شبكة الإمامين الحسنين عليهما السلام الثقافية

عاش حراً

بالحياة، عاش حرّا بالحياة، نال فخرا

ما ننسه يوم حسين عزه وفخر للدين

بالحياة، عاش حرّا

* * *

كلمن درس أهداف هاي الثوره اتحسس ابمعناها الحياة الحره

وحسين للعالم وضع هالفكره واللي كتبها اعله الأرض دم محره

الوريد، فاض حبرا الوريد، خطَّ نصرا

بالدم رفع هالصوت بين العزه والموت

بالحياة، عاش حرّا

* * *

من موقعه اتجسدت أربع أدوار همه وإراده ومعنويه وايثار

يحمل هدف توعية كل الأفكار دمه صبح شعله بطريق الثوار

بالدماء، صان فكرا بالدماء، حاز خيرا

ثار وحمل نبراس راد النفع للناس

بالحياة، عاش حرّا

* * *

هالامه ربنه اعله الامم فضلها وحسين كل ما ملك قدم الها

حافظ عليها وضمن مستقبلها راد ابخلوده لامته بشملها

بالخلود، عاش دهرا بالخلود، خط ذكرا

راد الامه وياه تتبع أثر مسراه

بالحياة، عاش حرّا

* * *

خل نستمر ويه الحدث ونراقب نسمع حسين اشصاح فكره الثاقب

صاح اعلنت هالثوره ضد الغاصب ثوره وباسناد الضعيف اتطالب

بالأباء، خاض أمرا بالأباء، زاد قدرا

قدم بشارة خير راد النفع للغير

بالحياء، عاش حرّا

* * *

من كربله الموقف الك يتجسم سبعين الف طاغي ولعين اتقدم

شنوا حربهم والهدف سفك الدم بسيوفهم جسم ابو اليمه اتخذم

اللعين، حزَّ نحرا اللعين، رضَّ صدرا

دم المنحر ايسيل انطه الوعي لكل جيل

بالحياة، عاش حرّا

* * *

لمن هوه المظلوم وسط المصرع زينب تعنت بالحزن والمدمع

نادته يا من بالسيوف اموزع جسمك دفنته ابگلبي واصبح مضجع

الفؤاد، صار قبرا الفؤاد، ضمَّ بدرا

وذچرك يطيب الذات ظل خالد وما مات

بالحياة، عاش حرّا

* * *

يبن امي حيرني زماني بأمرك بعيني شفت دمك يصب من نحرك

بعيني شفت هالخيل داست صدرك حيف ووسف يحسين خانك دهرك

الزمان، حين أزرى الزمان، كان أدرى

حزني ومصابي يطول وصوت الزمان ايگول

بالحياة، عاش حرّا

* * *

(لندن ١٩٩٤م)

عاشوراء

عاشوراء أنت لواء أنت لواء عاشوراء

* * *

عاشور أهدافك قدسيه يا مضمون الانسانيه

انت الحكمه الربانيه يا صوت الثوره الفكريه

جاء نداء للعظماء للعظماء جاء نداء

عاشوراء عاشوراء

* * *

يومك يا عاشور الحاسم هدم قلعة حكم الظالم

يالصحيت افكار الوادم يا فكرة كل واعي وفاهم

أنت فناء للأعداء للأعداء أنت فناء

عاشوراء عاشوراء

* * *

يا مصدر تفجير الثوره يومك ميعاد وننتظره

من أجل الافكار الحره بسمك ضحت كل العتره

فيك عزاء للنجباء للنجباء فيك عزاء

عاشوراء عاشوراء

* * *

يا أشرف ميثاق وذمه سجلها المظلوم ابدمه

يومك جمره ابگلب الأمه بيك حسين اتوذر جسمه

بحر دماءٍ للشهداء للشهداء بحر دماء

عاشوراء عاشوراء

* * *

يومك يا عاشور اتوضح اعظم وافجع كل يوم أصبح

يالخطيت حروف المذبح يالخليت المدمع يسفح

صوت بكاءٍ في الاحشاء في الأحشاء صوت بكاء

عاشوراء عاشوراء

* * *

سبط المختار بيا حاله من رضت جسمه الخيال

بالخيل انداست أطفاله وانسلبت بالطف اعياله

تلك نساءٌ دون خباء دون خباءٍ تلك نساء

عاشوراء عاشوراء

* * *

يا مشعل نار امصيبتنه يومك غيّر كل حالتنه

لجلك ما تنشف عبرتنه وانواسي الزهره بصرختنه

صوت ولاءٍ يا زهراء يا زهراء صوت ولاء

عاشوراء عاشوراء

* * *

(لندن ١٩٩١م)

ولدي يا ولدي

في حزنها ليلى ناحبةً ثكلى

وهي تنادي ذاب فؤادي

ولدي يا ولدي

* * *

شاخصه لبرج النوايب تنظر لمصرع والدها

اتصيح آيبني يالاكبر مهجتي مصابك ضهدها

ابگلبي رميات المنايه وحرت يا رميه أصدها

الحزن في القلب من لوعة الخطب

أين ودادي ذاب فؤادي

ولدي يا ولدي

* * *

چنت أتأمل رجوعك وانتظر ترجع يالاكبر

تالي لن من سمه الحومه للأرض بدرك تكور

دمك ابعيني تفايض واعله شوف العين أثر

من قسوة البين ما رقدت عيني

عزَّ رقادي ذاب فؤادي

ولدي يا ولدي

* * *

رحت من بين ايدي وآنه ناطره لجيتك واتاني

بعد ما حسبت يبني اشچان ناويلي زماني

خذك من عندي وفجعني وسدد اسهامه ورماني

في الطفِّ لا أدري ماذا تُرى يجري

شحَّ مرادي ذاب فؤادي

يا ولدي يا ولدي

* * *

مثل طي السجل يبني انطوت هالليله حياتك

بعد ما ظل عندي منك بس معالم ذكرياتك

وسفه يالاكبر زماني الليله فاجئني ابمماتك

الصبر لا يجدي في شَّدة الوجد

طال سهادي ذاب فؤادي

ولدي يا ولدي

* * *

فاضت ادموع المحاجر وامتزج دمعي اويه دمك

نثروا زهرة حياتي مثل ما نثروا جسمك

بعد ما ظل عمر عندي حتى اگضي العمر يمك

الدمع لو ينفع أبكيك بالمدمع

كنت عمادي ذاب فؤادي

ولدي يا ولدي

* * *

يبني لو أدري حياتك ترجع ابمدمعي الجاري

چنت اظل اعليك انوحن وانتحب ليلي ونهاري

لاچن ادري الدمع عاجز ماگدر يطفيلي ناري

الحزن أضناني والصبر يرعاني

صبري زادي ذاب فؤادي

ولدي يا ولدي

* * *

(لندن ١٩٩٤م)

يا أيّها السجّاد

يا أيها السجاد من كفَّن الأجساد

هل غسِّلت بالماء في يوم عاشوراء

* * *

من مصادر نايباتك النه وصلت هالروايه

شفنه حالك وانت محني وتحفر اگبور الضحايه

جينه ننشد عن جثثهم وانت تعلم بالخفايه

امغسله بدمهما وچفنها امفصل بذاري المنايه

من آلك الأنجاب كم من هلالٍ غاب

في الليلة الظلماء في يوم عاشوراء

* * *

جارت اعليك المصايب والگلب نيرانه تسعر

سيدي وأول مصيبه صابتك بمصاب الاكبر

اتخضب ابدم الكرامه ومن ثره المصرع تعفر

ابيا أرض گبره حفرته ووسدت جسمه التوذر

قد صارع الأقران حتّى قضى عطشان

والنار في الأحشاء في يوم عاشوراء

* * *

من صميم الروح اناشد عالشباب الماتهنه

هذا عريس المنايه وتدري شنهو اسمعنه عنه

عالحرب أصبح زفافه ومن دمه المنحر تحنه

ابيا وضع عالغبره شفته واگدرت بيدك تدفنه

في ساحة الميدان أفراحه أحزان

قد حلَّت الأرزاء في يوم عاشوراء

* * *

سيدي ابغيبة گمركم مظلمه الدنيه علينه

جسمه دامي اعله الشريعه وگطعوا ايساره ويمينه

بالعمد راسه تهشم بالسهم مصيوبه عينه

ابيا كتر عمك دفنته ننشد اعله الشاطي وينه

هذا حديث الناس عن عمِّك العباس

ذا فارس الهيجاء في يوم عاشوراء

* * *

من گلب ذايب انشدك عالرضيع الخالي مهده

هم تغسل هم تچفن لو بگه اعله الحاله بعده

والسهم طلعته منه لو دفنته اويا ابلحده

بالسهم گطعوا وريده يا وسافه وظامي چبده

صوت الأسى مرفوع من منحرٍ مقطوع

ما أفجع الأنباء في يوم عاشوراء

* * *

سيدي وافجع مصيبه البيها نيرانك مسعره

والدك جسمه رميه وجالت الخيل اعله صدره

ابيا وضع جيت اعله لحده واگدرت بيدك تدفنه

يا عجب بيدك دفنته اموذر وعينك تنظره

جائت خيول القوم في مصرع المظلوم

جالت على الأعضاء في يوم عاشوراء

* * *

سيدي احملت المآسي وچفك لأهلك دفنهم

للجثث منهو الحملها ومنهو جهزلك چفنهم

بالجمر يسعر دليلك ما طفت جمرة حزنهم

من عگب عين الضحايه لليسر طوّح ظعنهم

قد سيقت الأطفال بالقيد والأغلال

يا دافن الأشلاء في يوم عاشوراء

* * *

(لندن ١٩٩٢م)

الأمان الأمان

يا مليك الدهور حان يوم الظهور

طال وقت الغياب سيدي ما الجواب

* * *

الك يا حجة الباري بالدمع أشرح وضعنه

وانت يبن الحسن تدري بكل بواطن مجتمعنه

نعتب ومن كثر هذا العتب ملينه وجزعنه

اشما نعاتب بالنوايب من يتجاوب وانت غايب

نعتب ومحد سمعنه

يا عميد الزمان الأمان الأمان

قد أتاك العتاب سيدي ما الجواب

* * *

مجتمع بالوهم سارح خسر أهدافه ورصيده

زين لو بالألف واحد يملك ايمان وعقيده

تريد منهم الك ناصر وين ذاك اللي تريده

والتندبه تاه دربه ومن تجربه تشوف گلبه

ثعلب ونهجه المكيده

ديننا كالغريب أين من يستجيب

وفقدنا الصواب سيدي ما الجواب

* * *

الدين أصبح يستجير وما حصل واحد يجيره

صدگ لو گالوا يغايب كلمن وذاته وضميره

ذاك من ذاك التشوفه مخلص وصافي السريره

يا فخرنه يا ضخرنه ابخطر صرنه ومن صبرنه

الگلب ما يخمد سعيره

ديننا يستجير غاب عنه المجير

وحملنا الصعاب سيدي ما الجواب

* * *

سيدي والناس أضحت واهمه وتاخذ المظهر

واللي تعتبره جواهر من تجربه فحم يظهر

باطنه الحجاج لاچن ضاهره مالك الأشتر

ومن توصفه يزهي وصفه ومن تكشفه يالتعرفه

اتشوفه من مروان أمكر

صوتنا يستغيث نجِّنا يا مغيث

ديننا لا يهاب سيدي ما الجواب

* * *

سيدي والمثل واضح ما أظن عالناس يخفه

كل شخص لو مرض صابه من الطبيب اينول وصفه

والطبيب اشلون لمن يمرض بيا دوه يشفه

يا ضمدنه يا عمدنه الدنيه ضدنه ومنهو عدنه

نصرخ ونعتب ابلهفه

يا شفاء القلوب من لقلبٍ يذوب

آن وقت الإياب سيدي ما الجواب

* * *

سيدي ويا يوم چفك يشهر اعله الظلم سيفه

ويطفي جمر اللي توجر من لهب نار السقيفه

وتدري يا باب الدفعها بالظلم چف الخليفه

هذا جرمه وعرش حكمه انبنه ابظلمه وعلى الامه

واضح وما يخفي زيفه

من فعال الشرار البدار البدار

لك نصُّ الخطاب سيدي ما الجواب

* * *

هجموا اعله امك الزهره ريتك اتشاهد وضعها

شتنسه يبن الحسن منهم تنسه محسن لو ضلعها

ولمن اعله الدار هجموا صاحت الزهره بدمعها

صوتي ينعي يجري دمعي هذا وضعي انكسر ضلعي

صاحت ومحد سمعها

من لثأر الضلوع من لتلك الدموع

من لذاك المصاب سيدي ما الجواب

* * *

لون ما ضلع الوديعه ابدفعة الباب ايتكسر

ما على المظلوم جالت خليها وسحگته العسكر

ومن لهيب الدار ظلت جمره الصيوان تسعر

يالمحجوب انهض وسل بتارك

وشچم دوب تنتظر تاخذ ثارك

صبر ايوب صبرك وهاي آثارك

نصرخ ابلهفة گلبنه يمته يالموعود تظهر

* * *

(طهران ١٩٨٦م)

يا مهدينا أدركنا

يا مهدينا أدركنا بالله لا تتركنا

قم واهتف الثار الثار يا مهدينا أدركنا

* * *

يالمهدي طالت غيبتك واحنه بأمل ظلينه

ملينه من كثر الصبر يبن الحسن ملينه

بالهظم والهم والحزن والمحن لتخلينه

نصرخ بصوت الفاجعة بدرك الغايب وينه

يا عالماً ما فينا نار الغضى تكوينا

من يطفي النار النار يا مهدينا أدركنا

* * *

دنيانه صارت مظلمه وننتظر طلعة بدرك

يا وارث آدم بالعلم كنز العلوم ابصدرك

أيوب مثلك ماصبر والصبر مل من صبرك

يا عصة موسى وحكمته يا شبه نوح ابعمرك

يا وارث الزهراء بالحزن والأرزاء

يبن الهداة الأطهار يا مهدينا أدركنا

* * *

يا محنه ننسه ويا هظم ننسه مصاب الزهره

لوننسه وجه المرتضى امخضب ابدم الطبره

والحسن بالسم انغدر وبگلبه تسعر جمره

لو ننسه وقعة كربله اشحل وجره اعله العتره

خير الورى والهفي قد قوِّضوا بالطفِّ

ندعو بدمعٍ مدرار يا مهدينا أدركنا

* * *

يالمهدي هاذي كربله جدك اخذ اخباره

حاير وگف بين العدى ينظر جثث أنصاره

قدم الاكبر ضنوته وبالچبد تسعر ناره

من طاح الأكبر عالارض طاح وتهدم داره

نفس ابت اذعانا حتى قضى عطشانا

الحزن أفنى الأعمار يا مهدينا أدركنا

* * *

هيهات يبن العسكري انبطل النحب والونه

وجسام ليله زفته ابدم الوريد اتحنه

عريس وسيوف الحرب عالمعركه زفنّه

وذروا جسمه اعله الثره ابدال العرس والحنه

لمّا قضى منحورا للكون أضحى نورا

يا خاتماً للأنوار يا مهدينا أدركنا

* * *

يالمهدي صورة نايبه ابدمع الجفن موصوفه

ارويلك اخبار المحن من دمعتي المذروفه

من وگع عمك عالنهر يالمهدي ريت تشوفه

بالسهم عينه امصوبه وگطعوا الگوم چفوفه

قد فارق الأنفاسا فالندعو واعباسا

قد غاب بدر الأسحار يا مهدينا أدركنا

* * *

يالمهدي أصعب كل وضع اتفت الصخر آلامه

من برز جدك للحرب عاف الحرم وايتامه

ساعه ورجع بس المهر يصهل لصوب اخيامه

ينادي الظليمه والسرج خالي ويجر الجامه

* * *

قال أمير الؤمنين (ع)

قال الأمير أين الضمير يا أمة طه

كونوا للظالم خصما وللمظلوم عونا

* * *

چلمة عدل للناس حيدر حچاها

هالچلمه بالتاريخ واسع مداها

ادرس وصيته وشوف كل محتواها

وبكل زمان ودور تسمع صداها

نفرض علل دنياك يحصل شفاها

اجروح المذله امنين يحصل دواها

صوتٌ ينادي نحو العباد صاح وأوصاها

كونوا للظالم خصما وللمظلوم عونا

* * *

هاك اسمع اشوصاك صوت الامامه

عوف المذله وعيش عيشه ابكرامه

لتغرك ابدنياك أهل الزعامه

ماتلگه منهم غير بس الندامه

والظالم بكل حال فاشل نظامه

ما يگدر اويه الناس يوفي ابكلامه

غوث البرايا خطَّ الوصايا دونك فحواها

كونوا للظالم خصما وللمظلوم عونا

* * *

عن معرفه وتفكير نشرح وضعنه

نشوف الاجانب ليش الهم خضعنه

صنعوا معاجز شوف احنه اشصنعنه

نصنع حقد واللوم أصبح طبعنه

يا ما حچينه اسنين محد سمعنه

بهذا المرض مصيوب كل مجتمعنه

فما أطعنا وكم أضعنا قيماً مغزاها

كونوا للظالم خصما وللمظلوم عونا

* * *

من يصبح التيار عكس السفينه

ممشه البحر يا ناس يصعب علينه

اتعنينه للامراض واحنه المشينه

تاليها صرنه نصيح ليش انعدينا

هالعلل والأسقام كلها من ادينه

نحچي وبعد هيهات ينفع حچينا

فكم نقاسي تلك المآسي نحن زرعناها

كونوا للظالم خصما وللمظلوم عونا

* * *

ياوسفه هذا الدين أصبح تجاره

ما شفنه كل أرباح بس الخساره

وين العلم يا ناس وين الحضاره

هالمجتمع يا يوم يآخذ قراره

يركض ضعيف الحال ليله ونهاره

وتتسرب الأموال لهل الإماره

تلك الجرائم تلك المئاثم نحن زرعناها

كونوا للظالم خصما وللمظلوم عونا

* * *

گبل النقد للناس ننقد نفسنه

ليش النصر للغير واحنه انتكسنه

بسم العروبة نصيح ونسحگ اسسنه

وبقبضة اسرائيل صارت قدسنه

بيا ساعه وبيا يوم نآخذ درسنه

لابد عگب هالليل تطلع شمسنه

القدس بيعت لما أضيعت صاحت وصداها

كونوا للظالم خصما وللمظلوم عونا

* * *

(لندن ١٩٩٣م)

حديث الكساء

خمسة أقمارٍ من السماء أنزلها الله إلى الكساء

* * *

هذا مجلس النه أصبح جامعه وينشر فوائد

احنه من عنده أخذنه دروس من وحي العقايد

صرنه ننقل كل حديث اليمتلك قوة مساند

اقره ابمفاتيح الجنان الأخبار

شاهد حديث أهل الكساء الأطهار

تنقل الك بضعة محمد أسرار

جوهرةُ التقديسِ والولاء أنزلها الله إلى الكساء

* * *

الزهره تروي تگول اجاني والدي وأدّه التحيه

گال أحس ابجسمي ناحل والضعف أثر عليّه

ناوليني هالكساء وقدّم اچفوفه الأبيه

انطيته الكساء وشاهدت هالمنظر

وجه النبي المختار شع وأزهر

مثل البدر ليلة كماله اتنور

غُرّتُهُ ترفل بالبهاء أنزلها الله إلى الكساء

* * *

بعد ساعه لن تعنه الحسن ويشع ابجماله

سلّم وعينه تراقب ينظر ايمينه وشماله

گال أشم رايحة جدي المصطفه وعطر الرسالة

ناديته جدك يبني موجود هناك

تحت الكساء وعينه تربي لعيناك

اتعنه ونده تاذنلي ادخل وياك

أجابه يا خيرة الأبناء أنزلها الله إلى الكساء

* * *

حسين من بعده تعنه وسلم ابمنطق العصمة

گال اشم رايحة جدي المصطفه شافع الأمه

گتله هذا اوياه جدك والحسن موجود يمه

وحسين راح وصاح يا ضي العين

تسمح يجدي اوياكم أدخل هالحين

رحب الهادي وگال إدخل يحسين

يا هيبة العصمة والإباء أنزلها الله إلى الكساء

* * *

اتعنه حيدر من بعدهم سلم وناشدني حيدر

گال اشم ريحة عضيدي المصطفه وداري تعطر

اندهت هذا الهادي يم أولادك ويردوك تحضر

اتعنه علي وناده بلسان الحكمة

استاذن من المختار يدخل يمه

جاوبه إدخل يا أمير الأمه

يا حليةً صيغت من الوفاء أنزلها الله إلى الكساء

* * *

وجهت الهم سلامي ووالدي لصوتي يسمعه

گتله تأذن يا محمد تدخل اوياكم البضعه

صاح يا فاطمة انتي بضعتي وللدين شرعه

استاذنت من عنده ودخلت اوياهم

صاح النبي ذوله الذي أهواهم

من لطف ذاته الخالق استصفاهم

كواكب تسطع بالسناء أنزلها الله إلى الكساء

* * *

نزل جبريل وينادي الباري أنواره جعلكم

هالفلك بيكم يدور وخلق هذا الكون الكم

لا شمس تضوي ولا يجري بحر إله لأجلكم

الكم رفع هاي السمه المبنيه

من أجل حبكم هالأرض مدحيه

فازوا محبيكم بهاي النية

صفوة حقٍ حكمةُ الرجاء أنزلها الله إلى الكساء

* * *

يا أيها المختار

يا أيها المختار للحق أنت شعار

يا سيدي يا سيدي يا أيها المختار

* * *

يالهادي بارينه ابعثك للناس عزه ورحمه لجلك هبط جبريل

شرعت قانون الوحي وكل منجزاته وحكمه من محكم التنزيل

دعوتك دعوه صادقه واترسخت بالأمه ما تقبل التضليل

ويه العصور اتعايشت وبكل عصر منسجمه واستوعبت كل جيل

يا معدن الإيثار قرت بك الأنظار

يا سيدي يا سيدي يا أيها المختار

* * *

مبعوث من رب السمه لهاي البشر تهديها والغايه للاصلاح

للمشركين ابصرختك يالمصطفه اتناديها للعدل صوتك صاح

والجاهليه الواهمه نكرت أمر باريها والمخفي بان ولاح

وبنهضتك چان الهدف للوادم اتصحيها واتوضح المصباح

يا قدرة الجبار يا قبلة الأبصار

يا سيدي يا سيدي يا أيها المختار

* * *

نهضتك للعالم شمس تزهي وتشع للوادم ويه الزمان تنور

بهالبعثة ثاير عالظلم دستور للحگ راسم واتوضح الدستور

والجاهليه اتدهورت وانهدم عرش الظالم ما تم ظلم لا جور

واستهدفت يالمصطفه كل مجرم وكل واهم وكل جاحد ومغرور

يا ساحق الفجار للعدل أنت منار

يا سيدي يا سيدي يا أيها المختار

* * *

من شمس ذاتك تزدهر أنوارك القدسيه يا كوكب الايمان

سيرتك سيره عادله وحكمتك عرفانيه من مجمل القرآن

بهالمبعث الطاهر ردت تنشر الانسانيه واتحرر الانسان

تريد التعاون والعدل بالنهضتك مبنيه عالعدل والاحسان

فاليخسأ الإعصار والعاصف الموار

يا سيدي يا سيدي يا أيها المختار

* * *

همتك ناموس الشرع بيك الديانه انتصرت عالكفر والاصنام

من فكرتك من سيرتك كل المعالم ظهرت وانتشرت الأحكام

راح الجهل واهل الجهل والجاهلية اندحرت وانكشفت الأوهام

راحت الفتره المظلمه وشمس العصور ازدهرت من مطلع الاسلام

من شمسك الأنوار تحيي ذوي الأفكار

يا سيدي يا سيدي يا أيها المختار

* * *

انكتبت مواثيق الوفه واستبشرت امتنه صوت الأمل ناداك

نمشي اعله منهج سيرتك بالوضحت سيرتنه بالنفس بايعناك

يا خاتمة كل الرسل بسمك تتم بيعتنه خل تشهد الأملاك

آمنه بيك انت النبي ودينك ضمن عزتنه يمسير الأفلاك

الكون فيك يدار يا عالم الأسرار

يا سيدي يا سيدي يا أيها المختار

* * *

(لندن ١٩٩٢م)

يا غوث البرايا

نفديك بالأعمار يا أيها المختار

لا نخشى المنايا يا غوث البرايا

نفديك بالأعمار

* * *

يا من وهبت لأمتك كل معطياتك وجوهر صفاتك مبدأ حياتك

واحنه المشينه بسيرتك واعرفنه ذاتك من معجزاتك مبدأ حياتك

هاليوم يا سيد الرسل حانت وفاتك أصبح مماتك مبدأ حياتك

يا قمة الإيثار يا خازن الأسرار

في علم البلايا يا غوث البرايا

نفديك بالأعمار

* * *

عالأنبياء وعالرسل مرتفع قدرك نورت عصرك جوهرة فكرك

يا خازن اعلوم الوحي ابحلمك وصبرك وخازن ابصدرك جوهرة فكرك

ولأمتك يالمصطفى قدمت عمرك والحفظ أمرك جوهرة فكرك

يا باثق الأنوار من شعلة الأفكار

يا بحر العطايا يا غوث البرايا

نفديك بالأعمار

* * *

هذا الجنيته لأمتك يالهادي لنها اتسبب محنها واشحصلت منها

مثل الغبار بغيبتك ثارت فتنها وشهرت لسنها اشحصلت منها

ابدرب الجهل والتفرقه عافت سننها جاوبني عنها اشحصلت منها

في سطوة الإعصار في مجمل الأدوار

لم تحفظ وصايا يا غوث البرايا

نفديك بالأعمار

* * *

يالهادي اسرار امتك ظلت خفيه ابكهف المنيه أول ضحيه

خالفوا أمرك يالنبي وعهد الوصيه والعتره هيه أول ضحيه

أثمان تعبك قدموا هاي الهدية ضلع الزچية أول ضحيه

ما حالة الأطهار من قسوة الفجار

ذا صوت الشكايا يا غوث البرايا

نفديك بالأعمار

* * *

يالهادي ضلع الطاهره لمن تهشم گلبك تألم والباري يعلم

لمصاب ابن عمك علي دينك تهدم والحزن خيم والباري يعلم

صوبوا راسه وشيبته مخضوبه بالدم شنهو التحتم والباري يعلم

هذا دم الكرار يدعوك ليل نهار

من تلك الرزايا يا غوث البرايا

نفديك بالأعمار

* * *

وثالث مصيبه للحسن خالفوا عهده وانكروا جهده والأمه ضده

غصبوه يخضع للصلح ولا سند عنده طايح ابشده والأمه ضده

أمروا ابچتله ونفذت هالأمر جعده وگطعت چبده والأمه ضده

قد شاءت الأقدار في آلك الأبرار

أن تمضي ضحايا يا غوث البرايا

نفديك بالأعمار

* * *

ورابع مصيبه يالنبي چتل ابو اليمه وابسفك دمه جارت الأمه

جهزت جيش ابكربله وصبت النقمه گطعت جسمه جارت الأمه

من بعد چتله اعله الحرم شنوا الهجمه يا نبي الرحمه جارت الأمه

بين الأسى والنار والعصبة الأشرار

ساقوها سبايا يا غوث البرايا

نفديك بالأعمار

* * *

مولاي علي

مولاي علي مولاي علي

سلم لمن سالمك حرب لمن حاربك

مولاي علي مولاي

* * *

يا علي كل الحقايق من علم ذاتك انكشفت()

انت سورة عمه وانت البيك هالوادم اختلفت

عالنبأ هالناس تنشد منها جهلت منها عرفت

للمجد فضلك حارزه لعهد النبوه ناجزه

التلتزم نهجك فايزه وخسرت العنك انحرفت

هذا مقولي هذا مقولي

صاح وقد خاطبك حرب لمن حاربك

مولاي علي مولاي

* * *

يا علي القرآن واضح نهجه للرايد يطالع ()

سورة المائده تشهد للنواظر والمسامع

امنحت بالخاتم زكاتك للفقير وانت راكع

والباري نزلت آيته بمعناك يا سر هل أته

هاي الحقايق ثابته واليشكك خل يراجع

أصبحت ولي أصبحت ولي

طوبى لمن شايعك حرب لمن حاربك

مولاي علي مولاي

* * *

يا علي كونك ربك نور من ذاتك وجماله

سورة الرحمن گالت انت قرآن الجلاله()

علمك حفظ البيان وشرعت نهج العداله

بهالوصف معناك انوصف صوت الوحي بسمك هتف

لو ما وجودك ما انعرف لا رسول ولا رساله

الحق جلي الحق جلي

خصم لمن خاصمك حرب لمن حاربك

مولاي علي مولاي

* * *

يا علي انت الكتاب الناطق الواضح بيانه

سورة الجاثية تشهد صرت للحگ ترجمانه()

نسخة الاعمال بيدك وانت للخالق لسانه

والخالق ابحبك امر يا نسخة اعمال البشر

ابصارمك دين الله اعتمر وارتفع صرح الديانه

نار تصطلي نار تصطلي

تورى لمن أغضبك حرب لمن حاربك

مولاي علي مولاي

* * *

يا علي تصريح قدسي ابفضلك القرآن ناطق

هاذي سورة مريم اضحت درس للراد الحقايق()

اتگول اوهبنه وجعلنه لسان بالايمان صادق

بالصرت للعالم علم تكشف حقايق للأمم

ابحكم المواعظ والقيم تنطق وبالعدل واثق

ريب ينجلي ريب ينجلي

صدَّقت من صدَّقك حرب لمن حاربك

مولاي علي مولاي

* * *

يا علي ويوم القيامه ينكشف ستر الضماير

الباري عالباطن يحاسب ما يحاسب عالضواهر

الباري عن حبك يحيدر يكشف أوراق السراير

ابعلمك وعلم المصطفه يوم الفصل سره اكتفه()

والفصل ميقاته اختفه وغاب عن كل البصاير

عين المجتلي عين المجتلي

ترنو لمن أحبك حرب لمن حاربك

مولاي علي مولاي

* * *

(لندن ١٩٩٢م)