مع ثورةالحسين (عليه السلام)
ثوره يم أهل الضمير انعوفها والنتايج بالنهايه انشوفها
* * *
وين أهل الفكر وارباب النهى هالسؤال من الصميم انوجهه
حسين خالد يظل لو امره انتهى خل تجاوبنه ابنزاهة جوفها
* * *
من تجاوب لا تراوغ باللفظ بالشرع كل انتهازي ينرفض
والقمم تبگه قمم ما تنخفض هالأوصاف اتنزهه لموصوفها
* * *
ثورة حسين اظهرت هاي الشروح التتصل بيها تشاهدها بوضوح
ظهر نص الثوره من دم الجروح وعا الضمير الحي تخط احروفها
* * *
رزم ظعن التضحية وعرَّج حسين الناس ما تدري مسير الظعن وين
منها گالت طالعه لنصرة الدين ومنها گالت هاشم أبدت خوفها
* * *
چان مغزه حسين بالثوره بعيد شاف احرار البشر صاروا عبيد
وامة التنصاع للطاغي يزيد ايصير منكرها مثل معروفها
* * *
والهتافات الذي اتصحي الفكر من المدينة لساحة الطف تستمر
منه هتف لا اشر طالع لا بطر رايد ايصحيها من اطيوفها
* * *
واللي ما يصلحها اسلوب الرشاد ترتضي ابحكم المظالم والفساد
خل تشوف احسين بالتضحية اشراد من توجه بالظعن لطفوفها
* * *
حسين من وجه رحاله للمسير سمع هاتف قدره يعلن بالمصير
ساروا الگوم ومناياهم تسير بساحة الطف تنتظرها حتوفها
* * *
لابن آدم حليه وانخط المماة خط الگلادة وعلى جيد الفتاة
من تگطع جسمه عسلان الفلاة دمه يكشف لآل امية زيوفها
* * *
الباري لمن خبره ابنص البيان حسين من هاي الحرب نال الضمان
عرف راسه ينرفع فوگ السنان وجثته دموم الشهادة نزوفها
* * *
حسين ثار ويدري بالطف ينچتل ليش أخذ ويه الظعن حتى الطفل؟
بالشهادة يريد طفله ينشمل چالمواهي الما تعوف اخشوفها
* * *
وليش وياه الفواطم راحله؟ الباري شائت حكمته لهالعليله
يشوفها بالسبي اتغادر كربله حاله كلفه اتعجزه لمكلوفها
* * *
الظعن يمشي ولاحت آفاق الأمل وهودج أم الخدر بالعفه ابتهل
والينابيع (الزرودي) من وصل بهالمكان الخيل تم ارشوفها
* * *
هذي آخر منطقه لرشف الجياد حالف ابن القين بيها بانفراد
بلغه حسين لزهير اعله الجهاد وبيها تم الجانبين احلوفها
* * *
والزمل واصل مسيره لنينوى راي هالاحرار عالثوره انطوه
وگمر هاشم ناشر ابچفه اللوه ورايته ابيمناه صار اشغوفها
* * *
والمحامل تمشي مثل المملكه العفه بيها اويه المجد متشاركه
تختلف عن حال بعد المعركه وحتماً اتغير الدنيه اصروفها
* * *
ظعن ابو السجاد للطف من وصل گمر هاشم نصّب خيام الأهل
خيام غالب اصبحت كعبة أمل وبني غالب بالرماح اتطوفها
* * *
بالفجر من بدت ساعات الزحف سبعه وثمانين ضد سبعين الف
ابراي واحد عالحرب ما مختلف تريد تزعم لآل اميه أنوفها
* * *
راد ابو السجاد تحريك العقول من هتف يا گوم آنه ابن الرسول
چنها ما تسمع ابو اليمه اشيگول بالرذيله الطمع چان ايدوفها
* * *
وعگب تبليغ الحجج والاعتراف صار ما بين الجحافل اختلاف
واعتدل ابن الرياحي حين شاف بهالقتال الشمس تهوى اخسوفها
* * *
ساحة الطف ما جت ابخيل ورجال لاهفه لخوض الحرايب والقتال
بدت گبل المعركه ابرمي النبال وظهرت لسفك الدموم لهوفها
* * *
دخلت المعركه باطماع ودجل امصممه ولاچن يراودها الفشل
جاهليه وما صفح عنها الجهل ومثل وقعة بدر دگ ادفوفها
* * *
انقارن ابتفكير من غير انحياز يا هو فاشل بالتصدي ويا هو فاز
موحله وتحتاج دقة اجتياز للتوجه للمعارك شوفها
* * *
انخوض احداث المعارك بالفكر وبمراحلها المهمه نستمر
نشوف تالي يا كتيبه تنتصر ويا كتيبه فاشله بزحوفها
* * *
من بدت بالحومه ساعات النضال والكتايب ماجت ابخوض الاهوال
هوت أنصار ابواليمهم اعله الرمال والمنايه رحِّبت بضيوفها
* * *
ظلت بهالحرب عترة فاطمه بكربله اتجابه غمار الملحمه
سجلت أدوارها ابفيض الدمه ودمعة حسين اعله خده اذروفها
* * *
استشهدت هاشم وظل بس الحسين يصيح ما من ناصر ولا من معين
اگباله سبعين الف مغرور ولعين وشاهره اعليه المنايه سيوفها
* * *
گلبه ظامي والسهام اعليه تصب وبالمهند روع اصفوف الحرب
لوه الجنحين وطواها اعله الگلب سلكت دروب الهزيمه صفوفها
* * *
وراس ابو السجاد من صابه الحجر وصبوا اعليه النبل صب المطر
ابو اليمه ابأهب لگطع النحر عگب الأقمار الدناها اكسوفها
* * *
گبل ما ينگطع نحر ابن الرسول عالمخيم شاف غارات الخيول
أشد من جرح البواتر والنصول شاف زينب على التل اوگوفها
* * *
(دمشق ١٩٨٠م)
0%
مؤلف: جابر الكاظمي
