امام مہدیؑ کا خط ہے
توقیع اما الحوادث الواقعہ
توقیع اَمّا الحَوَادِثُ الوَاقِعَہ، امام مہدیؑ کا خط ہے جو اسحاق بن یعقوب کے سوالات کے جواب میں ارسال کیا گیا ہے۔ اس خط کو ولایت فقیہ کے اثبات کے لیے ایک دلیل کے طور پر استعمال کیا جاتا ہے۔
اس خط میں امام مہدیؑ نے ائمہؑ کی طرف سے احادیث نقل کرنے والے راویوں کو اپنی حجت قرار دیا ہے اور شیعوں کو ہدایت دی ہے کہ جب بھی کوئی حادثہ یا واقعہ پیش آئے تو وہ ان راویوں کی طرف رجوع کریں۔ یہاں احادیث کے راوی سے مراد وہ فقہاء ہیں جو قرآن و احادیث کی روشنی میں شرعی احکام کا استنباط کرتے ہیں اور معاشرے کی رہنمائی کی صلاحیت رکھتے ہیں۔
اگرچہ رجالی منابع میں اسحاق بن یعقوب کی صراحت کے ساتھ توثیق نہیں ہوئی، لیکن ایسے قرائن و شواہد موجود ہیں جو ان کی وثاقت کی دلیل بن سکتی ہے، مثلا یہ کہ اس خط کو کُلینی، شیخ صدوق اور شیخ طوسی جیسے محدثین نے بھی نقل کیا ہے اور امام مہدی کی طرف سے اسحاق کو خاص سلام بھیجا گیا ہے، جو اس کی وثاقت کی دلیل ہیں۔
مقام اور اہمیت
توقیع اَمّا الحَوادِثُ الواقِعَہ کو ولایت فقیہ کے اثبات میں حدیثی دلائل میں شمار کیا جاتا ہے۔[1] یہ خط امام مہدی ؑ کی طرف سے اسحاق بن یعقوب کے خط کے جواب میں ارسال ہوا ہے، جو نواب اربعہ میں سے محمد بن عثمان عمری کے ذریعہ امام تک پہنچا تھا۔[2] محدثین میں سے شیخ صدوق نے کتاب "کمال الدین"[3] میں اور شیخ طوسی نے "الغیبہ"[4] میں کلینی سے نقل کیا ہے۔
متن ترجمه
أَمَّا مَا سَأَلْتَ عَنْہُ أَرْشَدَكَ اللَّہُ وَ ثَبَّتَكَ .... وَ أَمَّا الْحَوَادِثُ الْوَاقِعَۃُ فَارْجِعُوا فِيہَا إِلَى رُوَاۃِ حَدِيثِنَا فَإِنَّہُمْ حُجَّتِي عَلَيْكُمْ وَ أَنَا حُجَّۃُ اللَّہِ عَلَيْہِمْ .... وَ السَّلَامُ عَلَيْكَ يَا إِسْحَاقَ بْنَ يَعْقُوبَ وَ عَلى مَنِ اتَّبَعَ الْہُدى.[5] "خدا تمہیں ہدایت دے اور حق کے راستے پر ثابت قدم رکھے۔ یہ جو تم نے سوال کیا ہے... اور جو واقعات تمہارے سامنے آئیں اور تم ان کا حکم نہیں جانتے، تو ان میں ہمارے راویوں کی طرف رجوع کرو، کیونکہ وہ تم پر ہماری طرف سے حجت ہیں، اور میں ان پر خدا کی طرف سے حجت ہوں... اور سلام ہو تم پر، اے اسحاق بن یعقوب، اور ہر اس شخص پر جو ہدایت کی پیروی کرتا ہے۔"
اثبات ولایت فقیہ کے دلائل
امام زمانہؑ کی غیبت کے دور میں ولایت فقیہ کی اثبات کے لیے اس خط سے استناد کیا گیا ہے۔
"الحوادث الواقعہ" سے استدلال
شیخ انصاری کے مطابق "حوادث واقعہ" کا مطلب صرف انفردی شرعی مسائل نہیں ہیں بلکہ وہ تمام واقعات اور معاملات ہیں جن میں عقل، عرف اور شریعت کے مطابق کسی رہنما یا رہبر کی طرف رجوع کرنا ضروری ہو۔ اس عمومیت کی دلیل یہ ہے کہ احکام شرعی کو سمجھنے کے لیے فقہاء کی طرف رجوع کرنا ایک روشن بات ہے، جس کے سلسلہ میں دریافت کرنے کی ضرورت نہیں ہے۔ اس بنا پر امام مہدیؑ نے اس خط کے ذریعے فقہاء کو حکومتی اور معاشرے کی انتظامی امور میں مرجع مقرر کیا ہے۔[6] مزید یہ کہ امام مہدی ؑ کا جواب مطلق ہے اور اس میں کوئی قید نہیں ہے، اس لیے اس حکم کو صرف ان مخصوص واقعات تک محدود کرنا جو راوی کے سوال میں ذکر ہوئے ہیں، مسترد کیا گیا ہے۔[7]
"فَإِنَّہُمْ حُجَّتي عَلَيْكُمْ" سے استدلال
"فَإِنَّہُمْ حُجَّتي عَلَيْكُمْ" کی عبارت فقہاء کے انتظامی اور سرپرستی کے کردار پر دلالت کرتی ہے۔[8] معصومینؑ کا حجت ہونا صرف احکام شرعی کے بیان تک محدود نہیں ہے، بلکہ ان تمام شعبوں میں جہاں امام معصومؑ کو حجت الٰہی کے طور پر ولایت و سرپرستی حاصل ہے، فقیہ بھی اسی طرح حجت اور ولی امر شمار ہوتے ہیں۔[9] جیسے ائمہؑ کی طرف رجوع کرنا معاشرتی اور حکومتی امور میں ضروری ہے، ویسے ہی فقہاء کی طرف رجوع کرنا بھی واجب ہے اور ان کے احکام سے انحراف، خدا کی ناراضگی کا سبب بنے گا۔[10]
"رُواۃِ حَدیثِنا" سے مراد
اس توقیع میں "رُواۃِ حَدیثِنا" سے مراد وہ فقہاء ہیں جو روایات سے شرعی احکام کو استنباط کرنے کی صلاحیت رکھتے ہیں، نہ کہ وہ راوی جو صرف روایات نقل کرتے ہیں۔[11]
اسحاق بن یعقوب کی وثاقت
اسحاق بن یعقوب کی رجالی منابع میں صراحت کے ساتھ توثیق نہیں ہوئی ہے۔[12] اسی وجہ سے بعض علماء نے اس خط کی صحت پرشک کیا ہے۔[13] سید کاظم حائری نے اپنی کتاب ولایۃ الامر فی عصر الغیبۃ میں غیبت صغریٰ کے دور کے حالات کا حوالہ دیتے ہوئے کلینی جیسے علماء کے توسط سے اس خط کو نقل کرنے کو اسحاق کی وثاقت کے لیے دلیل قرار دیا ہے۔ ان کا کہنا ہے کہ اس حساس دور میں خط کا ملنا صرف کسی بہت معتبر یانہایت فاسق شخص سے ہی ممکن تھا، اور چونکہ کلینی جیسے دقیق اور اس کے ہم عصر محدث نے اسے نقل کیا ہے اس لئے اسے راوی کی وثاقت پر حمل کیا جائے گا کیونکہ فسق اور جعل حدیث کوئی ایسا امر نہیں جو ان کی نظروں سے مخفی اور پوشیدہ رہ سکے۔[14]
اسی طرح مذکورہ خط کے اندر موجود قرائن و شواہد جیسے خط کے مضمون کی نوعیت اور امام مہدیؑ کا اسحاق کے لیے دعائیں دینا جیسے کہ "أَرْشَدَكَ اللَّہُ وَ ثَبَّتَكَ" اور "وَ السَّلَامُ عَلَيْكَ..." اس بات کی نشانی ہے کہ اسحاق کو امام مہدیؑ کی تائید حاصل تھی۔[15] اس کے علاوہ اسحاق کی طرف سے پوچھے گئے سوالات کے مضامین اور شیخ طوسی جیسے اشخاص کے ذریعے ان کا نقل ہونا بھی راوی کی علمی حیثیت کو ظاہر کرتا ہے۔[16]
اس کے علاوہ، بعض علمائے فقہ اور علم اصول جیسے شیخ انصاری، محقق اصفہانی اور میرزائے نائینی نے اسحاق کی وثاقت کے بارے میں خاموشی اختیار کی ہے، اور آیت اللہ خوئی نے اسحاق کو "عظیم علماء" میں شمار کیا ہے،[17] جو اس بات کا مؤید ہے کہ اسحاق ایک معتبر راوی تھے۔[حوالہ درکار]
کتاب الکافی میں نقل نہ ہونے کی دلیل
کلینی نے اس خط کو اپنی کتاب کافی میں نقل نہیں کیا ہے، اسی وجہ سے اس کے کلینی سے منسوب ہونے پرشک کیا گیا ہے۔[18] سید کاظم حائری کا ماننا ہے کہ کتاب کافی عوام کے لیے لکھی گئی ہے، اور اس تقیہ اور گھٹن کے ماحول میں شفاف طور سے راوی کا نام اور امام کے نائب خاص کا تذکرہ ، اپ کے وکلا اور امام وکالتی نظام کے لیے خطرات کا باعث بن سکتا تھا۔ نیز ممکن ہے کہ یہ خط کلینی کو کافی کی تکمیل کے بعد دستیاب ہوا ہو۔[19]
اسی طرح یہ بھی کہا گیا ہے کہ چونکہ یہ خط فقہی مسائل پر مبنی نہیں تھا، اس لیے کلینی نے اسے کافی میں شامل نہیں کیا ہے۔ البتہ کلینی کی ایک اور کتاب الرسائل بھی تھی، جو خطوط اور ائمہ کی توقیعات سے مخصوص تھی اور اس کتاب میں اس خط کا ذکر زیادہ مناسب تھا، اس لیے ممکن ہے کہ کلینی نے اسے اس کتاب میں درج کیا ہو۔[20]
حوالہ جات
1. شیخ انصاری، کتاب المکاسب، 1415ھ، ج3، ص555؛ امام خمینی، کتاب البیع، 1421ھ، ج2، ص635۔
2. صدوق، کمالالدین، 1395ھ، ج2، ص483-485؛ طوسی، الغیبہ، 1411ھ، ص290-291۔
3. صدوق،کمالالدین، 1395ھ، ج2، ص483-485۔
4. طوسی، الغیبہ، 1411ھ، ص290-291۔
5. صدوق،کمالالدین، 1395ھ، ج2، ص483-485۔
6. شیخ انصاری، کتاب المکاسب، 1415ھ، ج3، ص555-556۔
7. منتظری، دراسات فی ولایۃ الفقیہ، 1409ھ، ج1، ص481۔
8. شیخ انصاری، کتاب المکاسب، 1415ھ، ج3، ص555-556۔
9. امام خمینی، کتاب البیع، 1421ھ، ج2، ص636؛ مؤمن قمی، الولایۃ الالہیہ، 1425ھ، ج3، ص402۔
10. امام خمینی، ولایت فقیہ، 1381ش، ص80-82۔
11. منتظری، دراسات فی ولایۃ الفقیہ، 1409ھ، ج1، ص479۔
12. طباطبایی قمی، دراساتنا من الفقہ الجعفری، 1400ھ، ج3، ص111؛ خویی، موسوعۃ الامام الخویی، ج22، ص82۔
13. شقیر، «پژوہشی دربارہ توقیع شریف امام زمان(عج) بہ اسحاق بن یعقوب»، مجلہ فقہ اہل بیت(ع)»۔
14. حائری، ولایۃ الامر فی عصر الغیبہ، 1413ھ، ص100-101۔
15. مؤمن قمی، الولایۃ الالہیہ، 1425ھ، ج3، ص400۔
16. مدرسی یزدی، آفاق ولایت، 1403ش، ج2، 163۔
17. خویی، مصباح الفقاہہ، 1368ش، ج5، ص48۔
18. منتظری، دراسات فی ولایۃ الفقیہ، 1409ھ، ج1، ص479۔
19. حائری، ولایۃ الامر فی عصر الغیبہ، 1413ھ، ص103۔
20. شقیر، «پژوہشی دربارہ توقیع شریف امام زمان (ع) بہ اسحاق بن یعقوب»، مجلہ فقہ اہل بیت(ع)»۔
مآخذ
• امام خمینی، سید روحاللہ، کتاب البیع، تہران، مؤسسہ تنظیم و نشر آثار امام خمینی، 1421ھ۔
• امام خمینی، سید روحاللہ، ولایت فقیہ - حکومت اسلامی، تہران، مؤسسہ تنظیم و نشر آثار امام خمینی، 1381ہجری شمسی۔
• حائری، سید کاظم، ولایۃ الامر فی عصر الغیبہ، قم، مجمع الفکر الاسلامی، 1413ھ۔
• حسینی شاہرودی، سید محمود، کتاب الحج، مقرر: ابراہیم جناتی، قم، انصاریان، 1381ھ۔
• خویی، سید ابوالقاسم، مصباح الفقاہہ، مقرر: محمدعلی توحیدی، بینا، 1368ہجری شمسی۔
• خویی، سید ابوالقاسم، موسوعۃ الامام الخویی، مؤسسۃ الخویی الإسلاميہ، بیتا۔
• شقیر، محمد، «پژوہشی دربارہ توقیع شریف امام زمان (ع) بہ اسحاق بن یعقوب»، مجلہ فقہ اہل بیت(ع)»، شمارہ46، سال12، ص193 تا 207.
• شیخ انصاری، مرتضی، کتاب المکاسب، قم، المؤتمر العالمی بمناسبۃ الذکری المئويۃ الثانيۃ لميلاد الشيخ الاعظم الانصاری، 1415ھ۔
• صدوق،محمد بن علی، کمالالدین و تمام النعمہ، تہران، اسلامیہ، 1395ھ۔
• طباطبایی قمی، سید تقی، دراساتنا من الفقہ الجعفری، مقرر: علی مروجی، قم، مطبعۃ الخیام، 1400ھ۔
• طوسی، محمد بن حسن، الغیبہ، قم، دار المعارف الاسلامیہ، 1411ھ۔
• مامقانی، عبداللہ، تنقیح المقال، قم، مؤسسۃ آل البیت لاحیاء التراث، 1431ھ۔
• محمدی ریشہری، محمد، دانشنامہ امام مہدی(عج)، قم، دار الحدیث، 1393ہجری شمسی۔
• مدرسی یزدی، سید محمدرضا، آفاق ولایت، قم، دار الکتب المعاصرہ، 1403ہجری شمسی۔
• مروی، جواد، «اثبات اعتبار سندی توقیع شریف»، پایگاہ اطلاعرسانی شیخ جواد مروی، تاریخ بازدید: 22 شہریور 1404ہجری شمسی۔
• منتظری، حسینعلی، دراسات فی ولایۃ الفقیہ و فقہ الدولۃ الاسلامیہ، قم، المرکز العالمی للدراسات الاسلامیہ، 1409ھ۔
• مؤمن قمی، محمد، الولایۃ الالہیہ الاسلامیہ (الحکومۃ الاسلامیہ)، قم، دفتر انتشارات اسلامی وابستہ بہ جامعہ مدرسین حوزہ علمیہ قم، 1425ھ۔
• نائینی، محمدحسین، منیۃ الطالب فی حاشیۃ المکاسب، تہران، المکتبۃ المحمدیہ، 1373ھ۔