شبكة الإمامين الحسنين عليهما السلام الثقافية

نداء الكون

العالم والدنيا هتفا آهٍ لرحيلك وا أسفا

ظلموك يا فاتح خيبر

قتلوك حيدر حيدر

* * *

يا نور الباري وبرهانه ويا سيف الهادي وايمانه

سبحان الأظهر قدسيتك سبحان الخالق سبحانه

ابتأييدك دين الله اتأيد يا نهج الدين وقرآنه

سيف الصابك صاب المبدأ والدين انهدمت أركانه

لولاك الخالق ما عرفا والكون بحبك قد شغفا

ظلموك يا فاتح خيبر

قتلوك حيدر حيدر

* * *

هالعالم واساك ابهمك والكون اتخضب من دمك

صابوك وما صابوا مجدك دفنوك وما دفنوا علمك

كل ظنهم نورك يتغيب وضاح وما يأفل نجمك

وبرغم الظالم واعوانه بالتاريخ انخلد اسمك

أرداك الظالمو اعتسفا وبقتلك وضحت الهدفا

ظلموك يا فاتح خيبر

قتلوك حيدر حيدر

* * *

يا حيدر خصمك ما هابك سل سيف الطغيان وصابك

واتعفر شيبك من دمك واصبح دم الطبره اخضابك

أركان الاسلام انهدمت واهتز العالم لمصابك

غابت شمس الانسانيه من بعدك مظلم محرابك

الدمع لفقدك قد ذرفا ومدار الأكوان اختلفا

ظلموك يا فاتح خيبر

قتلوك حيدر حيدر

* * *

تتحمل يا لوعه بصبرك عايش مظلوم بكل عمرك

بگبرك مدفون وعدوانك تتحداهم وانت ابگبرك

سرك سر الاسم الاعظم يالما واحد يدرك سرك

جسمك مات وفكرك عايش محد يگدر يدفن فكرك

بسواك ضميري ما اعترفا والجرح لغيرك ما نزفا

ظلموك يا فاتح خيبر

قتلوك حيدر حيدر

* * *

من گبرك تتحده الظالم تهتف ما أخضع ما سالم

واحنه بهاي الفكره امشينه نرفض كل جاحد كل واهم

منبايع غيرك ياحيدر انت القائد انت الحاكم

يا قانون الذات الحره انت النور التهدي الوادم

الدَّهر على قتلك زحفا وعليك بأحقاد عصفا

ظلموك يا فاتح خيبر

قتلوك حيدر حيدر

* * *

صرخات مصابك مرفوعه تشرحلك أبعاد اللوعه

نار افراگك تطفه وتسعر بگلوب الناس المفجوعه

ما ظل مبعوث ولا مرسل ما سالت هاليوم ادموعه

كل الاملاك بهالليله أمست يم گبرك مجموعه

الحزن تقرب وازدلفا وأقام بقلبي واعتكفا

ظلموك يا فاتح خيبر

قتلوك حيدر حيدر

* * *

(دمشق ١٩٩٠م)

وداعاً يا علياً

فقدناك أميرا وللحق نصيرا

ولياً يا وليّا وداعاً يا عليّا

* * *

بوادي المصايب يا علي صرخة حزن مرتفعه

هالصرخه من جوف الگلب نسمعها ويه الدمعه

هالليله املاك السمه يم النعش مجتمعه

بالصبر والهم والدمع نعشك تريد اتشيعه

اشنصبر بعدك، يصعب فگدك، حفروا لحدك، بالدلال

سنبكيك فقيدا وللدين شهيدا

عهدناك تقيّا وداعاً يا عليّا

* * *

راحت اسنينك يا علي وانطوت صفحة عمرك

عفت الحياة الفانيه وعين الأجل تنتظرك

مجتمع جاهل عاصرك ما چان يعرف قدرك

ولمن متت يا بالحسن ابلهفه اعتنوا يم گبرك

بقوة صبرك، واضح أمرك، جهلت قدرك، هاي الناس

إذا العصر جهول ترى ماذا نقول

سنرثيك وفيّا وداعاً يا عليّا

* * *

هالناس عاشت بالكدر واتغيرت حالتها

عگب الرعايه يا علي محد يسد خلتها

بموتتك حسَّت بالندم ضيعت كل عزتها

هيهات عالامه بعد عگبك ترد هيبتها

بمصيبتها، اتهل دمعتها، يا هيبتها، الماتنعاد

إذا تعطي نفوسا إذا تفدي رؤوسا

فما أعطتك شيّا وداعاً يا عليّا

* * *

رغم المتاعب والشدد ومهما تكاثر همك

ما چنت تهتم لو إجت كل النوايب يمك

ماشي بطريقك والهدف اغلى وأعز من دمك

كل غايتك يا بالحسن تنشر مبادئ علمك

انت الحاكم، حكمك قايم، ضد الظالم، والغدار

فشيَّدت إباءا وطاولت السماءا

وناصرت النبيّا وداعاً يا عليّا

* * *

يا بالحسن شمس العدل من عدل ذاتك تظهر

لولاك ما چان انعرف للدين هذا المصدر

يا وسفه راسك ينفضخ بسيف الغدر يا حيدر

يا وسفه شيبك بالدمه يتخضب ويتعفر

نجري العبره، لجل الطبره، تسعر جمره، بوسط الروح

خسرناك حبيبا وللشيب خضيبا

وللهادي وصيّا وداعاً يا عليّا

* * *

شيعتك احنه يا علي وضحيت روحك النه

يوم القيامه لو ردت يا بالحسن تسألنه

انجاوبك انواع الظلم من اجلك اتحملنه

لجلك صمدنه والمحن ما گدرت اتبدلنه

اشما نتحمل، ما نتبدل، مهما تعمل، بينه اعداك

رفعناك شعارا وللدين منارا

عرفناك أبيّا وداعاً يا عليّا

* * *

يابالحسن فگدك صعب خله الدمع يتجاره

والأمه بعدك والهة ومدوهنه ومحتاره

عالم التقديس انفجع بيك وطفت أنواره

كل شي اندفن يابالحسن بس علمك وآثاره

هاي انوارك، هاي افكارك، يالآثارك، ما تنزال

سلاماً يوم تولد سلاماً يوم تفقد

ومذ تبعث حيّا وداعاً يا عليّا

* * *

(لندن ١٩٩٢م)

حديث نبوي شريف

قال الرسول إنَّ الحسين

مصباح الهدى وسفينة النجاة

* * *

نسمع أحاديث النبي وأصل الروايه ابحكمه

معنى الحديث انطالعه ابحكم العقل وانفهمه

ونشوف المن مسنده ونفحص رجال المه

لو شفنه صحه من السند نتمسك ونلتزمه

قول الأمين في كل حين

نبراس بدى لمسيرة الحياة

* * *

آل الرسول وعترته لوحدثت نسمعها

مضمون أحاديث النبي نآخذها من منبعها

عن معرفه وصحوة عقل ندرسها ونطالعها

سيرة حسين ونهضته بموضع فخر نوضعها

يوم عصيب خط الغريب

مضمون الفدا وسعادة المماة

* * *

وضح حسين بسيرته معنى الاراده الحره

بهالمنطلق ثاروعزم عالكفر يعلن ثوره

إيمانه ايمان النبي وصبر الرسول بصبره

ما همته جيوش العداه وللذبح قدم نحره

رمز الإباء في كربلاء

قد جاز المدى بكرامة الاباة

* * *

آلاف وگفت بالحرب تنتظره يبرز إلها

وحسين واگف بالخيم للعيله يتأملها

شاف الفواطم بالحزن دمعة مصيبه اتهلها

ودعهن ابصبر الگلب والمعركه استقبلها

يوم الطفوف حتف الأنوف

قد جاء الصدى لمنية الطغاة

* * *

ريحانة الهادي وگف يبن الجحافل وحده

گوم آل اميه والدهر والدنيه وگفوا ضده

اتناسوا حديث المصطفه ونكروا وصية جده

حرموه من باي العذب ظامي وتفطر چبده

سرُّ الوجود رمز الصمود

قد خط الردى بصحيفة الجناة

* * *

اتكاثرت رميات العده كل ساعه رميه تلوحه

وبعدد آيات الوحي صارت عداد اجروحه

تنعاه روح التضحيه وللأجل سلَّم روحه

مو دمه هذا اللي سفح دموم الرسل مسفوحه

هو الفداء له دماء

ما ضاعت سدى لعقيدة الهداة

* * *

مصاب ابو اليمه بكل گلب صابه وترك آثاره

ابلا ذنب گطعوا منحره ودم النحر يتجاره

كل ميت بهالقاعده عگب الچتل يتواره

بس جسم الحسين انترك بين اخوته وانصاره

جسم الشهيد فوق الصعيد

ما بين العدى وكتائب البغاة

* * *

(لندن ١٩٩٣م)

صوت الكرامة

في دولة الأشرار لا خير في الأعمار

الموت أولى من ركوب العار

في دولة الأشرار

* * *

من يا لسان الصوت هذا انسمعه منك يمن للدين نهجه وشرعه

يا من صرت للناس مثل الشمعه تحترگ ولغيرك النور اتوزعه

كل البشر من ثورتك منتفعه دمك زرع والناس حصدت زرعه

الموت لن تخشاه والعار لن ترضاه

العار أولى من دخول النار

في دولة الأشرار

* * *

مو مسألة قائد جمع گومه وثار حتى يسجل اسمه ويه الثوار

فكرتك أبعد من جميع الأفكار خيرك خصمك گال لو تحمل عار

لو تجي اتسلم رگبتك للأشفار حاشاك غير الموت بالعز تختار

يا صادقاً في الوعد يا حافظاً للعهد

لا شيء كالوحدة والإيثار

في دولة الأشرار

* * *

غايتك موتدخل حرب واتغامر حتى تگول الناس عنك ثاير

ما ردت من هالناس بيك اتفاخر ولا همتك يحسين قلة ناصر

جوهر فكرتك شفت حاكم فاجر رايد ابهالأمه المجيده ايتاجر

رددت صوتاً صاخبهذا يزيد غاصب شتان بين العزِّ والإقرار

في دولة الأشرار

* * *

بذلوا جهد رادوك الهم تخضع شافوك صامد للظلم ما تركع

وافتحت للتضحيه الباب الأوسع معركه وبيها اشترك حتى اليرضع

صرخات من دمك الطاهر نسمع معناها لو عيشه ابشرف لو مصرع

يا قاهر الأعداء في يوم عاشوراء

ها نحن نبكيك بدمع جاري

في دولة الأشرار

* * *

كل يوم باحث يظهر ابهالتحليل ويگول ابو السجاد حصل تبجيل

بالحرب فاز ونال أشرف اكليل شنهو السبب هالدمع من أجله يسيل

وليش الحزن متصل من جيل لجيل هذا الدمع تجروه بدعه وتضليل

مستفهماً لا يدري عن خافيات الأمر

كم من سؤال بات في الأفكار

في دولة الأشرار

* * *

يالباحث احنه انجاوبك عن ايمان هذا الدمع موبس علامة أحزان

هالدمع أصبح للتأسف عنوان ما چنه ويه حسين ذيچ الازمان

لو چنه وياه ابغمار الميدان چان افتديناه ابدموم الشريان

واحسرتي والهفي دمع الأسى لا يكفي

نبكي أسىً بالأدمع الغزار

في دولة الأشرار

* * *

(لندن ١٩٩٣م)

هيهات منا الذلة

إنَّ الحسين عقيدة وجهاد

ثار وقد ردَّد قوله هيهات منَّا الذلّه

إنَّ الحسين عقيدة وجهاد

* * *

هذا السسؤال ابكل عصر نسمع الناس اتعيده والسؤال ايگول

ليش ابو السجاد امتنع للبيعه ما مد ايده شنهو راد اينول

لوگلت من أجل الحكم للذبح قدم جيده هذا مو مقبول

جاوبنه يالعندك عقل واحنه الجواب نريده بالحچي المعقول

ماذا أراد برفضه لزياد

والصوت يردِّد حوله هيهات منَّا الذلّه

إنَّ الحسين عقيدة وجهاد

* * *

شنهو السبب سبط النبي خالف يزيد وامره واضحه الأسباب

انت اسألت واحنه بعقل نعرض الك هالفكره يالتريد اجواب

تقبل يزيد اعله العرش يحكم وبيده الخمره وللشرع ميهاب

هالسبب سبط المصطفه عالظلم اعلن ثوره بأهله والأصحاب

الدين يأبى منكراً وفساد

بل يرفض تلك الدوله هيهات منَّا الذلّه

إنَّ الحسين عقيدة وجهاد

* * *

وثاني سبب واضح الك لو چنت واعي وفاهم هالسبب معروف

والنوب آنه أسألك تقبل يحكمك حاكم بالغدر موصوف

يهالحاله وبهذا الوضع چانت تعيش الوادم بالظلم والخوف

وحسين يرفض هالحكم ميريد حاكم ظالم بالدجل مشغوف

قال الحسين مقالةً بسداد

لو أقتل أفجع قتله هيهات منَّا الذلّه

إنَّ الحسين عقيدة وجهاد

* * *

انظر الحاله التختلف وابفكرك اتأملها وقارن ابتفكير

هذا يزيد بهالظلم للناس راد ايذلها عالضلاله ايسير

وهذا ابو اليمه لأمته ايفكر ابمستقبلها ورايد التحرير

عزة الهادي عزته وللذله ما يقبلها صوته النه ايشير

لو خيِّرت روحي لنيل مراد

بين الذلّة والسِّله هيهات منّا الذلّه

إنّ الحسين عقيدة وجهاد

* * *

أول هدف من ثورته سيد شباب الجنه ايحرر الاجيال

نفّذ مطالب امته وحصل اشما يتمنه وحقق الآمال

من مكه طوح بالظعن لرض الطفوف اتعنه بعايله واطفال

لجل الهدف نحره انگطع والدم تفايض منه دمه بالطف سال

ودماءه هتفت بصوت رشاد

جئت بأصحاب قلّه هيهات منّا الذلَّه

إنَّ الحسين عقيدة وجهاد

* * *

عطشان ذبحوه العده تطفه وتشب ابگلبه جمره الآلام

جالت الخيل اعله الجسد هالنكبه افجع نكبه تشهد الأيام

سلبو احسين ابكربله و گوم الغدر من عگبه سلبوا الايتام

وعياله ظلت حايره فوگ الهظم والغربه اتيسرت للشام

آل الرسول أسيرة وتقاد

قد هتفت حتّى الطفله هيهات منَّا الذلّه

إنَّ الحسين عقيدة وجهاد

* * *

(لندن ١٩٩٢م)

يبن رسول الله (صلى الله عليه وآله وسلم)

يا ليتنا كنَّا معك فنفوز فوزاً عظيما

* * *

يحسين العلاقه اوياك من مصدر عقايدنه

عن ايمان عن تفكير ثبتت كل قواعدنه

كشفنه الماضي والحاضر ابعين العقل شاهدنه

واعرفنه يبو السجاد غيرك سند ما عدنه

رغم اعداك تابعناك يالمسراك يرشدنه

أنت الّذي في كربلا جدّدت عهداً قديما

يا ليتنا كنَّا معك فنفوز فوزاً عظيما

* * *

صرخه بعزم مصحوبه عن ايمان رافعها

كل انسان يملك ذات هاي الصرخه يسمعها

صرخه اتحرك الأجيال من منطلق واقعها

واحنه ادرسنه اهدافك واعرفنه دوافعها

عن تفكير للتحرير بذرة خير تزرعها

قد قلت قولاً صادقاً ونصرت نهجاً قويما

يا ليتنا كنَّا معك فنفوز فوزاً عظيما

* * *

عرفنه ابنهضتك يحسين انت للعدل محور

واتشيد كيان الدين من دمك يبو الأكبر

انت اللي ردت هالناس من الجهل تتحرر

وانت اللي گلت هالدين أفديه ابدمه المنحر

وابن زياد حكمه انباد مهما راد يتحذر

أعطيت نحراً دامياً وسحقت باغٍ زنيما

يا ليتنا كنَّا معك فنفوز فوزاً عظيما

* * *

انت الجامعه التجمع دروس وقيم للوادم

من عزتك يا مظلوم للعالم نهج راسم

ضميرك واعي ما يسمح تروح لخصمك اتسالم

ولا تسمحلك اخلاقك تبايع كل شخص ظالم

بصمودك جيت واتعنيت واتحديت هالحاكم

فوقفت في سوح الوغى لتقول قولاً كريما

يا ليتنا كنَّا معك فنفوز فوزاً عظيما

* * *

درسنه وشفنه أهدافك ابدم النحر مكتوبه

وشفنه موقفك يحسين يتميز بأسلوبه

مثلك ما حصل ثاير ابدمه اينول مطلوبه

يقدم أهله وانصاره ويشوف نحور مخضوبه

يا مظلوم يومك يوم خله الگوم مرعوبه

يا صامداً أنت الّذي قد خضت أمراً جسيما

يا ليتنا كنَّا معك فنفوز فوزاً عظيما

* * *

من دوحة ضمايرنه هذا الصوت ناداكم

بساحة كربله يا ريت چنه اهناك وياكم

چان ابذلنه أنفسنه ونمزج دمنه بدماكم

بالأرواح بالأموال بالأولاد نفداكم

الماضي اردود ريت يعود واحنه جنود مسراكم

يا أيُّها الفذُّ الّذي قد قال رأياً حكيما

يا ليتنا كنَّا معك فنفوز فوزاً عظيما

* * *

(لندن ١٩٩٢م)

صرخة الضمائر

يا سيّدي يا سيّدي يا حسين

* * *

يحسين يا نمن للعدل تهدينه امتك احنه وبسمك اتسمينه

كربلا اتصرح عن شرف ماضينه للهدف كلما نمتلك ضحينه

تضحيةً داميةً كلّ حين

يا سيّدي يا سيّدي يا حسين

* * *

عن سابقة ايمان خطينه اوياك عهد الموده وبالعهد بايعناك

بالذات بالدم بالضماير عشناك شفنه المصاعب لجلك وما عفناك

يا غايةً يا رايةً في اليدين

يا سيّدي يا سيّدي يا حسين

* * *

كل عصر بالمجتمع يظهر تيار يجرف الناس ابمغريات الافكار

واحنه اعله حبك نثبت وما ننهار اعرفنه الصمود ابجبهة المؤمن صار

كرامةً علامةً في الجبين

يا سيّدي يا سيّدي يا حسين

* * *

يحسين من سئلونه عن آثارك قدمنه الهم نبذه من أفكارك

شافوك شعله وما تغيب انوارك شافوك منبع ما تجف انهارك

جاريةً صافيةً كاللجين

يا سيّدي يا سيّدي يا حسين

* * *

يالأنجزت أهداف هاي الامه عالمك عالم تضحيات وهمه

غايتك ترفع امتك للقمه فوگ الترب نحرك تفايض دمه

كيف جرى فوق الثرى يا طعين

يا سيّدي يا سيّدي يا حسين

* * *

من شفت امة جدك بأتعس حال قدمت لجل الامه حتى الاطفال

براس الرمح راسك يبو اليمه انشال كل غايتك ترتفع روس الأجيال

يا رائداً يا خالداً في السنين

يا سيّدي يا سيّدي يا حسين

* * *

يحسين يالدمك نزف بالميدان لمصيبتك ما طفت نار الاحزان

ليل ونهار يسيل دمع الاشجان واتوجرت بگلوبنه اثلث نيران

أشجاننا أحزاننا والأنين

يا سيّدي يا سيّدي يا حسين

* * *

(لندن ١٩٩١م)

لبيك داعي الله

لبيك داعي الحق لبيك قولاً بصدق

يا أبا عبد الله يا أبا عبد الله

* * *

يا حسين انت العقيده البيها كل مؤمن تسلح

وانت قانون الهدايه وبيك درب الحگ توضح

واحنه تيارك جذبنه يريدنه انعانق المذبح

نصرتك ذمه علينه وعهد بالاعناق اصبح

انت الامان امن الخطر خل تسمع اسياد الدهر

تضحيه ومن دون البشر الها بس دمك ترشح

شيَّدت مجداً، بالإباء وحزت نصراً، بالوفاء

يا أبا عبد الله يا أبا عبد الله

* * *

يا حسين انت الحقيقة البيها توضيح الخفايه

من سمعنه اليوم صوتك يهتف ابسوح المنايه

بالعزم لبيك صحنه ابدافع الحب والهدايه

انت كعبتنه واجينه نصير للكعبه ضحايه

جينه اباراده ومو غصب ابدافع وفه ولهفة گلب

لو صار ميقات الحرب انصير الك قلعه وحمايه

وسوف تشهد، كربلاء بحراً سيجري، من دماء

يا أبا عبد الله يا أبا عبد الله

* * *

موقفك يحسين جسد كل مفاهيم العقايد

انت همة كل مضحي وكل غيور وكل مجاهد

واحنه آمنه وعرفنه اليفدي عمره يعيش خالد

هالعهد بالدم نكتبه والزمان اعلينه شاهد

اسلوب واحد نتخذ هيهات عن دربك نشذ

بالموت دونك نستلذ وهذا جيش الموت حاشد

اليوم نمضي، للفناء وماخلقنا، للبقاء

يا أبا عبد الله يا أبا عبد الله

* * *

انت قائد للمسيره واحنه للقائد نتابع

منه للاجيال يكتب ترجمة فكرك الواسع

ابكل رحابة صدر جينه انوقع ابدمنه ونبايع

ندخل الحرب ابجداره ونبرز بأشرف دوافع

مبدئنه للناس انعرف واحملنه أشرف كل هدف

راعي الكرامه والشرف عن شرف دينه يدافع

نَخطُّ عهداً، للولاء عهداً سنبقى، أوفياء

يا أبا عبد الله يا أبا عبد الله

* * *

خذنه نبذه واقعيه من مفاهيم الشهاده

اعرفنه للفارس اماره والعرش صهوة جواده

اعرفنه مفهوم المعارك لا صمود ابلا إراده

اعرفنه منكم يبو اليمه الموت للاشراف عاده

اعرفنه المراجل والشيم لليكتب ابدمه القيم

من مثلك ابكل الامم؟ صنع تاريخه ابجهاده

اليوم يوم الأتقياء اليوم قد حان اللقاء

يا أبا عبد الله يا أبا عبد الله

* * *

اليوم نتقدم ضحايه وننطي دمنه لدين جدك

انضحي احنه ومن بعدنه تصير بالميدان وحدك

جيش سبعين الف مجرم شاهره الأسياف ضدك

وانت لا ناصر ينصرك لا معين تشوف عندك

موقفك النه متضح بسيوف اميه تنذبح

دمك على الغبره يسح وينفرش عالترب خدك

الحور تبكي في السماء والدمع يجري للعزاء

يا أبا عبد الله يا أبا عبد الله

* * *

صوت من المعركة

والله إن قطعتم يميني إنّي أُحامي إبداً عن ديني

هذا نداء العباس

* * *

موقف العباس واضح للامم ندرس معالم سيرته

ابهدف هاي الثوره آمن والتزم وتابع حسين ابنهضته

حمل راية علي وبالرايه اعتصم من علي زوده وهمته

والوفه ابجبهة العباس انرسم كافل اعيلاه ابشيمته

والوفه، واعتقاده بالشهادة عن اراده، بصوته ناده

قد كُتب الحقُّ على الجبين إنّي أُحامي إبداً عن ديني

هذا نداء العباس

* * *

ابجامعة حيدر درس فن القتال واكتسب ايمان وثقه

عرف معنى التضحيه ومعنى النضال ومعنى الاخوه الصادقه

يدري شنهو تريد صولات الرجال تريد النفوس الواثقه

بهالاراده العاليه شد الرحال والهدف دمه ايحققه

بيده رايه، للهدايه عنده غايه، عن درايه

وصوته يبق مدى السنين إنّي أُحامي إبداً عن ديني

هذا نداء العباس

* * *

اتعنه ويه حسين للطف عن يقين لمن وصل شنهو الحصل

الجيش ظل يتلفّت ايسار ويمين واحد من الثاني سأل

الناس تنشد بيد من راية حسين والخبر للكوفه وصل

بيد عباس اعتلت راية الدين من سمعوا الجيش انذهل

الكوفه ذلها، من وصلها الحومه شلها، بصوته گلها

والله لو سال دم الوتين إنّي أُحامي إبداً عن ديني

هذا نداء العباس

* * *

أسد باسل يحمي حد امخيمه ينتظر رخصه للحرب

صاح يحسين ارد اخوض الملحمه ارخصني للحومه أطب

وهاي اطفالك تلوع من الظمه والعطش ناره بكل گلب

ترضه اطفالك تظل متألمه يحسين هالموقف صعب

الجوده ناله، السيف شاله الجيش هاله، من دناله

وصاح كالكرّار في صفّين إنّي أُحامي إبداً عن ديني

هذا نداء العباس

* * *

بعزمه وبايمانه مثل والده واتجددت وقعة بدر

راح للمشرعه وبيده امهنده وعيونه تتناثر جمر

شاف يم النهر مجموعه العده ومجرده البيض وسمر

صاح صوت وبالدهر ظل الصده ميهمني لو أفدي العمر

الموت حتمي، انطي دمي واجلي همي، بهذا عزمي

أذود عن مبادئ اليقين إنّي أُحامي إبداً عن ديني

هذا نداء العباس

* * *

زال عن المشرعه جيوش الطغاة للنهر عينه ترتقب

ابهمته وعزمه ملك ماي الفرات وما شرب من جاري العذب

اتذكر حسين وخواته الظاميات وعبد الله گلبه ملتهب

حاچه نفسه والمدامع جاريات يا نفس هوني من الشرب

گمر هاشم، گلبه هايم دمعه ساجم، عالفواطم

صاح إذا ما الموت يعتريني إنّي أُحامي إبداً عن ديني

هذا نداء العباس

* * *

طلع من المشرعه شايل الجود وابچفه ترفل رايته

دارت اعليه العده خيول وجنود گطعوا يساره ويمنته

ابسهم صابوا عينه والراس ابعمود عالنهر صارت طيحته

والحرم تنتظره يا ساعه يعود ظلت تراقب جيته

دمه ينزف، ابعهده ينصف حاشه يخلف، صوته يهتف

وارتفع الصوت مع الأنين إنّي أُحامي إبداً عن ديني

هذا نداء العباس

* * *

من المخيم هرعت اطفال وحرم واتوجهت للمشرعه

اتصيح وين اوگعت يا راعي العلم صرخة مصاب وفاجعه

ايدورن عالگمر بدموع والم شافن الجثه اموزعه

جسمه فوگ الگاع وبعينه السهم ويمه الچفوف امگطعه

چفوف يمه، وهذا جسمه يجري دمه، اتخلد اسمه

صوت حريٍّ بالعلا قمين إنّي أُحامي إبداً عن ديني

هذا نداء العباس

* * *

(لندن ١٩٩٢م)

حديث الإمام الصادق (عليه السلام)

قد قال الصادق شيعتنا خلقوا من فاضل طينتنا

يفرحون لفرحنا يحزنون لحزننا

خلقو من فاضل طينتنا

* * *

هذا الحديث أصبح سند وما بين الأقطار انذيعه

عن جعفر الصادق ورد يشرحلك عن فضل الشيعه

اصحاب دين ومعتقد توفي وما تخلف بالبيعه

لا تملك غير محبتنا وتضحي دون مودتنا

يلهجون بذكرنا يحزنون لحزننا

خُلقوا من فاضل طينتنا

* * *

للشيعه تاريخ انعرف لجل الدين اتقدم دمها

من أجل تحقيق الهدف تصمد والظالم ميهمها

للشرف صارتله شرف يا وسفه التاريخ اظلمها

صبروا من أجل قضيتنا ظلموا أسفاً كظليمتنا

يصبرون لصبرنا يحزنون لحزننا

خُلقوامن فاضل طينتنا

* * *

نعود ويعود النه الدهر نرجع وانفنّد كل بدعه

والنكر رجعتنه، كفر بدستور القرآن وشرعه

من بين كل هاي البشر شيعتنه اتآمن بالرجعه

تؤمن بمناقب عودتنا لم تنكر موعد رجعتنا

يرقبون ليومنا يحزنون لحزننا

خُلقوا من فاضل طينتنا

* * *

التزمت بدين المصطفه وتبعت منهاجه وقرآنه

أصحاب ذمه ومعرفه ثبتت ما عافت مسرانه

أدت مراسيم الوفه ولو نحزن تحزن ويانه

يبكون ليوم مصيبتا دمعتهم تسبق دمعتنا

ينهجون بنهجنا يحزنون لحزننا

خُلقوا من فاضل طينتنا

* * *

عاشر محرم من يمر ما تنشف دمعة شيعتنه

وگلوبهم تسعر جمر اتشاركنه ابنار امصيبتنه

تتحمل هموم وصبر تتأمل يظهر حجتنه

تصبر في غيبه حجتنا تترقب طلعة رايتنا

يحفظون لعهدنا يحزنون لحزننا

خُلقوا من فاضل طينتنا

* * *

تنصب مآتم للحزن وللمظلوم اتهل العبره

ما تنشف دموع الجفن تذكر جدي الحزوا نحره

خلوه مرمي ابلا دفن عالتربان امهشم صدره

والشيعة تذكر محنتنا وتصبُّ الدمع للوعتنا

يندبون لفقدنا يحزنون لحزننا

خُلقوا من فاضل طينتنا

* * *

(لندن ١٩٩١م)

يا لثارات الحسين (عليه السلام)

حجَّة الله أتبقى غائباً عن كلِّ عين

فمتى سيفك يتلو آية الفتح المبين

والنداء، في السماء، يا لثارات الحسين

* * *

الك يالمذخور نرفع صرخه من كهف المصيبه

من صميم الحزن ننشد يا سبب طالت الغيبة

يمته للثارات تنهض والگلب تخمد لهيه

ما سمعت ابجثث أهلك عالأرض ظلت سليبه

عترة الهادي محمد بين آلٍ وبنين

ها هم بالطفِّ صرعى يبن خير المرسلين

والنداء، بالسماء، يالثارات الحسين

* * *

سيدي اول مصيبه الأصبحت للحزن مصدر

من وگع بين الكتايب عالترب عمك الاكبر

دمه يجري من وريده وجسمه بالمصرع تعفر

من أثر هاي المصيبه العالم العلوي تغير

مشهد الأكبر يبقى لعيون الناظرين

لست أنساه صريعاً دامياً وهو طعين

والنداء، بالسماء، يالثارات الحسين

* * *

عجب الاملاك صبرك يا طليعة آل هاشم

من غمار الحرب أعرض الك موقف عرس جاسم

شاب وبليلة زفافه زفته رماح وصوارم

وانطفت شمعة شبابه وصارت الفرحه مئاتم

لهف نفسي بدماه بات مخضوب اليدين

بكت الدنيا عليه بدموع ٍ وأنين

والنداء، بالسماء، يالثارات الحسين

* * *

سيدي وهيهات صبرك يجلي عن الگلب همك

لو ردت للثار تنهض رايتك تنتظر عزمك

من بعد چف الحملها اتسجلت هالرايه بسمك

لو ردت تنشد عليها عالنهر يم جسم عمك

راية تبكي يساراً قائدها بعد اليمين

فقدت ليث وغاها بعده أنت قمين

والنداء، بالسماء، يالثارات الحسين

* * *

بعد أشرح الك موقف هالرضيع المات ظامي

گبل ميعاد الفطامه انفطم بصواب المرامي

بالسهم گطعوا وريده ووجسمه يبن الحسن دامي

وامه من خيمتها نادت يبني ما يخمد ضرامي

خرجت والقلب يدعو بالأسى وهو حزين

أيُّ ذنبٍ لرضيع مات محزوز الوتين

والنداء، بالسماء، يالثارات الحسين

* * *

سيدي وهاي المصيبه الجبل من عدها ايتصدع

من وگع جسم ابو اليمه جدك ابخطة المصرع

بالسيوف وبالعوالي اتشجر وجسمه توزع

سيدي ويا يوم ترفع سيفك وللثار تشرع

قتلوا جدَّك ظلماً بسيوف الظالمين

بقي الجسم رهيناً بين قومٍ مارقين

والنداء، بالسماء، يا لثارات الحسين

* * *

من بعد ما طاح جدك وانرمه ابحجر المعاره

استفردوا بالعيله بعده والخدر وجّروا ناره

انفتح درب اليسر الها ولليسر طلعت حياره

سيدي وعمتك زينب كفلت العيله اليساره

هكذا للأسر سيقت عترة الهادي الأمين

بين أقوام عتاةٍ من زنيم ولعين

والنداء، بالسماء، يالثارات الحسين

* * *

بمهجه الاسلام عگبك طاحت اسهام الرمايه

رايتك يمته تزمها وتطوي موجات الروايه

ويمته يالمحجوب سيفك يحدي بظعون المنايه

الك يبن الحسن نرفع ندانه

ترتقب طلعتك عين الديانه

والمحب يصرخ بگلبه ولسانه

وكل مراسيل التجيك امسجله ابدم الضحايه

* * *

(لندن ١٩٩٤م)