شبكة الإمامين الحسنين عليهما السلام الثقافية

يا عباس أنت المسؤول

وعدك وينه وعدك وينه صاحت زينب، وعدك وينه

يا عباس انته المسؤول عن هذا الموقف شتگول

وعدك وينه وعدك وينه صاحت زينب، وعدك وينه

* * *

يا عباس أنت الكافلنه وانت الضيغم والصنديد

جيت اشرحلك حال عيالك عطشانه وللماي تريد

اطفالك ما تگدر تصرخ صارت توميلك بالايد

وهذا الشاطي اگبال خيامك لا لتگول الشاطي ابعيد

لتخلينه، لتخلينه بهذا المقوف لتخلينه

تتراجف منك هالجيش صابر عن هالموقف ليش

وعدك وينه، وعدك وينه صاحت زينب، وعدك وينه

* * *

كلسا طفله اتمر اگبالي توگف يمي وتحچي اوياي

ما أفهم منها اشما تحچي ولا أسمع بس چلمة ماي

منهو ايصبر هاي الطفله حاچيني وباصرني براي

تگعد لو تطلع للشاطي ابكيفك ظلت يمك هاي

يا والينه، يا والينه بيدك جودك يا والينه

أنت العارف والحساس ظلت يمك يا عباس

وعدك وينه، وعدك وينه صاحت زينب، وعدك وينه

* * *

ما أشرحلك حال الخدّر اشرح بس حال الأطفال

طفلين من اطفالك وگفوا يحچون ابمدمع همال

واحد ينشد من الثاني شتگول أنت بهذا الحال

يطلع عمنه الماي ايجيبه لو نبگه ابجمر الدلال

يعلم بينه، يعلم بينه شاف الحاله ويعلم بينه

خل نطلع يم عمنه نروح ونگله ابمدمع مسفوح

وعدك وينه، وعدك وينه صاحت زينب، وعدك وينه

* * *

خل اترك حالة اطفالك واشرحلك حال الرضعان

كلسا اسمع واحد يصرخ وأمه تحاچيه بأحزان

هاك ارضع من دمعة عيني وحتى المدمع هم خلصان

ظلت يم عمك يوليدي بس هوّه اليروي العطشان

شبحت عينه، شبحت عينه حتى اليرضع شبحت عينه

ما عنده لسان ايحاچيك بلسان الدمعه ايناديك

وعدك وينه، وعدك وينه صاحت زينب، وعدك وينه

* * *

يا عباس وإلمن تصبر من صبرك شنهو المريود

بيدك هذا الجود الخالي ابلا ماي اشينفع هالجود

هذا الشاطي اگبالك يجري والمثلك ميريد اشهود

ريتك سالم ترجع النه ولخيامك بالماي اتعود

واتروينه، واتروينه ترجع سالم واتروينه

راح انظل ابها الآمال واتذكر كل صوت الگال

وعدك وينه، وعدك وينه صاحت زينب، وعدك وينه

* * *

شال السيف وهاج وأغضب والرايه اترف اعله الرأس

صارت ضجّه ابباب اخيامه وحده اتحذره من الأرجاس

وحده اتحب اچفوفه اتگله لا تتأخر يا عباس

وحده تصيح ارجع يا عمي لا توليك أشرار الناس

لوظلينه، لو ظلينه بهاي الحاله لو ظلينه

بس دمعات العين تسيح كلسا يسمع طفله تصيح

وعدك وينه، وعدك وينه صاحت زينب، وعدك وينه

* * *

بزودك من توصل للشاطي يا عباس اذكرنه اهناك

بس ما تترس جودك ارجع لخيامك والماي آوياك

اطفال وخدر تنتظرك ما تگدر تحمل فرگاك

اسرع للأطفال ابجودك واسگيها الماي ابيمناك

رد اعلينه، رد اعلينه جيب الماي ورد اعلينه

يا عباس وشنهو الماي ما نطلب أكثر من هاي

وعدك وينه، وعدك وينه صاحت زينب، وعدك وينه

* * *

(لندن ١٩٩٣ م)

موال في مصاب العباس (عليه السلام)

من حين طاح العلم محد حمل ذابله

وصمصامك أعله الأرض چفك وسف ذابله

مصابك لون بالصخر چان الصخر ذابله

نصين يا با الفضل گلبي انجسم وأنطر

من هظم جدواك مذهول العگل وأنطر

ظليت اتانيك عيني أعله الدرب وأنطر

وبكتري أطفال من حر العطش ذابله

* * *

أين طفلك

أصرخ يحسين طفلك يون وّديته

* * *

عبدالله الطفل ذبلان وابگلبه اسعرت نيران

ناوي تروح للميدان تطلب ماي للعطشان

ما ظن شيمة العدوان عدهم رحم عالرضعان

رد يا مظلوم جسمي اليوم شليته

* * *

يبن المصطفه لا وين رايح بالطفل يحسين

محتار وتدير العين تطلب ماي خويه امنين

تطلب ماي من طاغين ما عدهم كرامه ودين

لا وين اتروح گلبي اينوح خليته

* * *

گلبي بالحزن ناداك وبدمعي اريد انخاك

لا تگصد لگوم اعداك لتودي الطفل وياك

ارجع خويه أترجاك ما تلگه شهامه اهناك

شيفيد اللوم دمعي ادموم هلّيته

* * *

راح وگصد يم اعداه وعبدالله الطفل وياه

ما بين الجمع وداه حاچه العسكر وناداه

ذاب الطفل من اظماه والنار اسعرت بحشاه

عبدالله اوياي يشرب ماي يا ريته

* * *

اتوجه حرمله وصابه وصار المنحر اصوابه

من دمه صفه اخضابه احتار حسين بمصابه

ولصوب الخيم جابه ونار الحزن لهابه

والحرًّه تصيح دمه يسيح ردّيته

* * *

جابه حسين لخيمًّه وعياله اجت يمّه

صارت عالطفل لمّه وحده ابمنحره اتشمّه

وحده تمسح ابدمّه وصاحت بالحزن أُمّه

يوليدي اشصار گلبي ابنار شبّيته

* * *

وحسين اختلف أمره عالج موقفه ابصبره

صد لطفله وينظره جابه ووسده ابگبره

وسد عالترب نحره وصاحت زينب الكبره

يبن امي اشلون هالمدفون واريته

* * *

(لندن ١٩٩٣ م)

آخر ليله

محله الوداع اليوم اتودعنه يا مظلوم

هالليله آخر ليله

* * *

يبن أمي صورة فاجعه انرسمت ابدمعة عيني

واتواصلت حالة حزن بين الطفوف وبيني

خليني آنه وكربله ابهذا الأمر خليني

باصرني عن هالعايله يحسين شتوصيني

يا فرحة المهموم گوم لخواتك گوم

وصيني بأمر العيله

* * *

يبن أمي عندك عايله تعلم يخويه اشبيها

مجموعه بحدود الخيم كل حرّه عد واليها

لو ودعتها ابغيبتك هالدنيه شتراويها

الدنيه واميه وكربله وجور الزمان اعليها

هذا الأمر محتوم وأعله الحرم مقسوم

ابدمع الجفن تسجيله

* * *

يبن أمي جمرة نايبه بعين الحراير تظهر

كل وحده يم والي اعتنت اتودعه بگلبها اليسعر

أول وداع اللي حصل ليله وإبنها الأكبر

صاحب يا لأكبر بالهضم چبدي انصدع واتفطر

تشاهد ولدها ايحوم موقف حزن مرسوم

ايودع الأكبر ليله

* * *

وشاهدت جاسم بالخيم رمله الغريبه اتودعه

واتگله يا جاسم أخذ روحي لزفافك شمعه

هالشمعه لمن تنطفي تضوي بلهيب الدمعه

من أرفع أصوات العتب ما أظن صوتي اتسمعه

آيبني يا محروم جمر الگلب مضروم

أخذ الگلب واحچيله

* * *

ثالث وداع اللي حصل بين الگمر وسكينه

تنظر لعمها وتنتحب واتگله وعدك وينه

نوبه تشمه بهامته ونوبه تشمه بعينه

ونوبه تهل دمع الجفن وتشوبح لچفينه

طفله ابگلب مهضوم بين العتب واللوم

لعمها الگمر تشچيله

* * *

وأم الطفل يم الطفل گعدت تهل العبره

اهلال وتشعشع بالمهد وجه الرضيع اتنظره

محنيه يمه وشمته وگامت تقبّل نحره

واتگلّه باچر هالنحر سهم الغدر ينتظره

لو صابتك هالگوم يوليدي حزني ايدوم

دمع الوداع اتسيله

* * *

يحسين وآنه بهالوضع صوت الأجل أوحالي

صورة حزن عن مصرعك كل ساعه تتراوالي

هاليوم اشوفك بالخيم وجهك ينور اگبالي

باچر أشاهد جثتك فوگ الترب يالوالي

ألگه الصدر مهشوم والنحر يجري أدموم

وعيني ابحزن تربيله

* * *

(لندن ١٩٩٢ م)

جمرة مصيبتي

جمرة امصيبتي زيدت لوعتي

وين اتجه بالعايله يا كربله يا كربله

* * *

آنه العليل أتحملت هظم الغربة والآلام

فوگ المصايب والمحن أحمل لوعة الأيام

أنظر يتامه امسلبه أنظر عالأرض أجسام

نار الخيم متضارمه وما ظلت علينه أخيام

هذا عمري أنختم بالمرض والألم

اشحال الذي ايفارگ هله يا كربله يا كربله

* * *

كلسا مصيبة من الدهر تفجعني ودليلي يذوب

وأسمعت أول فأجعه الأكبر عالأرض مصيوب

وگبالي شفته أعله الثرة من دم النحر مخضوب

چم لوعه يحمل هالگلب أتحمل صبر چم دوب

بعيني شفته انصرع وآنه گلبي انفجع

ودموم الأكبر سايله يا كربله يا كربله

* * *

ثاني مصيبة شاهدت جاسم عالأرض مصروع

عريس صارت حنته بدم المنحر المگطوع

سيوف العده بدال الشمع صارت للزفاف اشموع

عالموت زفوه العده وذاك الفرح صار ادموع

عالحرب زفته وبالدمه حنته

دموع الحزن متواصله يا كربله يا كربله

* * *

ثالث مصيبة اللي جرت شعلت بالگلب نيران

گالولي يم شاطي النهر متوسد گمر عدنان

من عگب عمي للحرم ما ظلم خدر لا صيوان

بمصرع گمر هاشم وسف صرنه ابولية العدوان

طايح بمصرعه چفوفه متگطعه

منهو اليشد الراحله يا كربله يا كربله

* * *

رابع مصيبة اتحملت ظل دمع الجفن مسفوح

وگبال عيني شاهدت عبد الله الطفل مذبوح

لمن شفت دمه يصب لا مهجه بگت لا روح

عگب الطفل ما ظل صبر راح اگضي العمر بالنوح

شنهو ذنب الطفل بالسهم ينچتل

ما أنسه نبلة حرمله يا كربله يا كربله

* * *

خامس مصيبة راتبه صابتني بمرامي البين

وانگطع من عندي الأمل من گطعوا وريد حسين

من بعد غيبة والدي راح انطي الوجه لا وين

يا كربله ونار الحزن ما تنطفي ابدمع العين

والدي اعله الترب دمه يجري ويصب

ويه الدمع صوتي اعتله يا كربله يا كربله

* * *

بدار الغرب راحوا هلي وبعد الأهل ما ظل حيل

اتحيرت بأيتام وحرم اصرخ والدموع تسيل

وبليلة الحادي عشر من هوّد علينه الليل

ظلينه نتحمل غصص ما بين الزلم والخيل

چبدتي اتفطرت لوعتي اتكاثرت

عبراتي ظلت هامله يا كربله يا كربله

* * *

(لندن ١٩٩٣ م)

يا أيها الحماة

خان الدهر خان يا لوليان يا لوليان

* * *

من صميم الروح هتف صوت العقيلة

أتخاطب الإكرام أبدمع فجر مسيله

يهل الشيم جيت عگب غيبه طويلة

بعايله وأيتام صرت آنه الكفيلة

حان الأجل حان يا لوليان يا لوليان

* * *

أتكفلت بعيال عگب عين الغوالب

للكوفة والشام خذت خدّر غرايب

ما ينفع اللوم بعد ألمن أعاتب

ظعن الحرم شال وگطع حادي الرچايب

سارت الإظعان يا لوليان يا لوليان

* * *

يا وسفه يا حيف بعد عزنه انسبينه

وبعد الخدر ذاك تسترنه بدينه

بغيبة العباس الشمر حادي الظعينه

وطوح الجمّال وطلع للكوفة بينه

ابولية العدوان يا لوليان يا لوليان

* * *

ابنايبات الروح تخبركم يهلنه

للكوفة بالنوح تعنينه ووصلنه

بمجلس ابن زياد ابمدامعنه دخلنه

ما عدنه حماي ولا ظل والي النه

بس العدو چان يا لوليان يا لوليان

* * *

جمعوا الأطفال وسط گصر الأمارة

آمر ابن ازياد وصدر أمره وقراره

من الكفوة للشام يمشونه يساره

والگلب مجمور ولا تنخمد ناره

بالگلب نيران يا لوليان يا لوليان

* * *

من رحنه للشام ابفرح طلعت الوادم

شاخصة الأنظار تشو بح للفواطم

فوگ اليسر ذاك علينه الدهر ناقم

وبمجلس يزيد لگينه الطاغي حاكم

هاجت الأحزان يا لوليان يا لوليان

* * *

بالگلب يكرام تشب جمرة حزنكم

و لكربله اليوم تعنينه ابظعنكم

ما ندري شنگول لون رحنه لوطنكم

شنجاوب الناس لون تنشدنه عنكم

نگطع الوديان يا لوليان يا لوليان

* * *

(لندن ١٩٩٣ م)

(أبو ذيه)

گضت فرسان غالب واشبلاها

وعليهم ناري تسعر واشبلاها

نگول الشام ضدنه واشبلاها

الكوفة وليش تاخذنه سبيه

* * *

جئت إلى قبرك (عگيلي)

گبرك يحسين اتعنيته

* * *

يالگبرك ضمك عن عيني بمصابك منهو ايواسيني

اگعد يبن أمي وحاچيني وعن موضع گبرك دليني

أصرخ والمدمع هليته

* * *

اشرحلك عن وضعي وحالي أخلافك ظليت ابلا والي

أصبح چتالك يبرالي شاهدتك مذبوح اگبالي

وبالمصرع جسمك خليته

* * *

ناديتك ما تعلم بيه راح اطلع عنك مسبيه

امشي وعيني اعليك اربيه عن ظعنك انشد حاديه

درب الكوفة اشلون امشيته

* * *

الكوفة ابلوعتنه ادخلناها وبفيض المدمع عفناها

والگوم اللي رحنه اوياها جارت عالعيله ابمسراها

ظعنك من خصمك حاميته

* * *

للشام من الكوفة اخذونه جاروا بالمسره وضهدونه

عالنوگ الهزّل مشونه وبضرب السوط اتولونه

چم سوط اخلافك صديته

* * *

نمشي ورأسك يمشي اويانه للشام اوصلنه ابمسرانه

من گصره ايزيد اتلگانه وابچلمة شامت حاچانه

وخصمك بالشام اتحديته

* * *

بالمجلس خلاني اگباله لن زودي وعزمي اتصداله

ذليته وذليت ارجاله وخيبت اظنونه وآماله

اتحديت ايزيد وذليته

* * *

واليوم اتعنتي ابظعنك يبن أمي وجيت أنشد عنك

يا مظوم اتعذر منك ما چنت آنه بساعة دفنك

ومصابك لتظن انسيته

* * *

(كربلاء المقدسة ١٩٧٧ م)

حان رجوعي

يبن أمي فارگتك عالغبره ودعتك

وارجعت ما شفتك

* * *

من بعد الغيبه اللي طالت رديت لگبرك رديت

جيتك بهمومي واحزاني وبلهفة گلبي اتعنيت

انه المهمومه المسبيه وبصوت المدمع ناديت

عفتك عالتربان اموذر جيت وما شفتك من جيت

يا خويه واعدتك بالرجعه عاهدتك

وارجعت ما شفتك

* * *

حسبت أرجعلك يبن أمي وبالمصرع بعدك الگاك

ما شفتك من يوم العفتك متوسد ما بين اعداك

بس اگبور تشاهد عيني وگلب اختك صاح وناداك

يم جسمك هاك ادفن روحي وخليني ابگبرك وياك

بدموعي غسلتك وبروحي چفّنتك

وارجعت ما شفتك

* * *

بس ما شفت الطف ابعيني ردت وانعادت الأفكار

صرت أذكر مصرع ولياني وأذكرت خيامك والنار

واذكرت العاشر ومصابه واشما حل أعلينه وصار

واذكرت الليل وأيتامك محتاره اتلوذ ابمحتار

يالوالي حشمتك ناديتك آنه اختك

وارجعت ما شفتك

* * *

عديت الليل وساعاته واتنطّر وجه المصباح

ما أسمع لن صوت الحادي صاح وظعنك عنك راح

واصعب موقف شافت عيني روس انشالت فوگ ارماح

من يمك رحنه بهالحاله ويم جسمك عفنه الأرواح

للكلفه ذاخرتك للشده رايدتك

وارجعت ما شفتك

* * *

ما أرويلك شدة حالي إنشد رأسك چان اوياي

رأسك خل يحچيلك عني ويشرح عن لوعة ممشاي

محتاره بأيتام وخدّر واشگف للسوط ابيمناي

أتحمل جمرة فرگتكم لو أحمل جمرة دنياي

عن حالي أخبرتك بعيوني وسدتك

وارجعت ما شفتك

* * *

من يوم العفتك بالمصرع ما غمضت عيني لها ليوم

اگعد باصرني وحاچيني شيصبر گلبي المهموم

مالومك يالغايب عني يبن أمي وشيفيد اللوم

ما يدري بحال المظلومه ولا يعلم غير المظلوم

بالمصرع اتركتك وبعيني شاهدتك

وارجعت ما شفتك

* * *

بهمومي ولوعة دلالي اتعنيتك من درب الشام

جيت وجبت اثلاثه أويايه نوح ودمعات وآلام

يبن أمي جروحك وجروحي مرسومه بعين الأيتام

اخذت كل ما عندي الدنيه واشخلّت عندي الأيام

بالعتب لوعتك يا وسفه ضيعتك

وارجعت ما شفتك

* * *

(لندن ١٩٩١ م)

صرخة بضمير الوجدان

بالسجن صاح السجّان صرخه بضمير الوجدان

بالعليه جبريل ايحوم والكاظم اصبح مسموم

صرخه بضمير الوجدان

* * *

يردد لسان الفاجعه بهذا الصوت نامت طليعة هاشم ابحجر الموت

أصبح الكاظم يونس وسجنه الحوت والحزن ما بين الضماير مكبوت

صورة حزن مرسومه بالفاجعه المحتومه

اتنفذ الأمر المحتوم والكاظم اصبح مسموم

صرخه بضمير الوجدان

* * *

بالدهر أبشع صوره صورة هارون هالطاغي لتظن يختلف عن فرعون

موسى الكليم وموسى ما يختلفون حكمة الكاظم سر عصاته المكنون

تاج الفخر والعفه گطب المعاجز چفه

اتوضع السر المكتوم والكاظم اصبح مسموم

صرخه بضمير الوجدان

* * *

لموقف ابن يعگوب خل نتصور چانت (زليخا) تراوده أعله المنكر

ما گدر يصلحها ابعمل يمحي الشر وهالموقف بسجن الرشيد اتكرر

للجاريه الدخلوها ربة شرف طلعوها

كنز المعاجز معلوم والكاظم اصبح مسموم

صرخه بضمير الوجدان

* * *

والباري وضح ايته بفرانه عن حادثة نوح وأمر طوفانه

اشما طفحت امواجه نشف جروانه واحنه دمعنه امتزج ويه ادمانه

من فاجعة محنتنه ما تضمحل دمعتنه

هالدمع طوفانه دموم والكاظم اصبح مسموم

صرخه بضمير الوجدان

* * *

ونار الخليل اعليها نص القرآن برد وسلم صارت بأمر الرحمن

ولمصاب موسى الكاظم تشب نيران ما تنطفي اشما تمر بيها الأزمان

برد وسلم لبراهيم وعلينه صار التضريم

اشلون الگلب ما مضروم والكاظم اصبح مسموم

صرخه بضمير الوجدان

* * *

لا تندهش لو گلت ساورني البين لا چن أدهشك يالتناشد هالحين

عين الموالي اشلون تجمع ضدين نار ودمع متوالفه ابجفن العين

اشلون ابجفن مجتمعه نار الحزن والدمعه

لو شاهدتهن لتلوم والكاظم اصبح مسموم

صرخه بضمير الوجدان

* * *

محنة الكاظم گربت اجالي ونار المصيبة اموجره بدلالي

وحي النوايب بالحزن أو حالي متغيب اشباح الأجل عن بالي

كل نبي وكل مرسل ناح راهب بني هاشم راح

وابسجنه الأرواح اتحوم والكاظم اصبح مسموم

صرخه بضمير الوجدان

* * *

(دمشق – ١٩٨٠ م)

يا روح الإنسانية

يمهدينه الضلع ما ننسه ثاره وعلي جدك علي هجموا الداره

* * *

يا روح الإنسانية سرك سر التوحيد

يالبايعناك بدمنه مو بيعة ايد بأيد

اشما يكثر دمع الموعد أكثر محنتنه تزيد

منك يالغايب منك تدري وتعلم شنريد

تثور أعله الغصب حگ الأمارة تنشده بيا ضلع ملتهبه ناره

وعلي جدك علي هجموا الداره

* * *

يا من كسروا ضلع أمك بالحايط والبسمار

گوم انشد يا هو الطايح يم عتبة باب الدار

حلمك چم دوب وصبرك ننتظرك ليل انهار

يمته خيولك تسرجها وتصيح الثار الثار

أناشد عالفرج يمته البشاره أظن حتى الصخر مل انتظاره

وعلي جدك علي هجموا لداره

* * *

بعيونك دمعة آدم بگلبك لوعة يعگوب

وبصدرك شهگة يونس يالصبرك صبر ايوب

الصخره تذوب بحسراتك وگلبك صابر ميذوب

اشتنسه الزهرة ولوعتها لو محسن يالمحجوب

الك جفن المحب دمعه ايتجاره ويشوبح عالفرج ليله ونهاره

وعلي جدك علي هجموا الداره

* * *

امصابك يالمهدي امصابك ما مثله يصير امصاب

نثروا صفحات سنينك واحترگت ويه الباب

جدول احزانك يجري وظل ينزف بالمحراب

ما بين الزهرة وحيدر اصواب اعظم من اصواب

انغصب من الوصي تاج الوزاره وصفت عند الخصم ذيچ الصداره

وعلي جدك علي هجموا الداره

* * *

من غصبوا جدك حيدر ضاع الحگ والاصلاح

عافوا نبراس الحكمه وتبعوا حكم الأشباح

جدك طاح بمحرابه غدروه وراح الراح

يالغايب إنشد واسمع دم الكرار اشصاح

هتف وين القيم وين الحضاره رجع حكم الجهل هاي الخساره

وعلي جدك علي هجموا الداره

* * *

يالغايب وانت مصابك صار اليوم مصابين

يانار اللي تطفيها وانت بگلبك نارين

ياهي التگدر تحملها وتشخص عينك لا وين

جرح الباب الدفعوها لو طبرة سيف البين

كسر ذاك الضلع صعبه انجباره وتظل طبره علي تجري بغزاره

وعلي جدك علي هجموا الداره

* * *

انشد من دمعة عيني ومن دلالي المجمور

تلهب نارك عالطبره لو عالضلع المكسور

يا يوم اتجرد سيفك عالطغيان وعالجور

يا يوم وشمسك تطلع ونشاهد ذاك النور

تدفعك للنصر همه وجداره تثور وللكفر تعلن دماره

وعلي جدك علي هجموا الداره

* * *

(لندن ١٩٩٠ م)

العواقب بالتجارب

لو ردت حسن العاقبة من عدنه أخذ التجربه

والعواقب بالتجارب

* * *

رب البشر أعلينه أُمر نآخذ عبر من السور

والي كفر يسكن سقر اخذ الخبر من السور

وبالأثر دينه اعتمر والحق ظهر من السور

بالعمل دينك راقبه تكتسب أشرف مرتبه

والعواقب بالتجارب

* * *

بهاي الصفه للمصطفه لتخالفه بالمعرفه

واللي جفه عن موقفه لتوصفه بالمعرفه

أهل الوفه متآلفه عزها اكتفه بالمعرفه

دنيتك دنيه كاذبه للطمع والغش جاذبه

والعواقب بالتجارب

* * *

راعي الجشع مهما زرع ضر ما نفع بالمجتمع

والما خضع لهل الطمع مجده ارتفع بالمجتمع

ابگلبه انطبع درس الورع صوته ارتفع بالمجتمع

والعواقب بالتجارب

* * *

هذا الدرس مثل الشمس منه اقتبس عز النفس

گلبك طرس بي ينكعس مصدر غرس عز النفس

طبع الرجس مهما يحس ما يلتمس عز النفس

هاك اخذ منهاج الأبه من خامس أصحاب العبه

والعواقب بالتجارب

* * *

راعي الهمم بألطف عزم يكتب حكم تحيي الأُمم

سيفه القلم للحگ رسم اشرف قيم تحيي الأُمم

يملك شيم بعهده التزم يدري الذمم تحيي الأمم

بالحرب نفسه اتخاطبه للعدل إلزم جانبه

والعواقب بالتجارب

* * *

شد عالگلب صب الرعب فوگ النصب وسط الحرب

جمر الگلب ظل منعطب ظامي ويطب وسط الحرب

بدار الغرب دمه يصب فوگ الترب وسط الحرب

بالعطش روحه غايبه جثته بدمها مخضبه

والعواقب بالتجارب

* * *

شبل الطهر بسيف الغدر ضحه العمر ماتم صبر

رد المهر بصوته ايهدر راح الذخر ماتم صبر

جيش الكفر من كل كتر شنهو الأمر ماتم صبر

والخيم ظلت لاهبه شيطفي جمر النايبه

والعواقب بالتجارب

* * *

بهذا الألم گلبي علم حزني انكتم بعيني انرسم

من‏أهل الشيم محد سلم وحرگ الخيم بعيني انرسم

العسكر هجم وخدري‏انضرم سبي الحرم بعيني انرسم

مهجتي لگلبي تعاتبه يا گلب آنه امصوبه

والعواقب بالتجارب

* * *

(طهران ١٩٨٧م)

آيات دستور الوحي

آيات سر معناها سبحانه من أوحاها

بالتاريخ، ما تنمحي آيات دستور الوحي

تكوين ثورة محمّد للدين ثورة محمّد

* * *

تقديس ذات المصطفه متقدسه ابعرفانه

سبحان رب الوصفه بهذا الوصف سبحانه

بالشرف والعز والوفه وضّح سور قرآنه

نهجه صادق عالحقايق دلاّنه

واعرفنه الحگ ومنهاجه باسراء الهادي ومعراجه

شعلة هالثوره الوهاجه اتنور دين الله وبنيانه

للدين فجّر ثوره

تحمل الفكره الحره

عالطغيان، ثار وكتب (تبت يدا أبي لهب)

تضمين ثورة محمّد للدين ثورة محمّد

* * *

ادرس معالم ثورته وانظر ثباته وعزمه

شوف الرسول ابنهضته حرر كيان الأمة

هادينه رحمه لامته عالكفر أصبح نقمه

والاعادي اشما تعادي متهمة

حطّم للأصنام ودمّر والخالق ناداه وقرر

(أنا أعطيناك الكوثر) نزلت هاي السورة بأسمه

جبريل صوته اينادي

بسم الرسول الهادي

هالآيات، عن بيّنه بمصحف الباري امدّونه

ابتدوين ثورة محمّد للدين ثورة محمّد

* * *

أوصاف سره اتقدست بالجامعة القدسية

بسيرة حياته اتأسست هالمدرسه الروحية

جوهرة فكره أتكرست دينيه اصلاحيه

ظل يجاهد عن قواعد ثوريه

للباري امثبت ميثاقه توّج هالكون باخلاقه

صادق من يحجي ومصداقه لفظ الحكمه الرّبانية

مبعوث هاي الوصافه

لو طالعت أهدافه

للاجيال، سجل عهد من (قل هو الله أحد)

تحصين ثورة محمّد للدين ثورة محمّد

* * *

انشد يمن عندك ورع انشد وشوف اشبينه

يا شخص من عدنه انتفع من مدرسة هادينه

لو ناشدت للمجتمع اشقدمنه وشأدينه

وشنفعنه لمجتمعنه تدرينه

والمختار ايريد الأمة تتبع نهجه ومبدأ حكمه

خل نستلهم سيرة علمه صوت الأجيال اينادينه

صرخات من تسمعها

تعكس الك واقعها

هالصرخات دم ودمع اعكس الواقع تستمع

امأيدين ثورة محمّد للدين ثورة محمّد

* * *

نكتب صحف هم وألم نشرح وضع حالتنه

الليلة انفگد سيد الأمم واتصوبت امتنه

جوهر موازين القيم ضاع اببحر لوعتنه

والمصايب والنوايب صابتنه

اليوم انفگدت شمس العفه وحيدر يصرخ حيف ووسفه

هالوادم أضحت مختلفه اتخربت واتفرقت وحدتنه

هاليوم حيدر وحده

نصبوا سقيفه ابضده

ليش الناس، متهاونه رب الجلاله امعينه

ابتعيين ثورة محمّد للدين ثورة محمّد

* * *

لو ما يظل عقد الوله ابلايه نصير اينصره

ما چان شبله ابكربله ينصرع فوگ الغبره

ولو ما عگب سيد المله ينكسر ظلع الزهره

مالفنها ضلوع ابنها متكسره

وحسين ضلوعه المهشومه من ضلع الزهره المظلومه

كلمن راح ابعهده ويومه الله اشحملت هالعتره

هالصوت ظل يتعاله

بسم الرسول وآله

خط حسين، سر نهضته عالظلم فجر ثورته

ابتمكين ثورة محمّد للدين ثورة محمّد

* * *

(طهران ١٩٨٧م)