شبكة الإمامين الحسنين عليهما السلام الثقافية

أم المصائب

يا بويه تدري اشصار عگبك يحامي الجار

شفت المصايب

* * *

يا جبل يا راسخ ابگاع الإيمان يا من عواصف هالدهر متهمك

يا أسد يالترهب اگلوب الشجعان ترجف اصفوف الملحمه من اسمك

حيرني أمرك يا غضب يا بركان اشلون ابن ملجم گدر يوصل يمك

يا ريت گبلك اندفن بالتربان ولا شوفك امخضب يبويه ابدمك

لا طالت الاعمار عگبك يحامي الجار

شفت المصايب

* * *

آنه العقيله زينب وتدريني من جمر نار الهظم دلالي ذاب

خليني آنه ومحنتي خليني امصابك يحيدر ما حصل مثله امصاب

حال الدهر ما بينك وما بيني وظليت اصيح ادركني يا داحي الباب

ريت انطفت هاليوم شمعة عيني ولا شوف مظلم صار وجه المحراب

هالليله فكري احتار عگبك يحامي الجار

شفت المصايب

* * *

يا با الحسن چنت اشكي عندك همي وابشوفتك تنخمد من گلبي النار

لمن چنت اذكر مصيبة أمي انظر لوجهك أنسه كل اللي صار

وانجمعن بهاليوم حزني وهظمي واذكرت محسن والظلع والبسمار

بس الحسن وحسين ظلوا يمي منهو اليصبر حالتي يا كرار

راح أحمل الاخطار عگبك يحامي الجار

شفت المصايب

* * *

ايتام صرنه اليوم نتوجه وين ما ندري المن نتجه ما ندري

امن الحسن نوبه أمسح دموع العين ونوبه الحسن يمسح دمعتي التجري

نوبه اروح وانظر لحال حسين وحسين نوبه يشوف حالي وأمري

ومنين اجتنه المحن يا بويه منين من گبل عمرك ريت خطفوا عمري

شيطفي هاي النار عگبك يحامي الجار

شفت المصايب

* * *

سهرانه عيني وأحسب انجوم الليل كل ساعه وجهك بويه يتراوالي

اخلافك بعد ما عندي مهجه ولا حيل ومنين اجيب الحيل عگب الوالي

انظر مچانك خالي ودموعي تسيل ابيا عين أصد وأنظر مچانك خالي

يا ويل گلبي اشكثر يصبر يا ويل ليلة أمس وجهك اشوفه اگبالي

والليله وحشه الدار عگبك يحامي الجار

شفت المصايب

* * *

يا با الحسن المن أوجه عتبي متگلي شيصبر الگلب يا حيدر

چم فاجعه وچم لوعه يحمل گلبي لو صخر هم چان الصخر يتفطر

يا نور عيني البيك اشوفن دربي عگبك صرت أعثر واگومن واعثر

متحيره وعيني لمچانك تربي ما اگدر احمل فرگتك ما أﮔدر

مهمومه ليل انهار عگبك يحامي الجار

شفت المصايب

* * *

جارت علينه الدنيه يا والينه كلما نزيد الصبر محنتنه اتزيد

ملينه من فيض الدمع ملينه شيفيد سيل الدمع بعدك شيفيد

ايتامك احنه وشيطح بيدينه طيفك مثل ماي وتبده من الايد

والعيد هذا هلاله لاح اعلينه يا با الحسن يا ريت لا شفنه العيد

أبدال الفرح أكدار عگبك يحامي الجار

شفت المصايب

(لندن ١٩٩١ م)

لوعة البتول

اعليمن تهشم صدري محد يدري محد يدري

يا سبب ضايع گبري محد يدري محد يدري

* * *

آنه البتول أم الحسن يالوادم اتعرفوني

يا ذنب من عندي صدر شنهو السبب ظلموني

ليش الضلع مني انكسر والگوم ما رحموني

شنهو السبب حگي انغصب ومن الفدك حرموني

يا أسباب، ضعلي انصاب، خلف الباب، والأصحاب

بالغدر كسروا ضلعي فايض دمعي فايض دمعي

ليش المدامع تجري محد يدري محد يدري

* * *

عاتبت دهري وناشدت ليش الدهر عاداني

يا غايه عنده ويا سبب أجري الدمع خلاني

وخلاني بالباب احتمي يوم اللفت عدواني

بضعة محمد فاطمة اشلون الدهر ينساني

شنهو الراي، دهري بهاي، خان اوياي، مثل اعداي

هالدهر يعرف شاني ما ينساني ما ينساني

شنهو اللي غير دهري محد يدري محد يدري

* * *

يا دهر شنهو الغيرك أم الحسن تدريني

متحجبه ابنور الوحي وثوب العرش يكفيني

تاليها ما بين العده ابها لموقف اتخليني

ايدي اعله ضلعي ودمعتي تجري وتفيض ابغيني

حرت لا وين، ادير العين، مرار البين، اجاني امنين

والراد ينشد عني يسمع وني يسمع وني

شيطفي ناري وجمري محد يدري محد يدري

* * *

يا دهر آنه أم الحسن والهظم غير حالي

نار العلى الباب اسعرت متضارمه ابدلالي

والفاجعه الما تنمحي عن فكرتي وعن بالي

ساعة البيها شاهدت طايح جنيني اگبالي

دمعي ساح، صوتي صاح، محسن طاح، والعز راح

هالفاجعه وبلواها ما انساها ما انساها

اشلون أنسه شدة أمري محد يدري محد يدري

يا وسفه أصحاب النبي هالفعل منهم يبدي

والعتب گالوا بي نفع گلت العتب ما يجدي

يا ذنب من عندي بده وشنهو الصدر من عندي

ليش الصحابه التدعي اسلام توگف ضدي

دمعي اليوم، يجري ادموم، يكفي اللوم، ويه الگوم

ابگلبي الصبر خليته ما مليته ما مليته

ليش احتميت بصبري محد يدري محد يدري

* * *

هاي الصحابه التدعي اسلام لتلوموها

أحقاد ضمرت للنبي ابدافع حقد أخفوها

خلهم يبينون السبب والچلمه خل يحچوها

شنهو الجعلهم بالغدر دار النبي ايحرگوها

فكري احتار، شنهو الصار، اشوف الدار، تلهب نار

يا من تدافع عنهم اسأل منهم اسأل منهم

يا سبب طعنوا ستري محد يدري محد يدري

* * *

بهذا الوضع عمري انگضه ابنوح وهظم گضيته

من كثر شدة حالتي حتى الگبر أخفيته

گبل الأجل للمرتضى بدمعة حزن ناديته

بالليل شيل اجنازتي بهذا الأمر وصيته

بمرار ونوح، فديت الروح، والمجروح، طبعه اينوح

من كثر شدة نوحي فاضت روحي فاضت روحي

ياسبب أكتم سري محد يدري محد يدري

* * *

(لندن ١٩٩٢)

(أبو ذية)

محد يدري بيه اشصار وجره

يهل دمعي على الوجنات وجره

بگت نار الضلع بالروح وجره

واشوف العمر مشرف عالمنيه

* * *

بين الحسن والحسين (عليهم السلام)

على ابن أمي كثر همي كثر همي على ابن امي

* * *

چلمة حزن وهموم ونحيب ونوح

ظهرت من گلب متصدع ومجروح

هاي الچلمه مصحوبه بدمع مسفوح

غابت ويه روح المجتبى چم روح

انمرد چبده وعگب فگده انهدم عزمي على ابن امي

* * *

چن صوت الأجل ناداني يا مظلوم

وگع سور الأبه وراح الحسن مسموم

وآنه ابهمي أصرخ من گلب مهموم

ديجور الكفر يطلبنه يوم ابيوم

سفح دمعي انعطف ضلعي ونشف دمي على ابن امي

* * *

خلاني زماني امدوهن ومحتار

عندك راح ابث العتب يا لمختار

لو أدري الدمع يخمد لهيب النار

چان انحب وانوحن وحن ليل انهار

ابجمر نوحي اسعرت روحي الگلب مدمي على ابن امي

* * *

يا جدي المدامع تجري مني ادموم

محتوم الأمر وأدري الأجل محتوم

اعتب المن اعتب والعتب مذموم

گالوا لوم دهرك وشيفيد اللوم

ابگهف گلبي احبست عتبي ونحف جسمي على ابن امي

* * *

بصوتي صحت يا جدي أريد اجواب

شأنسه من الدهر يا نايبه ومصاب

أنسه الضلع يوم الهجموا اعله الباب

لو أنسه الوگع منصرع بالمحراب

الدمع جاري وتشب ناري انختم هظمي على ابن امي

* * *

نفرض أنسه كسر الضلع والآلام

نفرض أنسه طبرة والدي الضرغام

اشلون انسه الحسن يالوعة الأيام

نعش ابن امي تتنائر عليه اسهام

على الغالي اختلف حالي أو غدت ترمي على ابن امي

* * *

يا جدي عگب ما للحسن سموه

بسهام الضغاين للنعش صابوه

يالمختار وابشع كل فعل فعلوه

يمك ردت ادفنه وللدفن منعوه

ابتعد عنك مضه منك ابدفن حتمي على ابن امي

* * *

گبل الحسن يا ريت انمرد چبدي

هاذا الجره وهذا الصار يا جدي

هاليوم المصيبه اتسلحت ضدي

أصبر وادري غير الصبر ما عندي

بني غالب بالمصايب تحن يمي على ابن امي

* * *

(دمشق ١٩٩٠ م

صرخة التأسف

يحسين مدمعنه هتف ما چنه وياك يا حيف ووسف

* * *

انخطت بالگلوب وصيتك يا امامي

يا شيعتي اتصيح وحيد وگلبي ظامي

ذكروني بالماي وأنه اليسعر ضرامي

واحنه الذكر ناك ذكر من دمع دامي

اتخاطبك بالدمع اليسح يا ريت گبلك ننذيح

مدمعنه يحسين لمصابك ذرف ما چنه وياك يا حيف ووسف

* * *

محضرنه يحسين وسف ما چنه يمك

لو چنه وياك وحگك نجلي همك

نفديلك أجسام گبل لا يهوى جسمك

انضحيلك ادموم گبل لا يجري دمك

شيفيد نتأسف بعد راح ومضه وفات الوعد

گبلك تمنيت منحرنه نزف ما چنه وياك يا حيف ووسف

* * *

نتمنه انصار الك چنه ونناصر

نتقدم اوياك نقدملك مناحر

انشارك الأصحاب زهير الوفي الثاير

وحر الرياحي وحبيب ابن مظاهر

نتمنه چنه بكربله نشاركهم بهالقافله

حيف ووصف فات تحقيق الهدف ما چنه وياك يا حيف ووسف

* * *

كل أمل لو فات بعد لا تظن يرجع

ما نهنه بالعيش وعلي الأكبر تگطع

هالعمر شيفيد وجسم جاسم توزع

من بعد عباس تظن ينشف المدمع

يا ريت من گبل الگمر نتوسد ابكتر النهر

نصرخ يعباس ياتاج الشرف ما چنه وياك يا حيف ووسف

* * *

كربله بكل دور تعيش اويه المشاعر

محنتك يحسين جمر وسط الضماير

لا تظن هالصوت مجرد لفظ شاعر

هالصوت والله دمع من المحاجر

لدمع من عيني انسجم بين التآسف والآلم

لتلوم لتلوم لو ضلعي انعطف ما چنه وياك يا حيف ووسف

* * *

يحسين لو دار عكس دور الليالي

وترجع الأيام حسب فكري وخيالي

وكربله تنعاد وأشوف العده اگبالي

بالنحر أفديك واضحي وما أبالي

أربع اسهام ابچبدتي وروحي وحياتي ومهجتي

شيفيد شيفيد لو زاد الشغف ما چنه وياك يا حيف ووسف

مصرعك يحسين هدم حيلي وكياني

اشتنفعنه شتفيد ربيبات الأماني

صرخات المصاب يترجمهن لساني

بالگلب والعين سهم فگدك رماني

أجري الدمع طول العمر ذايب دليلي من الصبر

لتلوم عيناي لو دمعي نشف ما چنه وياك يا حيف ووسف

* * *

(أصفهان ١٩٨٨م)

بغايته المعروفة

بغايته المعروفة متجه للكوفة

لمن راح مسلم صاح غايتنه للإصلاح

* * *

مسلم طلع يحمل هدف اغلى وأعز من عمره

يأدي الرساله الخالده ويشرح بيان الثوره

مؤمن بأهدافه وطلع متوجه ابهالفكره

شاهد الكوفة بها لجمع متلهفة وتنتظره

سجلت بيعتها واعتلت صرختها

بايعناك واحنه آوياك فكرتنه للإصلاح

* * *

سجلوا ميثاق وعهد يا مسلم احنه انعاهد

بهاي النفوس المؤمنة انبايعك وانته القائد

لو ردت شاهد للوفه هالعهد يصبح شاهد

نسرع لتنفيذ الأمر ونوفي كلما رايد

فكرك يدلينه وعالعدل يهدينه

بكل تأكيد انته تريد سيرتنه للإصلاح

* * *

بهاي الصفه وهذا الوضع مسلم اخذ بيعتها

ما بين ليله والفجر غيرت كل فكرتها

كل الصفات الخافية بهذا الفعل ظهرتها

والكوفة رجعت عالغدر ما بدلت عادتها

جددت ماضيها لا تعتب اعليها

چم دجال منهم گال بيعتنه للإصلاح

* * *

شيفيد إنسان الذي يعاهد ويخلف عهده

والطبعه يغدر لا تظن يگدر ضميره يرده

ابحكم التجارب كل شخص جربه ابوكت الشدة

بالشدد جرب صاحبك ينكشف كل ما عنده

هالأمثال والأقوال دفعتنه للإصلاح

* * *

من الكوفة نضرب هالمثل كل بشر هوه وطبعه

مسلم يريد الها المجد وهيه تريد اتخدعه

خالفت دين المصطفه وحرفت نهجه وشرعه

ومسلم بصوت التضحية يهتف وصوته انسمعه

صرخته المرفوعة بكل زمن مسموعة

بسم حسين ثورة دين ثورتنه للإصلاح

* * *

مندوب مثل قائدة بزود وصمود وهمه

والكوفة مهما تبتكر جور وغدر متهمة

يحمل إرادة ثابته اتوئق بصبره وعزمه

أول شهيد وبالفخر مسلم تسجل اسمه

ثابت بايمانه والعزم برهانه

بهالآثار مسلم صار قدوتنه للإصلاح

* * *

مسلم بهاي التضحية صفحة شرف راسمها

والكوفة كل جيل اليجي بهاي الأفعال ايذمها

عافت اليمنحها الفخر تبعت حكم ظالمها

من بعد هالكوفة البدت للكوفة شتقيمها

تبعت اليخدعها وانكشف واقعها

مسلم عاد كل امجاد امتنه للإصلاح

* * *

(لندن ١٩٩٣ م)

ما أقسى الليالي

اذكر السهر السهرته والزمان اللي تعبته

فارگتني وشيبتني

اذكر السهر السهرته

* * *

هذا الصفالي من العمر يالأكبر سهر الليالي اعله الرمال اتنثر

اشلون اگدر اتحمل صبر واتصبر وبعيني شفتك بالحروب اموذر

يم الجسم خليني أذكر مرار اسنيني

مو بيدي يوليدي

اذخرتك وهاليوم يومك حگي من اعتب والومك

صوبتني وشيبتني

اذكر السهر السهرته

* * *

يوليدي چالورده تنثر جسمك ماي وتبده اعله الأرض شيلمك

اجروحك عيوني ودمعي يشبه دمك اشيختلف حالك يبني عن حال امك

عيني الك مشبوحه مثل الجرح مفتوحه

اشما أسهر يا لأكبر

والده التفگد ابنها يا صبر تترجه منها

هيمتني وشيبتني

اذكر السهر السهرته

* * *

سهران جفني ومثل جرحك مفتوح ودمع النواظر مثل دمك مسفوح

يا غصن روحي ازرعتك بوسط الروح ما أدري راح الگاك بألطف مذبوح

بدمع الجفن غذيتك تالي ذبيح الگيتك

مهمومة مهظومه

من عكب عيناك تالي راح اظل من غير والي

ضيعتني وشيبتني

اذكر السهر السهرته

* * *

يبني يالأكبر چنت بعيوني هلال أرعاك واسهر لك الليل اشما طال

عديت كل النجم واضربت ارمال بس كربله ما چانت أتمر عالبال

هالفاجعه المكتوبة بحسابي ما محسوبة

ما أدري باليجري

يبني والطف ما حسبته ما عرفني ولا عرفته

مرمرتني وشيبتني

اذكر السهر السهرته

* * *

اشباح طيفك ظلت اگبالي اتحوم وأعله الجفن وجهك يا لأكبر مرسوم

كل سهر ليلي الفارگت بيه النوم وكل تعب عمري راح لسيوف الگوم

من هالدهر شترجه ما ظل گلب لا مهجه

من همي من هضمي

اصرخ ودمعي أعله خدي يبني ما ظلم والي عندي

لوعتني وشيبتني

اذكر السهر السهرته

* * *

احلام عمري بالمصيبه انعكست عگبك حياتي مثل ورده ويبست

روحي بمصابك يبني لمن حست ثياب المصايب والنوايب لبست

نار الحزن يا لأكبر بالگلب تطفه وتسعر

نيراني واحزاني

يالطفوا شمعة شبابك ألف موته ولا مصابك

دوهنتني وشيبتني

اذكر السهر السهرته

* * *

لو ترضه چنت أعصر الك أيامي وتشرب جداول عاطفة أحلامي

ما چان ترجع للمخيم ظامي ولا چان اشوفك منذبح جدامي

عطشان فاضت روحك وتسيل دم اجروحك

متخضب متصوب

ابگلبي يوليدي اچفنك واحفر عيوني وادفنك

يالعفتني شيبتني

اذكر السهر السهرته

* * *

(طهران ١٩٨٩م)

مصاب الأكبر

صوبني أمصابك يا لأكبر

* * *

آيبني وفرحة ايامي يا نسمة شوگي وأحلامي

ابياعين انظر جسمك دامي طايح عالتربان اموذر

* * *

يا زهرة اتعاب اسنيني اگعد باصرني وحاچيني

اشلون ابها لحاله اتخليني بين النار وبين العسكر

* * *

جيتك يا لأكبر للمصرع شفتك بالميدان امگطع

ناديتك بلسان المدمع يبني أعله افراگك ما أگدر

* * *

اشلون اگدر أصبر ما أدري ما ينفع بغيابك صبري

گبلك ريت اتصوب نحري ولا شوفك مگطوع المنحر

* * *

جيتك بدموعي الهماله شفتك يوليدي بهالحاله

طايح ما بين الخياله والخيل بجسمك تتعثر

* * *

جيتك واصرخ يا بعد امك يا وسفه امغسًّل من دمك

واشلون اگدر أنظر جسمك بتراب الميدان امعفرّ

* * *

عين امك يبني اشظل بيها بس الدمعات التجريها

والأم التفگد غاليها حگها اتنوح الليل وتسهر

* * *

نبلات أمصابك صابني دوهنّي افراگك دوهني

ناديتك يالغايب عني ادري اخلافك راح اتحير

* * *

آنه المفجوعه المحتارة اتحملت الضيم وأخطاره

گلبي لفگدك تسعر ناره وما تخمد هالنار التسعر

* * *

(لندن ١٩٩٣ م)

واقاسماه

هالليله عرس وشموع هالليله الشمل مجموع

باچر تتحنه امن ادماك وكل طيوفي تموت آوياك

* * *

ناديت بشوگي وآمالي يا جاسم يا روح الروح

يا غصن الربيته بگلبي اتنطر يكبر ويفوح

ويعوض اتعاب اسنيني ويضمد گلبي المجروح

تاخذني اعيونك وتردني وبموجه احلامي اتروح

يوليدي احلامي اتروح يوليدي، رسمت اطيوف

لمصابك يذبل مرعاك وكل طيوفي اتموت آوياك

* * *

سهرانه الليل ابلوعاتي وغرگانه ابموج التفكير

كلسا حسبه اتمر ابالي وكلسا فكره اعليه اتغير

اشلون الحنه تصبح ونه اشلون الشمعه دمعه تصير

حسبات مصابك توميلي وچف المحنه اعليه يشير

حسباتي، تفت الروح حسباتي، ترد وتروح

باچر آجالك تنعاك وكل طيوفي تموت آوياك

* * *

ظنيت افرح يبني ابعرسك افراحي انگلبت أحزان

وابدال اشموعك يا جاسم مرفوعه سيوف العدوان

ابدال امنصة عرسك يبني تتوسد فوگ التربان

ابدال الزفه النفرح بيها تصير الزفه اعله الميدان

آمالي، صفت اوهام آمالي، حزن وآلام

باچر انصاب ابفرگاك وكل طيوفي تموت آوياك

* * *

بيني وبينك آخر ليله وبالمصباح الموت ايحول

حافر الخيول ايزفنك ويصيرن للزفه اطبول

من بين ايدي الموت ينولك ريت الموت لروحي ينول

والأم التفگد واحدها اشتحچي اويه الدنيه وشتگول

ليش اعتب على المقسوم ليش اعتب، وآبث اللوم

يا جسام اشلون انساك وكل طيوفي تموت آوياك

* * *

ضميت الحسرة ابدلالي واحبست الدمعة بعيناي

أكثر من لوعات مصابك ما أتوقّع من دنياي

بس يبني تروح أمن أيدي وبس همومك تبگه اوياي

يا لوعه الأسحنها بروحي گلب أمك يحمل يا داي

آيبني، دليلي ذاب آيبني، مصابي أمصاب

راح افگد فرحة ملگاك وكل طيوفي تموت آوياك

* * *

(لندن ١٩ / ٥ / ١٩٩٣ م)

وا ولداه

(تجليبه جناس)

يا جسام حيلي انهدم يا جسام

* * *

بين الحسن يومك للعگل خله وشحال الخليل الينفگد خله

أخذ الگلب يمك عالترب خله مجروح الگلب والجرح ما يلتام

* * *

أصرخ والظهر بالحزن حنيته وچفك من مسيل ادماك حنيته

كل حن البگلبي اليوم حنيته وأفراح العرس بألطف صفت آلام

* * *

يا لوعة دليلي وهمي وشجاني مدري اشصاربيه اليوم وشجاني

عامل يا ذنب يوليدي وشجاني بليلة زفتك فوگ التراب اتنام

* * *

انحب والدمع فوگ الوجن منصاب وبفگدك دليلي چم سهم منصاب

يبني بدال عرسك مأتمك منصاب وصارت فرحتك لوعه يبدر التام

* * *

ابدال العرس يبني انصبت ما تملك روحي جزعت وللصبر ما تملك

يا جاسم اهلال الفرح ما تملك واشموع العرس صارت اليوم اسهام

* * *

دمعي اعليك يا جاسم يصب إنهار وركن الصبر يوليدي انهدم ونهار

احنن وانتحب وانخاك ليل انهار صوبني زماني وجارت الأيام

* * *

اگعد يبني للرميات صدعني متصدعه وهاي المحن صدعني

يالصديت طيفك ليش صدعني رجوايه انگطع وانعكست الاحلام

* * *

رميات النوايب للگلب سالت مثل دموم نحرك دمعتي سالت

روحي اعليك يبني نشدت وسالت جاسم ليش غايب والعرس ما دام

* * *

شفرات الأجل بحشاشتي ما اظن وأيام الفرح يبن الحسن ما ظن

ما ظن اگدر اتحمل صبر ما ظن همت والعگل من جور المصايب هام

* * *

مهيوبه چنت والدهر هايبني تالي انهدم حيلي ومنهو هايبني

أنت للشهاده اطلعت هايبني وآنه لليسر أطلع بدرب الشام

* * *

(لندن ١٩٩٣ م)

دمعي يجري

محد حضر يمنه من حرگوا اخيمنه

دمعي يجري اسمع ونيني

يا عباس

* * *

عباس يا من طيحتك هدمت داري والدمع جاري

وجروا گلبي وناشدت شيطفي ناري والدمع جاري

انحب وانوح لفرگتك ليلي ونهاري والدمع جاري

گوم انظر لحالي لا خيمه لا والي

ذبني دهري اسمع ونيني

يا عباس

* * *

يا با الفضل حال الدهر بينك وبيني اسمع ونيني

شفرة الگطعت يمنتك گطعت يميني اسمع ونيني

من گبل عينك بالسهم صوبوا عيني اسمع ونيني

گلبي نشف ريعه يا ضيعة الضيعه

شنهو عذري اسمع ونيني

يا عباس

* * *

عباس عگبك جارت الدنيه علينه من يدري بينه

يا بدر عمري من غبت وليه انولينه من يدري بينه

ما ظل خدرنه ولا خيمنه ولا ولينه من يدري بينه

جرح الگلب دامي شيخفف آلامي

اشيطفي جمري اسمع ونيني

يا عباس

* * *

عباس بألطف دنيتي جارت اويايه ابطيحت الرايه

وبروحتك يا با الفضل شفنه المنايه ابطيحت الرايه

يا ريت شاطي العلگمي لا يجري مايه ابطيحت الرايه

فيض الدمع هامل لا خدر لا كافل

وينه خدري اسمع ونيني

يا عباس

* * *

عباس جفني ابغيبتك تنزف اجروحه روحتك روحه

گلبي يبو فاضل الك يعتب ابنوحه روحتك روحه

كل ساعه نبله من الدهر بألطف تلوحه روحتك روحه

اشما تكثر اجروحي يكثر صبر روحي

هذا صبري اسمع ونيني

يا عباس

* * *

بدرك يعباس اختفه اببرج المصايب عن عيني غايب

ما ظل ولي اليسمع عتب المن اعاتب عن عيني غايب

راح الذي عن الگلب يجلي النوايب عن عيني غايب

ملتهبه نيراني من جمرة احزاني

ناري تسري اسمع ونيني

يا عباس

* * *

من مجره نحرك يا گمر ظل يجري دمعي تعلم ابوضعي

نيران فگدك تنطفي وتلهب ابضلعي تعلم ابوضعي

أصوات حزني لمهجتي باللوعه تنعي تعلم ابوضعي

يا فرحة اسنيني يالغبت عن عيني

هذا أمري اسمع ونيني

يا عباس

* * *

(قم المقدسة ١٩٨٩ م)

يا ولدي يا عبدالله

گالولي عبد الله انفگد ظليت اعاين عالمهد

والمهد خالي والمهد خالي

* * *

عبدالله يا زهرة دليلي المنفجع يا شمعة ايامي وبدر عمري اليشع

صبيت دمعي بالوريد المنگطع بلچن يعبدالله يرويك الدمع

من غبت عن عيني شفت سود الليالي

ليل ونهار امدوهنه وأعله المهد ظهري انحنه

والمهد خالي والمهد خالي

* * *

عبدالله من رفرف اجناح امصيبتي ناديت والدمعات تجرح وجنتي

ابفگدك يطير السعد زادت لوعتي ما أدري گطعوا رگبتك لو رگبتي

والنوح والون والنحب عگبك حلالي

دمعي يعبد الله جره وعيني أعله مهدك ساهره

والمهد خالي والمهد خالي

* * *

ساهره عيوني وأنشد نجوم السمه هم شايفه اهلال ايتخضب بالدمه

روحي أعله مهدك بالمصايب حايمه انحب عليك وخل تلوم اللآيمه

ارخص ادموعي البالجفن والدمع غالي

من شفت نحرك منگطع عالمهد صبيت الدمع

والمهد خالي والمهد خالي

* * *

يا أمل روحي الما بعد عدها امل دمعي مثل دمك يعبد الله همل

يا وسفه عودك يا بعد بيتي ذبل والگلب چم نايبه وچم لوعه حمل

والروح ظلت سارحه ابعالم خيالي

تتفايض عيوني دمه وروحي اعله مهدك حايمه

والمهد خالي والمهد خالي

* * *

يا عين اشوفك يبني محزوز النحر مهمومه مظلومه وفجع گلبي الدهر

عيون أمك انمهرت ابنبلات السهر وأعله المهد انحب وأشبح بالنظر

راحن يوسفه ابروحتك عزي ودلالي

با صرني يهلال السعد واشلون اهز مهدك بعد

والمهد خالي والمهد خالي

* * *

عني رحت واتركت ورحي اموجله خليتني آنه وزماني وكربله

يا ريت صابت نحري نبلة حرمله ولا شوف يبني دموم نحرك سايله

يوليدي نبلة حرمله غيرّت حالي

مذهوله ما خذني الحزن واعله المهد أنحب وون

والمهد خالي والمهد خالي

* * *

لمن فصل نحرك يعبدالله السهم أهجس وگع بيتي وعلى راسي انهدم

ناديتك بصوت النوايب والألم يا ريت گبلك عمري بألطف انختم

ساعة الطفّوا شمعتك تدري اشجرالي

لمن شفت دمك يصب عالمهد ذبيت الگلب

والمهد خالي والمهد خالي

* * *

منصوب مهدك بين ضلعي والگلب لو تحيا چان ارضعتك بدمعي اليصب

والدمعه لمن تنشف أعصرها غصب ما شافت أعيوني مثل هذا الخطب

بس المناحه والحزن والهم صفالي

هاك ارتوي بدمعي اليهل ما أنسه يومك يا لطفل

والمهد خالي والمهد خالي

* * *

(أصفهان ١٩٨٧ م)

عهد الوفاء

بعدنه عالعهد لسّا بعدنه وفينه واحنه غير الوفه اشعدنه

يزينب يا غريبه يزينب يا غريبه

* * *

بني غالب لفوا عند الصواوين صاحوا صوت وين أم الخدر وين

يزينب أمري لأمرچ مطيعين وصية حيدر ابخدرچ وبالدين

علي وصانه واكتبنه وعدنه

نعاهد وأبد ما نخلف عهدنه

يزينب يا غريبة يزينب يا غريبه

* * *

وحگ عينج يزينب نكشف اهموم أبد لا ترهبچ لو كثرة الگوم

أفلاك الحرب لو دارت اليوم نحجِّل خيل أميه بفيض الدموم

نصد كلمن وگف ضدنه وجحدنه

أميه بالحرايب ما تردنه

يزينب يا غريبه يزينب يا غريبه

* * *

الحرايب من تدور أويه المنيه بحر من دم تصير الغاضريه

على حدود الشرف نصبح ضحيه ونقدم للخدر دمنه هديه

چم يوسف تسيل أدمومه عدنه

حزنچ حزن يعگوب ابفگدنه

يزينب يا غريبه يزينب يا غريبه

* * *

يزينب احنه للميدان عينه ومثل دور الجفن داروا علينه

واحدنه عصة موسى ابينه وفرعون وجنوده امطوگينه

فرعون العصر يعرف گصدنه

من عالم الذراحنه انرصدنه

يزينب يا غريبه يزينب يا غريبه

* * *

يزينب لو سمه الميدان غيًّم يصب من الأعادي مطر من دم

اشحدّه اليوصل احدود المخيم تضحي وبس خدر هالعيله يسلم

خيم محفوظة بيها أعيال جدنه

لحماية هالخيم نبذل جهدنه

يزينب يا غريبه يزينب يا غريبه

* * *

بربيع المعركه وروض الشهادة اخوتچ ما كثه ابحجر السعادة

راعي الشيم ما يگصر جهاده يضحي اشما ملك لجل اعتقاده

نضحي وبالهمم نحفظ مجدنه

واحنه لساحة الطف انوجدنه

يزينب يا غريبه يزينب يا غريبه

* * *

يزينب نشتري الدين بدمانه على تاج الشرف يرفل لوانه

دين المصطفه نكسب ضمانه والينطي المناحر ما سوانه

نفوز وندخل لجنة خلدنه

يمواقفنه وشهادتنه انفردنه

يزينب يا غريبه يزينب يا غريبه

* * *

(بغداد ١٩٧٦ م)