کربلا میں شب تاسوعا کی روایت؛ عاشورہ سے پہلے امام حسین (ع) کے ساتھیوں کی آخری تیاریاں
ترجمہ: یوسف حسین عاقلی
ماخذ: تبیان

محرم کی نویں شب، عاشورہ کے موقع پر، کربلا کا منظر روحانی تیاری اور شہادت کے حتمی فیصلے کے عروج پر پہنچ گیا۔
 جنگ کے حکم کے حتمی ہونے اور امام حسین (ع) کے ساتھیوں کی طرف سے امان کی پیشکش کو مسترد کرنے کے بعد، یہ رات عبادت، وفاداری اور امام کے ساتھ شعوری انتخاب کو مستحکم کرنے کا موقع بن گئی؛
 ایک ایسی رات جس میں خیمہ گاہ میں، مناجات اور قرآن سے لے کر ساتھیوں کے عہد و پیمان تک، ہر چیز عاشورہ کے خونین دن کی تیاری کا رنگ لیے ہوئے تھی۔
شب تاسوعا یعنی محرم کی نویں تاریخ اور عاشورہ سے ایک دن پہلے۔ نویں تاریخ کو شمر کی آمد سے لے کر دسویں تاریخ تک ایسے واقعات پیش آئے جنہیں ہم شہادت کے لیے نفسیاتی تیاری کہہ سکتے ہیں۔ اس مضمون میں ہم شب تاسوعا اور شب عاشورہ کے پانچ واقعات کو یاد دلاتے ہیں تاکہ شہادت کی تیاری میں تاسوعا کے کردار کو واضح کیا جائے۔
کربلا میں نویں محرم تک جنگ کی کوئی خبر نہیں تھی۔ دشمن کی فوجیں امام  حسین (علیہ السلام) کو کوفہ جانے سے روک رہی تھیں اور اصرار کر رہی تھیں کہ وہ یزید کی بیعت کریں اور امام عالی(علیہ السلام) نے اسے قبول نہیں کیا۔ نویں تاریخ – یعنی تاسوعا – کو شمر کربلا پہنچا اور ابن زیاد کا خط عمر بن سعد کو دیا جو جنگ کا حکم تھا۔ ابتداء میں ابن سعد اس کام میں دلچسپی نہیں رکھتا تھا لیکن وہ پیچھے ہٹنے پر تیار نہیں ہوا۔ وہ اس جنگ پر راضی ہو گیا اور خود کو ہمیشہ کے لیے بدبخت کر لیا۔

آپ چاروں امان میں ہیں

شمر نے جب دیکھا کہ ابن سعد جنگ کے لیے تیار ہے تو وہ امام حسین علیہ السلام کے لشکر کے قریب گیا اور ام البنین علیہا السلام کے بیٹوں کو پکارا جن کی والدہ اس کے قبیلے سے تھیں اور کہا: تم امان میں ہو، اپنے بھائی حسین کے ساتھ جنگ نہ کرو اور اس سے الگ ہو جاؤ۔
انہوں نے انکار کر دیا اور اسے دندان شکن جواب دیا اور شمر غصے کی حالت میں اپنے لشکر گاہ واپس چلا گیا۔

شب تاسوعا میں عبادت کا موقع

ابن سعد نے "اے خدا کے لشکروں سوار ہو جاؤ اور جنت کی بشارت دو" کے نعرے کے ساتھ اپنے لشکر کو امام حسین علیہ السلام کے اصحاب کی طرف روانہ کیا۔
 حضرت سید الشہداء علیہ السلام نے عباس علیہ السلام کو بیس افراد کے ساتھ ان کی طرف بھیجا تاکہ پوچھیں کہ کیا خبر ہے۔ انہوں نے جنگ کی خبر دی۔ حضرت عباس علیہ السلام فوری طور پر امام حسین کے پاس واپس آئے تاکہ حکم حاصل کریں اور اس دوران ان کے باقی گروہ نے دشمن کے لشکر کو وعظ کیا۔
 امام حسین علیہ السلام نے ان سے مہلت مانگی اور فرمایا: آج رات صبر کریں اور جنگ کو کل پر ملتوی کریں تاکہ آج رات میں کچھ نماز، دعا اور استغفار کروں، کیونکہ خدا جانتا ہے کہ میں نماز، تلاوت قرآن اور کثرت دعا و استغفار کو پسند کرتا ہوں۔

شب تاسوعا میں سب چلے جاؤ اور کربلا میں نہ رہو

امام سجاد علیہ السلام نے فرمایا: میں اس وقت بیمار تھا، اس حالت میں قریب ہوا اور سنا کہ میرے والد اپنے اصحاب سے فرما رہے تھے:
میں اپنے خدا کی بہترین تعریفوں کے ساتھ ثنا کرتا ہوں، اور اس کی سختی اور آسانی پر حمد کرتا ہوں، اے میرے پروردگار، میں تیرا شکر گزار ہوں کہ تو نے ہمیں نبوت کے شرف سے نوازا، اور ہمیں قرآن کی تعلیم دی، اور ہمیں دین میں دانا کیا، اور ہمیں سننے والے کان، دیکھنے والی آنکھیں اور دانا دل عطا کیے، پس ہمیں اپنے شکر گزاروں میں سے قرار دے۔
اما بعد:
 بے شک میں اپنے اصحاب سے زیادہ وفادار اور بہتر اصحاب نہیں جانتا، اور اپنے اہل بیت سے زیادہ نیک اہل بیت نہیں جانتا، خدا تمہیں بہترین جزا دے، جان لو کہ میں تم سب کو جانے کی اجازت دیتا ہوں اور اس میں کوئی حرج نہیں ہے، اب رات کا پردہ تم پر چھا گیا ہے، اس تاریکی کی مدد سے یہاں سے چلے جاؤ۔ جب آپ  کی بات یہاں تک پہنچائی۔
حضرت عباس علیہ السلام نے فرمایا: 
ہم یہ کام کیوں کریں؟ کیا اس لیے کہ ہم آپ کے بعد زندہ رہیں؟ 
خدا ہرگز نہ کرے کہ ہم یہ ناپسندیدہ کام دیکھیں۔

باقی ساتھیوں نے بھی اپنی زبانوں سے اور مضبوط اور خوبصورت الفاظ میں ان کی راہ میں جانفشانی کے بارے میں بات کی جسے انہوں نے دل و جان سے منتخب کیا تھا۔
 پھر آپ نے سب کو دعائے خیر دی۔

شب تاسوعا میں بڑی مصیبتوں کے لیے بہن کی تیاری

امام سجاد علیہ السلام سے روایت ہے کہ اس رات میری پھوپھی زینب علیہا السلام میری دیکھ بھال کر رہی تھیں کہ میں نے سنا کہ میرے والد یہ اشعار پڑھ رہے تھے:
یا دهر أفّ لک من خلیل     
              کم لک بالاشراق و الأصیل‏
ان اشعار کی وجہ سے میری آنکھوں میں آنسو آگئے لیکن میں نے صبر کیا، تاہم میری پھوپھی خود کو سنبھال نہ سکیں اور بے اختیار اس حضرت کی طرف دوڑیں اور کہا: 
ہائے افسوس!
 کاش موت مجھے فنا کر دیتی، اب ایسا لگتا ہے جیسے میری ماں فاطمہ اور میرے والد علی اور میرے بھائی حسن دنیا سے رخصت ہو گئے، 
اے بھائی! آپ ہمارے اہل بیت کے جانشین ہیں اور باقی ماندہ لوگوں کے فریاد رس ہیں۔

سید الشہداء علیہ السلام نے ان کی طرف دیکھا اور فرمایا: 
اے بہن زینب!
 خیال رکھنا کہ شیطان تمہارے صبر کو نہ چھین لے… 
اے بہن! 
اللہ سے ڈرو اور صبر کرو اور جان لو کہ زمین والے مر جائیں گے اور آسمان والے باقی نہیں رہیں گے اور ہر چیز ہلاکت کے دہانے پر ہے سوائے ذات خداوندی کے جس نے اپنی قدرت سے مخلوقات کو پیدا کیا، انہیں اٹھائے گا اور زندہ کرے گا اور وہ اکیلا ہے۔
میرے نانا، والد، والدہ اور بھائی مجھ سے بہتر تھے اور ہر ایک نے دنیا کو الوداع کہا، اور میرے لیے اور ہر مسلمان کے لیے ہے کہ وہ رسول خدا صلی اللہ علیہ وآلہ وسلم کی اقتدا اور پیروی کرے۔
 اے بہن! میں تمہیں قسم دیتا ہوں اور تمہیں میری قسم پر عمل کرنا چاہیے، جب میں قتل ہو جاؤں تو میری موت پر گریبان چاک نہ کرنا اور اپنے چہرے کو ناخنوں سے نہ نوچنا اور میری شہادت پر ویل و ثبور (ہلاکت) کی فریاد نہ کرنا۔ اس طرح، زینب کو سکون ملا۔

شب تاسوعا عبادت کی رات

حضرت امام حسین علیہ السلام کے حکم پر اس رات حرم کے خیمے ایک دوسرے سے متصل لگائے گئے، اور ان کے گرد ایک خندق کھودی گئی اور اسے لکڑیوں سے بھر دیا گیا تاکہ جنگ ایک طرف سے ہو اور حضرت علی اکبر علیہ السلام کو تیس سواروں اور بیس پیادوں کے ساتھ بھیجا گیا کہ وہ انتہائی خوف و بیم کے ساتھ چند مشک پانی لائیں اور اپنے اہل بیت اور اصحاب کو فرمایا کہ اس پانی سے پیو، وضو کرو اور غسل کرو اور اپنے کپڑے دھو لو جو تمہارے کفن ہوں گے (یہ بات ایک قول کی بناء پر ہے)
اور انہوں نے وہ پوری رات عبادت، دعا، تلاوت، تضرع اور مناجات میں گزاری اور اس سعادت مند لشکر سے، جو خیر البشر کی آنکھوں کا نور تھا، تلاوت اور عبادت کی آوازیں بلند تھیں۔

شب تاسوعا میں شہادت کے لیے تیاری

یہ تمام واقعات اس بات کی نشاندہی کرتے ہیں کہ یوم تاسوعا اور اس کے بعد آنے والی رات یوم شہادت کی تمہید تھی۔ تاسوعا میں یہ واضح ہو گیا کہ تمام مردوں کا مقدر شہادت ہے اور انہوں نے بھی اپنی مرضی سے اس اعزاز کو قبول کیا اور زینب سلام اللہ علیہا صبر کے مقام پر پہنچ گئیں۔ دشمن کے لشکر سے کچھ خوش قسمت افراد ان سے آملے اور سید الشہداء علیہ السلام اور ان کے سعادت مند اصحاب نے خیمہ گاہ کے ماحول کو قرآن، استغفار اور مناجات کے نور سے روشن کیا اور مکمل تیاری کے ساتھ اگلے دن صبح جنگ میں قدم رکھا۔