ''_

احكام: ١، ٢، ٣، ٥

استغفار: استغفار كى اہميت ٦، ٧، ٨، ١٠، ١٣

اسماء و صفات: رحيم ٩، غفور ٩

____________________

١) كافى ج ٤ ص ٢٤٧ ح ٤; نور الثقلين ج ١ ص ١٩٦ ح ٧١٩_

٢) تفسير عياشى ج ١ ص ٩٦ ح ٢٦٣، نور الثقلين ج١ ص ١٩٥ ح ٧١٠_

٣) كافى ج ٨ ص ٢٤٤ ح ٣٣٩ ،تفسير برھان ج ١ ص٢٠١ ح ٢_

اللہ تعالى: اللہ تعالى كى بخشش ١٠، ١٣ ; اوامر الہى ٧; رحمت الہي١٠، ١٣; وعدہ الہي١٠

اہل بيت (ع) : اہل بيت (ع) كو نمونہ عمل قرار دينا ١٤

حج: حج كے احكام ١ ،٢، ٣، ٥، ١١; مناسك حج٤، ٥، ٨

حضرت ابراہيم (ع) : حضرت ابراہيم (ع) حج ميں ١١

حضرت اسحاق (ع) : حضرت اسحاق (ع) حج ميں ١١

رحمت: رحمت جن كے شامل حال ہے ١٣

روايت: ١١، ١٢، ١٤

عرفات: عرفات ميں استغفار ٨، ١٣; عرفات ميں وقوف ٢، ١١، ١٤

قريش: قريش كا احساس برتري٧; قريش كا عقيدہ ١٢; قريش اور عرفات ١٢

گناہ: گناہوں كى مغفرت ١٠; گناہوں سے استغفار ٧

مشعر الحرام: مشعر الحرام ميں استغفار ٨، ١٣; مشعر الحرام ميں وقوف ١، ٣، ٥

مقدس مقامات: ١، ٢، ٣، ٥، ٨، ١١، ١٢، ١٣، ١٤

نسلى امتياز: نسلى امتياز كى نفى ٤

فَإِذَا قَضَيْتُم مَّنَاسِكَكُمْ فَاذْكُرُواْ اللّهَ كَذِكْرِكُمْ آبَاءكُمْ أَوْ أَشَدَّ ذِكْرًا فَمِنَ النَّاسِ مَن يَقُولُ رَبَّنَا آتِنَا فِي الدُّنْيَا وَمَا لَهُ فِي الآخِرَةِ مِنْ خَلاَقٍ (٢٠٠)

پھر جب سارے مناسك تمام كر لو تو خدا كو اسى طرح ياد ركھو جس طرح اپنے باپ دادا كو ياد كرتے ہو بلكہ اس سے بھى زيادہ كہ بعض لوگ ايسے ہيں جو كہتے ہيں كہ پروردگار ہميں دنيا ہى ميں نيكى دے دے اور ان كا آخرت ميں كوئي حصّہ نہيں ہے _

١_ مناسك حج كى تكميل كے بعد خدا كا ذكر ايسے ہى كرو جيسے اپنے آباء و اجداد كا ذكر كرتے ہو بلكہ اس سے بھى زيادہ كرو_

فاذا قضيتم مناسككم او اشد ذكرا

٢_ مناسك حج كے بعد آباء و اجدادپر فخر و مباہات كرنا زمانہ جاہليت كے طور طريقے تھے_فاذكروا الله كذكركم آبائكم

٣_ دعا كے آداب ميں سے ہے كہ خدا كى ربوبيت پر خاص توجہ ہو_من يقول ربنا آتنا

٤_ ان لوگوں كى مذمت جو مناسك حج كى ادائيگى كے بعد خداوند عالم سے صرف دنياوى منافع طلب كرتے ہيں _

فمن الناس من يقول ربنا اتنا فى الدنيا

٥_ دنيادارحسن و زيبائي كو صرف دنياوى وسائل اور اس كے منافع كے حصول ميں خيال كرتے ہيں _فمن الناس من يقول ربنا اتنا فى الدنيا كيونكہ انہوں نے اپنى دعاؤں ميں ''حسنةً '' كا لفظ ذكر نہيں كيا_ اس سے يہ ظاہر ہوتا ہے كہ جو كچھ بھى اس دنيا ميں ہے وہ ان سب كو خوبصورت گمان كرتے ہيں _

٦_ دنيا كے طالب آخرت كى نعمتوں سے محروم ہونگے_و ما له فى الاخرة من خلاق بعد والى آيت اس بات كا قرينہ ہے كہ دنيادار لوگ وہ ہيں جو آخرت كى طرف كسى قسم كى رغبت نہيں ركھتے اور دنيا كے طالب ہيں چاہے خداوندعالم راضى ہو يا ناراض _

٧_ دنيا دار حاجى اخروى نعمتوں سے محروم ہونگے_

فاذا قضيتم مناسككم فمن الناس من يقول ربنا و ما له فى الاخرة من خلاق

٨_ بعض لوگ خدا وند عالم سے صرف دنيا طلب كرتے ہيں _و من الناس من يقول ربنا اتنا فى الدنيا

كيونكہ بعد والى آيت ميں جس گروہ كا ذكر ہوا ہے وہ دنيا كے ساتھ ساتھ آخرت كے بھى طلب گار ہيں لہذاقرينہ مقابلہ كے مطابق پہلا گروہ صرف دنيا كا طالب ہے_

٩_ خداوند متعال سے دعا اور درخواست كرنااس كا ذكر ہے_فاذكروا الله فمن الناس من يقول ربنا

١٠_ دنيا طلب حاجيوں كى دنياوى حاجات اور دعائيں قبول ہوجاتى ہيں _فمن الناس من يقول ربنا آتنا فى الدنيا و ما له فى الاخرة من خلاق جملہ''و مالہ '' ميں ''واو عاطفہ''سے پتہ چلتا ہے كہ يہاں ''نؤتيہ'' (ہم اسے دنيا ميں عطا كريں گے) جيسا جملہ مخدوف ہے اور آخرت سے اسے كچھ نہيں ملے گا_

١١_ حج كى ادائيگى كے بعد اپنے آباء و اجداد پر فخر و مباہات كى بجائے خدا كا ذكر كرنا چاہيئے_فاذا قضيتم مناسككم فاذكروا الله امام باقر (ع) فرماتے ہيں :و يعدّون مفاخر آبائهم فامرهم الله سبحانه، ان يذكروه مكان ذكرهم آبائهم فى هذا الموضع (١) اپنے آباء و اجداد كے كارناموں كا ذكر كرتے تھے تو خداوند متعال نے انھيں حكم ديا كہ وہ انكے ذكر كى بجائے اس مقدّس مقام پر خدا كا ذكر كريں _

اللہ تعالى: اللہ تعالى كى ربوبيت ٣

جاہليت: جاہليت كى رسوم ٢

حج: حج ميں تفاخر ٢، ١١; حج ميں دعا ١٠; حج ميں دنيا طلبى ٤، ٧; حج ميں ذكر ١١

دعا: دعا كى قبوليت ١٠; دعا كے آداب ٣;دعا ميں دنيا طلبى ٨، ١٠;

دنيا: وسائل دنيا ٥

دنيا پرست: دنيا پرستوں كاطرز تفكر ٥ ;دنيا پرستوں كى آخرت فروشى ٦ ;دنيا پرستوں كى محروميت ٧

دنيا پرستي: دنيا پرستى كے اثرات ٧;دنيا پرستى كى سرزنش ٤

____________________

١) مجمع البيان ج٢ص ٥٢٩،نور الثقلين ج ١ ص١٩٨ح ٧٢٢ _

ذكر: دعا كے ساتھ ذكر ٩ ;ذكر خدا، ١، ٩، ١٠، ١١;ذكر كى اہميت ١

روايت: ١٠، ١١

فخر و مباہات: اپنے آبا واجداد پر فخر و مباہات كرنا ٢، ١١

معاشرتى گروہ: ٤، ٥، ٨

وِمِنْهُم مَّن يَقُولُ رَبَّنَا آتِنَا فِي الدُّنْيَا حَسَنَةً وَفِي الآخِرَةِ حَسَنَةً وَقِنَا عَذَابَ النَّارِ (٢٠١)

اور بعض كہتے ہيں كہ پروردگار ہميں دنيا ميں بھى نيكى عطا فرما اور آخرت ميں بھى اور ہم كو عذاب جہنم سے محفوظ فرما _

١_ ان لوگوں كى تعريف و تمجيد جو مناسك حج كى ادائيگى كے بعد دنيا و آخرت كى بھلائي اور جہنم كى آگ سے نجات كے خواہاں ہيں _و منهم من يقول ربنا آتنا فى الدنيا حسنة و فى الاخرة حسنة و قنا عذاب النار

٢_ خدا وند متعال كے مقام ربوبيت سے مانگنا دعا كے آداب ميں سے ہے_ربنا آتنا

٣_ خدا وند عالم سے مانگنے اور دعا كرنے كا طريقہ سكھلانا_و منهم من يقول ربنا آتنا فى الدنيا حسنة و فى الاخرة حسنة و قنا عذاب النار

٤_ آخرت كى خواہش اور دنيا كى طلب كے درميان كوئي تضاد نہيں ہے_و منهم من يقول ربنا آتنا فى الدنيا حسنة و فى الاخرة حسنة و قنا عذاب النار

٥_ ہر قسم كا آرام و آسائش مذموم نہيں ہے_ربنا آتنا فى الدنيا حسنة

٦_ دنيا ميں حسنہ سے مراد وسيع روزى اور اچھا اخلاق ہے جبكہ آخرت ميں حسنہ كا مطلب خداوند عالم كى رضا اور جنت ہے_ربنا آتنا فى الدنيا حسنة

امام صادق (ع) ''ربنا آتنا''كے بارے ميں فرماتے ہيں :رضوان الله و الجنة فى الاخرة و السعة فى الرزق و المعاش و حسن الخلق فى الدنيا (١)_رضائے الہى اور جنت آخرت ميں اور وسعت رزق و معاش اور حسن خلق دنيا ميں

____________________

١) معانى الاخبار ص ١٧٥، نور الثقلين ج١ ص ١٩٩ ح٧٢٥ و ٧٢٨_

آخرت: آخرت كا دنيا سے رابطہ ١ آخرت طلبي: آخرت طلبى اور دنيا طلبى ٤

آسائش : جائز آسائش٥

اخلاق: پسنديدہ اخلاق ٦

جنت: ٦

حج: حج ميں دعا ١

حسنہ: اخروى حسنہ ٦; دنياوى حسنہ ٦

خدا تعالى: خدا تعالى كى ربوبيت ٢; رضا ئے الہى ٦

دعا: دعا كے آداب ١، ٢، ٣

روايت: ٦

روزي: وسيع روزي٦

معاشرتى گروہ: ١

أُولَئِكَ لَهُمْ نَصِيبٌ مِّمَّا كَسَبُواْ وَاللّهُ سَرِيعُ الْحِسَابِ (٢٠٢)

يہى وہ لوگ ہيں جن كے لئے ان كى كمائي كا حصّہ ہے او رخدا بہت جلد حساب كرنے والا ہے _

١_ جو لوگ دنيا اور آخرت ميں حسنہ كے طالب ہيں انہوں نے جو كچھ انجام ديا ہے اس كا انہيں فائدہ ہوگا_

و منهم من يقول ربنا آتنا اولئك لهم نصيب مما كسبوا

٢_ مقصد و ہدف تك پہنچنے كيلئے دعا كا اثر _ربنا آتنا فى الدنيا حسنة اولئك لهم نصيب

٣_ مقصد كو پانے كيلئے دعا كے ساتھ سعى و كوشش بھى

شرط ہے_ربنا آتنا اولئك لهم نصيب مما كسبوا يہ اس صورت ميں ہے كہ''مما كسبوا''سے مراد ان كى دعا ہو_

٤_ دعا كرنا بھى ايك قسم كى كمائي ہے_ربنا اولئك لهم نصيب مما كسبوا

٥_ صرف انہى لوگوں كو اپنے حج سے فائدہ پہنچے گا جو حج كى ادائيگى كے بعد دنيا و آخرت كى بھلائي كے طالب ہوں _

فاذا قضيتم مناسككم اولئك لهم نصيب مما كسبوا يہ اس صورت ميں ہے كہ''مما كسبوا''سے مراد فريضہ حج كى ادائيگى ہو_

٦_ خداوند عالم بہت تيزى سے حساب لينے والا ہے_و الله سريع الحساب

٧_ خداوند عالم تمام انسانوں كے اعمال كا ايك ساتھ حساب كرے گا_و الله سريع الحساب

اميرالمومنين (ع) نے فرمايا:''معناه انه يحاسب الخلق دفعة كما يرزقهم دفعة' ' خدا تعالى تمام مخلوقات كا حساب ايك ساتھ اسى طرح كرے گا جس طرح سب كو رزق ايك ساتھ ديتا ہے_

اسماء و صفات: سريع الحساب ٦، ٧

اللہ تعالى: اللہ تعالى كا بندوں سے حساب لينا ٧

ترقي: ترقى كے اسباب ٢، ٣

حج: حج ميں دعا ٥

حسنہ: اخروى حسنہ ١، ٥; دنياوى حسنہ ١، ٥

دعا: دعا اور عمل ٣;دعاكى حقيقت٤; دعا كى شرائط قبوليت٣، ٥; دعا كے اثرات ١، ٢

روايت: ٧

عمل: عمل كاحساب كتاب٧ ;عمل كى جزا ١، ٥

____________________

١) مجمع البيان ج ٢ ص ٥٣١، نور الثقلين ج ١ ص٢٠٠ ح ٧٣١_

وَاذْكُرُواْ اللّهَ فِي أَيَّامٍ مَّعْدُودَاتٍ فَمَن تَعَجَّلَ فِي يَوْمَيْنِ فَلاَ إِثْمَ عَلَيْهِ وَمَن تَأَخَّرَ فَلا إِثْمَ عَلَيْهِ لِمَنِ اتَّقَى وَاتَّقُواْ اللّهَ وَاعْلَمُوا أَنَّكُمْ إِلَيْهِ تُحْشَرُونَ (٢٠٣)

اور چند معين دنوں ميں ذكر خدا كرو _ اس كے بعد جو دو دن كے اندر جلدى كر ے گا اس پربھى كوئي گناہ نہيں ہے اورجو تا خير كرے گا اس پر بھى كوئي گناہ نہيں ہے بشرطيكہ پرہيزگار رہا ہو اور الله سے ڈرو اوريہ ياد ركھو كہ تم سب اسى كى طرف محشور كئے جاؤ گے _

١_ حاجى پر كچھ معين دنوں (ايام تشريق) ميں خدا كا ذكر كرنا وا جب ہے_و اذكروا الله فى ايام معدودات

ان معين دنوں سے مراد ايام تشريق (گيارہ، بارہ، اور تيرہ ذى الحج) ہيں _

٢_ حج كے دوران ذكر خدا انتہائي اہميت ركھتا ہے_فاذكروا الله و اذكروه فاذكروا الله و اذكروا الله

٣_ معين دنوں (ايام تشريق) ميں مني ميں رہنا حج كے مناسك ميں سے ہے_و اذكروا الله فى ايام معدودات فمن تعجل فى يومين فلا اثم عليه و من تاخر فلا اثم عليه

٤_ حاجى كو اختيار ہے كہ مني سے بارہ ذى الحج كو كوچ كرے يا تيرہ ذى الحج كو، بشرطيكہ تقوي كي پابندى كرے_

فمن تعجل فى يومين فلا اثم عليه و من تاخر فلا اثم عليه لمن اتقي

٥_ خوف خدا اورتقوي كى پاسبانى ضرورى ہے_و اتقوا الله

٦_تقوي الہى فريضہ حج كى ادائيگى كا پيش خيمہ ہے_و اتقوا الله اس بات كے پيش نظر كہ مناسك حج بيان كرنے كے بعد تقوي كا ذكر كيا گيا ہے_

٧_ سب لوگوں كا حشر و نشر اوربازگشت صرف خدا وند عالم كى طرف ہوگي_و اعلموا انكم اليه تحشرون

٨_ قيامت اور خدا وند عالم كى جانب بازگشت پر توجہ

تقوي كى رعايت كا باعث بنتى ہے_فاذا قضيتم مناسككم و اتقوا الله و اعلموا انكم اليه تحشرون

٩_ قيامت كى ياد، مناسك حج كى ادائيگى ميں مددگار ثابت ہوتى ہيں _و اعلموا انكم اليه تحشرون كيونكہ مناسك حج كے بيان كرنے كے بعد قيامت كا ذكر ہوا ہے_

١٠_ حاجيوں كا اجتماع، ميدان محشر ميں انسانوں كے جمع ہونے كى ياد دلاتا ہے_و اعلموا انكم اليه تحشرون

١١_ اگر حج ميں تقوي كى رعايت كى جائے (جيسے محرمات احرام سے پرہيز) تو حج گناہوں كى بخشش كا باعث بنتا ہے_

فمن تعجل فى يومين فلا اثم عليه و من تاخر فلا اثم عليه لمن اتقي مذكورہ بالا مفہوم كى تائيد امام صادق (ع) سے مروى ايك روايت سے بھى ہوتى ہے كہ جس ميں آپ(ص) نے ''فمن تعجل في ...''كے بارے ميں فرمايا:''يرجع لاذنب لہ'' (١) حاجى گناہوں سے خالى ہوكر واپس پلٹتاہے_

١٢_ ''ايام معدودات''سے مراد ايّام تشريق ہيں _و اذكروا الله فى ايام معدودات حضرت امام صادق(ص) اس آيت كے بارے ميں فرماتے ہيں :هى ايّام التشريق (٢)

١٣_ جس حاجى كو ايّام تشريق ميں موت آ جائے اس كے گناہ بخش ديئے جاتے ہيں _فمن تعجل فى يومين فلا اثم عليه امام صادق (ع) آيت''فمن تعجل''كے بارے ميں فرماتے ہيں : من مات قبل ان يمضى فلا اثم عليہ(٣) جو شخص ايام تشريق گزرنے سے پہلے مرجائے اس پر كوئي گناہ نہيں ہے_

١٤_ اگر حاجى گناہا ن كبيرہ سے پرہيز كرے تو وہ گناہوں سے پاك ہوجاتا ہے_و من تاخر فلا اثم عليه لمن اتقي

امام صادق (ع) فرماتے ہيں : ...و من تاخر ...''فلا اثم عليہ'' اذا اتقى الكبائر (٤) اس پر گناہ نہيں ہے اگر وہ گناہان كبيرہ سے اجتناب كرے_

احكام: ١، ٣، ٤

اللہ تعالى: اللہ تعالى كى طرف بازگشت٧

____________________

١) كافى ج ٤ ص ٣٣٧، نور الثقلين ج ١، ص ٢٠٣ ح ٧٤٤ و ٧٤٥_

٢) كافى ج ٤ ص ٥١٦ ح ٣، نور الثقلين ج ١ ،ص٢٠٠ ح٣٢ ٧ _ ٣) كافى ج ٤، ص ٥٢١ ح ١٠ ،نور الثقلين ج ١ ،ص٢٠١ ح٤٠ ٧_

٤) مجمع البيان ج ٢ ص ٥٣٢_

انسان: ا نسان كاا نجام ٧; انسان كا محشور ہونا ٧، ١٠

ايام تشريق: ١، ٣، ١٢، ١٣

ايمان: آخرت پر ايمان كے عملى اثرات٨ ، ٩; ايمان و عمل كا رابطہ٨، ٩

تقوي: تقوي كا پيش خيمہ ٨; تقوي كى اہميت٤، ٥;تقوي كے اثرات ٦،٣ ١

حج: احكام حج ١، ٣، ٤; حج كى اہميت ٦;حج ميں اجتماع ١٠; حج ميں ذكر ١، ٢; حج ميں موت ١٣

حجاج: حجاج كى بخشش ١٣

ذكر: ذكر خدا ١ ، ٢;ذكر كى اہميت ٢; قيامت كا ذكر١٠

روايت: ١١، ١٢، ١٣

شرعى فريضہ : شرعى فريضہ پر عمل كا پيش خيمہ ٦، ٩

علم: علم و عمل كا رابطہ٨، ٩

گناہ: گناہان كبيرہ ١٣;گناہوں كى بخشش ١٣، ١٤

مني: مني ميں وقوف ٣، ٤

واجبات: ١

وَمِنَ النَّاسِ مَن يُعْجِبُكَ قَوْلُهُ فِي الْحَيوةِ الدُّنْيَا وَيُشْهِدُ اللّهَ عَلَى مَا فِي قَلْبِهِ وَهُوَ أَلَدُّ الْخِصَامِ (٢٠٤)

انسانوں ميں ايسے لوگ بھى ہيں جن كى باتيں زندگانى دنيا ميں بھلى لگتى ہيں او روہ اپنے دل كى باتوں پر خدا كو گواہ بناتے ہيں حالا نكہ وہ بدترين دشمن ہيں _

١_ بعض لوگ مسلمانوں سے دشمنى كے باوجود ان كے دنياوى امور كى اصلاح كے لئے مكارانہ

منصوبے پيش كرتے ہيں _و من الناس من يعجبك قوله فى الحيوة الدنيا و هو الد الخصام اس صورت ميں كہ''فى الحياة'' ''قولہ'' كے متعلق ہو_

٢_ بعض لوگوں كى دھوكہ اور فريب پر مبنى گفتگو سے نبى اكرم(ص) كا حيرت زدہ ہونا _و من الناس من يعجبك قوله فى الحيوة الدنيا يہ مفہوم مطلب نمبر ايك كى وضاحت كو مد نظر ركھتے ہوئے ہے_

٣_ منافق ريا كار اور تظاہر كرنے والے ہيں _و من الناس من يعجبك قوله فى الحيوة الدنيا و هو الد الخصام

٤_ رياكارى اور دوسروں كو دھوكہ و فريب دينا صرف دنيا ميں ممكن ہے_و من الناس من يعجبك قوله فى الحيوة الدنيا

يہ مطلب اس صورت ميں ہے كہ''فى الحياة الدنيا'' ،''يعجبك''كے متعلق ہو يعنى ان كى گفتگو كى دلچسپى اور حيرت انگيزى صرف دنيا تك محدود ہے_ كيونكہ آخرت تو حقيقتوں كے منكشف ہونے كا دن ہے_

٥_ پيغمبر اكرم(ص) لوگوں كى ظاہرى گفتگو پر توجہ فرماتے تھے_و من الناس من يعجبك قوله فى الحيوة الدنيا

٦_ پيغمبر اكرم (ص) كے علم كى محدوديت_و من الناس من يعجبك قوله فى الحيوة الدنيا

٧_ منافقين اپنے اظہارات كو ثابت كرنے كيلئے خدا تعالى كو شاہد بناتے ہيں اور اس كى قسم كھاتے ہيں _

و يشهد الله على ما فى قلبه

٨_ منافقين اپنے اغراض و مقاصد تك پہنچنے كيلئے مومنين كے اعتقادات اور مقدسات سے استفادہ كرتے ہيں _

و يشهد الله على ما فى قلبه

''خدا كى قسم'' مسلمانوں كے مقدسات ميں سے ہے جسے بعض لوگ اپنے بے بنياد عقائد قبول كروانے كيلئے ايك حربہ كے طور پر

استعمال كرتے ہيں _

٩_ منافقين، مسلمانوں اور اصلاح معاشرہ كے سخت ترين دشمن ہيں _و من الناس و هو الد الخصام ''الخصام''خصم كى جمع ہے جو كہ دشمن كے معنى ميں ہے_

١٠_ مسلمانوں كے ساتھ سب سے زيادہ جنگ و جدال كرنے والے منافق ہيں _و من الناس و هو الد الخصام

اس صورت ميں كہ''الخصام''مصدر ہو اور خصومت و جدال كے معنى ميں ہو_

١١_ پيغمبر اكرم (ص) كيلئے بعض منافقين كے چہروں سے اللہ تعالى نے نقاب اتار دي_و من الناس و هو الد الخصام

١٢_ لوگوں كے اصلى عقائد جاننے كيلئے ان كا ظاہرى طور طريقہ اطمينان بخش معيار نہيں ہے_

و من الناس من يعجبك قوله فى الحيوة الدنيا و هو الد الخصام

آنحضرت(ص) : آنحضرت (ص) اور لوگ ٥; آنحضرت (ص) كا تعجب ٢; آنحضرت (ص) كا علم ٦; آنحضرت (ص) كى سيرت ٥

اسلام: صدر اسلام كى تاريخ ١١

تظاہر: تظاہر كى حدود ٤

دشمن: دشمن اور اصلاح ٩; دشمنوں كا مكرو حيلہ ١; دشمنوں كى سازش ١

دنيا: دنياوى زندگى ٤

طور طريقہ: طور طريقہ كى بنياديں ١٢

عقيدہ: عقيدہ كى درستى كا معيار١٢

قسم: خدا كى قسم٧

مسلمان: مسلمان اور منافقين١٠;مسلمانوں كے دشمن ٩، ١٠; مسلمانوں كے ساتھ دشمنى ١

معاشرتى گروہ: ٣

مقدسات: مقدسات سے سوء استفادہ ٧، ٨

مكر: مكر كى حدود ٤

منافقين: منافقين كا افشا١١;منافقين كا جھگڑنا ١٠; منافقين كا فساد برپا كرنا ٩;منافقين كا مكر٧، ٨ ; منافقين كى دشمنى ٩،٠ ١;منافقين كى رياكارى ٣ ; منافقين كے برتاؤ كا طريقہ ٣، ٧،٨

وَإِذَا تَوَلَّى سَعَى فِي الأَرْضِ لِيُفْسِدَ فِيِهَا وَيُهْلِكَ الْحَرْثَ وَالنَّسْلَ وَاللّهُ لاَ يُحِبُّ الفَسَادَ (٢٠٥)

اور جب آپ كے پاس سے منھ پھيرتے ہيں تو زمين ميں فساد بر پا كرنے كى كوشش كرتے ہيں اور كھيتيوں اور نسلوں كو بر باد كرتے ہيں جب كہ خدا فساد كو پسند نہيں كرتا ہے _

١_ اگر منافقين حكومت حاصل كر ليں تو وہ زمين ميں فساد اور كھيتى اور نسل بشريت كى تباہى و بربادى كى كوشش كرتے ہيں _و اذا تولى سعى فى الارض الحرث و النسل اس صورت ميں كہ''تولي''كے معنى حكومت

حاصل كرنے كے ہوں _

٢_ منافقوں كا حكومت حاصل كرنے سے پہلے اصلاح طلبى كا اظہار كرنا اور حكومت كے بعد فساد برپا كرنا_

و من الناس من يعجبك و اذا تولى سعى فى الارض ليفسد فيها

٣_ منافق جب پيغمبر اكرم(ص) سے ملتے تو اصلاح طلبى كا اظہار كرتے اور آپ(ص) كى محفل سے اٹھتے ہى فساد كى كوششوں ميں مشغول ہو جاتے_*و من الناس من يعجبك و اذا تولى سعى فى الارض اس صورت ميں كہ جب ''اذا تولّي''كے معنى پلٹنےكے ہوں _

٤_ كھيتى باڑى كو تباہ و برباد كرنا اور نسل كشى كو رواج دينا، روئے زمين پر فساد كى روشن اور واضح مثاليں ہيں _

ليفسد فيها و يهلك الحرث و النسل اس صورت ميں كہ''و يھلك الحرث و ...'' جملہ''ليفسد فيها ''كى تفسير و بيان ہو_

٥_ كھيتى باڑى ، زراعت اور افرادى قوت كى غير معمولى اہميت اور معاشرے كے استحكام ميں ان كا بنيادى كردار_

و اذا تولي ...و يهلك الحرث و النسل اس اعتبار سے كہ ان دونوں كى تباہى و بربادى كو زمين كى تباہى و بربادرى قرار ديا گيا ہے ان كى بنيادى حيثيت و اہميت واضح ہوجاتى ہے_

٦_ اصلاح معاشرہ ، كھيتى باڑى اور نسل انسانى كى حفاظت صالح حكومت كى خصوصيات ميں سے ہے_

و اذا تولى ليفسد فيها و يهلك الحرث و النسل خداوند متعال نے فتنہ و فساد جيسے امور كو منافقوں كا كام شمار كيا ہے جس سے معلوم ہوتا ہے كہ صالحين كى حكومت ميں ايسے كام نہيں ہوتے_

٧_ غير صالح (كرپٹ) سياست دانوں كے اقتدار تك پہنچنے كيلئے منافقت سيڑھى كا كام ديتى ہے_ اس مفہوم ميں ''تولّي''كے معنى حكومت تك پہنچنے كے كئے گئے ہيں _

٨_ حكومت اور اقتدار، انسان كى پوشيدہ خصلتوں كو آشكار كرديتا ہے_و اذا تولى سعى فى الارض ليفسد فيها و يهلك

٩_ خداوند عالم زمين ميں فساد كو ناپسند كرتا ہے_و الله لايحب الفساد

١٠_ فساد كرنے والا مبغوض خدا ہے_و الله لايحب الفساد

١١_ كھيتى باڑى اجاڑنااور نسل كشى كرنا خداوندعالم كى نظر ميں مبغوض ہے_و اذا تولى و يهلك الحرث و النسل والله لايحب الفساد

١٢_ منافقوں كى حكومت كا نتيجہ روئے زمين پر فساد كى صورت ميں ظاہر ہوتاہے_و اذا تولى سعى فى الارض ليفسد فيها

اس بنا پر كہ '' تولي''كے معنى حكومت تك پہنچنے كے ہوں _

١٣_ حكومت كى ذمہ دارى ہے كہ زراعت، اور افرادى قوت كى حفاظت كرے اور انكى اصلاح ميں كوشاں رہے_

و اذا تولى سعى فى الارض

١٤_ روئے زمين پر تباہى و بربادى ، بُرے اور بدكردار لوگوں كے اعمال اور ناصالح حكومتوں كى وجہ سے ہوتى ہے_

و اذا تولى ليفسد فيها

١٥_خداوند عالم نے خبردار كيا ہے كہ ہر كس و ناكس جو اصلاح طلبى كا نعرہ لے كر اٹھے، اس سے دھوكا نہ كھاؤ_

و من الناس من يعجبك و اذا تولى سعى فى الارض ليفسد

١٦_ فاسد اور فساد برپا كرنے والے حكم راں خدا كے مبغوضہيں _و اذا تولى و الله لايحب الفساد

١٧_ اخنس ابن شريق منافق، دشمن، فسادي، متكبر اور نصيحت قبول نہ كرنے والا تھا_و من الناس و اذا تولي

بعض مفسرين كے نزديك مذكورہ بالا آيت اخنس ابن شريق كے بارے ميں نازل ہوئي ہے جو منافقانہ طرز عمل ركھتا تھا (مجمع البيان) _

١٨_ منافقوں كا طريقہ كار عوام اور انكے دين كى تباہى ہے_و اذا تولى و يهلك الحرث و النسل

امام صادق (ع) فرماتے ہيں كہ ان''الحرث''فى ھذا الموضع الدين و''النسل'' الناس _ يہاں پر '' حرث'' سے مراد دين اور '' نسل'' سے مراد لوگ ہيں _

____________________

١) مجمع البيان ج٢، ص٥٣٤، نور الثقلين ج ١ ص٢٠٤ح ٧٥٤ و ٧٥٥ _

آنحضرت(ص) : آنحضرت(ص) اور منافقين ٣ اخنس ابن شريق: ١٧

اسلام: صدر اسلام كى تاريخ ٣، ١٧

اصلاح: اصلاح كى اہميت ١٣

اعلان: ١٧

اللہ تعالى: اللہ تعالى كاخبردار كرنا ١٥;اللہ تعالى كاغضب ١٠، ١١،٦ ١; اللہ تعالى كى محبت ٩

انحطاط: انحطاط كے اسباب و عوامل ١، ١١، ١٤

انسان: انسانى صفات ٨

حكومت : حكومت كى ذمہ دارى ٦،٣ ١; فاسد حكومت كے اثرات١٤

روايت: ١٨

زراعت: زراعت كو تباہ و برباد كرنا ٤، ١١;زراعت كى اہميت ٥، ٦، ١١،٣ ١

عمل: عمل كے اثرات ١٤

فاسد راہنما: فاسد راہنماؤں كا فساد پھيلانا ١٦; فاسد راہنماؤں كا مبغوضہونا١٦

فساد: فساد كى ناپسنديدگى ٩; فساد كے اسباب ١،٣ ١، ١٥; فساد كے موارد٤ فسادى عناصر: ١٨ فسادى عناصر كا مبغوض ہونا ١٠

قدرت : قدرت كے اثرات٨

مسلمان: مسلمانوں كے دشمن ١٨

معاشرہ: معاشرتى ڈھانچہ ٥; معاشرے كى اصلاح كى اہميت ٦; معاشرے كى تشكيل كے عوامل ٥

منافقين: ١٨

منافقين اور دين ١٨;منافقين كا برتاؤ ١، ٢، ٣، ٧، ١٢; منافقين كا فساد پھيلانا ١، ٢، ٣; منافقين كا نسل كشى كرنا، ٤، ١١ ;منافقين كى حكومت ١، ١٢;

منافقين كى قدرت طلبى ٧; منافقين كے دعوے ٢، ٣

نسل: نسل كى حفاظت ٦

نسل كشي: نسل كشى كا مبغوض ہونا٤، ١١

نفاق: نفاق كا محرك ٧

وَإِذَا قِيلَ لَهُ اتَّقِ اللّهَ أَخَذَتْهُ الْعِزَّةُ بِالإِثْمِ فَحَسْبُهُ جَهَنَّمُ وَلَبِئْسَ الْمِهَادُ (٢٠٦)

جب ان سے كہاجاتا ہے كہ تقوى الہى اختيار كرو تو غرور گناہ آڑے آجاتا ہے ايسے لوگوں كے لئے جہنم كافى ہے جو بدترين ٹھكانا ہے _

١_ اصلاح طلبى كا جھوٹا دعوي كرنے والے رياكار منافقين كو جب تقوي الہى كى دعوت دى جاتى ہے تو اس كے مقابلے ميں غرور، تكبر اور ہٹ دھرمى كا مظاہرہ كرتے ہيں _و من الناس من يعجبك و اذا قيل له اتق الله اخذته العزة بالاثم

٢_ تقوى كى طرف بلائے جانے پر غرور و تكبر اور ہٹ دھرمى كا مظاہرہ كرنا ناصالح اور فاسد حكمرانوں كى نشانيوں ميں سے ہے_و اذا تولى سعى و اذا قيل له اتق الله اخذته العزة بالاثم اس صورت ميں كہ''تولي''كے معنى حكومت پانے كے ہوں _

٣_ گناہ كى وجہ سے پيدا ہونے والے غرور ، تكبر اور ہٹ دھرمى مفسد حكمرانوں كے نصيحت قبول كرنے ميں مانع ہوتے ہيں _و اذا قيل له اتق الله اخذته العزة بالاثم اس صورت ميں كہ''بالاثم''، ''العزة''سے متعلق ہو_