شبكة الإمامين الحسنين عليهما السلام الثقافية

تشوف الخبيث يدوس صدر حسين بنعال

وتدافعه وتبجي وهو يحز الوريدين

تنخّي وتقلّه يارجس لاتحز نحره

هذا حبيب المصطفى ومهجة الزّهرا

تربّى على صدر النّبي وتّدوس صدره

و تهبّر اوداجه عسى انشلّت هاليمين

وصاحت ينور العين ياصاحب الغيره

شبيدي يخويه مابقت ليّه عشيره

شتْفيد نخوات البقت حرمه ويسيره

متحيّره بعيله يخويه ولا لي معين

خضابي بعرصة كربلا ماريد انا خضاب

لازم يجيني من حبيب المصطفى كتاب

مسلم يبن عمّي دخبّرني اشصاير

اشوف لونك منخطف والقلب طاير

مذهول تمشي بالسّكك مشية الحاير

تخفي النّشيج و مدمعك بالخدّ سجّاب

قلّه هل الكوفه تراهم مستعدّين

لمـّوا عساكرهم قصدهم ذبحة حسين

وبكربلا مولاك لا ناصر ولا معين

عاف الدنيّه ومن كثر جورالدّهر شاب

عاف الدنيّه ويح قلبي وطلع مقهور

خلّا عقب عينه مظِلْمه وموحشه الدّور

وشال بعزيزات النّبي هايم بالبرور

ما ظلّ بعده بمنزله شيخٍ ولاشاب

انظر بعينك ياحبيب تجهّز الجيش

أعلن الصّايح والزّمان اقبل بتوحيش

واحنا عقب سبط النّبي ساعه فلا نعيش

شلون المعيشه من بعد بن داحي الباب

قلّه حبيب النّوح والحسرات مَتْفيد

توكّل على الله كربلا عنّه مهي بعيد

عجّل قبل ما ينذبح نسل الاماجيد

يا سعد من يحضى بنومة ذاك التراب

هذا من المختار في الأمّه وديعه

عجّل قبل ما توقع علينا الفجيعه

نوصل قبل لا تنهدم كعبة الشّيعه

العراق كلها مجنّده وماعنده اصحاب

الله يوصّلني قبل توصل هالجنود

و انجان رب العرش بلّغني المقصود

لَفْدي بروحي شِبِل حيدر سرّ الوجود

وانشر البيرق وانتخي مابين الاطناب

اتناول حبيب العلم من جف الشفيّه

وهزّه بيمينه وقال طابت لي المنيّه

عايف حياتي والوطن لجلك يَصِنديد

تشهد صناديد الحرب عندي الحرب عيد

موت بمعزّه ولا نعيش بطاعة يزيد

يابن الرّسول وطاعتك فرضٍ عليه

والله يبن بنت النّبي لو قطّعوني

بالسّيف والخطّي وبالنّار احرقوني

وذرّوا عضامي بالهوا وتالي انشروني

سبعين مرّه هالفعل يجري عليّه

والله يَبو السجّاد ما فارق جمالك

روحي ومالي والاهل كلهم فدالك

كل شيعتك تفنى ولا تهتك عيالك

و التفت لَصْحابه وعبراته جريّه

قَلْهم يَفرسان الحرب كلكم تسمعون

باجر ابهالعرصه يثور الحرب و الكون

ولايكون سادتكم بنو هاشم يحملون

الّا عقب ما ننفني كلنا سويّه

قلّه البطل عبّاس ما ترضى شيمنا

المطلوب اخونا والحرم كلها حرمنا

و انجان ثار الحرب يتقدّم علمنا

منشور بيدي واخوتي تمشي بفيّه

قال الشّهيد حسين يا مهجة الكرّار

جدّامنا خلها يخويه تفوت الانصار

منّه ومنهم يالأخو تتْقصَّف اعمار

تالي النّهار خيامنا تبقى خليّه

وتالي عْلَى المخيّم يخويه تهجم الخيل

وتطلع خواتك من خباها تصيح بالويل

ريتك تعاين حالها لو هوّد الليل

وتصير قشره على النّسا ذيج العشيّه

صوّل على الجيمان مغضب شيخ الانصار

و اروى من دموم العدا الصّارم البتّار

شدّ وصدم بالميمنه يسرى الاعادي

واظلم نهار الكون بس لمع الهنادي

وغرّة ابو مظاهر تشع وهو ينادي

نفسي فدا لك يابقيّة بيت الاطهار

يانور عين المصطفى روحي فدا لك

واللي أملكه يالذي خلصت رجالك

محصور يبن المصطفى وانصار مالك

و جنود اميّه ملَمْلَمَه من كل الامصار

والقلب ظامي ملتظي ماضاق شربه

وحدّر عليها واخلت الفرسان دربه

ولنّ الرّجس صمّم الحربه بوسط قلبه

ومن صهوة حصانه تقنطر فوق لوعار

خر وتِضَعضع ركن ابو السجّاد بالحال

و شافه يتمرّغ بالدّما ومنّه الدّمع سال

وقلّه وفيت وزدت ياجيدوم الرجال

لكن تركتوني بليّا انصار محتار

نايم حبيبي ياحبيب بحرّ التراب

فزت بجوار المصطفى ياخير الاصحاب

تحسّر وقلّه ياخليفة داحي الباب

ودّي أنا اتقطّع بنصرك عدّة امرار

بلّغ سلامي مخدّرة حيدر وقلها

الله يساعدها على تشِتّت شملها

متحيّره تبقى عقب شايل حملها

تقطع برور بغير والي فوق الاكوار

عندي خبر من حيدر الكرّار ابوها

من بعد عينك تنسبي و يسلّبوها

وللكوفه حسره عْلَى الهزيله يركّبوها

ويّا اليتامى يشهّروها بكل الامصار

ابّباب المخيّم عاليه ضجّة الرّضعان

وزينب بحسره ومرعليها شيخ همدان

وشاف الاطفال من الوديعه تطلب الماي

والكل يناديها يَعَمَّه تفتّت حشاي

وابّاب خيمتها العوايل رايح وجاي

هلّت ادموعه وصاح برجاله يفرسان

يَهْل الفراسه المرجله هذا محلها

مْن العطش هالرّضعان هلكت دانهضوا الها

أمّ الرّضيع تلوج ويعالج طفلها

هسّا نجيب الماي ونعمّر الميدان

سيطر العلامه ورجاله على الشّريعه

و الماي خاضه و عالوجن هلّت ادموعه

وقلهم حرام الماي ياصفوة الشّيعه

وآل الرّساله بالظّما وحسين عطشان

بالماي طلعوا قاصدين مخيّم حسين

ولن العدا جلَّت على الشّارع الصّوبين

وبرير صاح بصوت ياخوّانة الدّين

خلّوا دربنا من العطش هلكت الرّضعان

كهف اليتامى حسين بس ماسمع صوته

صاح ابّني عمّه وابو فاضل وخوته

بالعجل دركوا برير جنّي اسمع نخوته

حالاً تناخوا وهجموا وفرّت العدوان

وصّل برير بجربته يم الصّواوين

واجتمعت الايتام كلها والنّساوين

داروا على زينب بضجّه شمال ويمين

و زينب تهل ادموعها و القلب لهفان

تبدّد الماي وبقت محتاره الحزينه

و الكل يناديها يعمّه الماي وينه

وزينب تصيح مقدّر الباري علينه

نبقى بظمانا بالفلا يا آل عدنان

واللي دهاها عزيزة الزّهرا ودَهَشْها

وظلّت على الوادي مدامعها ترشْها

ضيعة الماي ورجعة العيله بعطشها

وضاقت عليها الواسعه الحالة النّسوان

طبّ الشّهيد حسين يتفقّد انصاره

ويّا حبيب وشاف مسلم بالمعاره

مرمي ووقف ريحانة المختار عنده

و آمر حبيب من التّراب يشيل خدّه

ترحّم و حطّ رجله وساده وعدل زنده

ويَمَّه حبيب يخاطبه ودمعه يتجارى

يقله انا بودّي توصّيني بوصيّه

لكن انا عْلى الاثر لورود المنيّه

قلّه يبن عمّي فرض واجب عليّه

اوصيك جاهد عن اهل بيت الاماره

عندي وصيّه يا حبيب اوصيك بحسين

انصر الهادي والوصي وستّ النّساوين

شوف العساكر دارت على الخيم صوبين

وهذي بنات المصطفى وقفن حيارى

ادّى الوصيّه وغمَض عينه وفاضت الرّوح

و حسين رد للخيم عاين طفلته تنوح

نشّف دمعها واحتضنها بقلب مجروح

صاحت انشدك عن ابويه وعن اخباره

عن والدي بشّر عسى نال الشّهاده

و بيّض وجهنا ياحشا الزّهرا بجهاده

قلها يَهَل هالبيت نلتوها السّعاده

فاز بشهاده والدج والله اختاره

بيده مسح راس اليتيمه وجان طبعه

من ينظر بعينه يتيم يسيل دمعه

للخيم ردها وبالنّحب ظلت تودعه

قلها درِدّي ويا الحرم صرتوا يسارى

وامها تلقّتها تقلها شعِنْدك اخبار

قالت على التّربان صار اكثر الانصار

وابوي ويّاهم فدا عترة المختار

قالت يبنتي خوش جيتي لي ابّشاره

لكن وحيد حسين ظل ولاله أعوان

و الحرم وسفه تضيع بعده بغير وليان

وَسْفه تظل زينب يسيره بيد عدوان

ويّا بنات المصطفى ويمشن يساره

واجف على راس العبد ركن الدّيانه

يقلّه انسحب ياجون لاتبلي اببّلانا

أهل الشّرف واللي رسول الله جدهم

شدّاتهم مايبتلي بيها عبدهم

وجنود ابن هند الرّجس ذبحي قصدهم

فوز بنجاتك جون لاتقعد ويانا

اعْلَى السّلامه والامان انتَ اتبَعتنا

و ادّيتها حقوق المودّه و اخْدمتنا

وهذي العدا حتّى عن الماي منعَتْنا

و لازم ابهالوادي ترى تسفك دمانا

هلّت ادموعه و ظل يصيح الله ولحّد

يامهجة الزّهرا و شمّامة محمَّد

آنا عبد يبن الرّسول ولوني أسود

بين الملا خلّ العبد يرتفع شانه

تكرّم على عبدك يبن حيدر الكرّار

خلّ يختلط دمّ العبد بدموم الاحرار

شلون اعوفك بين هالعدوان محتار

وانت يَبو اليمّه أمين الله وامانه

يبن الوصي العاده العبد يفدي عمامه

و ياهو أنا مثلي عبد عمّه إمامه

شالعذر عند المصطفى يوم القيامه

لو قال عفت حسين بين اهل الخيانه

شال الشّهيد إيديه للباري ودعى له

و حين اللفاه المصرعه يعاين الحاله

دنّق على خدّه وعن التّربان شاله

وفتّح عيونه وقال أدّيت الامانه

طبّ التّميمي للسّعاده الغاضريّه

وشاف السّبط مفرود وخيامه خليّه

سلّم على المظلوم شافه وحيد محتار

وكل اخوته فوق التراب ولا له انصار

قلّه جنودك وين يا مهجة المختار

عفت الاوطان وجيت بس قصدي المنيّه

آنا سعيد و جيت متْعَنّي سعودي

قصدي أعفر بالثّرى دونك خدودي

أقضي بظماي وياك و الكوثر ورودي

تسلّم عليك الوالده يابْن الشّفيّه

قلّه لها منّي و من جدّي سلامات

و مصيبتي كل الذي عنها سلامات

يبني اليطب هالكون مايرجع سلامات

وانتَ شباب بنفسك الدّنيا الهويّه

قلّه يبن خير الانام اسمع جوابي

جيتك البَذْل النّفس مَيهمني شبابي

فارقت يبن المصطفى لجلك احبابي

قصدي الشّهاده واندفن بالغاضريّه

كلمَن قِطَع منكم يبوالسجّاد وَصْلَه

هذا الخبث كلّه من اصل الام واصله

قلّه سلامي الجدّي المختار وصله

روح الحريبه والحق اليوث الحميّه

تكنّى وشهرسيفه وطلب رخصه من حسين

شمّر اردانه وهجم لاناصر ولامعين

زلزل كتايبها و قلَبْها شمال و يمين

من كل كتر دارت عليه جنود أميّه

صوّل عليها و بالدّما تجري اكتاره

لمَّن تعفّر و انجدل وسط المعاره

جاه الشّهيد حسين و ادموعه اتّجاره

وجابه وصفّه ويا الانصارعلى الوطيّه

طلعت من الخيمه الحزينه تصيح يحسين

ذوّبت قلبي خايفه تبقى بلا معين

جيت بحريمك واوحشت ياخوي لديار

وانْزلت وادي كربلا وجيش الكفر دار

و انتَ غريب ابهالفيافي و قلّة انصار

سبعين الف و انصاركم نيّف وسبعين

من هالعساكر موحشه الدّنيا عليّه

من بعدكم يحسين من وصّيت بيّه

خوفي يسلمونك أنصارك ياشفيّه

وبكربلا محتار تبقى ياضيا العين

خاطب انصارك ياضياناواكشف الحال

و استخبر النيّات ياصيوان العيال

خوفي يخويه من تصكّ رجال برجال

تتفرّق رجالك يخويه شمال ويمين

قلها يزينب هالعشيّه جمّعتهم

و اخبرتهم باللي يصير ورخّصتهم

حنوا حنين النّيب حينٍ خاطبتهم

وقالوا يبن حيدر نِصِد بوجوهنا وين

ناديت يَصْحابي عليكم هوّد الليل

روحوا وخلّوني وصاح الكل بالويل

قاموا يَزينب والمدامع تشبه السّيل

للموت كلهم دون اخيّك مستعدين

كلهم يحبّون الفَنا دوني والحتوف

متحالفين اعلَى المنيّه برض لطفوف

لذّاتهم يوم الحرايب ضرب السيوف

ليوث و ضواري ياحزينه لا تحنّين

ظلّت تعاينهم و تهمي فيض لدموع

ومن الاسف تصفج الرّاح بقلب موجوع

وتصيح يا وطرٍ تقضّى ماله رجوع

ماظنّتي لرض المدينه يرجع حسين

ثاري اخْوتي خطّار عندي يامسلمين

بس هالمسيّه والصّبح للموت ماشين

هلّت دموع عيونها وقامت كئيبه

وطلعت تلوب وتسحب أذيال المصيبه

وتصيح اثاري حسين يتركني غريبه

حرمه و غريبه شلون اسوّي ابهالنساوين

صاح الشّهيد حسين زينب يازجيّه

بطلي البواجي زادت اهمومي عليّه

صبري عسى الله يساعدج ياهاشميّه

مادام أنا موجود يختي ماتذلّين

تبجين يازينب و عندج صفوة ارجال

عبّاس بيهم يعرفونه موت الابطال

بس ينحدر للكون بيه يحلّ زلزال

شِبْهِ السّحاب بزلزله يرج الميادين

صاحت يخويه جان هلِّي تذكره دام

أدري بحياته مايذلّوني ولا انضام

وامّا المصيبه جان فوق المشرعه نام

بعده نضيع ونلتجي يابو علي وين

الليله بمعزّه و باجر نشوف الكسيره

يحسين تبليني ابهليتام الكثيره

ريتك ابهالليله تواريني ابحفيره

ولا شوفك مجدّل يخويه ابغير تجفين

الليله بمعزّه و باجر نشوف الهضيمه

جم أرمله تنتحب حولي وجم يتيمه

شان المسافر لازم يوصّي بحريمه

و صّيت من يانور عيني ابهالنّساوين

ثاري بنو هاشم الليله عندنا اضيوف

و باجر يخلّونا حيارى برض الطفوف

والله مذلّه بعدكم يابوعلي نشوف

هاجت احزانه والدّمع يجري من العين

قلها اصبري وتجلّدي لمقدّر يكون

وباري يَزينب هاليتامى لا يضيعون

بعدي على ظهور الهزِل حسَّر تركبون

و انتي على ناقه وعلى جسمي تمرّين

جيبج عليّه بعد ذبحي لا تشقّيه

ولا تخمشي خدّج وصدرج لا تلطميه

صبري على الذّله وكل ضيمٍ تشوفيه

وباري هالمسجّى القطع قلبي بالونين

طلعت تجر ذيل الحزن وقت العشيّه

ومرّت على فسطاط أبوسكنه الشجيّه

هلّت دموع العين لمّن شافت حسين

محتار جالس والمدامع على الخدّين

متصوّر الفقد اخوته وهتك النّساوين

يتلهّف ويعتب على الدّنيا الدّنيه

اختنقت بعبرتها ومشت والدّمع مذروف

ومرّت على خيمة كفيل ايتامها تشوف

لنّ البطل عبّاس جالس واخوته وقوف

مثل البدر من حوله نجوم المضيّه

وقدّام عينه مفرّعه حيود ونشامه

و الكل بيده مهنّده ومصغي الكلامه

قَلْهم يفرسان الذي يود السلامه

ابهالليل يمشي و اتركوا الزّحمه عليه

وكِلْمَنْ يهاب الموت منكم يا شياهين

يترك هالمخيّم بصدري و هالنّساوين

وانا واخوتي نروح فدوه العِزْنَه حسين

باجر أصيح بصوت حي على المنيّه

نفسي بجنب المشرعه تحضى بسعدها

أَوْعَدِتْ بنت المرتضى وباجر وعدها

اعزيزه و جبِتْها بذمّتي من حرم جدها

و هلّت ادموعه و انقطع باجي حجيّه

واكبر علي ثار وجذب سيفه وسلّه

وحطّه على جتفه و الشّعر بالحال فلّه

واحنى على عمّه يحب راسه ويقلّه

تشوف الفعل قدّام عينك يا شفيّه

والله يعمّي لو تجي رخصه من حسين

وحياة أبوك المرتضى فارس الكونين

لحمل على العسكر واخلي الجيش شطرين

قبل الفجر تبقى مضاربهم خليّه

قلّه ينور العين باجر عينك تشوف

بجنب الشّريعه بصولتي شَفْعَل بالصفوف

جان القضا ساعد وسلمت لي هلجفوف

لترك أهل كوفان كل بيت بعزيّه

كلّه لجل زينب تراهي ذوّبتني

شافت الجيش وبقت تنحب وشْعبَتْني

تشبع مذلّه من العدا جان فقدتني

تنصب نياحتها على حسين وعليّه

شمر الضّبابي ايخاطب اولاد امّ البنين

ويقول يا عبّاس خلّوا عنكم حسين

فكّر ترى مطلب اخوك مجيد وبعيد

كلّه مخاطر والسّلامه بطاعة يزيد

هذا أمانك واخوتك عندي وإذا تريد

نخلّيه تحت تْصَرّفك جيش العراقين

قلّه يطاغي شهالكلام اللّي تقوله

سيف القضا بونا علي واحنا شبوله

أترك حمى الدّين وحبيب الله ورسوله

واتبع نغل سفيان لا مذهب ولا دين

ديني حسين ومذهبي خلّ الأخوّه

ركن الدّيانه بو علي وفرع النبوّه

أترك خواتي تنسبي و وين المروّه

محنا نتيجة هند ، صفوه وهاشميين

حيدر ابويه اسمه على ساق العرش نور

واخذل عضيدي حسين وانصر شارب خمور

والله لراويكم فعل للحشر مذكور

وتجدّده كل عام شيعتنا المحبين

مغضب رجع وحسين يترقّب رجوعه

مثل الاسد يهدر و لا يملك ادموعه

وقبال ابو سكنه وقف يبدي خضوعه

وحسين قلّه والحجي مابين الاثنين

انت عضيدي يالأخو وانا عضيدك

وانا مراد الجيش وانت ما يريدك

عبّاس انا المطلوب وانت الامر بيدك

دنّق وحب ايده وهل مدامع العين

وقلّه يبو السجّاد روحي اليوم تفداك

ويّاك لقضي العمر يامظلوم ويّاك

وجودك يخويه العيد واقبلنا ضحاياك

هيهات يعدي عليك عادي واحنا حيّين

نفس الرّسول ومهجة الزّهرا ونخلّيك

نطلب سلامتنا ونعوفك بين اعاديك

بالجيش رخّصني يبن حيدر واراويك

و زينب بخيمتها وسمعت نحبة حسين

طلعت تجر اذيالها وتصعّد انفاس

دشّت الخيمه و بالمصايب قلبها حاس

ولنّ الشّهيد يقلّب بجفين عبّاس

و قفت بحيرتها الوديعه بين الاثنين

صاحت وهي متأكّده حلول المصيبه

ياولاد حيدر لا تخلّوني غريبه

ومن شافها المظلوم بطّل من نحيبه

وقلها علي السجّاد عندج ماتضيعين

ضاقت يبو فاضل فيافي الغاضريّه

واشوف بين خيامنا تحوم المنيّه

جنّي أشوف حتوف و اعمارٍ قريبه

وجنّه القضا نازل يَسردال الكتيبه

باجر على راسي أنا تدور الحريبه

وهالجيش هاللي مجتمع كلّه عليّه

وقصد الاعادي من عضيدك يبن الامجاد

سوم الدنيّه وطاعة الفاجر ابن زياد

وحتف المنيّه بينها ومابين المراد

ويدرون أخوك حسين ميدوس الدنيّه

لكن يبو فاضل بخوتك قوّض وشيل

و انا اتركوني ابهالفضا و القوم والخيل

ردّوا ابسلامتكم يخويه بأوّل الليل

أمكم حزينه و دوركم تبْقى خليّه

وسلّم على محمَّد وقلّه يبن الامجاد

إلتفت لا تنقطع من بعدي الوفَّاد

و آنا عليّ ابهالفلا ياخوي ميعاد

أنذبح و اختك تنسبي و تركب مطيّه

قلّه يبو سكنه تركت القلب مكسور

مَنْته ملاذ النّاس وانتَ العمد و السّور

لاوين أنا اتوجّه ومجبل يوم عاشور

كلنا انتمنّى الموت دونك ياشفيّه

أرجع واشوفك حاير وتتحدّث النّاس

خاف المنيّه وعاف أخوه حسين عبّاس

وشعاد لو قطعوا جفوفي وفضخوا الرّاس

هاي السّعاده ودونها حتوف المنيّه

وزينب على باب الخبا ودخلت كئيبه

تصيح بذممكم لا تخلّوني غريبه

لو عافنا العبّاس ياهو النِلْتجي به

وسط الفلا وعدوان ما بيهم حميّه

واهوت علىحسين وعلىالعبّاس بالحال

تقلّه تخلّينا يبو فاضل يَسردال

وتشوف أخوك حسين حايرماله رجال

ياهو الطلَعْني امن الاوطان وزمط ليّه

قرْب المسا وقّف اصحابه وكل لخوان

صَفّين وتوسّطهم بجانب الصّيوان

قلهم يصحبي واخوتي كلكم تسمعون

مطلوب انا و القوم بيكم مايفكرون

يَكْرام قتلي ابهالفيافي لازم ايكون

فوزوا ابسلامتكم وانا وعدي ابهالمكان

ضجّوا فرد ضجّه وصاحوا ياحما الدّين

نفوز بسعادتنا و فداك نصير يحسين

نخلّيك مابين الأعادي والشّيم وين

شالعذرعِدْ خير الرّسل يانور الاكوان

لكن يبو السجّاد بكره يصير معلوم

ماينسفك دمّك لحتّى تسفك دموم

ونشفي غليل قلوبنا لازم من القوم

ونوفي بذممنا والوفا من شان الاعيان

يحسين ما عفنا حلايلنا و لبيوت

إلّا بعزم دونك ودون عيالك نموت

حالاً رفع جفّه الذي للقدس لاهوت

عدهم وراواهم منازلهم بلجنان

وليلة العشره بيّتت ذيج الشّفايا

كلها بعباده وبالتّلاوه و بالوصايا

وعدهم مثل كاس العسل جرع المنايا

وامّا الحراير ساهره تودّع الشبّان

وزينب مشَت بين المضارب تجر حسرات

وسمعَت بخيمة بو الفضل عبّاس نخوات

قرّبت يمها بعجل وتعلّت الاصوات

لن البطل عبّاس يندب يال عدنان

باجر يَفرسان الحرايب يعْمَر الكون

و تسبقكم الانصار للميدان لايكون

ناداه لكبر ياشبل هزّاز لحصون

نتقدّم احنا المعركه ياعالي الشّان

احنا يعمّي اللّي ندافع عن حمانا

وتقود فِرْقَتنا ويرف بيدك لوانا

ونشفي غليل القلب باجر من عدانا

لحّد وانا ابن حسين لَطْحَن جيش كوفان

ابتاسع محرّم بو علي قرب المسيّه

خاطب أصحابه وكل بني هاشم سويّه

قلهم يسامين الفَخَر يهل المعالي

عاشر ترى الليله وهي تالي الليالي

وبكره العدا تزحف على مخيّم عيالي

منتو قصدهم هالجمع مبعوث ليّه

قلّه حبيب الليث مقصدنا المنايا

ونبقى على وجه الثّرى دونك ضحايا

عنّك نصد لاوين ياشمس الهدايه

شْنعتذر عند المصطفى خير البريّه

عنّك نصد والجيش سد افجوج البرور

لازم عليك الماي والجو نار مسعور

من غير ناصر بس حرم تلعي بالخدور

وشنْقول للكرّار والزّهرا الزّجيّه

وبرير قام بخطبته وذبّ العمامه

يقلّه يَعنْوان النبوّه والإمامه

هذا يزيد محشّم عراقه وشامه

الذبحك شلون تصير عيشتنا هنيّه

و انا حياتي ابهالدنيّه عايف الها

و حق الوصي و الطّاهره المامش مثلها

لحمل على الجيمان و ابعزمي أَفِلها

أما نجاح و نصر لو فوز ومنيّه

وزهير شال الصّوت بالخطبه ونثرها

يقلّه وحقّ اللّي رْضَعتْ يحسين درها

باجر نخلّي كربلا شايع خبرها

بموقف أحرار يدوم للمحشر دويّه

أثنى على انصاره وتشكّر شبل عدنان

أشّر و راواهم منازلهم بالجنان

وقلهم منايانا ترى باجر يَفرسان

وحريمنا تروح بيسر لاوغاد اميّه

وكِلْمن إله زوجه يودّيها لهلها

و امّا حرمْنا للضّرب و السلب خَلْها

باجر تظل ابهالفيافي و محّد الها

باليسر للشّامات تتودّى هديّه

قومي أريد أوصِّلج يا أسديّه

لهلج وانا ارْد ابْقى بطف الغاضريّه

هذا الشّهيد حسين باليجري علمنا

باجر نهايه وآمَر انودّي حرمنا

وهذي بني عمّج نزل بالقرب يمنا

بالعجل قومي انوصّلج قبل المسيّه

قالت يَمُسلم جان هذي صورة الحال

مهجة الزّهرا حسين شيسَوّي ابهَلعيال

قلها تروح اميسّره و تِفنى هلرْجال

بُكره الظّهر تبقى الخيم كلها خليّه

وانتي بعجل قومي ترى الحاله خطيره

قالت عجايب خوش حب وخوش غيره

آنا المصونه وزينب الحورا أسيره

أقعد براحه و زينب بكور المطيّه

عفت الحياة ودون أخوها سمَحت بالرّوح

و اتريدنا انخلي حريمه بيسر و نروح

كف الحجي حجيك ملا قلبي ترا جروح

لازم تواسي حسين ونواسي الزجيّه

ردّ للشّهيد وعبرته بخدّه يهلها

قلّه وحب إيده يَبن سيّد رسلها

ما قِبْلت الحرّه نوصّلها لاهلها

تفضّل مواساة الحريم الهاشميّه

كلنا فدا لك والحرم فدوه الحريمك

إلنا الفنا يحسين وانت الله يديمك

واطفالنا كلها فدا الظّامي فطيمك

و الوعد عند المصطفى خير البريّه

قلّه بذلتوا الجهد يالطابت شِيَمْكُم

يالزّاكيين اعراض نزّهتوا ذِممكم

اتشاطر عوايلنا ابمصايبها حرمكم

يَكرام بشروا بالجزا مْن الله و نبيّه

باجر يبويه من الصّبح قوّض هلَضعان

و انزل بوادي يصلح الحملة الفرسان

يابوي شوف الجيش يترادف ابهالقاع

وتدري يبويه الغاضريّه انصوص واتلاع

و اللي معك يَبن البتوله احيود و اسباع

و الخيل تدري تريد فسحه وسعة ميدان

وعندك أطفال مروّعه وعندك نساوين

ما تقدر تعاين مذابيح و مطاعين=

قلّه الحرب باجر على ابواب الصّياوين

وانتَ وحرمنا تنظرونا فوق تربان

و اتلاع وادي كربلا كلها و لتلول

باجر أساويها بجثِث فرسان وخيول

وتصير صَفْصَفْ يالولد ودامومها سيول

واجلب على الحي من دم المذبوح طوفان

قلّه أبو فاضل يبن حيدر ونعمين

إنتَ الذّخر لكن شعبت القلب يحسين

تحمل على العسكر يبو سكنه وانا وين

مادام انا حي ماتطب حومة الميدان

آنا واخوتي وكل بني هاشم سيوفك

هيهات مَتْباشر حرب واحنا نشوفك

قلّه عقب ما تنقطع منّك اجفوفك

واتضل مرمي اعْلى النّهر واعود حيران

و عند العليل ضيوف كلنا ابهالعشيّه

و باجر يعاين هالخيم كلها خليّه

و يوم احدعش تقْفر فيافي الغاضريّه

بيها جثثنا امطشّره من غير دفّان

وزينب تسمعه وقلّي اشحالة حشاها

و طلعت تهل ادموعها و تخفي بجاها

طلعت بحسره وقام ابو فاضل وياها

يقلها القصد لاوين ياخيرة النّسوان

قالت أروح الخيمتي واجمع يتاماي

و ابجي عليكم يخوتي و اكثر من انعاي

واشفي غليلي قبل ما تمنعني اعداي

باجر يخويه ابهالوكت ماعندي اخوان

مصباح لقشر صبّحت يا يوم عاشور

تزحف كتايب والسّبط بالطّف محصور

ومن الصّبح جيش الضّلاله تحرّك ودار

و حسين آمر تنضرم بالخندق النّار

والخيم ممليّه حرم و اطفال وكبار

وقلوبهم تغلي بظماها والفضا يفور

أوّل سهم من قوس ابن سعد المزنّم

زلزل اركان الدّين عاشر بالمحرّم

والّا السهام تساقطت وسط المخيّم

وضجّت عزيزات الرّساله وسط الخدور

حالاً نده يَكْرام يَرْجال الحميّه

يَنْصار جدّي وصلت اطروش المنيّه

وفرّت ليوث الغاب للحومه سويّه

وخلّوا برور الغاضريّه بالدّما بحور

والكل يصيح ارواحنا يحسين تفداك

لاخير في الدّنيا ومعيشتها بليّاك

سبعين مرّه ننْذبح يحسين ويّاك

لجلك مهو لجل الخلد يحسين والحور

يامهجة الزّهرا علينا فرض مفروض

يحسين حتف الموت دونك لازم نخوض

وهذا نعيم الخلد يامظلوم معروض

مَيصير منّا قصور لو ما لاحت قصور

وظلّت تحوم على المنايا البيع الارواح

ضرب الهنادي ماتحس به وطعن لرماح

وهجموا علىحتوف المنايا بطرب وافراح

يمشون وسط المعركه مشية المخمور

عدهم احدود البيض جنها بيض لخدود

و امّا السّمر سمر الأوانس تحمل انهود

أطواد لكن حيف كل ساعه وهوا طود

واتناثرت فوق الوطيّه ذيج البدور

وقْفَة حبيب المصطفى تهزّ الاراضين

يقلهم يَوافين العهد خلّيتوا حسين

تهنّوا بنومتكم وَفيتوا يا ميامين

اهتزّت جثثهم على الغبرا ورادت تثور

قبل الظّهر صارت الحمله الاوليّه

واكثر انصار حسين ناموا بالوطيّه

حلّت صلاة الظّهر واذّن ناصر الدّين

تركوا الحرب وتيمّموا وتقدّم حسين

ونادوا على العسكر انجان انتو مسلمين

كفّوا نبلكم خل يصلّي ابن الزجيّه

بارز الحجّاج و تكنّى و صار جدّام

يازين مأموم أُو وراه يصير ليمام

ظل يتلقّى عن حمى الاسلام لسهام

وحسين سلّم والشّهم لاقى المنيّه

قال الشّهيد حسين يصحاب المحنّه

قوموا تراهي تزيّنت روضة الجنّه

و الخايف امن الموت خلّه يروح عنّا

وارد اقضي الواجب من الباري عليّه

دارت رحاها الحرب وامّا الهاشميات

كلهن على ابواب الخبا يجذْبن حسرات

وامّا الوديعه بقلبها صارت الحسبات

تتصوّر المجبل و تتجلّد شجيّه

وصاحت يفضّه بالعجل سئلي عن الحال

بلكت من انصار الولي تشوفين خيّال

نشديه جم فارس تقنْطَر فوق الرمال

لحّد يعين الله على هاي المسيّه

طلعت ولنْ بن عوسجه بجانب الحومه

مطعون تاجي اعْلى الرّمح تنزف دمومه

صاحت يواجف جيشنا عندك اعلومه

من حزبنا ياشيخ لو من حزب اميّه

قلها أنا مسلم يَفضّه تعرفيني

جنّج عن الانصار عزمج تنْشديني

خمسين راحوا وانا منهم حان حيني

قولي الزينب تستعد الهالرزيّه

ردّت و هي تلطم على الهامه بليدين

تنادي يحورا لا تنشديني الخبر شين

راحت ابهالحمله من الانصار خمسين

لليسر لازم نستعد ياهاشميّه

واقف ابوسكنه ويهل الدّمع منثور

ينظر انصاره بين مصروعٍ ومنحور

و يعاين بعينه اشبال الهاشميّين

تتسابق اعلَى الموت دونه و مستعدّين

كلها من ابو طالب ضياغم مستميتين

شدّوا وفرشوا بالاجساد تلاع وبرور

و عبّاس للميدان قلّطهم اخوانه

وجيش الأعادي ضَعضعوا منّه اركانه

وكلهم تفانوا والسّبط قلّت اعوانه

وظلّت خيمهم خاليه من ذيج البدور

وصاحب الرّايه بمركزه ابّاب الصّواوين

يشوف المضارب خاليه من الهاشميّين

لازم حصانه وينتظر رخصه من حسين

وعزمه على خوض المعاره وقلبه يفور

ساعه ولن امن الخبا طلعت سكينه

تبجي وتنادي عمّي العبّاس وينه

مات الرّضيع من الظّما وغمّضت عينه

يمها قرب من شافها والقلب مذعور

اتناول من سكينه الرّضيع وقال ردّي

وطبّي الخيمه يالعزيزه واستعدّي

أمّا أجيب الماي لو ينقطع زندي

وعرّج علىحسين الشّهيد بدمع منثور

وناداه ياللي بالصّبر يحسين موصوف

مَقْدر يموت الطّفل ظامي وعيني تشوف

لو تنطفي عيني و تِتقَطّع هلجفوف

بالله درَخّصني يبن حيدر المذخور

قلّه السّبط عبّاس يازهوة زماني

مثلك أنا حال الطّفل فَتْني وشجاني

لكن يَمَجْمع عسكري وباجي اخواني

حامي خيمنا هالعلم مادام منشور

رخّص عضيده وودّعه والدّمع مسفوح

و قلّه الطّفل ودّه يخويه لخته و روح

لاح بظهر مُهره وسيفه وبيرقه يلوح

بيها صرخ صرخه وخلّى العسكر شطور

ضبَّط حِزمْ غوجه ووقف حامي الظّعينه

جدّام أبو السجّاد و السّيف بيمينه

يقلّه ينور العين درخصني العزم هاج

ياخوي مالي عن ورود المشرعه علاج

قصدي أروّي مهنّدي من فيض لَوداج

طفلك يخويه حسين فت قلبي بونينه

يحسين سكْنه بطفلك الملهوف جتني

يابس السانه و شوفته و الله اشْعبَتني

وحال العزيزه وحال أخوها شلون فتني

تجذب الونّه والرّضيع يدير عينه

هلّت مدامعها يخويه ووقفت حذاي

ترتعش وتقلّي يَعمّي تفتّت حشاي

مدّة ثلثتيّام والله ماضقت ماي

واحنا يخويه الموت لازم واردينه

قلّه يقُطب الحرب ياشايل حملنا

خلّه يخويه من العطش يهلك طفلنا

الله يعَين الجيش لا تشتّت شملنا

بعدك يخويه تميل عدوانك علينا

عبّاس تدري وحدتي بعدك مجيده

وانتَ يخويه الجيش سرداله و عميده

وتدري الأخو للموت مَيْسَلّم عضيده

والحيد يتْضَعْضَعْ من يفارق عوينه

قلّه نخلّي تموت نسوتنا ضمايا

واحنا يَكَهْف الخايف ليوث وشفايا

يحسين درخصني أنكّس هالرّوايا

خيّج يجيب الماي لو تقْطَع يمينه

يحسين درْخصني أنا الهاليوم مذخور

والله بالمطهّم لدوس خدود وصدور

تدري ابهالتّربه و تدري اليوم عاشور

و بالغاضريّه النا مرامٍ قاصدينه

حدّر قمر هاشم على جيش العدا وصال

رمحه المنيّه وصارمه بتّار لاجال

مثل الزّلازل مِنْحدر تسمع رعيده

يتْبَخْتر امكيّف املاقى الموت عيده

حَتم القضا بسيفه وعزرائيل بيده

ضيّق فضاها والعَساكر شافت اهوال

شعّة جبينه وصارمه تذهب بالابصار

من صرخته ذاك الجمع مثل الرّحى دار

فاضت اطفوف الغاضريّه وصاحت النّار

بس امتليت اغمد البتّارك يَسردال

صال وذهلها بصولته ولفها ونشرها

و اذوايبه فوق المتن فلها و نثرها

وطفّح بميمونه على اليمنه وكسرها

وطشّر اليسرى والقلب من مركزه زال

عيون المسامي من ظهور الخيل شلّع

جم حيد مدرع خطف والعسكرتضعضع

كلما تراكم غيمها نوره يتشعشع

فرّت وحتف الموت يلقط وين الابطال

فرّت وظنّت حل عليها نافخ الصّور

تطلب الملجا و الرّ مح يلعب بلصدور

والشّمس تتوقّد وقلبه من الظّما يفور

و تذَكّر سكينه واخوها وللنّهر مال

وحسين لازم مركزه و تهمل ادموعه

يشوفه نسَف جيش العدا وشتّت جموعه

وطلعت مريبه وتنتظر زينب رجوعه

تصيح الكفيل أبطا عساه يعود خيّال

قلها يَزينب للنّهر حوّل بجوده

واخلى ملازمها عسى تسلم زنوده

ردّي الخيمه واطلبي من الله يعوده

سورج تراهو و الذي لَطفالج ظلال

للمشرعه يَمَّمْ قمر هاشم وعدنان

مثل الأسد والجمع راح تقول غزلان

طبّ للنّهر زعلان حاسر عن ذراعه

والماي خاضه وشافه يلوح بشعاعه

عاف الشّرب والعمردون حسين باعه

ينظر الماي وقلبه من العطَش لهفان

بيده غرف غرفه وصاح وقلبه يفور

ليت العراق بزلزله و افراتها يغور

والله فلا اتروّى وقلب حسين مفطور

وعنده حريم معطّشه واطفال رضعان

قلبي مفتّت والمروّه تقول هيهات

عطشان اخيّي وارتوي من ماي لفْرات

مقمّط رضيعه ويجذب على الماي حسرات

عمري عقب عمرك يخويه حسين لاجان

ظل بالظّما ساقي العطاشى وطلع بالجود

والدّرب بينه وبين اخوه حسين مسدود

بيها سطى وسيفه وصوته بروق ورعود

و الرّوس تمطر والدموم تقول طوفان

كر ايتناخى الجيش وحسين انتخى وصال

عبّاس باليَمنه وابوسكنه بالشمال

صبّوا على العَسكر من البردين زلزال

والكل قصد خيّه ورفيف العلم نيشان

شوصف فعايلهم بهل كوفان الاثنين

مدْري صواجع نازله عْلى الجيش صوبين

شنهي الصّواجع من عزم عبّاس وحسين

عافت ملازمها وخَلَت حومة الميدان

شمس النّبوّه وقمر هاشم يوم عاشور

دار الفلك بيها وتلاقى النّور بالنّور

شقّوا سحاب من الكتايب والسّما تمور

احتضنوا وزينب طلعت ترحّب بلَخوان

قطعوا جفوفه وانبهض حامي الظّعينه

وظل بالمعاره يصيح يختي ياحزينه

يختي يَزينب قطعوا شمالي ويميني

دارت عليّ صفوف لا تترقّبيني

حال القضا يمخدّره بينج و بيني

و انجان طحت اعلى الثّرى سلّي سكينه

منكم يزينب أيّست للخيَم ماعود

جفوفي تراهي اتقطّعت واتمزّق الجود

والسّيف ما ينشال يازينب بلا زنود

والطير مَيْطير و جناحه كاسرينه

دمومي انّزفت ياحزينه والقلب ذاب

وانا الأسد لكن بقيت بغير مخلاب

ما ظنّتي أقدر أوصّل يم لَطناب

ابهالحال أنا وصولي الحرم ويني اُووينه

انقطعت جفوفي وصرت حاير بالمعاره

شلون الصّقر يفرس ومقطوعه اظفاره

بشروا عقب ذبحي يزينب بانكساره

و انجان راح حسين ضعتي ياحزينه

قولي لخيّي بوعلي يلتفت ليّه

جان اوقعت فوق الثّرى يلحق عليّه

أنظر بعيني غرّته قبل المنيّه

و بلغوا سلامي الوالده برض المدينه

قولي لبوسكنه يجي بس يسمع الصّوت

حتّى يودّعني واودعه قبل ما اموت

تحيّر وقلبه من لهيب العطش مفتوت

و لنّ السّهم صابه يويلي بوسَط عينه

قطعوا العدا اجفوفي يخويه والعلم مال

بالعجل شوف البيرقك يحسين شيّال

طاح الحمل يا بوعلي وقلّت الحيله

مقدر أشيل سلاح والجربه ثجيله

مال العلم يحسين خل ضيغم يجي له

لا ينكسر جيشك يبن حيدر يَسِرْدال

سيفي بسنّي والصّرع يسحب بالتراب

والدّم ينزف والقلب يا بوعلي ذاب

هذا السّهم ناشب بعيني يابن الاطياب

فدوه الخيالك مابقت لعْضيدك أحوال

والله فلا يطيح العلم مادمت موجود

ملزوم أنشره والزمه بْصَدري والزْنود

مَيْطيح حتّى يطيح أخوك بضربة عمود

ينكسر جيشك جان خدّي توسّد رمال

تحيّر أبو فرجه و وقف ودمومه تسيل

وانسد دربه للخيم بالزّلم والخيل

نوبٍ يسنْد العلم صدره ونوبٍ يميل

قرْبَت السّاعه وراسه انشق والعرش مال

تكوّر قمر هاشم وخر من برج مهره

وشمس الهدايه حسين اجا مكسور ظهره

شافه اجفوفه مقطّعه و يفحص بغبره

قلّه يخويه ضاعت اعيالي و لطفال

توعّى يَشايل بيرقي وعن هالتّرب قوم

تترقّبك سكنه وزينب وامّ كلثوم

قلّه عن عيوني يخويه اغسل هلدموم

بيني وبينك ياضيا عيني القضا حال

عبّاس نزّل على العسكر نفخة الصّور

صد الشّريعه يصيح انا الهاليوم مذخور

كردس الرّمايه المشكّر بالشّريعه

صوّل وعسكر بن سعد شتّت جموعه

اووقفت على باب الخِبا بروعه الوديعه

وعبّاس حوّل للفرات وقلبه يفور

وحسين عينه شابحه وينظر افعاله

و زينب خفى وسط النّهر عنها خياله

صاحت يخويه حسين اخوك اشجرى بحاله

ماشوف شخصه ولاأشوف العلم منشور

قلها كفيلج بالنّهر قحّم حصانه

لكن يحورا وحيد مفقوده اعوانه

و الجيش يترادف و خوفي اعْلَى لوانا

يتنكّس وتدرين هذا العلم والسّور

ساعه ولنّه من الشّريعه طلع عبّاس

خلّى الارض كلها جثث بالخيل تنداس

ويلاه من طارن اجفوفه وفضخوا الرّاس

وحسين خاض المعركه و الظّهر مكسور

وشافه مجدّل صاحب النّفس العطوفه

صاح انكسر ظهري ودمعاته ذروفه

ترجّل عن حصانه يلقّطهن اجفوفه

وعاين سهم عينه وشاف الرّاس مطرور

تخوصر على اعضيده ومنّه القلب ذايب

صبهن ادموعه وغسل دمّه و التّرايب

وقلّه مصابك هوّن عليّه المصايب

ياهو اليباري الحرم من بعدك ولخدور

قلّه ودم راسه ودم عينه يسيله

محّد بقى لك هالعلم بعدي يشيله

وبلّغ سلامي و التّحيّه للعقيله

بعدي و بعدك عالهِزّل تقطع هلبرور

اطلب لي العذر منها وقلها ماله زنود

وقلها ملكت الماي لكن خرّقوا الجود

ولا تقول خلّيته على التّربان ممدود

خوفي تفر حسره ولا يبقى لها شعور

يحسين قوموا مْن الخيم ذبّوا العمايم

هذا بدركم مِنْخسف ياولاد هاشم

يحسين ثور من المخيّم جيب شيّال

سردال جيشك لا تتركه فوق لرمال

عنكم ابوفاضل مشى وضاعت هالعيال

دركه تراهو بجانب المسناة نايم

طفّح جواده ووقف يمّه ودمّه يسيل

ينادي يبو فاضل علينا حاطت الخيل

ياهو اليباري هالحرم لو هوّد الليل

وانا بعد ساعه على التّربان لازم

لكن يخويه وين بتّارك طرحته

قلّه يخويه انقطعت اجفوفي و تركته

لو سلم جفّي جان هالبيرق نشرته

وردّيت للخيمه وجود الماي سالم

قلّه يخويه بو الفضل في وين الجفوف

قلّه يخويه اتقطّعت مابين لصفوف

دمّي على عيني جَمَد يَحْسين ماشوف

نشّف ادمومي يابقيّة آل هاشم

نادى يخويه لَغْسِل بدمعي دمومك

تمنّيت جان الهالحريم الله يدومك

لكن يخويه ابهالارض يومي و يومك

وتضيع من بعدي وبعدك هالفواطم