شبكة الإمامين الحسنين عليهما السلام الثقافية

الهاشميون أبطال الوغى

هاشم الاحرار اتعنت اعله الثار

سمعت ابمسلم گضه اتعنت اعله الثار

* * *

سار ظعن حسين لكربلا گاصد

والامل معقود ابراية القائد

هاشم اتعنت رايده اتجاهد

ساروا ابهمه ابظعن أبو اليمه

للمذله رافضه اتعنت اعله الثار

* * *

والهوادج هاي بالجلاله اتنور

وزينب اتشاهد للعلم منشور

وصارم الايمان بالعزم مشهور

أبو اليمه صار ينتظر اخبار

وهاشم ابجمر الغضه اتعنت اعله الثار

* * *

والفرزدق شاف هالشمل ملتم

خبر المظلوم عن چتل مسلم

الكوفه گله اليوم عالغدر تعزم

گلوبهم تهويك والسيوف عليك

گله هاشم معرضه اتعنت اعله الثار

* * *

حسين واخوانه وكل بني عمه

واتحزمت للثار وصاحت ابهمه

واقسموا ميضيع مسلم ودمه

ثاره عيب ايروح نفتدي بالروح

للمنايه خايضه اتعنت اعله الثار

* * *

حسين لمن شاف آل أبو طالب

ابثار ابن عمها رايده اتطالب

ناده حياكم يا بني غالب

راشده النيه للغاضريه

ابكربله ايضيگ الفضه اتعنت اعله الثار

* * *

لن گمر هاشم شهر بتاره

صاح يا مظلوم خل نشن غاره

تقبل لمسلم انضيعه لثاره

حسين گال اشلون مثل ما تردون

والظعن سار ومضه اتعنت اعله الثار

* * *

جعفر وعثمان ايدوا عباس

جاوبوه الموت لو حصل لا باس

ولا نظل انعيش امهبطين الراس

لبن عمنه اليوم ننطي غالي السوم

والشهاده اتعوضه اتعنت اعله الثار

* * *

وعون خاطبهم لجل ابن عمي

ارخص الغالي وافتدي ابدمي

الثار يهل الثار عالزلم حتمي

انبجح گلب حسين اباخوته الطيبين

لحال اخوته ايلاحظه اتعنت اعله الثار

* * *

لكربلا وصلوا وشافوا الحاله

جيش ابن زياد صفوا ارجاله

لن أبو السجاد صوته يتعاله

اهل بيتي وياي اليوم عند عداي

ما اضنها معرضه اتعنت اعله الثار

* * *

جاوبوه الگوم يا حسين نريد

تعلن البيعه للخليفه يزيد

حسين جاوبهم ما نمد الايد

وكل بني عمي امصوته يمي

لحكم اميه اتعارضه اتعنت اعله الثار

* * *

طهران / ١٩٨٥ م

وداعاً يا حسين

يحسين هاي الليله آخر ليله انعيش وياك

هاليوم اصعب كل يوم وانودعك يا مظلوم

يحسين هاي الليله آخر ليله انعيش وياك

* * *

الليله الاخيره من العمر وياكم

باچر يخويه اعله الترب نلگاكم

اسمع دليلي اشصاح واشوصاكم

بالشيم يرباب الشيم ننخاكم

يحسين هاي عيالك هاي اطفالك من بعداك

آنه أحرسها امن الگوم وانودعك يا مظلوم

يحسين هاي الليله آخر ليله انعيش وياك

* * *

آنه العقيله وشاهدت جدّامي

مو زلم چنها ابدور وسط خيامي

واشما تجور ابكربله ايامي

شوفتكم اتروّي دليلي الضامي

يحسين هاي رجالك كلها گبالك تتفداك

صاحوا عالحومه نحوم وانودعك يا مظلوم

يحسين هاي الليله آخر ليله انعيش وياك

* * *

يحسين لتهابون اشرار الناس

لازال وياكم اخويه العباس

هاليله ظل يبن امي مرفوع الراس

وجثتك باچر بالحوافر تنداس

يحسين عندك قائد بالحگ صامد بين اعداك

عهدك بالدم مرسوم وانودعك يا مظلوم

يحسين هاي الليله آخر ليله انعيش وياك

* * *

يحسين تدري بأختك اشتتمنه

كلمن يروح لمصرعه ويتعنه

حتى الضماير كلها تشهد النه

قدمنه شاب ابدم وريده اتحنه

يحسين شاهد جاسم بيده الصارم واتعناك

وينادي انضحي دموم وانودعك يا مظلوم

يحسين هاي الليله آخر ليله انعيش وياك

* * *

يبن امي ويه الگوم ابذل جهدك

بلچن تحس ناس اللي تطلع ضدك

تبرز گبال اشبه الناس ابجدك

شبلك الاكبر هذا مهجة چبدك

يحسين هذا الاكبر يم الخدّر ظل يتناك

گوم لصيوانك گوم وانودعك يا مظلوم

يحسين هاي الليله آخر ليله انعيش وياك

* * *

گام أبو اليمه للخيام وگصده

ايشاهد الوجه اللي يذكره ابجده

والتفت لن شاهد رضيعه ابمهده

ومن شاف عبد الله تفطر چبده

يحسين طفلك ضامي وسط خيامي ابمهده هناك

ايناغي ابگلبه المضروم وانودعك يا مظلوم

يحسين هاي الليله آخر ليله انعيش وياك

* * *

اتعنه لرضيعه حسين يجري العبره

وعالمهد مثل الگوس محني ظهره

بيا عين أبو اليمه لرضيعه اينظره

بالمهد يتلوه وتدارك امره

يحسين انظر طفلك ضامي مثلك نترجاك

گوم واسگي المحروم وانودعك يا مظلوم

يحسين هاي الليله آخر ليله انعيش وياك

* * *

طهران / ١٩٨٦ م

رمز الإباء

ثورتك يحسين ثورة معتقد

بيك اقتدينه والعالم شهد

* * *

يا صفوة الخالق وكنز الاسرار

ثورتك صارت درس لهل الافكار

وضحت دستور الشيم للاحرار

وبكل زمان اتعيد نفس الادوار

موقفك يحسين بالطف انرصد

ابدربك مشينه والعالم شهد

* * *

مشعل الثورة اتنور ابفيض دماك

والكون يا مظلوم يزهي ابمعناك

واحنه المشينه ابدربك وعاهدناك

آخره ودنيه يبو السجاد وياك

ثبتت يحسين للدين العمد

يشهد نبينه والعالم شهد

* * *

هذا الحديث الوارد ابنهج الدين

عن الرسول الهادي نور التكوين

لحسين مني گال وآنه امن حسين

واحنه اعله هاي السنن بالعز ماشين

حبك يمظلوم من أبٍ وجد

ينتقل بينه والعالم شهد

* * *

صاح الضمير اتحققت آمالي

نرخص لاجلك كل نفيس وغالي

وجمرة مصابك تسعر بدلالي

وشفرة احزانك يا شهم تبرالي

جسمك يمظلوم عالغبره سجد

وامگطعينه والعالم شهد

* * *

جسمك الطاهر من وگع عالتربان

سجلت من دمك سور للقرآن

وابطيحتك طاحت اركان الايمان

وابكل گلب تستعر نار الاحزان

وابحافر الخيل مسحوگ الجسد

وامسلبينه والعالم شهد

* * *

نهضتك برض الطف درس للأجيال

ابدم الوريد اكتبت توضيح الحال

واشتركت ابنهضتك حتى الاطفال

واشلون ثوره البيها مسبيه عيال

بالكوفه والشام ثبتت عالعهد

هاي الضعينه والعالم شهد

* * *

يحسين يالفجرت اعظم ثوره

ابدمك الغالي ارسمت هاي الفكره

من مثلك الخياله رضت صدره

وعياله راحت بالظعن متيسره

ابثورتك هزيت اركان الحسد

من المدينه والعالم شهد

* * *

من ارض المدينه لكربله يا مظلوم

راسم درس بالشرف والعز مرسوم

لا أشر طالع لا بطر ضد الگوم

غايتك تدفع للشرف غالي السوم

والباري لولاك ما چان انعبد

ناصرت دينه والعالم شهد

* * *

ابچف الشيم صافحت ذاري المصرع

وجسمك الطاهر بالسيوف اتگطع

لبيض الاشفار وللعواسل مرتع

يا جبل قاف الشامخ الما يخضع

جسمك للسيوف صار الهن غمد

واموذرينه والعالم شهد

* * *

بعلبك / ١٩٨٢ م

الإنسان والمسؤوليّة

موقف الأمة خطير وينهم اهل الضمير

بعده صوت حسين يهتف لا معين ولا نصير

وينهم اهل الضمير

* * *

نفتتح موضوع فكري غامض ويطلب بيان

نشوف كل إنسان يثبت مركزه باربع اركان

ذات واحساس وضمير وفكر يبحث عن ضمان

قسّم واطرح واجمع يطلع الحل الأخير

وينهم اهل الضمير

* * *

ليش خصصنه الضمير وغيره بالحل انترك

هوه الينجي ويوگع صاحبه ابوسط الشرك

وامتحان الناس يظهر بالشدد والمعترك

هذا يوم الامتحان وهذا تقرير المصير

وينهم اهل الضمير

* * *

انقدم اطروحة معارف بالفكر مو بالكلام

ليش كل انسان يجرم من يصيبه الانفصام

وليش هاي الحاله تدفع هالبشر للانتقام

نريد حل لهالمسائل وباناملنه نشير

وينهم اهل الضمير

* * *

نوجد الحل الوحيد ونقط نوضع عالحروف

يظهر السبعين ألف انجنوا بيوم الطفوف

وابو اليمه گباله ينظر جيش متحشد صفوف

جيش سبعين الف طاغي وكافر ومجرم اجير

وينهم اهل الضمير

* * *

شاهد جسوم الصحابه بين مخضوب وتريب

وشاف اهل بيت النبوه بين مذبوح وسليب

ظل أبو السجاد وحده بين هالوادم غريب

مثل هالموقف ميحصل لا مثيل ولا نضير

وينهم اهل الضمير

* * *

التفت لجسوم الصحابه وصاح يا نعم الاصحاب

وحدي ما بين آل اميه والامل عن عيني غاب

لن يشوف الجثث صارت تضطرب فوگ التراب

امغسله ابدم الشهاده امچفنه ابذاري الهجير

وينهم اهل الضمير

* * *

عگب ما أيس حسين وچفه صافح مصرعه

رجع لخيام النبوه وحنه ظلوع الفاجعه

وصاح يا زينب ابذمتچ هاليتامه امودعه

وزينب اتجاوب اخوها ليش بعيونك تدير

وينهم اهل الضمير

* * *

ودع العيله الغريبه وطلع من امخيمه

ظهره مثل الگوس محني وگصد صوب الملحمه

منفرد ما عنده ناصر غير رمحه وصارمه

ولا معين اللي يعينه ولا مغيث ولا مجير

وينهم اهل الضمير

* * *

طلع مثل الليث يمشي وطلعت وياه الهمم

هجم عالجيش ابثباته وهجمت وياه الشيم

وطاح عالتربان لاچن طاح من غالب علم

جالت الخيل اعله صدره وجسمه من دمه عفير

وينهم اهل الضمير

* * *

اشلون هاي الامه ترضه حسين مرمي اعله الرمال

وابن مرجانه عليها يحكم ابجور وضلال

ارد اناشد هالضماير باچر اشتلگه الاجيال

تلگه جسم حسين دامي وابن مرجانه امير؟

وينهم اهل الضمير

* * *

بعلبك / ١٩٨٢ م

إلى رهين السجون

يالكاظم يمسموم اريد اشكيلك هموم

من يوم الغبت عنك لهاليوم اريد اشكيلك هموم

* * *

يالكاظم انادي ابدمع مسفوح ودلالي تفطّر

اصبر والصبر علّة المجروح ما ظن گلبي يگدر

بس الجسم عندي ويمك الروح يا موسى بن جعفر

بالغربه واناديك وابهمك أواسيك

يالكاظم ومثلك گلبي مالوم اريد اشكيلك هموم

* * *

اعتب والعتب من جور الايام وسهام المحبه

وجرح البالگلب ما اظن يلتام من لوعة الغربه

شيصبر الغريب اليحمل آلام وتدري الغربه صعبه

دلالي مينساك گضيت العمر وياك

ما ادري يصير الغرب محتوم اريد اشكيلك هموم

* * *

بدموع الحنان ارسمت آمال وخابت هالاماني

خان الدهر بيّه والهجر طال وابسهمه رماني

هاي المحنه ما چانت على البال ويغدرني زماني

فارگتك يمحبوب وعنك رحت مغصوب

وروحي يم ضريحك ظلت تحوم اريد اشكيلك هموم

* * *

اشكيلك يبن كشّاف الكروب زاد الگلب همّه

اكشف همي يالحبك بالگلوب يا منمسح رسمه

أصدّگ للضريح ارجع يمحبوب ولگبرك اشمه

خل تعتب هالاحباب واسمع صوت العتاب

لتلوم المحب لو عتب لتلوم اريد اشكيلك هموم

* * *

گضيت الحياة ابسجن هارون وابأفعاله سمّك

واشچم شاب مثلك عدنه مسجون نشكي الحاله يمّك

مثلك رادوا ابدمهم يضحون وهمهم مثل همّك

واتنفذت هالاحكام جور وظلم واعدام

ولو دام الكفر هالظلم ميدوم اريد اشكيلك هموم

* * *

صوت الفاجعه من الگلب مرفوع واتصوّب گلبنه

وابدار الغرب محنيه الظلوع من لوعة غربنه

نعتب والجفن فايض بالدموع من يسمع عتبنه

يالكاظم واشد حال عدنه اتيتمت اطفال

مثال ايتامكم غدرتهم الگوم اريد اشكيلك هموم

* * *

چني ابكربله والمدمع يسيل وانظر لليتامه

من هجمت عليها غارة الخيل واتصيح ابملامه

يبدور السعاده خيّم الليل وين اهل الكرامه

وزينب ويه الايتام طلعت تشكي الالام

وصاحت صوت يم جثّة المظلوم اريد اشكيلك هموم

* * *

طهران / ١٩٨٦ م

تريب المحيّا تضنّ السماء

بأنَّ على الأرضِ كيوانَها

(موشح)

العليّه هلّت بالحزن مرجانها تضن طاح اعله الثره كيوانها

* * *

خطت ما صابت الراي ام العله ضنت الكيوان طاح ابكربله

ما درت طايح شبل سيد المله وبي شفت مروان كل اضغانها

* * *

لبست الدنيه اله ثياب السواد وبيه فرحت آل مروان وزياد

ابهدر دمه اغضبت رب العباد وارضت ابهذا الفعل شيطانها

* * *

للرذيله وللطمع صفت صفوف واشهرت سمر القنه بيض السيوف

الطاغي انهضها وتعنت للطفوف سارت ابذل واركبت طغيانها

* * *

اتعنت لسفك الدمه وهتك العرض چتل أبو السجاد چن عدهم فرض

غطّت ابجيمانها افجوج الارض وبالعواسل شيدت حيطانها

* * *

صاحوا بصوت الذي ايشيب الجنين يا حسين اختار وحده من الثنين

لو تبايعنه وتمد النه اليمين لو تسلّم نفسك لميدانها

* * *

اوصه نفسه خامس اصحاب العبه لا ترههبچ بالحرب بيض الضبه

احتزمي بالعز والمچارم والابه وانتي لنفوس البشر ميزانها

* * *

جاوبت راعيها بالعز والامان ناجحه نفسك ابهذا الامتحان

ولون ما تلگه سوى ثياب الهوان تنزع ابچف الحتف جثمانها

* * *

ويه نفسه اتحاور وصار القرار ايضحي بالغالي ولا يحمل العار

الموت بالعز للاكرام اصبح شعار فخر بالدارين يرفع شانها

* * *

جرّد الصارم شبل سر هل اته اسفر هلاله وتوسط حومته

روّع الجيش ابثباته وهمته والمنايا ابچفه زم اعنانها

* * *

وجهه يسطع والمعاره مظلمه وبالمهند شعل نار الملحمه

شب صليل السيف لعنان السمه وجمره لاح الطاير باعنانها

* * *

الارض ترجف غدت والكون انذهل ضنوا الزلزال حل بيها ونزل

اسد باسل فرع من ذاك الفحل يسلب الارواح من ابدانها

* * *

اتغيرت الوانها وجوه الغدر ضنت ابكربلا ميعاد الحشر

ابوجهه تزداد الطلاقه ويبتشر لمن ايغير الخوف الوانها

* * *

بالثبات وبالعزم والمرجله جيش سبعين الف فارس گابله

شهم وفّه ابهمته حگوگ العله وشيد الها ابصارمه بنيانها

* * *

حسين للميدان لمن افرغه للاجل وجّه الاسماع وصغه

نزل مترجل ابساحات الوغه والشهاده نشّرت ديگانها

* * *

والمنيه صافحت چفه الخضيب وفرشت الخدين عالخد التريب

والشهاده مسرعه لوصل الحبيب چالفتاة الواصلت خلصانها

* * *

والرماح السمر ركعت عالجسد وسيف شمر الخنه اعله المنحر سجد

للحوافر جسمه صار الهن مهد ونفسه فرشت عالترب ديوانها

* * *

طاح من بالحشر للمذنب شفيع وجثته اتعفرت من فيض النجيع

يا هو شايف جسد عالغبره صريع ميّت ويرهب گلب شجعانها

* * *

فوگ جسمه امشجر سهام الحتوف وصار مرتع للرماح وللسيوف

يا غريب اشهالغريبه بالطفوف خدك اموسد على كثبانها

* * *

ريت حيدر يبو اليمه ايشاهدك الجاهليه اعله الرمال اتوسدك

الگوم عدهم ثار ويه والدك كسر ابوقعة بدر اوثانها

* * *

اشلون چف الدهر من جسمك نهش اشلون خدك على التربان انفرش

اشلون چبدك ذاب من جمر العطش وصكّت عليك المنيه اسنانها

* * *

اشلون يغمض من بني هاشم جفن وجسم سيدها يظل ابلا دفن

اشلون ربات الخدر فوگ الهجن تطلع ابحيرة بني سفيانها

* * *

اشلون تصبر بني غالب هالفحول وفوگ صدرك عشر خياله تجول

ليش غالب ما ترجع هالخيول وتخلي عنتها وتگطع ارسانها

* * *

آه والجرح اللذي ما يندمل اطلعن ربات الخدر فوگ الهزل

عگب اهلها العده تحدي بالابل وين عنها هاشم وعدنانها

* * *

طهران / ١٩٨٦ م

لماذا الرجوع (موشح)

اشعدها زينب عودت لحسينها باليسر وفّت البينه وبينها

* * *

اشعدها زينب ويه الحسين شتريد ما كفاها مصابها وشوفه يزيد

نست هظم اليسر لو وحشة البيد لو برض كربله اشنظرت عينها

* * *

اشعدها زينب ردت لكربله ردود ما درت بخوتها متوسده اللحود

الراح منها راح لتضنه يعود وعالمصايب بس صبرها ايعينها

* * *

اشعدها زينب عودت لرض الطفوف ما درت لو وصلت الطف شتشوف

انچان ما تگطع املها وما تعوف خل تگضي اعله اگبور سنينها

* * *

اشعدها زينب عتب لو رايده تنوح واليسر ما خله الها بعد روح

خل تلم الحرم والطيبه تروح ويم گبر امها تكثر ونينها

* * *

اشعدها زينب تعدي ما بين الگبور وابمچان خيامها ظلت تدور

بالشكايه وبالمعاتب لا تجور حسين شاهد حرگة صواوينها

* * *

اشعدها زينب امل بعد اشتنتظر شاهدت مصرع اخوتها واليسر

والتحشم بيه منها يعتذر تدري لا رايته ولا چفينها

* * *

اشعدها زينت حايمه اعله المشرعه وغدت تتمثل اخوها ومصرعه

ما درت بچفوف اخوها امگطعه وجثته بفيض الدمه مغسلينها

* * *

اشعدها زينب تذكر ايام الدلال ما درت بخوتها متوسده الرمال

خل توزم روحها ابجمع العيال حيث بمر العايله اموصينها

* * *

اشعدها زينب والعليها ادته الراده منها حسين عگبه سوته

حفظت العايله ونصرت ثورته وسبت بالشام الذي سابينها

* * *

اشعدها زينب واليريده حسين صار وضع اميه منها صابه الانهيار

خل ترد عيال اخوها للديار العتب وين وروح زينب وينها

* * *

كربلاء المقدسة / ١٩٧٦ م

استنهاض المنتظر (عجل الله فرجه) (موشح)

الدنيه تاهت والطمع عاميها يظهر ابن الحسن وايصفيها

* * *

يا گلب اترك دياجير الظلام ولا تضن الدنيه تمشي اعله المرام

بيها متساوي الحلال ويه الحرام وصار سافلها مثل عاليها

* * *

السافل اويه العالي صارن فد قياس والخيانه اتغرست من الاساس

هيّه هيّه الناس مختلفت الناس شفنه اولها وبعد تاليها

* * *

واللي چانت راضيه ابعاد وثمود ترضه بحكام النصاري واليهود

ابن ربعي وحرمله ردوا ردود ونفس ذيچ سيوفها ابايديها

* * *

بعده عرش يزيد ثابت عالحكم وهالظلم مفترع من ذاك الظلم

چم عزيز وعلى الذله منرغم هاي دنيه وبعد تدري شبيها

* * *

جزع صبري وما جزعت من الصبر بنتظار الغايب افنيت العمر

الصبر عالموعد احر من الجمر الجمره لو فاض الدمع يطفيها

* * *

واحنه جمرتنه متطفه بالنحيب اشما نكثر الدمع يزداد اللهيب

لا ولا علتنه تحتاج لطبيب بس ظهور الغايب ايداويها

* * *

گبل ميصيح اللسان الگلب صاح يا فرع عدنان يا سر الفلاح

تظن ويه جسومنه ظلت ارواح هالارواح اببرجك امغيبيها

* * *

بالمساجد تنظر الوادم حشود مسلمين الشكل بالباطن يهود

راح ماضينه وبعد ما ظن يعود والرعيه تيّهت راعيها

* * *

اشلون چان النه مجد يبن الحسن لچن يا وسفه تبدّل بالفتن

على الأمه انضربت استار المحن حيل ويه اللي جفت مهديها

* * *

آه لو بالناس يالغايب تريد تنادي يا ثارات محزود الوريد

تلگه بيها شچم شمر وشچم يزيد وچم عقيلة هاشم املوعيها

* * *

لو صدگ هالناس تتنه طلعتك چان سارت على منهج سيرتك

نفس هاي الگوم يسروا عمتك والسكينه ويه الظعن سابيها

* * *

طهران / ١٩٨٥ م

النعي، الأبوذية، الموال

النعي

انتقال الرسول (صلى الله عليه وآله) إلى الرفيق الأعلى

غرب هلال النبي المختار بغيابه صار الذي ما صار

مظلمه الدنيه عگب الانوار واتلاهبت وسط الگلب نار

امته تاهت منها الافكار وظلت تحن بالحان واطوار

ابچف المصيبه ادفنه الكرار وصب اعله جسمه دموع الانظار

ظل أبو الحمله عگبه محتار ينعه وينوح ودمعه فجّار

مغوار وينوح اعله مغوار حيدر فگد درّة الاطهار

جر النوايح ليل ونهار ما طالت وگصرت الاعمار

هچي تغيب بدور الاسحار

ام الحسن طلعت كظيمه ودموعها اعله الخدر سجيمه

تناديي يبويه اشهالهظيمه خليتني عگبك يتيمه

والنوح بغيابك لجيمه يالچنت فوگ الراس خيمه

فراگك فلا ينحمل ضيمه

* * *

في رثاء الأمير (عليه السلام)

جبريل بعنان السمه صاح ابمحرابه حماي الحمه طاح

ابطيحتك طاح العز والاصلاح واجب نجيم عليه النياح

ولثاره نتفاده بالارواح ابطبرة علي راح الفخر راح

وابغيبته روح القدس صاح راح اليلاعب بيض الصفاح

وگلبي عليه امخزن اجراح

* * *

في رثاء الأمير عن لسان زينب (عليها السلام)

جيتك يبويه وخلص صبري وعبراتي متكسره بصدري

يا ريت گبلك خلص عمري ولا شوف دم طبرتك يجري

من هالمصايب تاه فكري انته الچنت بالشدد ذخري

يلهب ابوسط الگلب جمري ونار الحزن بحشاي تسري

جيت ارد اقدم الك عذري تدري يبويه بحالي تدري

فوضت للمعبود امري

بويه على هيجت ناري وابفرگتك هدمت داري

جيتك ودمع العين جاري گبل الجدم دلالي ساري

* * *

في رثاء الحسن (عليه السلام)

هالفاجعه من جور الايام نعش الحسن ينضرب بسهام

هالجرح گلي اشلون يلتام وابعيني انظر هاي الايتام

عبد الله ومحمد وجسام تشكي وتبث هموم وآلام

وتصيح يا دوحه الاحكام طحنه يبويه بين ظلام

وابغيبتك خابت الاحلام ترضه عگب عيناك ننظام

نشرت عمامي سود الاعلام كل يوم صار عليهم ابعام

ابهاي المصيبه انصاب الاسلام دمع البيابي عليك همّام

وطير الحزن عالنعش حوّام

* * *

في رثاء العباس (عليه السلام)

يا موح گلب اختك يريعه سدّة اسكندر يا منيعه

يا ليث يا عين الطليعه لمن طحت فوگ الشريعه

طاحت بيوت اهلي الرفيعه ومن شفت چفينك گطيعه

ابگلبي اسعرت نار الفجيعه وضعنه يخويه اشلون ضيعه

شيمتك ترضه اعله الوسيعه بالغرب تنعاف الوديعه

* * *

في خروج ام كلثوم من المخيم مخاطبة اخيها العباس (عليه السلام)

عباس يا زود البواذخ بحر الابه بيمناك ناضخ

يا جبل قاف الچنت شامخ ويا طود بالميدان راسخ

يا تاج وبروس المشايخ سيفك لراس الكون راضخ

اسمرك نفخه صور نافخ بارواح اميه من البرازخ

بيرغك فوگ الگاع صارخ لراسك اشلون العمد فاضخ

ما هزتك هاي الصوارخ

* * *

عن لسان ليلى إلى ولدها علي الاكبر

يوليدي يالاكبر يفاعي يا صل ينازل من افاعلي

حومتك شات وانته راعي لمن طحت بيّن ضياعي

طيور الحزن حطت بگاعي برباك دمع امك يداعي

ما هزتك هاي النواعي

* * *

لسان رباب مخاطبة ولدها الرضيع (عليه السلام)

يبني يعبد الله يمحروم يا من ابسم البين مفطوم

عگبك تراني امفارجه النوم امساهره الليل واحسب نجوم

اشعندك ذنب يبني ويه هالگوم لنحرك تگطعه ابسهم مسموم

ابدال الشرب ترويك بدموم وصوبوا گلب امك المالوم

من يوم عني غبت لليوم دمع البيابي عليك مسجوم

جمر الحزن بالچبد مضروم وعليه طير الفاجعه يحوم

حگ ارضه واصبر على المقسوم

* * *

عن لسان رمله تخاطب ولدها القاسم

هاذ انته يا جاسم يصنديد صل انزلت من ظهر عربيد

ادريك عند الشدد رعديد هيّج ابرمحك هظله الويد

هزت چفوفك تكسر الميد يوم الحرب عندك شبه عيد

وابعينك سيوف الزلم غيد ايلاعبها عزمك مثل ميريد

اشما زادت العدوان ميفيد من حيث زودك اكثر يزيد

يا نسر يمحوّم على الصيد شرّد صگور الگوم تشريد

هيج اعله ام الحرب لتهيد ركز السيف ابراحة الايد

لتخلي امك تنحر البيد

* * *

خطاب فاطمة بنت الحسين (عليهما السلام) لبني هاشم

آنه العليله وفكري محتار عافوني اهلي بهاي الديار

خلوني وحدي والظعن سار وطير المنام من الجفن طار

والجسم من المرض منهار تنطفي وتسعر بالگلب نار

ما وصلت من الاهل اخبار عالدرب ظليت اشبح انظار

ما ادري بهلي اشصار ما صار

* * *

هالطفله ما تدري باهلها بيا باديه نزلت ابلها

ما وصلت الاخبار الها وفراگهم زيّد عللها

بغيابهم فگدت أملها ودمعتها ويه الدم تهلها

بهالنايبه اتگرب اجلها فوگ المرض لفراگ سلها

بالبيده طلعت من وجلها ابحر الشمس مفگود ظلها

لفاطمه خلها تنوح خلها والاهل راحت عنها كلها

وكل خبر منهم ما وصلها

* * *