شبكة الإمامين الحسنين عليهما السلام الثقافية

والله لا ننساه

والينه فارگناه فوگ الترب عفناه

والله ما ننساه

* * *

آنه السجاد وجيت احسب چم لوعه بگلبي وچم داي

رديت وروس أهل الشيمة ردت لرض الطف وياي

اتعنيت ابخدّر مفجوعه تسكت ذيچ وتنحب هاي

رديت بأحزان وعبره

مو عالگاع امشي أعله الجمرة

أنشد عن حسين وگبره

من رحنه خليناه وأرجعنه ملگيناه

والله ما ننساه

* * *

ما نشفت دمعتنه وتجري من يوم العفنا لليوم

أطفال حسين بها لحاله واحد يم الثاني أيحوم

مفجوع ايصبر مفجعوعه ومهمومه اتسكت مهموم

ردنه التوديع ومنعونه

عالنوگ الهزّل يسرونه

للكوفة بها لحال اخذونه

درب اللذي امشيناه هم وهظم شفناه

والله ما ننساه

* * *

للكوه اوصلنه وطبينه بأحزان وهم وآلام

لمجلس ابن زياد ادخلنه برضعان وعيله وأيتام

چم شامت متشمت بينه واحملنه من الكوفة اسهام

أمر ابن زياد اعلينه

لبلاد الشام ايمشينه

محد يدري ويعلم بينه

والحادي هذا اوياه ما يرحم ابممشاه

والله ما ننساه

* * *

والأعظم من هذا الموقف والأبشع من هذا الحال

وگعت من المحمل طفله عفناها وسار الجمال

لن رأس الوالد يتناها يثگل رمحه وما ينشال

نمشي ورأس حسين اوبانه

يراقب وگفتنه وممشانه

من نتعب يثگل يتنانه

رأس الولي بمسراه الظعن الحرم يبراه

والله ما ننساه

* * *

للشام اوصلنه وشفناها بنشوة فرحه وزهوة عيد

واحنه بأغلال امگيدينه ومتواصل من ايد لأيد

أخلصنه من ابن زياد وگومه النوب انگابل وجه يزيد

شفنه يزيد بهاي الحاله

ظالم يتغطرس بأفعاله

واضح رأس حسين اگباله

وشال العصه بيمناه وظل يضرب ثناياه

والله ما ننساه

* * *

تغر الچان أيشمه الهادي بهاي الوضعيه اينكثوه

راس اليحمل تاج العصمة ابطشت الأرجاس ايخلوه

اخذوا للشام وللكوفة ويانه وللطف ردوه

هذا الصار وأجره اعلينه

فوگ الاكوار اميسرينه

واليوم ارجعنه وردينه

لوالي الحرم جيناه ما ينحمل فرگاه

والله ما ننساه

* * *

چانت هاي العيله اتحّسب ترجع وتشوف الوليان

حگها وما تدري ابولياها سكنت ما بين التربان

طاحن عالگبور وصاحن اوياكم جينه من الأوطان

صاحن وياكم جبتونه

گوموا ابشيمتكم ردونه

جبتونه وتالي أتعيفونه

آه لفگدكم آه عمر الذي عشناه

والله ما ننساه

* * *

(دمشق ١٩٩٠ م)

يا نازلين بكربلا...

جينه ننشد عن أهلنه مادروا للطف وصلنه

اليوم اجينه وما نسينه

جينه ننشد عن أهلنه

* * *

يا نازلين ابكربله دلونه

عن الأهل نخبركم وخبرونه

ناس الذي فوگ الهزل يسرونه

جابونه للطف مثل ما ودونه

ابدمع ومصاب اطلعنه بنوح ونحيب أرجعنه

ابلوعتنه بدمعتنه

نصرخ ومحد سمعنه ولا دروا للطف رجعنه

واعتنينه وما نسينه

جينه ننشد عن أهلنه

* * *

يا نازلين بكربله جينه اليوم

ننشدكم بنوح ومدامع وهموم

عدكم خبر فوگ الترب عفنه اجسوم

دلونه وين اندفن جسم المظلوم

ما چنه بألطف يمه يوم اللي دفنوا جسمه

دلونه وخبرونه

وين اخونه ووينه گبره أنشد وبعيوني عبره

عن ولينه وما نسينه

جينه ننشد عن أهلنه

* * *

يا نازلين ابكربله اتعنينه

نسأل عن العباس گبره وينه

عدكم خبر عن رايته وچفينه

منهو الذي جر السهم من عينه

اسمعنه أعله المسنايه ظلت چفوف ورايه

عفناها بدماها

رحنه واخذونه سبيه اشننسه من افعال اميه

اميسرينه وما نسينه

جينه ننشد عن أهلنه

* * *

يا نازلين بكربله شنهو الصار

عن حال الأكبر ما لفتكم أخبار

منهو الدفن جثه شبيه المختار

وبياكتر غيبوا ذيچ الأنوار

عفنا خضيب ابدمه ورحنه ابيسر من يمه

فجعونه ولوعونه

جينه ننشد على الأكبر من دفن جسمه التوذر

اموذرينه وما نسينه

جينه ننشد عن أهلنه

* * *

يا نازلين بكربله نصيح ابنوح

اشعدكم خبر عن الشباب المذبوح

ابثوب العرس عفناه بألطف مطروح

واتحنه من دم الوريد المسفوح

نصرخ ابمدمع ساجم اشعدكم خبر عن جاسم

عن جسمه وعن دمه

بالحرب گطعوا وريده وبالدموم اتحنت ايده

ايعز علينه وما نسينه

جينه ننشد عن أهلنه

* * *

يا نازلين ابكربله نصيح النوب

دلونه عن گبر الرضيع بيا صوب

ما شفنه من گبله رضيع ومصيوب

ذبحوه ظامي ونحره بالدم مخضوب

من شفنه مهده الخالي بألطف رخصنه الغالي

دلاله ابيا حاله

بالعطش ذايب دليله وما طفت جمرة غليله

املوعينه وما نسينه

جينه ننشد عن أهلنه

* * *

يا نازلين بكربله بهذا الحين

جابونه من درب اليسر مفجوعين

عگب الأهل ما ندري نتوجه وين

ويانه رجعت روس اهلنه الطيبين

راح الولي من عدنه للوطن منهو ايردنه

ابجمرتنه وحيرتنه

هالأرامل بالظعينه من يردهن للمدينه

امفارگينه وما نسينه

جينه ننشد عن أهلنه

* * *

(دمشق ١٩٩٠ م)

قم وسلها

گوم اسألها گوم اسألها زينب رجعت گوم اسألها

لمن عافتكم يحسين ويه اعيالك راحت وين

گوم اسألها گوم اسألها زينب رجعت گوم اسألها

* * *

هاي اختك رجعت بظعونك جابت وياها الايتام

گوم اسألها وخل تشرحلك كلما شافت من آلام

شوف الدنيه اشعملت بيها واشعملت بيها الأيام

تنتقل كل يوم ابمجلس بين الكوفة وبين الشام

من أولها، من أولها خل تشرحلك من أولها

عگبك شافت چم امصاب لو رايد من عدها اجواب

گوم اسألها گوم اسألها زينب رجعت گوم اسألها

* * *

خل تشرحلك كلما شافت من يوم مصابك لليوم

أول حاله المرّت بيها شافت عالتربان اجسوم

وگفت فوگ التل وصاحت يحسين ادركنه من الگوم

ما سمعت منك كل چلمه وأيست منك يا مظلوم

نتمثلها، نتمثلها حاله زينب نتمثلها

بين النار وبين الخيل اشلون اتحملت ذاك الليل

گوم اسألها گوم اسألها زينب رجعت گوم اسألها

* * *

سهرانه الليل وما نامت واتراقب حال الأطفال

بس ما راح الليل الموحش لن تنظر وجه الجمّال

يا مظلوم وهذا الموقف ما چان ايمر أعله البال

منهوا يصدگ اختك زينب تطلع مسبيه بهالحال

ما نقبلها، ما نقبلها صعبه الحالة وما نقبلها

بغياب الاخوه الاكرام ويا من راحت للشام

گوم اسألها گوم اسألها زينب رجعت گوم اسألها

* * *

دخلت للطف بين اخوتها طلعت ما بين العدوان

تريد اتودعك ما خلوها عافت جسمك عالتربان

والحادي اتوجه للكوفة ابخدّر وأطفال ورضعان

مسبيه ابجور الحدّايه وگطعت كل ذيچ الوديان

طلعت الها، طلعت الها أهل الكوفة طلعت الها

بين الشامت والغدار من وصلت للكوفة اشصار

گوم اسألها گوم اسألها زينب رجعت گوم اسألها

* * *

أول ما طبت للكوفة وگفوها گبال ابن زياد

ظالم مغرور ابطغيانه وهذا الظالم تدري اشراد

رايد يگطع نسل العتره ويحوم لچتل السجاد

صارت ضجه بذاك المجلس ومصابك يحسين انعاد

يتأملها، يتأملها صد لعيالك يتأملها

ولسانه أعله الخدّر طال وزينب سمعت كلما گال

گوم اسألها گوم اسألها زينب رجعت گوم اسألها

* * *

طلعت من اديار الكوفة اشلون اوصف حالتها اشلون

للشام اتوجه حاديها وعدوانك صاروا يحدون

من توگع طفله من المحمل ايعيفون الطفله ويمشون

والگطعوا رگبة عبد الله اشلون ابهالطفله ايرحمون

من محملها، من محملها طفله التوگع من محملها

تركض زينب الها ابساع چم طفله الطاحت عالگاع

گوم اسألها گوم اسألها زينب رجعت گوم اسألها

* * *

وصلت للشام واطفالك تنتقل من ايد لأيد

فوگ الآلام الشافتها اختك شافت وجه يزيد

واليوم اتعنت بظعونك گوم اسأل زينب شتريد

هاي المسبيه المظلومه رجعتلك من درب ابعيد

تستقبلها، تستقبلها زينب ظنت تستقبلها

طالت غيبتها اويه الگوم شنهو الأخرها لها ليوم

گوم اسألها گوم اسألها زينب رجعت گوم اسألها

* * *

(لندن ١٩٩٣ م)

البنين الأربعه

أصرخ بصوت الفاجعه عگب البنين الأربعة

حيلي انهدم حيلي انهدم

* * *

اولادي راحوا بالظعن والگلب راح اوياهم

ما ادري لا وين الدهر هالأربعه وداهم

شاخصه عيوني أعله الدرب اتنطر وأتناهم

والدار ظلت مظلمه ومستاحشه ابلياهم

يا خبر راح اتوقعه عگب البنين الأربعه

حيلي انهدم حيلي انهدم

* * *

اسكنت الصحاري والموحشه كلسا أهيم ابوادي

أعثر واگوم ابلوعتي وروحي الحزينه تنادي

لو شفت حادي من البعد اركض واحاچي الحادي

يالحادي ما عندك خبر ما شفت ظعن اولادي

انه الحزينه الضايعه عگب البنين الأربعه

حيلي انهدم حيلي انهدم

* * *

أحسب ليالي وأنتظر والدهر غير حالي

لا خبر من عدهم لفه ولا طارش اتعنالي

كل ساعه لن حسبه تجي وحسبه تروح اببالي

ما ادري شنهو اللي جره ولا أدري شنهو التالي

متحيره ومتلوعه عگب البنين الأربعه

حيلي انهدم حيلي انهدم

* * *

عافوني بديار الحزن اجري الدمع واتحسر

عالدرب عيني شابحه ومنهم خبر اتنطّر

چم دوب اظل أحمل صبر وأعله الصبر ما أگدر

لو چان حالي بالصخر چان الصخر يتفطّر

للصخر حالي ايصدعه عگب البنين الأربعه

حيلي انهدم حيلي انهدم

* * *

فرگتهم اتشيب الطفل ما تنحمل فرگتهم

افرش عيوني أعله الأرض لو أسمع ابجيتهم

أنذر نذر لو عودوا وعيوني لو شافتهم

أزرع طريق الطف ورد واستبشر ابرجعتهم

ضاگت ابعيني الواسعة عگب البنين الأربعه

حيلي انهدم حيلي انهدم

* * *

اكشف مصادر لوعتي خل تجي الناس وتسمع

اولادي أغلى من العمر بيهم دليلي امولع

ناديت لمن شاهدت گلبي الحزين اتصدع

ما يهم لو راحوا چتل وحسين سالم يرجع

هالصوت منهو اليسمعه عگب البنين الأربعه

حيلي انهدم حيلي انهدم

* * *

(لندن ١٩٩٣ م)

الحسن المجتبى (عليه السلام)

بالأمه اشراح ايصير جاوبنه عن تفكير

يا من تراقب شوف العواقب

* * *

هاي المواقف أبد ما ننساها

أدوار من عهد الحسن عشناها

عن فكر واعي الحاله تابعناها

أمة الهادي بهالوضع شفناها

اليبذل عمره اتخالف أمره وتجهل قدره وتالي اتغدره

عن حكمه وعن تدبير نكشف وين التقصير

يا من تراقب شوف العواقب

* * *

للحسن گالوا ننطي عهد البيعه

سبط النبي واجب علينه انطيعه

انعاهد وبالدم هالعهد توقيعه

بالشدد هيهات الضمير انبيعه

بمبدأ واحد احنه انعاهد ويه القائد نمضي انجاهد

صاحوا يالقائد سير واحنه اجنود التحرير

يا من تراقب شوف العواقب

* * *

بهالصوت صاحوا يالحسن بايعناك

امضي ابطريقك واحنه نتبع مسراك

مايهم والي الشام لو يتحداك

للحرب اطلع يالحسن واحنه اوياك

كلنه انقاتل ضد الباطل خصمك فاشل واخذ الحاصل

ما بين الشر والخير شتفسر يا تفسير

يا من تراقب شوف العواقب

* * *

من شافوا الجيش ابحروبه اتوزع

خانوا وصاحوا للحرب ما نطلع

يالحسن عن هاي المعارك ارجع

صالحهم وغير الصلح ما ينفع

أهل الرده خانوا عهده وگفواضده وعافو وحده

هذا المجمع شرير ما ينفع كل تبرير

يا من تراقب شوف العواقب

* * *

ناس الذي چانوا گبل يوم احرار

سحگوا ضما يرهم وقبلوا بالعار

ابحكم الجهل عافوا سليل المختار

سلموا أمرهم بيد مجرم غدار

ابحكم الواقع خل انتابع ليش انخادع شنهو الدافع

عالواقع احنه انشير ما نقبل كل تحوير

يا من تراقب شوف العواقب

* * *

هاي الخيانه ما كفت للأمه

اتعمدت تغدر بالحسن واتسمه

وابدال ما تحسب ضريبة دمه

هالنوب طلعت للنعش منتقمه

الخلت جعده، اتگطع چبده، منعت لحده، ايجاور جده

بسهام الجور اتغير رادت للفتنه اتثير

يا من تراقب شوف العواقب

* * *

للحسن بالسم من عگب ما غدروه

هالگوم يا مكسب ومطلب رادوه

ليش النعش بسهام صاروا يرموه

ويم گبر جده يندفن ما خلوه

ضاع الجوهر، بين المنكر، هذا المظهر، ما يتغير؟

لابد يحصل تغيير مهما طال التأخير

يا من تراقب شوف العواقب

* * *

(لندن ١٩٩٣ م)

هذا مغزاها

هالحقايق واضحه هذا مغزاها

حسين فجر ثورته لجل دينه وامته

هالحقايق واضحه هذا مغزاها

* * *

ثوره للاصلاح حسين أعلنها

وصفحة التاريخ بسمه دونها

وانت يالناقد شسمعت عنها

بالنقد شتگول شفهمت منها

ثوره وانكشفت الك كل خفاياها

لا تغالط نظرتك لا تخادع فكرتك

هالحقايق واضحه هذا مغزاها

* * *

أنت تسألنه بالسؤال اتگول

حسين لمن ثار شنهو راد اينول

ليش ما بايع الحاكم المسؤول

انجاوبك احنه بالحچي المعقول

سلطه تحكم بالظلم حسين يأباها

يريد عزة هالبشر كل أمر مخفي ظهر

هالحقايق واضحه هذا مغزاها

* * *

واضح الموقف يالتريد اجواب

ادرس الحاله تعرف الأسباب

حسين شاف ايزيد للشرع ميهاب

طلع من مكه بأهله والأصحاب

بنهضته يريد العدل مانكرناها

حسين للنهضه اندفع مولجل غايه وطمع

هالحقايق واضحه هذا مغزاها

* * *

يزيد لمن زاد عالبشر ظلمه

خطط المظلوم ابفكرته وعلمه

راد عن الناس يدفع النقمه

شاف بس الدم ينقذ الأمة

فكرة منحتنه الوعي من درسناها

عرفنه يملك يا هدف موقف حسين انكشف

هالحقايق واضحه هذا مغزاها

* * *

عن فكر واعي انتابع المسره

نستمر ونشوف ناتج الثوره

حسين للأجيال غرس يا بذره

يا جوانب حاز من عرض نحره

بذرة الحگ والعدل دمه غذاها

اتروًّت ابدم النحر صار للأمة الثمر

هالحقايق واضحه هذا مغزاها

* * *

حسين من قدم جسمه للأشفار

أمة الهادي نالت الأثمار

ابنهضته الحره نوّر الأفكار

ابدمه تتوهج شعلة الثوار

هاذي ثوره وبالفكر عشنه وياها

للأمم صارت درس بيها تهذيب النفس

هالحقايق واضحه هذا مغزاها

* * *

(لندن ١٦ / ٥/ ١٩٩٣ م)

يا شفيعنا

عالعهد يا مظلوم نمشي اعله دربك ما ننسه حبك

يا شفيع الناس بيك اقتدينه عاهدناك ماننساك

* * *

من نشأة التكوين بيك اعترفنه حبك شرفنه

بالنفس بالأرواح بالدم هتفنه حبك شرفنه

بسمك الاه الكون تمم وصفنه حبك شرفنه

يا منار الدين ليك اهتدينه عاهدناك ما ننساك

* * *

من عالم الأرواح ثابت عهدنه بيك اعتقدنه

لو ناشدونه الناس عن معتقدنه بيك اعتقدنه

وبصفحة الأعمال حبك سندنه بيك اعتقدنه

يا وجود الكون ليك انتمينه عاهدناك ما ننساك

* * *

بصوت العدل يحسين تسمع ندانه حبك اويانه

من عالم الأصلاب واضح ولانه حبك اويانه

وگبل الرضاعة چان يمشي ابدمانه حبك اويانه

من الأزل وياك عشنه وربينه عاهدناك ما ننساك

* * *

بسمك لهجنه وصار حبك أملنه بيك أتصلنه

وبمأتمك كل عام نجمع شملنه بيك أتصلنه

ما ننحرف يحسين صادق عملنه بيك أتصلنه

يا فخرنه آوياك سرنه ومشينه عاهدناك ما ننساك

* * *

كلمن يذب خطوات عنك بعيده محد يفيده

والثعلب اشما راد يحفر مكيدة محد يفيده

واللي ترك مسراك ساقط رصيده محد يفيده

يا عمود الدين عالعهد جينه عاهدناك ما ننساك

* * *

صح المثل يحسين كلمن وذاته تعرف صفاته

طيب الأصل معروف من مكرماته تعرف صفاته

والخالفك خسران دينه وحياته تعرف صفاته

يا عظيم الشان يمك هوينه عاهدناك ما ننساك

* * *

يالوضحت للناس معنى السعادة بزود وإراده

صافحت يا مظلوم چف الشهاده بزود وإراده

يالثبتت للدين نهجه ورشاده بزود وإراده

والمهج يحسين لجلك حزينه عاهدناك ما ننساك

* * *

حزنك ثبت بحشاي وبدمعي يظهر بالگلب أثّر

فاض بحزن ينبوع جفني وتفجر بالگلب أثّر

مشعل سنا الآهات هاج وتوجر بالگلب أثّر

مصابك المحتوم يصعب علينه عاهدناك ما ننساك

* * *

(طهران ١٩٨٩ م)

جهاد الأنصار

يحسين وياك انجاهد يحسين والموقف واحد

للعالم نكشف غايتنه هيهات انغير فكرتنه

يحسين والموقف واحد

* * *

انصارك احنه وصممنه وياك انجاهد يحسين

نتأمل ميعاد الثورة وننتظر من كبل اسنين

هالموعد حانت ساعاته وصار الموقف بين اثنين

بين النار وبين الجنة بين الدنيه وبين الدين

منريد هالدنيه ابذله منريد عنك نتخلّه

من اجلك نترك دنيتنه هيهات انغير فكرتنه

يحسين والموقف واحد

* * *

بتكوين الإنسان المؤمن تتكون أربع أركان

لو ردنه انعددهن ذمه واحساس وذات ووجدان

والما يملكهن ما نگدر يحسين انسميه إنسان

بهذا المبدأ جينه ونشرح للوادم معنى الإيمان

للناس فكره انوضحها للناس بالدم نشرحها

بس الدم يضمن عزتنه هيهات انغير فكرتنه

يحسين والموقف واحد

* * *

عزتنه انشيدها ابدمنه ومنعيش ابظل الطاغوت

انقدم للدين اشما نملك يحسين ومنهاب الموت

هالفرصه اشلون انضيعها فرصتنه وهيهات اتفوت

بالمنحر نرفع صرختنه وصوت المنحر أوضح صوت

صرخات تتحده الظالم صرخات وتصحي الوادم

بالدم انترجم صرختنه هيهات انغير فكرتنه

يحسين والموقف واحد

* * *

يحسين أنصارك تدرينه جينه ابلهفه وبايعناك

واتركنه الدنيه وما بيها لجلك وامشينه ابمسراك

أتعنينه وغيرك ما عدنه انعيش اوياك انموت اوياك

انقدم أرواح ومنبالي ولا ترهبنه اجيوش أعداك

هاليوم نرخصلك دمنه هاليوم خصمك ميهمنه

گبلك خل ندخل حومتنه هيهات انغير فكرتنه

يحسين والموقف واحد

* * *

آلاف العسكر مجموعه تريد اتصب اعليك الجور

بيا قانون انعوفك وحدك ابيا اعراف ابيا دستور

گبلك نتقدم بالحومه وانقدم يحسين انحور

يا قلعة امتنه الحره احنه ابحدك نصبح سور

وياك آمننه ابحبك وياك ما نترك دربك

يا راسم منهج ثورتنه هيهات انغير فكرتنه

يحسين والموقف واحد

* * *

هذا اليوم وهاي الساعة وهاي اللحظة وهذا الحال

گبل اسنين انفكر بيهن وانعقدت بيهن آمال

لاحت آفاق الحرية التضمن تحرير الأجيال

والعزة اللي نحلم بيها اتكلفنه انخوض الأهوال

منعوف مبدأنه الخالد منعوف نهجك يالقائد

بحدودك نرفع رايتنه هيهات انغير فكرتنه

يحسين والموقف واحد

* * *

يحسين أرواح انضحيها أرواح وعالموت اتحوم

والحال اللي أثر بينه انفكر بمرك يا مظلوم

لو رحنه اتظل ابلا ناصر من تستفرد بيك الگوم

ريت الأرواح اتعود النه وهم انضحي وننطي ادموم

واشلون من اتظل وحدك واشلون لا ناصر عندك

رغم الحاله اللي فجعتنه هيهات انغير فكرتنه

يحسين والموقف واحد

* * *

نتصور من اتظل وحدك واتحيطك خيل وفرسان

تهتف هل من ناصر ينصر هالصرخه اتهز الأكوان

احنه وبالمصرع نسمعها وعالگاع اتموج الأبدان

نتأسف ما نگدر ننهض لو حاطت بيك العدوان

شيفيد من نسمع صوتك شيفيد ما ندفع موتك

لو نحيا انجدد صولتنه هيهات انغير فكرتنه

يحسين والموقف واحد

* * *

(لندن ١٩ /٥/١٩٩٣ م)

واولداه واعليّاه

مصرعك خيبني والدهر شيبني

آيبني آيبني

* * *

يبني يالأكبر من ردت للحرب تمضي وتطلع

ودعتك وصوتي انخمد ما يحچي غير المدمع

شلت ايدي للباري وصحت يا ربي گلبي اتصدع

يا رب مثل يوسف ردت ضنوتي الأكبر يرجع

الباري حقق ظني فگدك يالمني

آيبني آيبني

* * *

بارينه حقق دعوتي وارجعت من ميدانك

شفتك بآمال النصر متوجه لصيوانك

نار الحرب نار الحزن ما غيرّن ألوانك

لا چن شفت جمر العطش يتناثر امن السانك

هالجمر يلهبني عالبعد ذوبني

آيبني آيبني

* * *

آخر وداع اتوادعت ويايه واشتد همي

للحرب يبني من رحت هدمت حيلي وعزمي

مرة يصور لي الأمل ترجع واشوفك يمي

ومره يصورلي الحزن جسمك صريع ومرمي

هالأمل عذبني والحزن صوبني

آيبني آيبني

* * *

أنت ابغمار المعركة تتبارز اويه العسكر

وآنه حزينه ابخيمتي منك خبر اتنطر

ما شفت لن فزعة زلم واسمعت صوت الخدر

صاحن يليله اشها لخبر بالحومة طاح الأكبر

هالخبر دوهني والهظم صدعني

آيبني آيبني

* * *

يوليدي من صوب الحرب للخيم شالوا جسمك

اتعنيتك ابكسره گلب اجري المدامع يمك

يم جسمك أحنيت الضلع وامزجت دمعي ودمك

ناديتك بصوت الهظم أمك تراني أمك

منظرك يفجعني ابغربتي تضيعني

آيبني آيبني

* * *

يبني يا لأكبر من شفت جسمك صريع اگبالي

روحي افرشتها لجثتك وغطيتك ابدلالي

ناديتك ابچلمة حزن منهو اليأمن حالي

منهو اليصبر الوالده التفگد ولدها الغالي

هالنحب أتعبني والصبر حاربني

آيبني آيبني

* * *

بضيعتك يبني ضيعت كل سهر ليلي وتعبي

ريتك يسباح الچبد تسمع ونيني وعتبي

يا نظر عيني المنفگد بيمن اوچد دربي

يوليدي وصفولي الصبر واشلون يصبر گلبي

يا شهم جاوبني بالطفوف اتذبني

آيبني آيبني

* * *

(لندن ١٩٩٢ م)

ولدي علي

يومك هاليوم، يا لأكبر لتهاب الگوم، يا لأكبر

تنتظرك ساحة ميدانك من دمك سجل عنوانك

* * *

يا طموح الروح والدك وانخاك

هاك اخذ گلبي للحرب وياك

خل يصد اسهام كل مرامي اعداك

دينك ايريدك ما تعز ادماك

اسرع للموت، يا لأكبر واسمع هالصوت، يا لأكبر

لتهمك كثرة عدوانك من دمك سجل عنوانك

* * *

للمنايه عيون شاخصه يمك

هالقلم سيفك والحبر دمك

يبني روح اكتب صفحه من عزمك

خل يظل خالد بالدهر اسمك

دمك لو سال، يا لأكبر أصبر عالحال، يا لأكبر

بالمدمع أخمد نيرانك من دمك سجل عنوانك

* * *

بالحرب گبلك ضحت الأنصار

النوبه يبني اعليك صارت الأدوار

يا من ابخلقك تشبه المختار

وهمتك همة والدي الكرار

ابوصف الأجداد، يا لأكبر عزمك يزداد، يا لأكبر

مكتوبه ابصفحة وجدانك من دمك سجل عنوانك

* * *

عيني لو شافت منحرك مگطوع

تحبس الدمعه وما تهل ادموع

والنصر أعظم من گلب مفجوع

ابعينك وعيني هالأمل مطبوع

أنت الموصوف، يا لأكبر ما تعرف خوف، يا لأكبر

من عزمك فجر بركانك من دمك سجل عنوانك

* * *

موقفك يبني ايتوج الأيام

أشرح بدمك منهج الأحكام

يبني خليني آنه والآلام

عگبك اتحمل اشما تجيني اسهام

روحي اتناديك، يا لأكبر گلبي ايحاچيك، يا لأكبر

من عزمك شيد بنيانك من دمك سجل عنوانك

* * *

يبني هاي الگوم كلها تنتظرك

والگصد واضح رايده اتغدرك

بالمعاره اسيوف تنتظر نحرك

للهدف للدين لا تعز عمرك

للمصرع روح، يا لأكبر روح انطي الروح، يا لأكبر

صنديد وثابت ايمانك من دمك سجل عنوانك

* * *

بگلب ينضح زود ودع الوالد

اتوجه أعله الموت للحرب وافد

وگف ثابت جاش بالعزم صامد

وتعرف الأجيال يا هدف رايد

كل جيل ايگول، يا لأكبر أنت المأمول يا لأكبر

بس المنحر يرفع شانك من دمك سجل عنوانك

* * *

ابمقتبل عمره للحرب داخل

واقعي وماراد ايساوم الباطل

من اجل غايه سامية ايناظل

ويثبات الروح للوغه ايواصل

صوت الحگ صاح، يالأكبر نهضة اصلاح، يا لأكبر

بالصارم قدم برهانك من دمك سجل عنوانك

* * *

ابطابع الإخلاص قدم اوريده

من المعاره اتشير عالمجد ايده

گبل أبوه حسين مصرع ايريده

وهات الآجال هذا ترديده

نحرك مذبوح، يا لأكبر دمك مسفوح، يا لأكبر

لا زال اموسد تربانك من دمك سجل عنوانك

* * *

وارتفع هالصوت من الحرب صاخب

صاح انجدني يا فرع غالب

اتوجه المظلوم چالأسد غاضب

شاف دمه يسيل والجسم شاحب

ابحزني اتعنيت، يا لأكبر للمصرع جيت، يا لأكبر

صاح لساني گبل السانك من دمك سجل عنوانك

* * *

لصوب المخيم صاح أبو اليمه

يا بني العيله سارعوا ابهمه

هذا الأكبر طاح عالترب جسمه

للخيم شيلوه تنتظر امه

اتعنت عدنان، يا لأكبر اتشيل الجثمان، يا لأكبر

يالشيعوا بالطف جثمانك من دمك سجل عنوانك

* * *

يالفديت الروح وابذلت جهدك

يبني عالدنيه العفه من بعدك

يا من اتعفر بالترب خدك

الليله ينتظرك بالخلد جدك

جدنه المختار، يا لأكبر شابح أنظار، يا لأكبر

اگصدله بصفحة احزانك من دمك سجل عنوانك

* * *

يالرحت ظامي بمهجتك حسره

برشفة الكوثر تخمد الجمره

فرحة استقبال للنبي تغمره

يالخلد ترعاك امك الزهره

للزهره آوياك، يا لأكبر صوغه من ادماك، يا لأكبر

وخل حيدر يشكر سعوانك من دمك سجل عنوانك

* * *

(لندن ١٩٩٢ م)